She made my May and June !!!

I am FREEEEeeeeEEEeeeEEEEeee and NO ONE can get MEEeeeEEEeeeEEEeee

----------------------------------

loooooool ..... 3/4 computer engineer

أصلي شغالة من سنة أولى بعد كل سنة أقول

1/4 engineer, then 1/2 engineer

وأدي جه اليوم اللي بقيت فيه

3/4

الحمد لله

يللا، باقي تكتين بس السنة دي والواحد يتنفس الصعداء بجد ... يا مسهل

----------------------------------

امبارح كان يوم عمره ما هيتنسي فعلا ... أنا مش فاكرة لو كان أحلى يوم عدى عليا السنة دي عشان ما أكونش ببالغ، بس أكيد هو على الأقل تاني أحلى يوم !!!! كنت بنام في اللجنة وعندي صداع رهييييييب سامعة دقات قلبي في راسي ومش قادرة أقعد على الكرسي خااالص ... لأول مرة في حياتي أعملها، لاقيت نفسي باخد برشامتين (مسكن والله) .... الحمد لله ... المهم، حصل اللي حصل في اللجنة بس اللي ضحكني فعلا إن الدكتور مش بتجاوب على أسئلتك إلا لو جه دورك حتى لو كانت جنبك ... والله قعدت أضحك ... النظام حلو بس لما يزيد عن حده بيخنق .... ء

قعدنا بقة أنا والبنات نسلم على بعض (بنشوف بعض كل يوم بس مش بنحس بوجود بعض فعلا) واستقبلتني حبيبتي أمونة التي في القلب مسكنها .... نزلنا السلالم يا ما شاء الله علينا وادتني أمونة مفاجأة حلوة أوي .... عارفة إيه اللي بيفرحني ربنا يكرمها .... أنا بقة كنت خلاص، حسيت إن موتور عقلي وقف (فعلا حسيت إن كان في حاجة جوا راسي شغالة في اللجنة وفجأة اتطفت وسمعت صوت بسسسس من جوا راسي ) .... كنت همووووت وأنام، والله كنت عاوزة كدة أقعد مكاني على الأرض وأنام حبة

المهم، ذكور الدفعة اتصوروا وبتاع والبنات أصلا مجرد ما اللجنة خلصت اتقسموا لمجموعات :(((( لا حد اتصور ولا مثلا كلنا خرجنا سوى زي ما عملنا في أولى وتانية :((( .... صراحة أمونة من ثانية سي إس دي استغربت وأنا زعلت ... المهم بقة ، اتنين بدأوا يتخانقوا عليا، دي عاوزاني أخرج معاها ودي عاوزاني أخرج معاها بس الاتنين مش عاوزين يخرجوا مع بعض ... هههه ... المهم، أمونة طبعا كسبت الخناقة وأخدتني فسحتني فسح بجد بجد نسيتني الصداع اللي كان قاسم راسي ... طيرت خاااالص النوم من عيني .... وديتني مكانين طوووووول عمري بعدي عليهم بس عمري ما دخلتهم !!!! ... ما كنتش أعرف إنهم بالجمال دة !!!!... بجد استمتعت بكل لحظة وأخدنا بعض الصور .... ربنا يخليك ليا يا أمونة، بجد حسيت إني ناسية الدنيا باللي فيها وأنا معاك ولما روحت ما كنتش عاوزة أكل أي حاجة عشان طعم اللي أكلناه سوى ما يروحش من بقي وما كنتش عاوزة أغسل وجهي عشان أثار الخروجة التحفة دي ما تروحش

++ :D ++

ما كنتش أتخيل أبدا أبدا إني أصاحب ناس بالقرب دة من برة الدفعة، فعلا أمونة بحس إني فدوى أوي معاها، بتكلم من غير تكلف خاااالص وبكون على طبيعتي أوي وبحس إني مبسوطة حتى لو مش بنتكلم ... كتير أوي أيام الدراسة كنت بروح لها الفصل وأقعد جنبها كدة حتى لو مش بنتكلم بحس إني سعيدة وأنا جنبها ما شاء الله ... ربنا يديم المحبة ولا حرمني الله منها أبدا

ما كنتش أتخيل في يوم إن بنات من سي إس دي 2012 و سي إس دي 2013 يبقوا أقرب لي من بنات 2011 بس أمونة وسارة كسروا الفكرة دي وفعلا بحمد ربنا عليهم أوي ما شاء الله

بعد ما خلصت أنا وأمونة

I am still SPEECHLESS :D ++

روحت أسلم على بنت عمتي عشان لسة جيا من السفر وروحت الساعة الفلانية

:D

وطبعا ما حسيتش بحاجة وهاتك يا نووووووووووووووووم بس بردو قمت في نفس الوقت اللي بقوم فيه بقالي 12 سنة، مهما نمت متأخر، مهما كنت تعبانة، سبحان الله ، لازم أقوم في الوقت دة من نفسي ... أنا مرة فعلا نمت قبل الوقت دة بساعة وبردو قمت من نفسي ... كإن جسمي متبرمج على كدة

يااااااااااااااااااه، خلصتك يا ثالثة، سنة كانت غريبة بمعنى الكلمة، صراحة أغرب سنة تعدي عليا في حياتي ( أسوأ سنة كانت أولى وأمتع سنة كانت ثانية) .... بس السنة دي أكتر سنة اتعلمت فيها دروس من الحياة ... كل سنة كنت بتعلم وبطنش بس السنة دي (وبالذات الفترة الأخيرة) فعلا لقيت نفسي الحمد لله بطبق اللي اتعلمته ... ويا رب لك الحمد على كل الأخطاء اللي ارتكبتها السنة دي وكل الناس اللي عرفتها وكل اللحظات الحلوة اللي عدت عليا ... الحمد لله أنا من طبعي بنسى أوي أوي بس لو حاجة أثرت أو علمت، مستحيل أنساها ... الحمد لله مش فاكرة أي يوم وحش من السنة دي، كل ذكرياتي منها حلوة وأكيييد السنة دي أضافت لخبراتي بفضل الله

إن شاء الله هيكون ليا وقفات متنوعة وقصص متفرقة على البلوج، بس محتاجة أظبطها وفي قرارات مصيرية هتتاخد إن شاء الله وكله هيتقال هنا بردو :) ... أنا ما عنديش مانع مين يعرف إيه، بس بحس فعلا إني لما بكتب حاجة هنا، بثبتها أكتر ... أكيد مش كل حاجة بكتبها هنا (كان زماني خلصت البلوج) ..... ء

ياااااااه يا ثالثة

I DID IT !!!

بس فعلا حزينة أوي إني باقيلي سنة وأسيب الكلية .... فعلا كان ممكن أخلي أيامي تعدي أحلى من كدة .... بردو الانسان بيكون ليه إيد كبيرة أوي في الأحداث من حواليه بس أنا فعلا كنت جاهلة أوي بكل حاجة أول ما دخلت الكلية، حياة جديدة من كل زاوية ومجتمع غريييب أوي ... كفاية إنها كانت قارة جديدة عليا وأنا لسة إلى الآن بحاول أخد عليها

أكيد تعبت أوي وأنا بتعلم أتعامل إزاي ولا إيه المفروض ما يتقالش، بس أكيد أنا أحسن من اللي لقة الحاجات ساهلة كدة أمامه

أنا حياتي مغامرة كبيرة من أول ما اتولدت وكل سنة أحداث بتحصل لي غير باقية الناس، البعض منها بحكيه والكتير منها بحتفظ بيها لنفسي

بس بإذن الله السنة الجيا هتبقى أحلى سنة في حياتي عشان ما أندمش عليها زي اللي فاتوا ... أنا عارفة بالظبط أنا عاوزة إيه وإيه اللي المفروض يتعمل (أمال أنا بقالي 4 سنين بقرأ في إيه :-) ) وجه الوقت اللي أطبق بإذن الله

يا رب اجعلها سنة سعيدة عليا وعلى أهلي وصحباتي ودفعتي اللي فعلا بحبها أوييييييييييي والله رغم ما كان بها من مشاكل وتصادمات واللي أكيد بردو كان ليا إيد فيها ... بس عادي يعني، الواحد يامااااااا بيتخانق مع أهله وبردو بيفضلوا أهله اللي بيحبهم وما بيقدرش يستغنى عنهم أبدا

وأنا اكتشفت إني بحب دفعتي بكل اللي فيها الحمد لله وكمان الناس اللي مش طايقني بحبهم بقة أكتر من غيرهم عشان بتعلم منهم حاجات كتيرة وأولها التسامح

أنا مسامحة كل الناس ويا رب الناس كلها تسامحني (أو على الأقل تحاول تسامحني :(( ) ء

كفاية كدة عشان ما حدش يزهق (قال يعني في حد بيكمل قراءة للآخر)ء

ربنا يجعل المستقبل بتاعنا كلنا أحلى من الماضي

وافتكروا، زي ما ديما بقول لكم، مهما كان وضعك الحالي ومهما كانت الحاجات اللي حصلت لك في الماضي، بإيدك تنسى كل دة وتبدأ صفحة جديدة بيضاء خااالص وأكيد انت أحسن من غيرك عشان مش كل الناس اتعرضوا لنفس اللي اتعرضت له

yesterday is history, tomorrow is mystery, today is a gift and that is why it's called The Present !!

يا رب أكون ديما مصدر حب وإلهام وأمل وتشجيع وتقوية للناس

واللي هيقرأ الكلام دة النهاردة، يفتكر إن في ساعة إجابة يوم الجمعة فيا ريت يدعيلي بالهداية وحسن الختام ... والله كله يهون بس الواحد يموت على طاعة ... نفسي أدخل الجنة بغير حساب

بجد الحمد لله أوي على كل حاجة

وزي ما عودتكم

:) ويبقى الأمل :)

خواطر متسائلة

" وجعلنا بعضكم لبعض فتنة أتصبرون وكان ربك بصيرا "

----------------------------------------------------

ربنا يرحمك يا " خالد محمد سعيد " ويدخلك جنته ويصبر أهلك يا رب :((( ء

---------------------------------------------------

ء " الباب اللي يجيلك منه الريح، سده واستريح " ... متجيبيش لنفسك وجع القلب بعدين تشتكي :) ... الحمد لله سديت الباب خااالص ومافيش نسمة هواء هتدخل بإذن الله تاني أبدا :) ء

------------------------------------------------------

CSD 2010 الذبابة الملعونة مع

الفيديوز كلها على الفايس بوك

فضحتكم

متااااااحف ما شاء الله .... وعقبال أما نغني للذبابة بتاعتنا يا رب :) ... على الأقل دبانتكم اتهشت، بس بتاعتنا لازقة كمان سنة إن شاء الله

مبروووووووووووك ليكم كلكم ويا رب أيامكم الجيا كلها تكون سعادة وهناء وأفراح

------------------------------------------------------

رأيكم فيا لا يدل عليا ولن يدل عليا :)

---------------------------------------------------

يا رب يا رب 224 يجي تاني بسرعة :(((((

----------------------------------------------------

قعدنا نلون في اللجنة النهاردة

كنت حاسة إني في حصة رسم في تانية حضانة والميس هتعدي علينا وتحطلنا ستيكر على الورقة ... الحمد لله، أول مادة الواحد يحل فيها بنفس وروقان ... المستفاد من المذكرة التانية، إن الواحد ما يحطش علامات تعجب بعد كلامه عشان كدة كإنه بيزعق للقارئ، على كدة بقة أنا كلامي أكثره زعيق !!! ء

------------------------------------------------------

عجبني رده أويي ... واحدة أجنبية في مؤتمر ما راحت تشتكي لدكتور إبراهيم الفقي إن زوجها طلقها وقالت له إنها فاشلة في العلاقات وكدة ...... قام قايل لها " لما كل الرجالة يطلقوك، ساعتها ازعلي وتعالي اشتكي " ... طبعا هو مش قصده خالص إن الواحد يبقى مستهتر في حياته ولا إنه يقعد يجرب وما يهتمش، بس قصده إن مش شرط لما فرصة تروح أو حاجة تفشل تكون انت السبب وحتى لو كنت انت السبب، فأكيد في فرص تانية أحسن ممكن تكسبها وتحسن نفسك فيها ... يعني كلامه دة حلو ومفيد أوي لو يتطبق على كل حاجة في حياتنا :) ء

---------------------------------------------------

ما فيش أي حاجة في الدنيا تستاهل إن الواحد يزعل عشانها

الدنيا لا تساوي عند الله جناح بعوضة وكمان " قل لن يصيبنا إلا ما كتب الله لنا " فما فائدة الحزن ؟؟؟ أسيرجع الغائب أم يهدي الضال ؟؟ أم ستتحسن الأحوال بالحزن ؟؟؟ ما فيش حاجة أحسن من الرضى بكل شئ ... اللهم رضني بقضائك حتى أعلم أن ما أصابني لم يكن ليخطئني وأن ما أخطأني لم يكن ليصيبني : ) ....ء

--------------------------------------------

لقد طويت صفحاتكم منذ زمن، فلا داعي للتفتيش عن مستنداتكم وإدخالها إلى ذاكرتي مرة أخرى ....ء

---------------------------------------------

You mean NOTHING to me and I really don’t care who you are

--------------------------------------------

مش كل كتاب المفروض يتقرأ، ومش كل أما الواحد يعجبه كتاب ينصح غيره بيه وهو أصلا مليان أفكار غلط خااالص ... لا داعي لنشر الأفكار المسمومة بين الناس، كفاية تسمموا نفسكم !!!!ء

----------------------------------------------

If you only knew, what I’m going through, I just can’t smile without you !!!

------------------------------------------------

تساؤل: مش عارفة إيه اللي بيخلي الناس متصنفة لطيبة وشريرة ... ساذجة وخبيثة ... صادقة وكاذبة ... أمينة وخائنة ... دنيئة ورفيعة ... قلبها أسود وقلبها أبيض ؟؟؟ يا ترى دي جينات بيتولدوا بيها ؟؟؟ وراثة من أحد الأقارب ؟؟؟ ظروف حياة اتعرضوا لها ؟؟؟ ولا ده بيكون اختيارهم إنهم يبقوا كدة ؟؟؟ أحيانا يصعب علي الإختيار ... ولا بتكون دي مجرد لحظات بتعدي على كل إنسان فلو صادف إن لحظة الشر عدت عليه وحد كان بيتعامل معاه ساعتها، هيقول عليه إنسان شرير ... ولو كانت لحظة الخير هي اللي بتزوره، اللي هيتعامل معاه لحظتها هيقول عليه طيب ؟؟؟ أنا كتير أوي بكون عارفة بالظبط أنا عاوزة أبقى إزاي بس مش عارفة خالص أوصل للنموذج دة ... الطبع مش دائما بالتطبع

--------------------------------------------

ما فاضيلش غير مادة بإذن الله

:) ويبقى الأمل :)

ثانية واحدة ممكن تقلب حياة الانسان

الحمد لله، أديني خلصت أسبوع من الامتحانات

باقيلي أسبوع إن شاء الله وأكون بقيت في سنة رابعة رسميا إن شاء الله

أنا مبسوطة إني الحمد لله بقيت بروح للامتحان قبل وقت اللجنة ما شاء الله، كنت كل سنة من أول ما دخلت الكلية لكل امتحان تقريبا بروح عند اللجنة بالظبط أو بعد ما تبدأ (ولا أنسى يوم الكونترول اللي رحت بعدها ب 20 دقيقة تقريبا، أصلا ما كنتش عاوزة أروح بس ربنا هداني الحمد لله ) ........ء

وإن شاء الله في حياتي كلها هحط موضوع

arriving an hour early is better than arriving five minutes late

أمام عيني وإن شاء الله أحترم المواعيد على طول

-----------------------------------------------------------

أنا ما بقدرش خااااااالص أقعد على كرسي أكتر من ساعة، فمن أول الساعة التانية في اللجنة وأنا ببدأ بهز رجلي، تغيير قعدتي كل 5 دقايق، أحط رجل على رجل، أربع (آه والله بقعد مربعة)، أقعد بالجنب ... المهم ما أفضلش ثابتة أصل بجد الدم بيقف في رجلي وراسي وبفقد التركيز

ومجرد ما اللجنة تخلص، بلاقي نفسي بجري أو بطير برة اللجنة، عاوزة أجري فعلا، صحابي يتريقوا ويقولوا فدوى عاوزة تلحق تروح عشان تذاكر المادة الجاية وأنا لم أعد أهتم مين بيقول إيه طالما مش بعمل حاجة غلط

ثم موضوع المشي السريع بتاعي ما شاء الله والصوت العالي ما شاء الله بردو وراثة الحمد لله، ماما وبابا الاتنين مشيتهم سريعة أوي ما شاء الله وصوتهم عالي جدا (الحنجرة قوية ما شاء الله) فلكم أن تتخيلوا بنتهم هتكون عاملة إزاااااي

:D

ربنا يخليهم ليا يا رب ويقدرني على برهم

كل يوم وأنا رايحة الامتحان، طريق البحر كله دة عبارة عن ناس بتصيف وماسكين عوامات وحاجاااااات ربنا يسامحهم، مش يراعوا النفسية بردو ؟؟؟ ولو فضلت برة لحد بالليل، سكة الرجوع كلها بلالين اللي بيكون عليها اسامي الناس اللي بتتجوز وأفرااااح وبيييب بيييييب بيييييييب وزغاريط ربنا يسامحهم، مش يستنوا لما نخلص بردو ؟؟؟ :) ربنا يسعد الجمييييييع بس لازم الناس تراعي بعضها ... أنا إن شاء الله هتأكد لو ربنا كتبلي إني أعمله بعيد عن أي موسم امتحانات عشان ما حدش يدعي عليا

:D

-----------------------------------------------------------

أكتر مادة كنت مرعوبة قبلها، الأو آر

أكتر مادة كنت متوترة في اللجنة، الأو أر

أكتر مادة اكتأبت بعدها، الأو آر

أكتر مادة نمت وأكلت بعدها، الأو آر

أكتر مادة ندمت إني ذاكرتها، الأو آآآآآر

ويا ريتني ما عرفتها، الأو أأأر

:P

أكتر مادة كنت مشتتة في اللجنة فيها، الكومبايلرز

أكتر مادة اتبسطت قبليها وبعديها، الداتابايس (مش عشان الامتحان، يعني بردوحياة الانسان مش متوقفة على امتحاناته بس ) ..ء

كانت هذه عناوين الأخبار وإليكم التفاصيل

:D

---------------------------------------------------------------

أما بالنسبة للأو آر اللي عمالة بظلم فيها دي فببساطة، الامتحان كان مباشر أوييييييي (من وجهة نظري المتواضع) بس أنا فعلا من الصدمة إنه مباشر، قعدت طول اللجنة والله وعند كل سؤال أقول ( لا لا لا، مستحييييييل يكون المطلوب كدة بس، أكيد الدكتور مخبي خدعة في حتة ما، أكيد السؤال مش قصده كدة، طب أنا هبص للسؤال بنظرة تانية، هبص من خارج الصندوق زي ما بيقولوا، طب هقرأ السؤال تاني بس كأني مش في لجنة إمتحان .... يااه، بقيت بجد طول ما أنا قاعدة بس بدور على الفكرة أو الخدعة اللي في المسألة فطبعا ما لحقتش أحل حاجة وفعلا سيبت سؤال عليه 20 درجة وسؤال عليه 20 حليت ربعه تقريبا ويللا ، خيييييييييير إن شاء الله

فطلعت من اللجنة، عوزة أنام وأكل وبس ومش عاوزة حد يكلمني بس قعدت فترة كدة مكتئبة وحاسة إن خلاص، ما فيش فايدة بس سبحان من خلاني أرجع تاني فدوى

:) الحمد لله :)

--------------------------------------------------------------

أما بالنسبة للكومبايلرز، صباحية الامتحان واحد زميلنا بعت رسالة عن انهم بدأوا بمنع النقاب تاني وبتاع، أنا قلت مجرد كلام بقة حسبي الله ونعم الوكيل ونسيت الموضوع ونزلت اللجنة .... طبعا أنا كنت فاكرة إني فاهمة كومبايلرز أو إني شاطرة فيها، بس الحمد لله اتضح في اللجنة إني يا دوب بعرف عناوين المحاضرات ... أصل ما شاء الله، ناس كتيرة أوي حلت امتحانات قبل كل مادة وانا كنت يا دوب مذاكرة وما لحقتش أبص على أي امتحان في أي مادة غير سؤالين في الداتابايس عشان زميل بعت يقول إنهم بيتكرروا

المهم، وأنا في اللجنة وبحاول أحول من بايناري (مش شتيمة والله) لدسيمال (بردو مش بشتم) ، لاقيت الدكتور نهى عدلي بتقول لي تعالي .... أنا أول حاجة فكرت فيها " بريييييييييييء يا بييييييه !!! والله ما غشيت والله ما عملت حاجة !!! "... بعدين جه في عقلي موضوع "كنت فين الساعة 9 إلا خمسة إمبارح بالليل؟؟" زي الأفلام كدة وطبعا والله كنت في بيتنا بذاكر كومبايلرز زي بقيت الناس بشهادة أهلي ... المهم، دخلتني أوضة كدة وأنا قلت أكيد هيقعدوني على كرسي إعتراف وجهاز كشف الكذب وبتاع، بس لاقيتها بتقول لي (انت اسمك إيه ) ؟؟؟ ضحكت أوي وقلت لها (أنا فدوى) قالت ( ياااااااه) أصلها ما كانتش عارفة إني اتنقبت وطلعت لسة فاكراني ما شاء الله أصلي فعلا مش بتنسي بسهولة الحمد لله

;-)

المهم راحت قالتلي (وأنا كنت بدأت أرتعش فعلا مش عارفة ليه وريقي نشف وبقيت بعرق وكنت خلاص هنهار أو هعيط) ، قامت قايلالي (معلش، لازم اشوف وجهك)، (يااه، بس كدة) ؟؟؟ ووريتها وجهي السمح وضحكت ... ما علينا

رجعت مكاني وأنا لسة برتعش وحاسة إني عملت جريمة مش عارفة ليه

جه الدكتور اللي بيحبني مووووووت من أول ما دخلت القسم دة والدفعة كلها عارفة كدة الحمد لله وقال لي (هه، عندك إعتراض ؟؟) ، (لا طبعا، حد يقدر يقول حاجة???) ، راح واقف جنبي كدة وحاطط إيده في وسطه (أصلا المفروض ما تدخليش اللجنة خاااالص، بس إحنا عديناها) ... ما شاء الله، بجد شكرا ليكم أوي !!! عديتوها ؟؟؟؟ حسسني ب"عديناها" دي إني عملت جريمة أو قتلت حد وإنهم سامحوني .... روحت قايلة له (بس أنا سألت الدكتور أمين شكري وقال ممكن أخش اللجنة عادي جدا) ، (بس بردو، عندك إعتراض ؟؟ ) ( لا خالص، ما فيش حاجة حصلت !!!) ... ووالله العظيم قبل ما الدكتور تاخدني بشوية كنت سألت الراجل اللي بيقف علينا الساعة كام وقال 2 وتلت تقريبا، المهم، قعدت أرتعش فترة طويلة ومش مركزة خالص وقاعدة بقول (يللا يا فدوى ما فيش وقت، يللا يا حبيبتي كملي وركزي ربنا يخليك) ، بس بجد القلم كان بيرتعش أوي أوي في إيدي وكنت مش عارفة أكتب أي كلمة ولا أي حرف راضي يتكتب .... لا حول ولا قوة إلا بالله، كنت خلاص هبدأ أعيط أو هسلم الورقة ببساطة وامشي بس الحمد لله سيبت الورقة والقلم خااالص و قعدت أذكر ربنا وأعمل تمارين استرخاء، والحمد لله لما هديت وبدأت أكتب تاني، سألت الراجل الساعة كام وقال 3 وعشرة ... يااااه، ساعة إلا عشر دقايق تقريبا ضاعت ؟؟؟؟؟ قدر الله وما شاء فعل

:)

بس بردو مهما حصل، ربنا مش هيضيعني وهيعوضني أوي أوي أوي بإذن الله

وهبقى أفكر الدكتور دة بإذن الله ربنا يسامحه

بس، فبالنسبة لي، أنا ما كنتش رايحة أمتحن كومبايلرز، أنا كنت رايحة أكشف على وجهي ... صحيح كان معايا 3 تانيين ربنا يثبتهم يا رب، بس مش كل الناس ردة فعلها لنفس الموقف بتكون زي بعض

الحمد لله :)

-----------------------------------------------------------------

أما بالنسبة للداتابايس، نزلت بدري عشان أنزل حلول الشيت عشان ما كانش عندي نت والحمد لله فهمتهم بعدين رحت الكلية بس ما عرفتش أجيب اللي مستنياه بقالي كتير ... ربنا يسهل الأسبوع الجاي إن شاء الله ... وقفت تحت مبنى الإدارة قبل اللجنة عشان كان لسة فاضل ربع ساعة تقريبا بعدين وأنا طالعة حصل موقف صغنون أوي بس أنا ما أخدتش بالي منه خااالص الا بعد ما دخلت اللجنة وبدأت بالحل فجأة إفتكرت الموقف ولاقيت نفسي فرحانة وببتسم وقاعدة بكتب وأنا مبسوطة ... سبحان الله، ربنا فعلا بيدي الواحد الصابر والمتوكل والواثق أكثر مما يتوقع ..... :) الحمد لله، الامتحان كان أحسن من الاتنين اللي قبليه وكل شوية أفر في الكتاب وأكتب اللي ألاقيه .... بس بردو ما لحقتش أخلصه، بدات من ورا لقدام ويادوب بدأت في المسألة الأولى :) .... بعد اللجنة رحت أتفسح وأتمشى مع حب حياتي وأختي وصديقتي الصدوقة التي لا أستطيع الاستغناء عنها سارة، كانت فسحة حلوة أويييييييييي وكنت محتاجة أطلع معاها فعلا، والحمد لله على كل ثانية قضيتها معاها، بس ما طولناش عشان كنا عوزين ننام أويييي ... خلصنا على 6 بعدين رحت مشوار صغير وروحت والمواصلات كانت زحمة أوييييييييي وبردو أفراح وبلا لين وبييييب بيييييييب بييييييييييب

الحمد لله :)

---------------------------------------------------------------

الأسبوع الجاي غريب، هيبدأ بأكتر مادة مش فاهماها وهينتهي بأكتر مادة ما حضرتهاش وفي النص في مادة مش عارفة أستخدم فيها فولو ماستر ولا خشب ؟؟؟؟

++ :D ++

بجد ، مت من الضحك لما شفت المايل، وأنا لسة مش فاهمة المطلوب في الأساينمنت خااااااالص بس هسأل حبيباتي في سنة رابعة وإن شاء الله هعرف الخبر اليقين

عشان انا ما بقيتش بسأل خااالص على الجروب العظيم بتاعنا عشان الدفعة ما شاء الله فيها ناس عظماء وأنا غلبانة وعلى قد حالي

ربنا يسهل بقة ويعديها على خير

هاااااانت أوي الحمد لله

والحمد لله ما اتقبلتش في أي تي وركس (قال يعني كنت متوقعة إنهم ياخدوني) بس يكفيني شرف المحاولة والجيات أكتر من الرايحات وأكيد ربنا عاينلي حاجااااات أحسن

وإلى لقاء قريب مع أحداث جديدة

ويا رب ما حدش يصاب بالملل

وطبعا كما عاهدتموني

:) ويبقى الأمل :)

قصاصات ما بعد الأو آآآآآآر

وأخيييييييييرا الحمد لله هستلم اللي كنت مستنياه من شهريييييييييين !!! اللهم لك الحمد كله ... مش قادرة أستنى ليوم الثلاثاء .... عاوزاها دلوقت حاااااااااااالا .... عجيب ابن آدم، يقعد شهور مستني حاجة وأول ما تقرب أوي، صبره ينفذ ويكون عاوزها في ثانيتها
----------------------------------------
ألف مبروك لصاحبتي، أختها ولدت بنت ما شاء الله، وصاحبتي الثانية أخوها جاب ولد الله أكبر ... ربنا يجعلهم ذرية صالحة وقرة عين لوالديهما ..... :)
-----------------------------------------
أحلى حاجة لما الواحد يقعد أقل من يوم ما يفتحش البريد الخاص بجروب الدراسة، ويفتحه بعد الامتحان يلاقيه ملياااان أسئلة وإجابات خاصة بالمادة اللي لسة طالع منها !!! والله أنا قعدت أضحك وأمسح، أضحك وأمسح =)) ....
------------------------------------------
يقول الشيخ محمد العريفي في كتابه "استمتع بحياتك " : الناس كلما أشعرتهم بقيمتهم وأظهرت الاهتمام بهم، ملكت قلوبهم وأحبوك .... ماشي، أنا كدة فعلا، بحب اللي بيحبني ... بس، بالنسبة للناس التانية، صراحة أنا بعترض على كلامه دة أوي... أنا مع أغلب الكلام اللي كاتبه في الكتاب بس أنا مجربة الموضوع دة وللأسف الناس بتتقل أو بتبعد أكتر (مش عارفة ليه) ..... ممكن المفروض ما أحطش قاعدة بمجرد إني قابلت 2-3 كدة، ما أعرفش بس أنا بحس فعلا الواحد لما يحس إن حد بيحبه، بيتهرب منه وبيبعد عنه وبيتقل أوي
---------------------------------------

أريد موتا هادءا لا يشعر أحد فيه أنني رحلت عن دنياهم .. لا أريد دموعا ولا عزاءا ولا حداد ... يكفيني كفني وقبري ... ما فائدة البكاء إن كان سينتهي سريعا وتحترق ذكراي بعد أيام ؟؟؟ لم أشكل فارقا في حياتهم أثناء حياتي، لا أظنني سأفعل شئ بعد مماتي !!! الموت ليس موت الجسد والروح فقط ولكنه موت المشاعر وقد مات ما تبقى من مشاعري .... الآن أنتظر موت الجسد والروح ... ولكنني لست مستعدة ... أوراقي ليست معي ولم أحزم أمتعتي وحقائبي بعد ... من منا مستعد ؟؟؟ لا أحد ... اريد موتا صامتا، أرجوكم لا تنوحوا على فراقي ... أظن أنه لا داعي للرجاء، فأنتم لن تبكوا علي سواء طلبت منكم ذلك أو لا ... ما فائدة البكاء ؟؟؟ لا شئ ، إذا لا تبكوا ... ولكنني أثق أن دفتري سيشتاق إلى كلماتي وآهاتي ولن يجد من يبوح له ويؤنس وحدته من بعدي ... يكفيني بكاء دفتري علي، فطالما بكيت أنا عليه وطالما نمت محتضنة إياه ... كم طمأنني وإن كان يكذب أثناء حديثه .. سأغفر له كذبه علي حين قال أن كل شئ سيكون على ما يرام ... فلم يكن أي شئ على ما يرام في يوم ما ... فكلماته هي التي جعلتني أكمل المسار بعد أن فقدت مصباح طريقي وانطفأت شمعة حياتي ... شكرا لك دفتري، أرجو أن لا يطول بكاؤك علي ... حقا سأشتاق إليك ... أرجو أن يحرقوا دفاتري كلها بعد رحيلي وينثروا رمادها في البحر !!!

قصاصات ما قبل ال"أو آر"ء

الحمد لله، صحباتي في سنة تانية حلوا كويس أوي ... ربنا يوفقهم على طول يا رب وعقبال الجميع في ثالثة وأولى بكرة

---------------------------------------------------------------------

Many of life's failures are people who did not realize how close they were to success when they gave up--- Thomas Edison

--------------------------------------------------------------

شعور غريب، انقباض في الصدر، ضيق في التنفس، تقلص في الأمعاء، صداع ودوار ... ليس بالخوف، وليس بالتوتر وحتما ليس بالقلق، إذا ما هو ؟؟؟ سيكون امتحان الغد مميزا ما بين العبقري جدا جدا والعبقري جدا، ولأنك لا تنتمين لأي من هذين الصنفين، إذا، لم عليك الذهاب ؟؟؟ أشعر بالخجل لشعوري بمثل هذه المشاعر وقد بلغت العقدين، وهي ليست بالمقابلة الأولى، فقد قابلت قاعة الامتحانات مرات عدة وفي نفس الطابق وفي مقعد يقع خلف نفس الطالبة وكنت في بعض المرات في أسوأ لحظات حياتي، ألا تذكرين يوم الكونترول ؟؟؟ ولكن، صدق القائل، فهذه المشاعر لا تفرق بين الكبير والصغير "أنا مهما كبرت صغير" ...

يتصارع صوت صغير ضعيف يكاد لا يسمع مع أصوات كثيرة قوية الصدى ... صه !! انه صوت الامل، "فدوى، لا تقلقي، لن يضيع الله تعبك"، ولكن من منا لم يتعب ؟؟؟ ولكن سرعان ما تغشاه الأصوات الأخرى، "انت ناسية إنه قال إن الدفعة هتتقسم قسمين، امتياز ومقبول وما عندهوش حاجة إسمها في النص ؟؟ وما دامك أكيد مش مع الامتياز، هتكوني فين يعني ؟؟ كمان انت كنت مذاكرة للميد ترم وفاهمة كويس أوي وحصل اللي حصل، إيه اللي هيخلي الوضع يختلف بكرة " ؟؟ ... يرد الصوت الضعيف "ربنا" ....

ممكن تستغربوا اني قاعدة بكتب، بس دي طريقتي الوحيدة للتخلص من مشاعر المفروض ما تكونش موجودة خااالص بكرة، في ناس بتاكل زيادة، ناس بتسيب كل حاجة وتروح تنام وأنا أقعد أصحيها، ناس بتقعد تعييط وأنا أقعد أهدي فيها، بس أنا بلجأ للكتابة، الحاجة الوحيدة اللي ما بتزهقش من كلامي وديما موجودة في أي وقت تسمع ... بس دة ما يمنعش طبعا إن يكون في بردو نوم زايد وأكل زايد ودموع مالهاش سبب ....

للأسف، دي المادة الوحيدة اللي فاهماها كويس أوي أوي (ما شاء الله الله أكبر والحمد لله) بس مش عارفة مالي ؟؟؟ ممكن عشان قاعدة بذاكر داينامك ؟؟؟ شكلي هحفظ المسائل مع إني نظام الحفظ مش بيمشي معايا خالص ومش بيمشي مع الدكتور خاااااااااالص...

كل شوية عاوزة أهرب من المكتب، أنا اللي حضرت الغداء، أنا اللي غسلت المواعين، أنا اللي عاوزة أغسل الهدوم، فجأة نفسي أروق البيت، وفجأة افتكرت إن في كتب نفسي أخلص قراءتها، وأشعار عاوزة أعدي عليها وأناشيد نفسي أسمعها ومقاطع نفسي أتفرج عليها .... سيبت كل حاجة وروحت أنام، حلمت بناس كتيرة أوي من الدفعة عمري ما كنت بفكر فيهم، أمال إيه اللي خلاني أحلم بيهم ؟؟؟؟ وكمان أحلام مضحكة اوي وقمت من النوم بضحك على اللخبطة اللي شفتها وبقول "الدفعة قاعدة بتذاكر وسيادتك رايحة تنامي وتحلمي بيهم" ؟؟؟ خلاص بلاش أنام، خليني آكل ... "بس انت لسة مخلصة أكل!!!" .... طب أعمل إيه ؟؟؟ "خليني أعيط" ... "وهتستفيدي إيه، روحي كملي مذاكرة أفيدلك ربنا يهديك" ....

شكله ما فيش مفر من الداينامك ومافيش مفر من الأو أر وأكيييد ما فيش مفر من بكرة ....

"ألا بذكر الله تطمئن القلوب" ... لا حول ولا قوة إلا بالله، لا إله إلا أنت سبحانك إني كنت من الظالمين ... حسبي الله لا إله إلا هو عليه توكلت وهو رب العرش العظيم ... يا رب انت عارف أنا تعبت في المادة دي قد إيه فظني فيك أنك لن تخيب رجائي ...

يا رب أكون أحسنت عملا "إن الله لا يضيع أجر من أحسن عملا" .......

أروح بقة أشوف الشركة الفروض توظف ولا ترفد ....

:) ويبقى الأول :)

خواطر متفرقة

ء" إِنَّهُ مَنَّ يَتَّقِ وَيَصْبِرْ فَإِنَّ اللَّهَ لاَ يُضِيعُ أَجْرَ الْمُحْسِنِينَ " .... سورة يوسف الآية 90

الحمد لله :)

-----------------------------------

ولكني نبذت زمام أمري ** لمن تدبيره فينا عجيبُ

------------------------------------------

واكتشفت أنّى لا أعرف فى حياتى الا حقيقة واحدة ،،، وهى أننى لا أعرف شيئا عن البشر

------------------------------------

كيف تريدين الناس أن يفهموك وأنت لم تقومي بفهم نفسك حتى الآن ؟؟؟؟

------------------------

زعلانة أوي إنها مش جيا 15-6 بس مبسوطة عشان إن شاء الله هقدر أذاكر أركيتكتشر

-------------------------------------

أحيانا فعلا في وسط الحزن أو العصبية بتكتشف حاجة حلوة، مثلا أنا كنت قاعدة بكتب وأنا متنرفزة على مايكروسوفت وورد وبالغلط دوست على كونترول وشيفت بدل ألت وشيفت عشان أحول بين اللغات واندهشت لما لاقيت اتجاه الكتابة اتغبر من الشمال لليمين إلى من اليمين للشمال !! فرحت إني اكتشفت حاجة بسيطة ولاقيت نفسي قاعدة بجربها ونسيت سبب نرفزتي !!!

-----------------------------------

أنا متغاظة أوي ونفسي أعيط .. كتبت كلام جميييل أوي عن نفسي (ما أقصدش إني مدحت نفسي، بالعكس خااالص :) ) في ظهر ورق كنت بذاكر فيه ونسيت ورميت الورق ورمينا الزبالة !!! بس عادي يعني، اللي خلاني أكتبه، يخليني أكتب غيره وأحسن إن شاء الله : ) ما دام الكاتب هو نفس الشخص ...

-----------------------------------------

لا ضرر في أعادة ترتيب الأولويات وإسقاط بعض الأهداف ... لا ضرر في التعديل طالما أن هناك خطة بديلة ....

I AM SOOOO PROUD, I FEEL LIKE CRYING!!!

دي صورها وهي صغيرة عشان ما حدش يتخض وما ينفعش أحط الصور وهي كبيرة عشان الرقابة

يا الله !! بجد أنا قاعدة بطير فوق خالص ومش عاوزة أنزل على الأرض تاني أبدا

ما شاء الله الله أكبر اللهم لا حسد

يا رب احفظها من عيون الناس وأحقادهم يا رب وحقق لها كل اللي نفسها فيه وزيادة

يا رب من نجاح لنجاح أعلى

أختي يا ناس الأولى على كلية الطب !!! ما شاء الله، الله أكبر

أختي لولي حبيبة قلبي وأمي التي لم تلدني اتكرمت امبارح عشان طلعت الأولى على كلية الطب اللي هي فيها

ما شاء الله، بقالها 6 سنين بتطلع الأولى كل سنة

الله أكبر ، بجد فرحتني أوييييييييييييي

أنا كنت في حالة زعل فظيعة وقلت يا رب نفسي أسمع أي خبر مفرح أوي يطلعني من اللي حصل

وأختي الحمد لله اتكرمت امبارح على إنها الأولى على دفعتها لمدة 6 أعوام متتالية

يا رب احفظها من كل سوء

وعقبال ما أفرح بباقية أخواتي وأخويا يا رب يا رب يا رب

سبحان الله، كإني أنا اللي اتكرمت .... كان نفسي أوي أكون معاها

الحمد لله على كل حال وإن شاء الله أكون معاها في المرات الجية

يا رب احفظها واسعدها وحقق لها كل اللي نفسها فيه

I cant express my happiness

I told her Allah will give u more than anyone else, I never lost hope and always filled her with it

أيوة ربنا هيعوضها أكثر من أي حد تاني وهتشوف إن شاء الله

دي مجرد البداية يا حبيبة قلبي وإن شاء الله اللي جي أحسن

الصور كلها على الفايس بوك بس طبعا مش هقدر أحطها هنا عشان الرقابة

أختي يا ناس الأولى على كلية الطب !!! ما شاء الله، الله أكبر

قصاصات ما بعد الرجوع

خيبر خيبر يا يهود، جيش محمد سوف يعوووووووود ... إن شاء الله قريبا جدا

------------------------------------

سبحان من يخليك فجأة تكره حاجة كنت بتحبها أوي وتستغرب إزاي كنت بتحب الحاجة دي في يوم من الأيام

------------------------------------

الحمد لله بقيت أحسن بكتيييييير .. حاسة إني مستقلة، ما فيش حاجة ممكن تخوفني أو تشغل بالي .. الحمد لله، ارتحت أوي .. فعلا كان لازم أخد القرار دة من زمان بس أديني بتعلم وأكيد أنا أحسن من غيري اللي ما حصلهوش نفس الموقف

----------------------------------

أحسن مقابلة في حياتي ... بجد استمتعت بكل لحظة فيها ولشدة دهشتي استمرت ساعة إلا ربع !!!!! يا رب اعمل اللي فيه الخير وارضيني بيه

------------------------------------

(63) -> I am happier !! الحمد لله :)

-----------------------------------

مقولة ضحكتني أوي أوي ... ناس يأست من الحياة

I'm sick of following my dreams. I'm just going to ask them where they're going and meet up with them later.

--------------------------------------

وتستمر رحلة القراءة

استمتع بحياتك لمحمد العريفي

قصة الالتزام والتخلص من رواسب الجاهلية لمحمد حسين يعقوب

فوضى الحواس لأحلام مستغانمي

Breaking Dawn by Stephen Meyer ( the 4th part in the twilight series ;-) ) ... I loooooooove her books and cant wait for Eclipse !!!

بجد القراءة بتشفيني من حاجات كتيرة أوي بعد فضل الله ... وربنا الطبيب الأعظم :) ء

-----------------------------------

:) سيظل الأمل بإذن الله :)

----------------------------------

ربي

الحمد لله، كان يوم جميل أوي ... قعدت مع طنط أم إسلام طول اليوم ... بجد فرحت أوي ... ربنا يشفيها يا رب ويهدي ليها أولادها .... الحمد لله إنها اتبسطت :)

-------------------------------------

إلهي، أدعوك دعاء من اشتدت فاقته و ضعفت قوته و قلت حيلته دعاء الغريق المضطر البائس الفقير الذي لا يجد لكشف ما هو فيه من الذنوب إلا أنت , فصل على محمد و آل محمد واكشف ما بي من ضر انك ارحم الراحمين لا اله إلا أنت سبحانك إني كنت من الظالمين

----------------------------------------

ء"عَسَى رَبُّنَا أَن يُبْدِلَنَا خَيْرًا مِّنْهَا إِنَّا إِلَى رَبِّنَا رَاغِبُونَ " ... سورة القلم الأية رقم 32

-----------------------------

اللهم إني أشكو إليك ضعفي وقلة حيلتي وهواني عليهم .... إلى من تكلني ؟؟؟ إن لم يكن بك علي غضب، فلا أبالي، غير أن عافيتك هي أوسع لي ... لك العتبى حتى ترضى ولا حول ولا قوة إلا بك

-----------------------------------------

اللهم إني أشكو إليك أمورا أنت تعلمها ... مالي على حملها صبرٌ ولا جلدُ

--------------------------------------

ربى لقد ضعفت ولا غيرك يقويني لقد يئست ولم أفقد فيك يقيني لقد ضللت ولا سواك يهديني . يارب ارحمني في لحظة ضعفي وابعد عني شيطاني ونفسي واهدي لي قلبي وعقلي واغفر لي خطيئتي ويأسي يارب. إلى من أشكو وأنت موجود؟؟؟ ولمن أبكي وبابك غير مردود؟؟؟ ومن أدعو وأنت فقط المعبود؟؟؟ ومن أرجو ورجائي فيك غير محدود؟؟؟ يارب، اجعل عفوك عني دائم، ورضاك علي قائم، واجعلني عن الذنوب نادم، ولباب توبتك قائم

----------------------------------

:) ويبقى الأمل :)