قصاصات تفاؤلية

همستُ للدرب : صبراً جميلاً ، فقال : يئستُ من الصابرين!

----------------------------------------

كم منزل في الأرض يألفُهُ الفتى *** وحنينُهُ دوما لأول منزلِ

--------------------------------------------

أيام وتنقضي، ولا يغلب الأيام إلا من رضي

-------------------------------------------

علمتني الحياة: أن جرحي لا يؤلم في الوجود أحد غيري وأن بكاء الناس من حولي لن يفيدني بشئ

أن أثمن الدموع واصدقها هي التي تنزل بصمت دون أن يراها أحد

أن أمسح دموعي بنفسي وأن لا أدعها تسيل أمام أحد

أن لا مكان للضعفاء فيها

أن رضى الناس غاية لا تدرك

-----------------------------------------------

Please stop staring, I AM NOT A TV SCREEN !!!

------------------------------------

أنا رجلٌ أحيا بالأمل، فإن تحقق فبفضل الله، وإن لم يتحقق فقد عشتُ به زمنا ... علي بن أبي طالب

------------------------------------------------

يا رب يستقروا على رأي ..............

--------------------------------------------------

كنت شغالة عد تنازلي

But I noticed that I don’t even know what the stopping condition is, therefore, I chose

أكمل عد تصاعدي

With zero initial conditions….

يا مسهل ... وأدي وااااحد ......

--------------------------------------------

فعلا، كل ثانية في عمر الإنسان نعمة، فلا تضيعها في الزعل أو النكد ... أنا بشتاق أوي لأيام المدرسة والبنات واللعب والهزار طول الوقت براحتي وكنا كلنا بنحب بعض أوي وبنخاف على بعض .... وأكيد هيجي اليوم اللي أشتاق فيه لأيام الكلية ... أكيد كل ما الواحد يكبر مسؤولياته بتزيد عشان كدة لازم أستغل وجودي في الكلية واستمتع بيها قد ما أقدر دون معصية الله طبعا ... بيقولوا (مش عارفة مين هما) إن أحلى سنين في العمر هي الشباب بس أنا لسة ما بدأتهاش ....

---------------------------------------------------

أول مرة في حياتي أنام في سيكشن !! روحت في النوم خااالص !! كنت قاعدة بسمع الباش مهندسة أسماء وفجأة صوتها قعد يختفي والدنيا تعوم قدامي وراسي وقعت على الديسك واستسلمت للجاذبية الأرضية !! بعد مدة حسيت بحركة وصوت عالي ولاقيت الناس قامت عشان السيكشن خلص !!! بيقولوا قعدوا يصحوني بس أنا ولا هنا مع إن نومي خفيف بس الظاهر كان إغماء مؤقت .....

----------------------------------------------

الحياة أقصر من أن نقصرها بالشحناء والبغضاء وسوء الظن وتتبع عيوب الناس ....

---------------------------------------------

أيَُهذا الشاكي وما بك داء ُ *** كيف تغدو إذا غدوت عليلا

أترى الشوك في الورود وتعمى *** أن ترى فوقهُ الندى إكليلا

والذي نفسُهُ بغير جمال *** لا يرى في الوجود شيئا جميلا

خدوا راحتكم

ء" صمتي لا يعني جهلي بما يدور حولي ولكن ما يدور حولي لا يستحق الكلام "، بس أنا هتكلم عشان كل ما موقف زي دول يحصل، أجي هنا وافتكر اللي كتبته

-----------------------------------------------------

غــــداً ســــأذبــــح أحــــزانـــي وأدفنـها *** غـــداً ســأطــلــق أنــغــامــي الضحـوكات

------------------------------------------------------

كل فترة حد يبعت انتقاد على اللي بكتبه ... أحيانا بيكون بناء وأحيانا ما لهوش لزوم وأنا للأسف كل ما يجيلي انتقاد مش عاجبني، بقفل المدونة عشان الناس تسيبني في حالي وأكون بكتب لنفسي بس وبعد فترة الناس اللي بتحب كتاباتي تشتكي إني قفلتها فبرجع أفتحها تاني :) .... امبارح جاتلي رسالة ربنا يكرم كاتبها فعلا وضحتلي حاجات كتيرة أوي وأنا أسفة لو كلامي على المدونة دي مرة أساء لحد، العيب في الناس إن تفكيرهم محدود أوي وأفقهم ضيق واللي ديما بيفكر في حاجة، بيحس إن كل اللي حواليه كدة فالواحد يصلح من تفكيره الأول بعدين يتكلم على الناس

أنا كالعادة روحت قافلة المدونة وقلت أرتاح من وجع الدماغ والناس اللي مالهاش لازمة ... ومن شوية قعدت أقلب في مدونة الباش مهندس حاتم من سنة رابعة وهو فعلا من قدواتي في الكتابة ما شاء الله وكذة مرة لاقيته كاتب إنه هيقفل المدونة عشان التعليقات البايخة اللي بتجيله بس رجع في كلامه عشان هو عنده هدف ... فكرك لو كان سمع للناس دي كان وصل لمستواه دة ما شاء الله ؟؟؟

وكمان يعني عنده حق، ليه يحرم الناس الكتيرة اللي بتستنى يكتب أي حاجة وبتستمتع بقرائتها عشان كام واحد ما وراهوش حاجة ؟؟؟ وأنا الحمد لله تأكدت الفترة اللي فاتت إن في ناس كتيرة (فعلا دون مبالغة) بتحب أسلوبي في الكتابة وبتستنى أي حاجة أكتبها وبتحس إنها افتقدت حاجة لما ببطل أكتب .... احتمال كبير أوي أكون غلطت في كتير من كتاباتي (وإذا كنت شايف نفسك معصوم ومافيكش عيوب فأنت فيك أكبر عيب) بس أديني لسة في أول مشواري وبتعلم، بس أنا عمري ما ذكرت اسم حد على المدونة خالص عشان الغيبة ولأسباب أخرى فمش حد يشوف كلام كاتباه يلزق فيه أي شخصية تخطر على باله ويقول إن الشخصية دي أنا اتكلمت عليها !!! ء

صراحة والله أنا فرحت أوي واتبسطت لما عرفت إن في ناس بتتريق على اللي بكتبه بجد حسيت إني في طريقي إلى هدفي ... فكرك كل كاتب أو شاعر أو أي إنسان بقة حاجة في يوم من الأيام ما كانش فيه اللي بيتريقوا عليه ؟؟؟ طبعا لأ، إذا قرأت سيرتهم هتلاقيها بدائت باستحقار الناس ليهم أو التريقة فشكرا أويييييييي لكل واحد اتريق وسخر مني، فعلا شكرا، أنا من غيرك ما كنتش صممت إني أوصل للي نفسي فيه بس انت ادتني الدفعة وإن شاء الله هوصل ولو بعد حين ومش عارفة بقة مين اللي ساعتها هيتريق على مين .... خدوا راحتكم ... وكفايا إن قدواتي في الكتابة الحمد لله قالوا عني كلام أحطه وسام على صدري وأنسى بيه إساءة العالم كله لو حصل يعني

أنا أكتر حاجة بتخليني أتمسك بالحياة وبأهدافي هي السخرية ، فبدونها حياتي مافيهاش إثارة وبكون عايشة زيي زي غيري اللي عاش ومات ما حدش عارف عنه حاجة ولا انتقد فيه حاجة ولا قدم حاجة ... فاستمروا في السخرية وإن كانت أمام عيني، فأنتم من يدفعني إلى الأمام :) ء

اللي مخليني مستغربة فعلا مادام انتم مش عاجبكم اللي بكتبه وشايفينه مصدر تريقة، إيه اللي بيخليكم تقرأوه ؟؟؟ دة أكبر دليل إن كتاباتي كويسة الحمد لله عشان لو كنت بشخبط وخلاص ما كانش حد اهتم للشخبطة دي بس الظاهر إن ناس كتيرة أوي مهمتها في الحياة تتكلم عن فدوى وتنقش في عيوبها وإيه اللي وحش فيها وتطلع لها ألف عيب ، للدرجة دي أنا كويسة في الظاهر فبتدوروا على خفايايا ؟؟؟ :) شكرا أويييي .... أنا فعلا بتأكد كل يوم من مقولة بقولها لنفسي " مهما الحاجة كانت حلوة، هتلاقي ناس بيشتكوا منها وبيدوروا على أي حاجة ناقصة فيها عشان يثبتوا للي قال عليها إنها حلوة، إنها ولا حلوة ولا حاجة " وليا الشرف إني أكون الحاجة الحلوة دي اللهم لك الحمد

وكمان حاجة محيراني، انتم ناس بتشتكي من كل حاجة حواليها ووراكم حاجات محتاجة تتسلم ومواد ما اتفتختش من بداية الترم، سايبين كل دة وقاعدين بتتريقوا على فدوى ؟؟ للدرجة دي بقيت أهم من الدراسة ؟؟؟ والله كويس جدا بردو !!! :) ببساطة، اللي مش عاجبه، ما يقرأش !! أنا ما افتكرش إني عمري غصبت حد على القراءة ولا حطيت كتاباتي قدامه وقلتله اقرأ ... بس أنا مبسوطة إني خليتكم تلاقوا حاجة تضحكوا عليها وتطلعوا كبتكم فيها، ليا الأجر إن شاء الله :) ....ء

كمان والله كله تكفير ذنوب أكيد أنا سخرت من حد قبل كدة أو اغتبته وبكدة يكون إن شاء الله ربنا سامحني ، فشكرا كمان انكم نقصتوا من رصيد ذنوبي :) استمروا في التنقيص أرجوكم

وأنا لو حبيت أتريق عليكم ولا أطلع عيوب أي إنسان، صراحة مش هخلي فيه حتة سليمة وهطلع اللي مستخبي بس أنا مقتنعة إن عيوبي وبلاوية مغرقة الدنيا عشان كدة بحط نفسي مكان الناس .... ء

يا رب : ... يظن الناس بي خيرا وإني *** لشر الناس إن لم تعف عني

أخيرا، بحب أهدي الأبيات القادمة دي لكل حاقد، أو ناس بتكرهني من غير سبب أو بسبب أو .. أو ... كلكم لكم هذا الإهداء ولكم جزيل الشكر فلو لا أنتم، ما كنت أنا

-------------------------------------------

اذا نطق السفيه فلا تجبه ** فخير من اجابته السكوت

فان كلمته فرجت عنه ** وان خليته كمدا يموت

سكتت عن السفيه فظن أني ** عييت عن الكلام وما عييت

ولكني اكتسيت بثوب حلم ** وجنبت السفاهة ما حييت

ما ضر الورود وما عليها ** إذا المزكوم لم يطعم شذاها

ما ضر شمس الضحى في الأفق ساطعة ** ألا يرى نورها من ليس ذا بصر

وما يضر البحر أمسى زاخرا *** أن رمى فيه غلام بحجر

اذا سبني نذل تزايدت رفعة ** وما العيب الا ان اكون مساببه

و لو لم تكن نفسي علي عزيزة ** لمكنتها من كل نذل تحاربه

أعرض عن الجاهل السفيه ** فكل ما قاله فهــــو فيه

فلا يضر نهر الفرات يوما ** إذا خاض بعض الكلاب فيه

---------------------------------------------

تحياتي للجميع ، الساخرين والحاقدين وأكيد المتابعين :) ء

Thanx my lovely batch :)

وريقات مبعثرة

"إوعي تسيبيني "

---------------------------------

بمووووووووت فيها ... بجد بتحسسني إني مهمة وضرورية وأساسية في حياتها .... ربنا يخلينا لبعض يا أحلى سارة في الدنيا ... قالت لي وهي بتدمع " أنا بحب الدنيا بس عشان انت فيها " .... والله أنا اللي بقيت بحب الدنيا عشان انت فيها .... ما كنتش أتخيل إني ممكن أحب حد كدة وأنا مالحقتش أعرفه بس صدق رسول الله صلى الله عليه وسلم " الأرواح جنود مجندة" وأنا فعلا مش بحب إلا لما روحي بتحب، لا المظاهر بتشدني ولا الذكاء ولا المنصب ولا أي حاجة، لو روحي التقيت مع الشخص دة، خلاص، ما بعرفش أتدخل وأبعدها وإلا هتتعب أوي وأكتر حاجة بتوجع تعب الروح .... ربنا يديم المحبة ويحفظنا من عيون الناس يا سارة يارب ........ء

---------------------------------

قررت مش هعمل الإمبدد بروجكت ولا الأو أر واللي يحصل يحصل .... أسلوب تعجيز، حسبي الله ونعم الوكيل ...... أنا إلى الآن ناقصة تقريبا 20 درجة في كل مادة ولسة ما امتحنناش الفاينال ... بجد مش عارفة أقول إيه .... فعلا يكفيني الله ... اللهم إني أشكو إليك

-----------------------------------

بيقول أنا لو مكانكم كنت عيطت ومشيت جنب الحيط، لا طبعا ، لا لا لا...... صحيح أنا سقطت في امتحانك، وأول مرة في حياتي كلها أسقط في امتحان بس حياتي مش هتقف على امتحان ----- زي دة .. أنا فاهمة المادة كويس أوي الحمد لله وذاكرت كويس أوي للامتحان ... والله تعبي مش هيروح وربنا مش هيضيعني .... أنا مش همشي جنب الحيط، أنا همشي في نص الطريق، لأ، همشي في أول الطريق إن شاء الله وراسي مرفوعة لفوق .... ربنا اللي هيديني ...... بس أنا مبسوطة من نفسي أوي أوي الحمد لله، الحمد لله، أول مرة أسقط وكمان ما أعيطتش ولا حتى زعلت ثانية واحدة ولا كإن حاجة حصلت .... والله والله والله ربنا رحيم أوي وهو اللي هيديني كل اللي عاوزاه وزيادة لإنه كريم ولا يظلم أحد .... "إن الله لا يضيع أجر من أحسن عملا" ء

-------------------------------------

أنا مش هخاف المرة دي *** ضاع من عمري سنين في الخوف

أنا مش هكون إنسان عادي *** أنا هتحدى أي ظروف

-------------------------------------

مش لاقية جدول امتحانات آخر السنة في أي حتة ... تعبت من التدوير وتهت من الجروب مش لاقية حاجة ومش لاقياه خالص في المايل .... يا رب سهل وأعرف راسي من رجلي

---------------------------------------

عسل أوي، " يللا بينا يا فيدو نتفسح، أنا زهقت من الدراسة والدنيا وكل الناس.... يللا نروح السينما ندخل فيلم أجنبي ... يللا نبوظ .... " ... " أنا عاوزة أهرب " ...... ههههههههههه ... متاااااحف والله البنات دول .. عليهم أفكار لإخراج الكبت فظيعة وفعلا نفسي أنفذها ...ء

يللا، إن شاء الله في الجنة بقة .... يا رب يا رب يا رب .... نفسي في حاجات كتيييييييييرة أوي ومستحييييييييلة أوي في الدنيا ... أنا زعلانة من الدنيا .... عاوزة دولة ما فيهاش رجالة .... أو على الأقل مدينة ..... نفسي أروح الجنة وأعمل الحاجات دي في الجنة .... الحمد لله اللي خلقني بنت، أكيد في حكمة .... نفسي أوي أركب حصان أبيض وأجري بيه على البحر، أركب بيتش باجي وأطير بيه على البحر، أركب ورا حد على موتو سيكل ويطير بيه ( كله طيران، أنا بردو كان نفسي أطلع قبطان طيارة بس ما نفعش عشان بنت :( ) ، نفسي أتعلم العوم، نفسي أجري وأجري وأقعد أجري دون توقف .... الولاد بيعملوا كل الحاجات دي براحتهم .... اللهم إني أسألك من فضلك.. قال تعالى " ولا تتمنوا ما فضل الله به بعضكم على بعض، للرجال نصيب مما اكتسبوا وللنساء نصيب مما اكتسبن، واسألوا الله من فضله " .... أنا مش بتمنى أكون ولد لا قدر الله ( مش عشان هما وحشيين ) ولا زعلانة إني بنت بالعكس، دة جزء من أحلى حاجة في حياتي إني بنت والله ...، الحمد لله يا رب أن جعلتني فدوى، بس أنا زعلانة من الدنيا ..........ء

--------------------------------------

أحلام مستغانمي، انت مبدعة مبدعة مبدعة ... حاسة إنك بتتكلمي عني ... نص كلامك عني

------------------------------------

فدوى، فدوى، فدوى ( يهتف الجمهور ويصفق ) ..... يللا يا فدوى صدقيني تقدري .... ربنا معاك ( لازم أدلع نفسي بردو عشان أقدر أشتغل) مش كفاية الكل هاجم علينا وبيعاملونا معاملة القهر والتعجيز، مش هكون أنا والدنيا على نفسي بردو .... ربنا يوفقك يا فدوتي

-------------------------------------

A-M-A-A-G-A-A : I MISS U SOOOO MUCH, so unbearable ..... =((

-----------------------------------

ويستمر العد التنازلي

قصاصات حائرة

شئ ما يجذبني إلى هنا ... أشتاق إلى الكتابة أو مجرد بعثرة بضع كلمات ربما لا يأبه بها أحد ولكنها تعني لي الكثير...هنا، لا أحب استخدام لغة الصمت، فالكلمات تتكلم والحروف تبوح بما يحتويه صدري .... زفرات وآهات ... اشتياق واحتراق ... ويلي من الأيام وما تحمله لي من مفاجئات !!!ء

-------------------------------------

والله فتحت كتاب الأركيتكتشر وقعدت أقرأ شوية والدنيا عمالة تظلم تظلم لحد أما بقيت بقرأ وتقابلني كلمة "ذا" وأقعد أسأل نفسي يعني إيه "ذا" وبجد طلاسممممم ؟؟؟ تعبت أوي فلجأت لحاجات تزيل عني الزهق وتساعدني على الاستمرار في الحياة ......ء

-----------------------------------

أريد حلا، اللهم اهدني ... من ثانوي وأنا قبل الامتحانات باسبوعين بالظبط وبتحصل لي حالة غريبة ... بسيب المذاكرة اللي أي انسان طبيعي عاقل بيكون بيعملها وبقعد أقرأ كتب وأكتب حاجات .... مثلا، في ثانوية عامة قبل الامتحانات بأسبوع وأثناء الامتحانات، قعدت أقرأ في كتاب حوالي 900 صفحة وكنت بخبيه تحت كتبي عشان ما حدش يشوفه بس أختي اكتشفت الموضوع دة وحاولت تخبيه مني بس ما نفعش .... كان هاري بوتر الجزء الخامس بالانجليزي .... كتاب قمة في الجمال ... الرواية ( ال 7 أجزاء ) تحفة نادرة ... أنا قرأت كل الأجزاء مرة ما عدا الجزء الثالث قرأته ثلاثة مرات والجزء الخامس خمس مرات (900 صفحة) والجزء السادس مرتين .... بعشق المؤلفة، بجد تحفة تحفة تحفة ... وكل الأجزاء دي قرأتها في ثانوي ....ء

في إعدادي هندسة صراحة ما قرأتش حاجة تذكر أوي ... كنت في مرحلة صعبة أوي في حياتي وكنت فعلا تايهة بس ربنا رحمني أوي .... في سنة أولى، قرأت لا تحزن لعائض القرني (الكتاب الأزرق الضخم) مش عارفة كام صفحة بس أنا خلصت تقريبا نصفه أيام الامتحانات

وكملته في الصيف وقرأت كمان أثناء الامتحانات

women from venus and men from mars

في سنة تانية اشتغلت على كتاب "كن سعيدا " لوصفي مهنا و"الداء والدواء" لابن القيم

. سنة ثالثة امتحانات الترم الأول اشتغلت على

the secret

أروع كتاب (مش رواية) أقرؤه في حياتي (قرأته أربع مرات ورا بعض) وكتب تانية ... وأنا دلوقت بقرأ في كتاب "استمتع بحياتك" لمحمد العريفي و"فوضى الحواس" لأحلام مستغانمي ... صراحة الكلام دة مش بقوله لحد عشان ما حدش بيصدق إنه أسيب الامتحانات وأقعد أقرأ بس صراحة دي بقيت حاجة في دمي زي المرض عشان كدة لما بقول إن مستوايا الفعلي أحسن من اللي أنا عليه بكون قاصدة كل كلمة بقولها الحمد لله بس أنا اللي اخترت الطريق دة ... يعني الناس كلها ما ورهاش غير المذاكرة والكلية والدراسة، بس أنا طول ما أنا قاعدة في المحاضرات لو ما قعدتش أسأل وأنتبه، بسرح أوي في تأليف حاجات أو بسترجع حاجات قرأتها .... ممكن تسميه هروب أو خوف أو قلق أو مش حابة الامتحانات فبعمل حاجة بحبها أحسن من ضياع وقتي في الاكتئاب والسراب .... صراحة لسة بادئة أقرأ في كتاب "فوضى الحواس" والألهام كان نابع من الباش مهندس حاتم من رابعة سي إس دي ربنا يكرمه، فعلا مصدر إلهامي في القراءة والكتابة ... نفسي أكتب زييه في يوم من الأيام ... كتب الباش مهندس حاتم (أو ربما نقل) الآتي على أحد مدوناته : "ء

ابتسم .. فما زاد البكاء العمر يوما .. وما أنقصه كثرة النحيب .. وما أعادت عبرات العين غائبا .. ولا أنست لحظة فراق حبيب .. فابتسم لزمانك .. فالأيام ستمضي .. وزمانك أيامه خير طبيب .." ... أنا سعيدة إنه قرب يحقق جزء من أحلامه ما شاء الله، ربنا يتمم له بخير يا رب وعقبال كل اللي زييه ....ء

طبعا اللي معايا في القسم عارفين إننا أصلا مش بنذاكر طول السنة والترم دة كمان بقينا مش بنحضر أوي والأيام دي فرصتنا الوحيدة لإنقاذ ما يمكن إنقاذه ... بس أنا ؟؟؟ ربنا يهديني ... إن شاء الله خير ... في قوة تنافر كبيرة أوي بيني وبين المذاكرة ... عداء ما لهوش أي تفسير ...

----------------------------------------------

أكره جميع الأغاني لأسباب دينية ونفسية ولكنني أقع صريعة أمام كلمات الكثير منها ... هناك كلمات تخبرك أنها خرجت من فؤاد كاتبها وقد تأكد من كل حرف قبل خروجه .. لم يكتبها لمجرد الرقص عليها أو الغناء بها .. كلمات صادقة، ينبوعها صادق .. ليتني أستطيع الكتابة مثلهم !!! أعشق كتابات الثلاثة، واحد منهم مات منذ أكثر من 10 أعوام .. والثاني عمره تجاوز النصف قرن ... والثالث في مثل عمري وفي قسمي بالتحديد ... إنهم مثلي الأعلى في الكتابة ... أتمنى أن أصبح مثلهم يوما ما حتى وإن لم يحب كتاباتي أحد، يكفيني أنني سأحبها دوما ويكفي أن دفتري لم يمل احتواءها ....ء

-----------------------------------------------

طبعا أي حد هقول له الكلام دة مش هيصدقه ودة مش هاممني أبدا عشان أنا مصدقة نفسي (حلوة مصدقة نفسي دي ) ... أنا حاسة إني سعيدة ومتضايقة في نفس الوقت وأنا بتعب أوي لما أحس بأكتر من إحساس في نفس الوقت وممكن أدوخ من تضارب الأحاسيس المختلفة ... فرحانة عشان بقرأ حاجات بحبها وبستمتع أوييييي ومتضايقة عشان سايبة اللي ورايا وبقرأ ... طب ما أنا ممكن أقرأ في الصيف، بس للأسف لا تحلو القراءة إلا وقت الامتحانات وما بعرفش أبدا أسيب كتاب قبل ما أخلصه ... بقعد أحلم بيه وأفكر في أحداثه وأنا في اللجنة ... أنا سعيدة إني سعيدة ومتضايقة إني متضايقة .........ء

-----------------------------------------

I am totally against what I said last time, I changed it to “ If u love something, go ahead and get it before it is too late”, but unfortunately, not everything could be attained so easily ……

--------------------------------

في مثل هذا اليوم، قبل مولدي بعامين ونصف، ولد حبيبي الوحيد أخي ... أنا لا أحتفل بميلاد أي كائن كان لأن ديني أمرني بهذا ولكنني لا أستطيع منع نفسي من الشعور بالفرحة أن أحَب ذكر إلى قلبي (هو وبابا طبعا) أتى إلى العالم اليوم ليضئ عالمي الذي بدأ بعده .... كم أحبك يا أخي العزيز !! كم أشعر بنعمة الأخ وأنت معي ولا أدري كيف كانت ستكون أيامي بدونك ... شكرا لك لأنك أخي ولأنك صنعت لي الكثير والكثير دون أن تشعر ... دائما تخبرني أنك لم تصنع لي شيئا ولكنك والله أضأت زاوية مظلمة من حياتي الجامعية ... ربنا يخليك ليا يا رب ويعوضك بكل خير ويحقق لك كل اللي نفسك فيه وأشوفك ديما في أحسن حال يا رب يا رب ويحفظك من كل شر ... آمين ....ء

-------------------------------------------

I can not stop myself from watching the lord of the rings .. I watched all four parts a couple of times, it is amaaaaaaaaaazing !!! A very CLEAN movie, it does have sound and music effects but the idea is fabulous, so inspiring and full of strength …. I just loOOOoove it !!!

فيلم هادف أوي ومليان حماس، بجد لو الشباب اتفرجوا عليه بغرض الاستفادة، ما تتخيلوش العالم كان هيبقى عامل إزاي .... وكل إنسان وليه رأيه بردو

----------------------------------------

Tomorrow is a long and tiring day, I gotta go catch some sleep :| …

يعني مش ولا مذاكرة ولا حتى حضور وفهم وتركيز ... اللهم أنت المجيب وأنا المضطر، فاكشف ما بي من ضُرْ ......ء

انتِ اللي عشانِك بكتب شعر

ربي لا أدرى ما تحمله لي الأيام لكن ثقتي بأنك معي تكفيني :)

---------------------------------------

لا تحمل الكرة الأرضية على رأسك :)

----------------------------------------

لستُ أملك في زمان العَدو خيلاً للسباق

-------------------------------------------

:) :) :) "If someone is too tired to give you a smile, give one of your own, because no one needs a smile as much as those who have none to give” :) :) :)

------------------------------------------

"Knowing that there is worse pain doesn't make present pain hurt any less." ... It is already very painful ...

الدروس المستفادة

سأنظر إلى النصف الممتلئ من الكوب وطالما مش أنا اللي غلطانة في أي حاجة حصلت، أنا هصبر نفسي بحبة دروس لازم أكون استفدتها بجد ... ممكن في يوم من الأيام أتزنق في أي كلمة تشجيعية نابعة مني عشان ما حدش بينفع حد، طبعا هلجأ للمدونة العزيزة التي طالما تحملت شكوايا من كل حاجة .... ممكن بردو العيب يكون فيا أنا والدنيا كلها ماشية صح، على الأقل أنا حسيت إن في حاجة غلط محتاجة تغيير

---------------------------------------------

استعدي لتقبل أسوأ حاجة ممكن تحصل في أي موقف ... طالما أسوأ حاجة ما حصلتش، خلاص، ولا يهم ... ما حدش بيموت ناقص رزق ولا ناقص عمر ... كل حاجة مكتوبالي من قبل ما أتولد ... بس أنا للأسف ديما بسعى للأفضل عشان كدة بتعب ... كلنا هنتساوى في يوم ما ...ء

---------------------------------------------

قمة الغباء إن الواحد يغير من نفسه عشان خاطر حد ولا يظهر حاجات مش فيه أصلا عشان يعجب حد ... أنا مش هتغير إلا عشان أنا "فدوى ذات نفسها" عاوزة أتغير للأحسن بإذن الله ... مش عارفة إزاي هبقى أحسن في مجتمع كل حاجة فيه ماشية غلط وقلما تجد حد كويس ... يا رب أنا تعبت وأنا بحاول وبدور على حد يساعدني ... كلهم زي بعض ... أنا غلطانة إني حطيت لقاعدتي حالات خاصة

---------------------------------------------

ما فيش أي حاجة تستاهل، وما حدش في الدنيا كلها يستاهل تزعل عشانه، وأصلا الشخص اللي يستاهل دموعك، مش هيسمح لنفسه إنه يبكيك أبدا وعمره ما هيبكيك .... دموعي غالية وأنا مش هنزلها إلا على حاجة تستاهل وأعصابي غالية مش هفقدها إلا على حاجة تستاهل بجد ( يعني هفكر كذة مرة، لو الحاجة تستاهل أزعل عشانها، هزعل بس مش هطول وأنا زعلانة، لو لأ ، هقوللها كلمتي الشهيرة ;) ) ء

----------------------------------------------------

إذا كانت الدنيا حرها مش قادرة أستحمله، هعمل إيه في نار جهنم ربنا يعافينا منها ؟؟؟ أكيد إن شاء الله في الآخر هروح الجنة برحمة ربنا بس لازم أتنظف من معاصية وذنوبي في النار لو ربنا ما سامحنيش عشان أخش الجنة نظيفة ... الحمد لله على نعمة الاسلام والحجاب، اللهم اني قد تحملت حر الدنيا من أجلك فباعد بيني وبين حر الآخرة

------------------------------------------------------

أنا بعاني عشان أنا بحاول أبقى كويسة في قسم أصلا مبني على الهرجلة وعدم النظام .... بجد حسبي الله ونعم الوكيل في اللي اتعمل فينا امبارح والنهاردة من غير ذكر للتفاصيل عشان مالهاش لزوم وما حدش خالص عمل حاجة !!!!!!!!!! احنا ليه نتنرفز ولا نضايق نفسنا ؟؟؟؟ احنا عملنا اللي علينا وفي الآخر ضاع وقت كتيييييييير أوي وحاجات كتيرة كانت ممكن تتعمل بدل اللي اترمى دة .... حسبي الله ونعم الوكيل ... حسبي الله ونعم الوكيل وهفضل أقولها لحد ما أتخرج إن شاء الله

----------------------------------------------------

حسبي الله ونعم الوكيل، كنت بحسب أنا بس اللي معملتش الأندرويد لاب بتاع الأسبوع اللي فات أو على الأقل كمان 10-20 ويطلع 15 بس هما اللي عاملينه !!!!! وبردو ما حدش عمل حاجة وينزلوا لاب جديد الأسبوع دة عادي جدا ؟؟؟؟ وبردو ما حدش بيتكلم ؟؟؟؟ حسبي الله ونعم الوكيل ... ... شكرا ليكم أوي أوي أوي ... ... ربنا يسامحكم يا رب ..... أنا مش هقول أكتر من كدة

----------------------------------------------------------

عَنْ عَبْدِ اللَّهِ بن مسعودٍ رَضِيَ الله عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ
مَا أَصَابَ أَحَدًا قَطُّ هَمٌّ وَلَا حَزَنٌ فَقَالَ اللَّهُمَّ إِنِّي عَبْدُكَ ابْنُ عَبْدِكَ ابْنُ أَمَتِكَ نَاصِيَتِي بِيَدِكَ مَاضٍ فِيَّ حُكْمُكَ عَدْلٌ فِيَّ قَضَاؤُكَ أَسْأَلُكَ بِكُلِّ اسْمٍ هُوَ لَكَ سَمَّيْتَ بِهِ نَفْسَكَ أَوْ أَنْزَلْتَهُ فِي كِتَابِكَ أَوْ عَلَّمْتَهُ أَحَدًا مِنْ خَلْقِكَ أَوْ اسْتَأْثَرْتَ بِهِ فِي عِلْمِ الْغَيْبِ عِنْدَكَ أَنْ تَجْعَلَ الْقُرْآنَ العظيم رَبِيعَ قَلْبِي وَنُورَ صَدْرِي وَجِلَاءَ حُزْنِي وَذَهَابَ هَمِّي إِلَّا أَذْهَبَ اللَّهُ هَمَّهُ وَحُزْنَهُ وَأَبْدَلَهُ مَكَانَهُ فَرَجا ... دة وعد من ربنا وأنا عمري ما أسأت الظن بالله ... وأنا هقعد أقولها طول ما أنا ماشية

-------------------------------------------------------------

أنا مش بطيق الدخان ولا السجاير ... ارحموني أنا صدري تعباااااااااان وبيهيج على طول ... كفاية سجاير، نفسي أتنفس هواء نقي ... ء

------------------------------------------------------------

----------------------------------------------------------

حسبي الله ونعم الوكيل

قصاقيص

لن أزيل عيني من الأرض أبدا ... يقولون أنها بريد إبليس وأنا لا أريد استقبال أي رسائل شيطانية !!!

---------------------------------------

أ-م-ع-ع-غ-ع-أ : اشتقت إليكم وبشدة ... يا رب ارحم قلبي المنكسر ....

----------------------------------------

بحب أنام متأخر وأصحى بدري أوي وأنام كتيييييييييير... طب إمتى أناااااام وأنام قد إيه ؟؟؟؟؟ خبراء الألجورذمز يقترحوا حل ....

---------------------------------------------

لو نمت، مش هكمل الشغل وضميري هيقعد كام يوم بيأنبني والإحباط هيزيد، ولو ما نمتش، مش هبقى مركزة وهقعد ساعات في حاجات ما تستاهلش وهقعد أخرف اليوم اللي بعديه، طب أعمل إيه ؟؟؟ لا تقولوا نامي شوية ، فإن "شوية" في قاموس النوم ليس لها وجود ....

----------------------------------------------

أول مرة أحس إني نفسي ألعب في البروجكت بتاعهم ..... أعوذ بالله من الشيطان الرجيم ....

-------------------------------------------------

لما تكون لسة مش عارف تستخدم char * ولا string ويكونوا من وجهة نظرك مش زي بعض خالص زي ما العالم بيقول وتكون أصلا بتبص على tutorials على النت عشان تكتب array أو أي حاجة تافهة بال C++ تعمل إيه في نفسك ؟؟؟؟ بقترح ترجع سنة أولى ....

-----------------------------------------------------

كل حاجة مهنجة، عقلي، الجهاز، firefox، chrome، visual studio.... توووت .... تووووت .... تووووووووووووووووووت

----------------------------------------------------

Carbide, eclipse, netbeans, code blocks, C free, visual studio,

IE, firefox, chrome

Oracle, Oracle XE,

Microsoft CLIP (which is getting on my nerves)

وحاجات تانية عجيبة مش عارفة إيه اللي نزلها وخايفة أشيلها حاجة تبطل تشتغل ...... وبعدين ألومه إنه مش قادر ينطق ؟؟؟ كتر خيره والله، أنا لو مكانه ما كنتش فتحت أصلا !!!!

------------------------------------------------

لا يوجد ترجمة متوفرة .... قمة الاستفزاز والنرفزة .................. طم طم طم طشششششش....

-----------------------------------------------

تلات أسابيع ولسة مش مذاكرين أي كلمة من بعد الميد ترم (وكمان حاجات من الميد ترم) وحاجات أصلا مش حاضرينها وحاجات مش فاهمينها خالص وهنقعد نسلم في مشاريع لحد آخر أسبوع !!!! (كفاية تقليب المواجع على البشر، اللي فيهم مكفيهم).... يا رب أريد حلا فقد فقدت القدرة على إيجاد الحلول .... اللهم إني أشكو إليك.........ء

-----------------------------------------

:) ويبقى الأمل :)

حاجات غريبة

I should learn to give more and expect less …..

------------------------------------------------ I Never needed wings to fly ……

------------------------------------------------

أنا غريبة أوي، دة معناه إيه ؟؟؟؟... بقالي كذة سنة بلبس فردة شراب لون وفردة لون، يعني مثلا أحمر وأزرق، بنفسجي وأخضر المهم يكونوا الفردتين غير بعض، بفكر أعمل كدة في الكوتشي كمان ....

-------------------------------------------------

اتنرفزت أويييييييييييي ... شغل 5 ساعات راح مني مش فاهمة إختفى فين ؟؟؟ دورت عليه في كل حتة تاني بس مش لقياه خالصصصصصصصص ... لقيت الملف بس فاضي !!! لا حول ولا قوة إلا بالله ... عملته تاني وخلصت في ساعتين ونص الحمد لله ... آدي اللي أخدناه من مشروع د.أبو جبل (الراجل برئ والله، أنا بتكلم عن المشروع نفسه) !!!!!!!!!!!

---------------------------------------------

خلاص كلمتها واتأسفتلها .... اتصالحنا الحمد لله وما كانش في سبب أصلا للخصام :) ... الشيطان ربنا يكفينا شره ... بجد من أحلى الناس اللي قبلتها في حياتيييييي ... :-***********************

-------------------------------------------------

لما تنام أكتر من الوقت اللي محدده لنفسك وتضايق إنك نمت زيادة (عن اللي معاك في القسم مش عن الناس الطبيعية) وتزعل إنك نمت، إعرف إنك في سي إس دي ... لما تقعد ليالي نسيت شكل السرير وتعدي عليه كدة تسلم من بعيد وتكون نفسك تحط راسك ولو دقيقة على المخدة (لو حطيتها تبقى جنيت على نفسك ومصلحة البلد هتقف)، أهلا بيك في سي إس دي .... لما تقعد طول ما انت شغالة في حاجة تظهر لك مشاكل ملهاش أي مصدر وتقعد تلطم، مرحبا بيك في سي إس دي ... لما نفس البرنامج يشتغل على جهاز صاحبك بس مش راضي يشتغل عندك، منور سي إس دي ... لما تنام على اللاب توب وانت شغال كل يوم وتصحى بعد كام ساعة تلاقي ظهرك بيوجعك ورقبتك ملوحة وتلاقي نفسك كاتب تخارييييييييييف (مرة كتبت جزء من قصة حصلتلي في طفولتي) بدل البرنامج، يبقى انت أكيد في سي إس دي ... ولما تقول يا رب من قلبك وكل خلية في جسمك تقول آمين، تأكد بدون شك إنك في سي إس دي ... لو لم أكن سي إس ديهيا لوددت أن أكون سي إس ديهيا ....

------------------------------------------

مش قادرة أمسك نفسي من الضحك !!! كنت نازلة السلالم وهو طالع، فضل مبحلق فيا كإني كائن غريب قام واقع على وشه !!! صعب عليا أوي بس قعدت أضحك !! حد قاله يسيب السلم ويركز فيا ؟؟؟ طب أعمل إيه أنا وأنا كلي متغطية ؟؟؟ ألبس طاقية الإخفاء ؟؟؟ والله يا ريت، نفسي فيها أوي بس يا ترى بتتباع فين ؟؟؟؟

------------------------------------------

عاوزة أناااااااااااااااااااااااااااااااااااااااااااااااااام ..... zzzzzzzzzzzzzzzzzzzzzzzzzzzzzzzzzzz

:) ويبقى الأمل :)

وعاد من جديد ...... ء

( I love this emotion icon soOOOo much ... بحس إني باردة )

----------------------------------------------

كان يوما جميلا بكل معاني الجمال ... كانت نسبة ال"ألفا" لدَيّ (يا فندم ;) ) تساوي واحد ... (مع إني لسة ما كنتش درست الألفا !! ) كان ( اليوم والله عشان تفكيركم ما يروحش بعيد :) ) حاملا بأرق المعاني وأحلى العبارات ... بدأ برسالة أبكتني كثيرا ثم أسعدتني للغاية ثم أبكتني ... فجلست أبكي حتى أدركت أن علي الإسراع بالرد .. فجلست أكتب وما زالت الدموع في عيني ... لا أدري كيف أشكرهم ؟؟؟ لا أملك سوى الدعاء فوالله لا أدعو لأحد سواهم في كل صلاة وعند كل أذان ... اللهم استجب ...ء

ثم قمت بتأليف الآتي

Victory is not for the strong only, it is for the active and the brave .... The battle is not over as I did not win yet ...

-------------------------------------------

فرحت أوي إني فدوى ... بجد شكرا، أصلي لو ماكنتش فدوى، كان عمر اللي حصل ما حصل .... يا رب أدم عليا نعمتك وما تخلينيش أعصيك بيها ولا تنزعها مني أبدا ... آميييييييييييييييين

------------------------------------------

روحت الكلية بس وصلت كامب شيزار بدري أوي (يوم الخميس المواصلات حلوة) فقلت أتمشى على البحر لحد الشاطبي ... البحر كان هادي اوييييييي ولونه رهيب ... لبني وأخضر فاتح وأبيض ... بجد تشكيلة فظيعة ومافيش نقطة موج ... كان نفسي أنط فيه بس للأسف هتضطروا تطلعوني بنفسكم عشان ما بعرفش أعوم ! نفسي أتعلم، يا ترى إمتى ولا فين ؟؟؟ عملت بالنصيحة وطول ما أنا ماشية قاعدة برمي الخير في البحر ... الحمد لله إني في اسكندرية وإلا ما كنتش هعرف أرمي الخير فين ;) !!! أحلى حاجة إن البحر فاضي وما فيهوش معاكسات فالواحد اتمشى وهو مرتاح ومتطمن ... وصلت الشاطبي ولسة الوقت بدري، قلت أرجع لكامب شيزار تاني :) وفي طريق العودة، اتصلت بيها وأخيييييييرا ردت عليا الحمد لله .. ربنا رحيم أوي ...الحمد لله إنها بخير .. نفسي أزورها بس مافيش وقت خاااااااااالص وهي ساكنة بعييييييييييييييد أوي ... يا رب سهل .....ء

وصلت الكلية متأخر 5 دقائق بس ما كانش لسة جه، قعدت أتمشى لحد ما دخل .. كان سكشن مفهوم الحمد لله ... بعدين طرت برة الفصل وكلمت أخويا حبيب قلبي ربنا يخليهولي ... يا رب اسعده واحفظه وعوضه بعدين رنيت على أختي ربنا يعوض صبرها خير ... أمي التي لم تلدني ... رفيقة دربي الصادقة الصدوقة (معلش، اكتشفت مؤخرا ماحدش يستاهل اللقب دة غير أختي) التي ليس لها مثيل ... أحبكم جميعا ... ربنا يخليلي أهلي ويخليني ليهم ... مهما زعلنا من بعض بنفضل نحب بعض ما شاء الله حب صادق ما وراهوش مصالح ... نعمة والله ناس كتيرة محرومة منها .. اللهم لك الحمد !!! ربنا يعوضهم ويديم علينا نعمته ويحفظها من الزوال ...ء

حضرت أو أر وفهمت الحمد لله ... كانت محاضرة مليانة ضحك وفرفشة ... ربنا يسامحه على الضغط بس يكرمه على دمه الخفيف ما شاء الله ويخلي له فرح وسارة وأمين ;) .... بردو طيرت بعد المحاضرة ولفيت الكلية .... الإمبدد محاضرة عجزت إني أفهمها من بداية السنة ... بطلع كل مرة فاهمة العُشر تقريبا ... يللا، مصيري أفهم ولو كانت آخر محاضرة في المنهج إن شاء الله :) ...ء

قعدت ساعة مع اللي يستاهلوا أقعد معاهم ونمت على كتف أطيب واحدة عرفتها في حياتي ما شاء الله ... والحمد لله بردو عملت بالنصيحة وعاتبت كل اللي احتجت أعاتبهم وقبلت أعذارهم ... أعمل إيه ؟؟؟ بحبهم !!! :) بس في واحدة لسة مش قادرة أكلمها عشان بحبها أكتر منهم فزعلي منها كان أشد ... ربنا يصلح الحال ...ء

بدأ السيكشن والحمد لله فهمت أغلبه وفرحت إني كنت عاوزة أفهم فعلا بغض النظر عن أي حاجة ... وقفت مع جروبي شوية نتفق على الأو أر إمتى هنبدأوه :) والكومبايلر إمتى هننهيه .... بعدين روحت .... وأنا في المشروع قعدت أفكر في حبة مواضيع شاغلة بالي ... يعني في ناس صحابي بتعمل حاجات تغضب ربنا أوييييييي بس هيا مبسوطة واللي نفسها فيه بتعمله وخلاص وبتقول (أنا بستمتع بشبابي وبعيش حياتي !!!!) ... وبتتباهى إنها بتعمل الحاجات دي !! قعدت أقول سبحان الله !! فكرها إن هي دي السعادة والاستمتاع ؟؟؟ والله أبدا ... والله لو ما تابتش هتتحرم من سعادة أكبر بقيت حياتها ربنا كاتبها للي إتقوه بس ... أكيد الواحد بيكون نفسه في حاجات بس والله تقوى الله هي اللي بتجيبها بعد فضل الله ... راح والله العظيم سمعت الشيخ في المسجل اللي في المشروع بيقول "إنه من يتق ويصبر فإن الله لا يضيع أجر المحسنين" !!! ياااااااااه !! رسالة مباشرة !! قعدت أعيط .. ربنا مش هيضيعني أبدا .... بعد شوية، الشيطان استلمني وقعد يقول ما انت ياما صبرتي وللصبر حدود وفي ناس كتير ما صبرتش قدك وعملت اللي نفسها فيه ولا همها وعايشة عادي ، راح أقسم بالله الشيخ في المسجل قايل "ولا تيأسوا من روح الله، إنه لا ييأس من روح الله إلا القوم الكافرون" !!!!!!! مش ممكن !!! رسايل في الصميم (من سورة يوسف) ... ربنا كريييييييم ، مستحيل ينسى اللي بيعمل اللي ربنا عاوزه ... حتى لو عصيناه ، كلنا بنغلط، المهم نرجع تاني بسرعة ليه ... كل أما أتضايق أفتكر آية "ففروا إلى الله" !!! يعني لما الواحد يتضايق من أي حاجة، بيفر من الحاجة دي، إلا الله، لازم نفر إليه ....ء

أنا أكتر فاكهة بحبها من الشتاء الموز ومن الصيف البطيخ ... من شهر 10 اللي فات (أول ما خلص البطيخ) وأنا نفسي في بطيخ وكل شوية أشم ريحته :) ... مرة لاقيت مستيكة بالبطيخ جبتها على طول !!! النهاردة وأنا مروحة كنت هجيب بطيخة من عمو اللي تحت بس كسلت أشيلها وهي تقيلة كدة ... وانا بتغدى ولشدة اندهاشي قالولي في بطيخ في التلاجة ... سيبت الأكل وقمت جري سجدت شكر لله ... حاجة نفسي فيها بقالي 6 شهور ( :) مش فجعة والله بس مش موجودة في السوق بقالها كتيييير) ودلوقتي ربنا بعتهالي ... والله الواحد بيتعلم الصبر من أبسط المواقف دي .. أنا هصبر والله .. ء

--------------------------------------

مش عارفة مالي، إيدي بقيت تاكلني ... كل شوية عاوزة أدخل وأكتب ... شكلي هكتب كل يوم !!! إن شاء الله خير

--------------------------------------

:) وعادَ الأمل :)