ثانية واحدة ممكن تقلب حياة الانسان

الحمد لله، أديني خلصت أسبوع من الامتحانات

باقيلي أسبوع إن شاء الله وأكون بقيت في سنة رابعة رسميا إن شاء الله

أنا مبسوطة إني الحمد لله بقيت بروح للامتحان قبل وقت اللجنة ما شاء الله، كنت كل سنة من أول ما دخلت الكلية لكل امتحان تقريبا بروح عند اللجنة بالظبط أو بعد ما تبدأ (ولا أنسى يوم الكونترول اللي رحت بعدها ب 20 دقيقة تقريبا، أصلا ما كنتش عاوزة أروح بس ربنا هداني الحمد لله ) ........ء

وإن شاء الله في حياتي كلها هحط موضوع

arriving an hour early is better than arriving five minutes late

أمام عيني وإن شاء الله أحترم المواعيد على طول

-----------------------------------------------------------

أنا ما بقدرش خااااااالص أقعد على كرسي أكتر من ساعة، فمن أول الساعة التانية في اللجنة وأنا ببدأ بهز رجلي، تغيير قعدتي كل 5 دقايق، أحط رجل على رجل، أربع (آه والله بقعد مربعة)، أقعد بالجنب ... المهم ما أفضلش ثابتة أصل بجد الدم بيقف في رجلي وراسي وبفقد التركيز

ومجرد ما اللجنة تخلص، بلاقي نفسي بجري أو بطير برة اللجنة، عاوزة أجري فعلا، صحابي يتريقوا ويقولوا فدوى عاوزة تلحق تروح عشان تذاكر المادة الجاية وأنا لم أعد أهتم مين بيقول إيه طالما مش بعمل حاجة غلط

ثم موضوع المشي السريع بتاعي ما شاء الله والصوت العالي ما شاء الله بردو وراثة الحمد لله، ماما وبابا الاتنين مشيتهم سريعة أوي ما شاء الله وصوتهم عالي جدا (الحنجرة قوية ما شاء الله) فلكم أن تتخيلوا بنتهم هتكون عاملة إزاااااي

:D

ربنا يخليهم ليا يا رب ويقدرني على برهم

كل يوم وأنا رايحة الامتحان، طريق البحر كله دة عبارة عن ناس بتصيف وماسكين عوامات وحاجاااااات ربنا يسامحهم، مش يراعوا النفسية بردو ؟؟؟ ولو فضلت برة لحد بالليل، سكة الرجوع كلها بلالين اللي بيكون عليها اسامي الناس اللي بتتجوز وأفرااااح وبيييب بيييييب بيييييييب وزغاريط ربنا يسامحهم، مش يستنوا لما نخلص بردو ؟؟؟ :) ربنا يسعد الجمييييييع بس لازم الناس تراعي بعضها ... أنا إن شاء الله هتأكد لو ربنا كتبلي إني أعمله بعيد عن أي موسم امتحانات عشان ما حدش يدعي عليا

:D

-----------------------------------------------------------

أكتر مادة كنت مرعوبة قبلها، الأو آر

أكتر مادة كنت متوترة في اللجنة، الأو أر

أكتر مادة اكتأبت بعدها، الأو آر

أكتر مادة نمت وأكلت بعدها، الأو آر

أكتر مادة ندمت إني ذاكرتها، الأو آآآآآر

ويا ريتني ما عرفتها، الأو أأأر

:P

أكتر مادة كنت مشتتة في اللجنة فيها، الكومبايلرز

أكتر مادة اتبسطت قبليها وبعديها، الداتابايس (مش عشان الامتحان، يعني بردوحياة الانسان مش متوقفة على امتحاناته بس ) ..ء

كانت هذه عناوين الأخبار وإليكم التفاصيل

:D

---------------------------------------------------------------

أما بالنسبة للأو آر اللي عمالة بظلم فيها دي فببساطة، الامتحان كان مباشر أوييييييي (من وجهة نظري المتواضع) بس أنا فعلا من الصدمة إنه مباشر، قعدت طول اللجنة والله وعند كل سؤال أقول ( لا لا لا، مستحييييييل يكون المطلوب كدة بس، أكيد الدكتور مخبي خدعة في حتة ما، أكيد السؤال مش قصده كدة، طب أنا هبص للسؤال بنظرة تانية، هبص من خارج الصندوق زي ما بيقولوا، طب هقرأ السؤال تاني بس كأني مش في لجنة إمتحان .... يااه، بقيت بجد طول ما أنا قاعدة بس بدور على الفكرة أو الخدعة اللي في المسألة فطبعا ما لحقتش أحل حاجة وفعلا سيبت سؤال عليه 20 درجة وسؤال عليه 20 حليت ربعه تقريبا ويللا ، خيييييييييير إن شاء الله

فطلعت من اللجنة، عوزة أنام وأكل وبس ومش عاوزة حد يكلمني بس قعدت فترة كدة مكتئبة وحاسة إن خلاص، ما فيش فايدة بس سبحان من خلاني أرجع تاني فدوى

:) الحمد لله :)

--------------------------------------------------------------

أما بالنسبة للكومبايلرز، صباحية الامتحان واحد زميلنا بعت رسالة عن انهم بدأوا بمنع النقاب تاني وبتاع، أنا قلت مجرد كلام بقة حسبي الله ونعم الوكيل ونسيت الموضوع ونزلت اللجنة .... طبعا أنا كنت فاكرة إني فاهمة كومبايلرز أو إني شاطرة فيها، بس الحمد لله اتضح في اللجنة إني يا دوب بعرف عناوين المحاضرات ... أصل ما شاء الله، ناس كتيرة أوي حلت امتحانات قبل كل مادة وانا كنت يا دوب مذاكرة وما لحقتش أبص على أي امتحان في أي مادة غير سؤالين في الداتابايس عشان زميل بعت يقول إنهم بيتكرروا

المهم، وأنا في اللجنة وبحاول أحول من بايناري (مش شتيمة والله) لدسيمال (بردو مش بشتم) ، لاقيت الدكتور نهى عدلي بتقول لي تعالي .... أنا أول حاجة فكرت فيها " بريييييييييييء يا بييييييه !!! والله ما غشيت والله ما عملت حاجة !!! "... بعدين جه في عقلي موضوع "كنت فين الساعة 9 إلا خمسة إمبارح بالليل؟؟" زي الأفلام كدة وطبعا والله كنت في بيتنا بذاكر كومبايلرز زي بقيت الناس بشهادة أهلي ... المهم، دخلتني أوضة كدة وأنا قلت أكيد هيقعدوني على كرسي إعتراف وجهاز كشف الكذب وبتاع، بس لاقيتها بتقول لي (انت اسمك إيه ) ؟؟؟ ضحكت أوي وقلت لها (أنا فدوى) قالت ( ياااااااه) أصلها ما كانتش عارفة إني اتنقبت وطلعت لسة فاكراني ما شاء الله أصلي فعلا مش بتنسي بسهولة الحمد لله

;-)

المهم راحت قالتلي (وأنا كنت بدأت أرتعش فعلا مش عارفة ليه وريقي نشف وبقيت بعرق وكنت خلاص هنهار أو هعيط) ، قامت قايلالي (معلش، لازم اشوف وجهك)، (يااه، بس كدة) ؟؟؟ ووريتها وجهي السمح وضحكت ... ما علينا

رجعت مكاني وأنا لسة برتعش وحاسة إني عملت جريمة مش عارفة ليه

جه الدكتور اللي بيحبني مووووووت من أول ما دخلت القسم دة والدفعة كلها عارفة كدة الحمد لله وقال لي (هه، عندك إعتراض ؟؟) ، (لا طبعا، حد يقدر يقول حاجة???) ، راح واقف جنبي كدة وحاطط إيده في وسطه (أصلا المفروض ما تدخليش اللجنة خاااالص، بس إحنا عديناها) ... ما شاء الله، بجد شكرا ليكم أوي !!! عديتوها ؟؟؟؟ حسسني ب"عديناها" دي إني عملت جريمة أو قتلت حد وإنهم سامحوني .... روحت قايلة له (بس أنا سألت الدكتور أمين شكري وقال ممكن أخش اللجنة عادي جدا) ، (بس بردو، عندك إعتراض ؟؟ ) ( لا خالص، ما فيش حاجة حصلت !!!) ... ووالله العظيم قبل ما الدكتور تاخدني بشوية كنت سألت الراجل اللي بيقف علينا الساعة كام وقال 2 وتلت تقريبا، المهم، قعدت أرتعش فترة طويلة ومش مركزة خالص وقاعدة بقول (يللا يا فدوى ما فيش وقت، يللا يا حبيبتي كملي وركزي ربنا يخليك) ، بس بجد القلم كان بيرتعش أوي أوي في إيدي وكنت مش عارفة أكتب أي كلمة ولا أي حرف راضي يتكتب .... لا حول ولا قوة إلا بالله، كنت خلاص هبدأ أعيط أو هسلم الورقة ببساطة وامشي بس الحمد لله سيبت الورقة والقلم خااالص و قعدت أذكر ربنا وأعمل تمارين استرخاء، والحمد لله لما هديت وبدأت أكتب تاني، سألت الراجل الساعة كام وقال 3 وعشرة ... يااااه، ساعة إلا عشر دقايق تقريبا ضاعت ؟؟؟؟؟ قدر الله وما شاء فعل

:)

بس بردو مهما حصل، ربنا مش هيضيعني وهيعوضني أوي أوي أوي بإذن الله

وهبقى أفكر الدكتور دة بإذن الله ربنا يسامحه

بس، فبالنسبة لي، أنا ما كنتش رايحة أمتحن كومبايلرز، أنا كنت رايحة أكشف على وجهي ... صحيح كان معايا 3 تانيين ربنا يثبتهم يا رب، بس مش كل الناس ردة فعلها لنفس الموقف بتكون زي بعض

الحمد لله :)

-----------------------------------------------------------------

أما بالنسبة للداتابايس، نزلت بدري عشان أنزل حلول الشيت عشان ما كانش عندي نت والحمد لله فهمتهم بعدين رحت الكلية بس ما عرفتش أجيب اللي مستنياه بقالي كتير ... ربنا يسهل الأسبوع الجاي إن شاء الله ... وقفت تحت مبنى الإدارة قبل اللجنة عشان كان لسة فاضل ربع ساعة تقريبا بعدين وأنا طالعة حصل موقف صغنون أوي بس أنا ما أخدتش بالي منه خااالص الا بعد ما دخلت اللجنة وبدأت بالحل فجأة إفتكرت الموقف ولاقيت نفسي فرحانة وببتسم وقاعدة بكتب وأنا مبسوطة ... سبحان الله، ربنا فعلا بيدي الواحد الصابر والمتوكل والواثق أكثر مما يتوقع ..... :) الحمد لله، الامتحان كان أحسن من الاتنين اللي قبليه وكل شوية أفر في الكتاب وأكتب اللي ألاقيه .... بس بردو ما لحقتش أخلصه، بدات من ورا لقدام ويادوب بدأت في المسألة الأولى :) .... بعد اللجنة رحت أتفسح وأتمشى مع حب حياتي وأختي وصديقتي الصدوقة التي لا أستطيع الاستغناء عنها سارة، كانت فسحة حلوة أويييييييييي وكنت محتاجة أطلع معاها فعلا، والحمد لله على كل ثانية قضيتها معاها، بس ما طولناش عشان كنا عوزين ننام أويييي ... خلصنا على 6 بعدين رحت مشوار صغير وروحت والمواصلات كانت زحمة أوييييييييي وبردو أفراح وبلا لين وبييييب بيييييييب بييييييييييب

الحمد لله :)

---------------------------------------------------------------

الأسبوع الجاي غريب، هيبدأ بأكتر مادة مش فاهماها وهينتهي بأكتر مادة ما حضرتهاش وفي النص في مادة مش عارفة أستخدم فيها فولو ماستر ولا خشب ؟؟؟؟

++ :D ++

بجد ، مت من الضحك لما شفت المايل، وأنا لسة مش فاهمة المطلوب في الأساينمنت خااااااالص بس هسأل حبيباتي في سنة رابعة وإن شاء الله هعرف الخبر اليقين

عشان انا ما بقيتش بسأل خااالص على الجروب العظيم بتاعنا عشان الدفعة ما شاء الله فيها ناس عظماء وأنا غلبانة وعلى قد حالي

ربنا يسهل بقة ويعديها على خير

هاااااانت أوي الحمد لله

والحمد لله ما اتقبلتش في أي تي وركس (قال يعني كنت متوقعة إنهم ياخدوني) بس يكفيني شرف المحاولة والجيات أكتر من الرايحات وأكيد ربنا عاينلي حاجااااات أحسن

وإلى لقاء قريب مع أحداث جديدة

ويا رب ما حدش يصاب بالملل

وطبعا كما عاهدتموني

:) ويبقى الأمل :)

قصاصات ما بعد الأو آآآآآآر

وأخيييييييييرا الحمد لله هستلم اللي كنت مستنياه من شهريييييييييين !!! اللهم لك الحمد كله ... مش قادرة أستنى ليوم الثلاثاء .... عاوزاها دلوقت حاااااااااااالا .... عجيب ابن آدم، يقعد شهور مستني حاجة وأول ما تقرب أوي، صبره ينفذ ويكون عاوزها في ثانيتها
----------------------------------------
ألف مبروك لصاحبتي، أختها ولدت بنت ما شاء الله، وصاحبتي الثانية أخوها جاب ولد الله أكبر ... ربنا يجعلهم ذرية صالحة وقرة عين لوالديهما ..... :)
-----------------------------------------
أحلى حاجة لما الواحد يقعد أقل من يوم ما يفتحش البريد الخاص بجروب الدراسة، ويفتحه بعد الامتحان يلاقيه ملياااان أسئلة وإجابات خاصة بالمادة اللي لسة طالع منها !!! والله أنا قعدت أضحك وأمسح، أضحك وأمسح =)) ....
------------------------------------------
يقول الشيخ محمد العريفي في كتابه "استمتع بحياتك " : الناس كلما أشعرتهم بقيمتهم وأظهرت الاهتمام بهم، ملكت قلوبهم وأحبوك .... ماشي، أنا كدة فعلا، بحب اللي بيحبني ... بس، بالنسبة للناس التانية، صراحة أنا بعترض على كلامه دة أوي... أنا مع أغلب الكلام اللي كاتبه في الكتاب بس أنا مجربة الموضوع دة وللأسف الناس بتتقل أو بتبعد أكتر (مش عارفة ليه) ..... ممكن المفروض ما أحطش قاعدة بمجرد إني قابلت 2-3 كدة، ما أعرفش بس أنا بحس فعلا الواحد لما يحس إن حد بيحبه، بيتهرب منه وبيبعد عنه وبيتقل أوي
---------------------------------------

أريد موتا هادءا لا يشعر أحد فيه أنني رحلت عن دنياهم .. لا أريد دموعا ولا عزاءا ولا حداد ... يكفيني كفني وقبري ... ما فائدة البكاء إن كان سينتهي سريعا وتحترق ذكراي بعد أيام ؟؟؟ لم أشكل فارقا في حياتهم أثناء حياتي، لا أظنني سأفعل شئ بعد مماتي !!! الموت ليس موت الجسد والروح فقط ولكنه موت المشاعر وقد مات ما تبقى من مشاعري .... الآن أنتظر موت الجسد والروح ... ولكنني لست مستعدة ... أوراقي ليست معي ولم أحزم أمتعتي وحقائبي بعد ... من منا مستعد ؟؟؟ لا أحد ... اريد موتا صامتا، أرجوكم لا تنوحوا على فراقي ... أظن أنه لا داعي للرجاء، فأنتم لن تبكوا علي سواء طلبت منكم ذلك أو لا ... ما فائدة البكاء ؟؟؟ لا شئ ، إذا لا تبكوا ... ولكنني أثق أن دفتري سيشتاق إلى كلماتي وآهاتي ولن يجد من يبوح له ويؤنس وحدته من بعدي ... يكفيني بكاء دفتري علي، فطالما بكيت أنا عليه وطالما نمت محتضنة إياه ... كم طمأنني وإن كان يكذب أثناء حديثه .. سأغفر له كذبه علي حين قال أن كل شئ سيكون على ما يرام ... فلم يكن أي شئ على ما يرام في يوم ما ... فكلماته هي التي جعلتني أكمل المسار بعد أن فقدت مصباح طريقي وانطفأت شمعة حياتي ... شكرا لك دفتري، أرجو أن لا يطول بكاؤك علي ... حقا سأشتاق إليك ... أرجو أن يحرقوا دفاتري كلها بعد رحيلي وينثروا رمادها في البحر !!!

قصاصات ما قبل ال"أو آر"ء

الحمد لله، صحباتي في سنة تانية حلوا كويس أوي ... ربنا يوفقهم على طول يا رب وعقبال الجميع في ثالثة وأولى بكرة

---------------------------------------------------------------------

Many of life's failures are people who did not realize how close they were to success when they gave up--- Thomas Edison

--------------------------------------------------------------

شعور غريب، انقباض في الصدر، ضيق في التنفس، تقلص في الأمعاء، صداع ودوار ... ليس بالخوف، وليس بالتوتر وحتما ليس بالقلق، إذا ما هو ؟؟؟ سيكون امتحان الغد مميزا ما بين العبقري جدا جدا والعبقري جدا، ولأنك لا تنتمين لأي من هذين الصنفين، إذا، لم عليك الذهاب ؟؟؟ أشعر بالخجل لشعوري بمثل هذه المشاعر وقد بلغت العقدين، وهي ليست بالمقابلة الأولى، فقد قابلت قاعة الامتحانات مرات عدة وفي نفس الطابق وفي مقعد يقع خلف نفس الطالبة وكنت في بعض المرات في أسوأ لحظات حياتي، ألا تذكرين يوم الكونترول ؟؟؟ ولكن، صدق القائل، فهذه المشاعر لا تفرق بين الكبير والصغير "أنا مهما كبرت صغير" ...

يتصارع صوت صغير ضعيف يكاد لا يسمع مع أصوات كثيرة قوية الصدى ... صه !! انه صوت الامل، "فدوى، لا تقلقي، لن يضيع الله تعبك"، ولكن من منا لم يتعب ؟؟؟ ولكن سرعان ما تغشاه الأصوات الأخرى، "انت ناسية إنه قال إن الدفعة هتتقسم قسمين، امتياز ومقبول وما عندهوش حاجة إسمها في النص ؟؟ وما دامك أكيد مش مع الامتياز، هتكوني فين يعني ؟؟ كمان انت كنت مذاكرة للميد ترم وفاهمة كويس أوي وحصل اللي حصل، إيه اللي هيخلي الوضع يختلف بكرة " ؟؟ ... يرد الصوت الضعيف "ربنا" ....

ممكن تستغربوا اني قاعدة بكتب، بس دي طريقتي الوحيدة للتخلص من مشاعر المفروض ما تكونش موجودة خااالص بكرة، في ناس بتاكل زيادة، ناس بتسيب كل حاجة وتروح تنام وأنا أقعد أصحيها، ناس بتقعد تعييط وأنا أقعد أهدي فيها، بس أنا بلجأ للكتابة، الحاجة الوحيدة اللي ما بتزهقش من كلامي وديما موجودة في أي وقت تسمع ... بس دة ما يمنعش طبعا إن يكون في بردو نوم زايد وأكل زايد ودموع مالهاش سبب ....

للأسف، دي المادة الوحيدة اللي فاهماها كويس أوي أوي (ما شاء الله الله أكبر والحمد لله) بس مش عارفة مالي ؟؟؟ ممكن عشان قاعدة بذاكر داينامك ؟؟؟ شكلي هحفظ المسائل مع إني نظام الحفظ مش بيمشي معايا خالص ومش بيمشي مع الدكتور خاااااااااالص...

كل شوية عاوزة أهرب من المكتب، أنا اللي حضرت الغداء، أنا اللي غسلت المواعين، أنا اللي عاوزة أغسل الهدوم، فجأة نفسي أروق البيت، وفجأة افتكرت إن في كتب نفسي أخلص قراءتها، وأشعار عاوزة أعدي عليها وأناشيد نفسي أسمعها ومقاطع نفسي أتفرج عليها .... سيبت كل حاجة وروحت أنام، حلمت بناس كتيرة أوي من الدفعة عمري ما كنت بفكر فيهم، أمال إيه اللي خلاني أحلم بيهم ؟؟؟؟ وكمان أحلام مضحكة اوي وقمت من النوم بضحك على اللخبطة اللي شفتها وبقول "الدفعة قاعدة بتذاكر وسيادتك رايحة تنامي وتحلمي بيهم" ؟؟؟ خلاص بلاش أنام، خليني آكل ... "بس انت لسة مخلصة أكل!!!" .... طب أعمل إيه ؟؟؟ "خليني أعيط" ... "وهتستفيدي إيه، روحي كملي مذاكرة أفيدلك ربنا يهديك" ....

شكله ما فيش مفر من الداينامك ومافيش مفر من الأو أر وأكيييد ما فيش مفر من بكرة ....

"ألا بذكر الله تطمئن القلوب" ... لا حول ولا قوة إلا بالله، لا إله إلا أنت سبحانك إني كنت من الظالمين ... حسبي الله لا إله إلا هو عليه توكلت وهو رب العرش العظيم ... يا رب انت عارف أنا تعبت في المادة دي قد إيه فظني فيك أنك لن تخيب رجائي ...

يا رب أكون أحسنت عملا "إن الله لا يضيع أجر من أحسن عملا" .......

أروح بقة أشوف الشركة الفروض توظف ولا ترفد ....

:) ويبقى الأول :)

خواطر متفرقة

ء" إِنَّهُ مَنَّ يَتَّقِ وَيَصْبِرْ فَإِنَّ اللَّهَ لاَ يُضِيعُ أَجْرَ الْمُحْسِنِينَ " .... سورة يوسف الآية 90

الحمد لله :)

-----------------------------------

ولكني نبذت زمام أمري ** لمن تدبيره فينا عجيبُ

------------------------------------------

واكتشفت أنّى لا أعرف فى حياتى الا حقيقة واحدة ،،، وهى أننى لا أعرف شيئا عن البشر

------------------------------------

كيف تريدين الناس أن يفهموك وأنت لم تقومي بفهم نفسك حتى الآن ؟؟؟؟

------------------------

زعلانة أوي إنها مش جيا 15-6 بس مبسوطة عشان إن شاء الله هقدر أذاكر أركيتكتشر

-------------------------------------

أحيانا فعلا في وسط الحزن أو العصبية بتكتشف حاجة حلوة، مثلا أنا كنت قاعدة بكتب وأنا متنرفزة على مايكروسوفت وورد وبالغلط دوست على كونترول وشيفت بدل ألت وشيفت عشان أحول بين اللغات واندهشت لما لاقيت اتجاه الكتابة اتغبر من الشمال لليمين إلى من اليمين للشمال !! فرحت إني اكتشفت حاجة بسيطة ولاقيت نفسي قاعدة بجربها ونسيت سبب نرفزتي !!!

-----------------------------------

أنا متغاظة أوي ونفسي أعيط .. كتبت كلام جميييل أوي عن نفسي (ما أقصدش إني مدحت نفسي، بالعكس خااالص :) ) في ظهر ورق كنت بذاكر فيه ونسيت ورميت الورق ورمينا الزبالة !!! بس عادي يعني، اللي خلاني أكتبه، يخليني أكتب غيره وأحسن إن شاء الله : ) ما دام الكاتب هو نفس الشخص ...

-----------------------------------------

لا ضرر في أعادة ترتيب الأولويات وإسقاط بعض الأهداف ... لا ضرر في التعديل طالما أن هناك خطة بديلة ....

I AM SOOOO PROUD, I FEEL LIKE CRYING!!!

دي صورها وهي صغيرة عشان ما حدش يتخض وما ينفعش أحط الصور وهي كبيرة عشان الرقابة

يا الله !! بجد أنا قاعدة بطير فوق خالص ومش عاوزة أنزل على الأرض تاني أبدا

ما شاء الله الله أكبر اللهم لا حسد

يا رب احفظها من عيون الناس وأحقادهم يا رب وحقق لها كل اللي نفسها فيه وزيادة

يا رب من نجاح لنجاح أعلى

أختي يا ناس الأولى على كلية الطب !!! ما شاء الله، الله أكبر

أختي لولي حبيبة قلبي وأمي التي لم تلدني اتكرمت امبارح عشان طلعت الأولى على كلية الطب اللي هي فيها

ما شاء الله، بقالها 6 سنين بتطلع الأولى كل سنة

الله أكبر ، بجد فرحتني أوييييييييييييي

أنا كنت في حالة زعل فظيعة وقلت يا رب نفسي أسمع أي خبر مفرح أوي يطلعني من اللي حصل

وأختي الحمد لله اتكرمت امبارح على إنها الأولى على دفعتها لمدة 6 أعوام متتالية

يا رب احفظها من كل سوء

وعقبال ما أفرح بباقية أخواتي وأخويا يا رب يا رب يا رب

سبحان الله، كإني أنا اللي اتكرمت .... كان نفسي أوي أكون معاها

الحمد لله على كل حال وإن شاء الله أكون معاها في المرات الجية

يا رب احفظها واسعدها وحقق لها كل اللي نفسها فيه

I cant express my happiness

I told her Allah will give u more than anyone else, I never lost hope and always filled her with it

أيوة ربنا هيعوضها أكثر من أي حد تاني وهتشوف إن شاء الله

دي مجرد البداية يا حبيبة قلبي وإن شاء الله اللي جي أحسن

الصور كلها على الفايس بوك بس طبعا مش هقدر أحطها هنا عشان الرقابة

أختي يا ناس الأولى على كلية الطب !!! ما شاء الله، الله أكبر

قصاصات ما بعد الرجوع

خيبر خيبر يا يهود، جيش محمد سوف يعوووووووود ... إن شاء الله قريبا جدا

------------------------------------

سبحان من يخليك فجأة تكره حاجة كنت بتحبها أوي وتستغرب إزاي كنت بتحب الحاجة دي في يوم من الأيام

------------------------------------

الحمد لله بقيت أحسن بكتيييييير .. حاسة إني مستقلة، ما فيش حاجة ممكن تخوفني أو تشغل بالي .. الحمد لله، ارتحت أوي .. فعلا كان لازم أخد القرار دة من زمان بس أديني بتعلم وأكيد أنا أحسن من غيري اللي ما حصلهوش نفس الموقف

----------------------------------

أحسن مقابلة في حياتي ... بجد استمتعت بكل لحظة فيها ولشدة دهشتي استمرت ساعة إلا ربع !!!!! يا رب اعمل اللي فيه الخير وارضيني بيه

------------------------------------

(63) -> I am happier !! الحمد لله :)

-----------------------------------

مقولة ضحكتني أوي أوي ... ناس يأست من الحياة

I'm sick of following my dreams. I'm just going to ask them where they're going and meet up with them later.

--------------------------------------

وتستمر رحلة القراءة

استمتع بحياتك لمحمد العريفي

قصة الالتزام والتخلص من رواسب الجاهلية لمحمد حسين يعقوب

فوضى الحواس لأحلام مستغانمي

Breaking Dawn by Stephen Meyer ( the 4th part in the twilight series ;-) ) ... I loooooooove her books and cant wait for Eclipse !!!

بجد القراءة بتشفيني من حاجات كتيرة أوي بعد فضل الله ... وربنا الطبيب الأعظم :) ء

-----------------------------------

:) سيظل الأمل بإذن الله :)

----------------------------------

ربي

الحمد لله، كان يوم جميل أوي ... قعدت مع طنط أم إسلام طول اليوم ... بجد فرحت أوي ... ربنا يشفيها يا رب ويهدي ليها أولادها .... الحمد لله إنها اتبسطت :)

-------------------------------------

إلهي، أدعوك دعاء من اشتدت فاقته و ضعفت قوته و قلت حيلته دعاء الغريق المضطر البائس الفقير الذي لا يجد لكشف ما هو فيه من الذنوب إلا أنت , فصل على محمد و آل محمد واكشف ما بي من ضر انك ارحم الراحمين لا اله إلا أنت سبحانك إني كنت من الظالمين

----------------------------------------

ء"عَسَى رَبُّنَا أَن يُبْدِلَنَا خَيْرًا مِّنْهَا إِنَّا إِلَى رَبِّنَا رَاغِبُونَ " ... سورة القلم الأية رقم 32

-----------------------------

اللهم إني أشكو إليك ضعفي وقلة حيلتي وهواني عليهم .... إلى من تكلني ؟؟؟ إن لم يكن بك علي غضب، فلا أبالي، غير أن عافيتك هي أوسع لي ... لك العتبى حتى ترضى ولا حول ولا قوة إلا بك

-----------------------------------------

اللهم إني أشكو إليك أمورا أنت تعلمها ... مالي على حملها صبرٌ ولا جلدُ

--------------------------------------

ربى لقد ضعفت ولا غيرك يقويني لقد يئست ولم أفقد فيك يقيني لقد ضللت ولا سواك يهديني . يارب ارحمني في لحظة ضعفي وابعد عني شيطاني ونفسي واهدي لي قلبي وعقلي واغفر لي خطيئتي ويأسي يارب. إلى من أشكو وأنت موجود؟؟؟ ولمن أبكي وبابك غير مردود؟؟؟ ومن أدعو وأنت فقط المعبود؟؟؟ ومن أرجو ورجائي فيك غير محدود؟؟؟ يارب، اجعل عفوك عني دائم، ورضاك علي قائم، واجعلني عن الذنوب نادم، ولباب توبتك قائم

----------------------------------

:) ويبقى الأمل :)

حقيقة فدوى .....ء

" إِنَّ اللَّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنفُسِهِمْ وَإِذَا أَرَادَ اللَّهُ بِقَوْمٍ سُوءًا فَلاَ مَرَدَّ لَهُ وَمَا لَهُم مِّن دُونِهِ مِن وَالٍ "

سورة الرعد، الآية 11

زي التفاحة اللي قشرتها ناعمة وسليمة وبتلمع من برة بس مجرد ما تفتحها، تلاقيها سوداااااااااااااء ومدودة من جوا :) ...... رحم الله امرئ عرف قدر نفسه :) ..

يا ريتني كنت طفلة، وكل همي لعبتي،

يا ريتني كنت عصفور، وكل همي أكلتي ...

يا ريتني كنت هواء، ماورايش أي هموم،

أو حتى كنت ميّة، تتبخر وتضيع في يوم...

يا ريت الدنيا تخلص، وأسبيها أوام أوام،

أصل إزاي أفضل فيها، من غير أي أحلام ؟؟

الكون غريب بيضحك، على وجعي من سنين،

عمال يقهر فيا، وبيجرح قلبي الحزين..

هو اللي عملته جريمة، ولا عادي المفروض أفرح،

هو أنا مكبرة الموضوع، ولا فعلاً طريقي مش صح ...

قالولي الدنيا جميلة، ابتسمي أكيد هتضحك،

عمالة بضحك لها، مع إن وجعي مُنهك !!

كل يوم ذنب شكل، وتعب ودموع وندم،

عشان أنا أصلا وحشة، ولا عشاني بني آدم؟؟

لازم أغلط نفس الغلط، مع إني براجع نفسي كتييير،

بس بردو برجع تاني، وبنسى ندمي على التقصير...

ممكن يكون في الظاهر شكلي، حلو أوي وأتاخد قدوة،

بس والله جوايا بلاوي، وذنوب بتزداد قوة ...

يا رب إمتى حياتي، هتخلص أو تتغير،

أنا ديما بدعيك وبحاول، بس الأمر محير ...

وحشتني أوي جنتك، مع إني ما أستاهيلهاش،

بس عارفة إنك رحيم، يا رب النار ما أدخلهاش !!

أنا أسفة لو زعلت حد، بعتذر لكل الناس،

والله ما كانش قصدي، أحيانا بيغيب الإحساس ...

وبعمل حاجات غريبة، ما أعرفش إزاي وإمتى،

هو أنا بكون متخدرة، من غير مخدر حتى !!

يا رب أرجوك ارحمني، عذابك مستحيل أستحمله،

لو ثانية زعلت مني، يا ترى مين غيرك هلجأ له ؟؟

سامحني وسامح كل الناس، وخلي الناس تسامحني،

مستحملة غدر الزمان، بس الكون مش مستحملني ...

أكيد اليوم هيجي، اللي هبقى فيه ماشية مظبوط،

وقلبي من جوا يصفى، والتوكل يفضل محطوط..

في قلبي عشان من غيره، حياتي ضياع وآلام،

يا رب أنسى الماضي، وأبدأ صفحة جديدة أوام ...

أكيد هملاها بطاعتك، وهبعد عن الشيطان،

عاوز يضيعني معاه، بس إزاي أضيع وانت الرحمن ؟؟

إن شاء الله أنا هرجع، أحسن من الأول وهنشوف،

مش ههتم بحد غير ربي، وهشيل من قلبي الخوف...

هحط الرسول قدامي، وهمشي على كلام الله،

لحد ما حياتي تخلص، ساعتها بس هبطل الآه ....

بإذن الله هبطل الآه ...

:) ويبقى الأمل :)

:) Dr Moustafa Amin :)

Moments like those force me to write … 3^rd year has ended, with all its nice and painful moments… I sat down, held my pen and decided to write something about it as I usually do … But then I found myself unconsciously writing about the most person who has affected me and had a great positive impact on me this year…

حقاً، إنه "مصطفىً" من بين الأساتذة، و"أمين" في التعامل والتعليم !!!

Dr. Moustafa Amin, what shall I say,

I was very tearful, when I left today…

I won’t be hearing, “ya fandemZ” for days,

I’ll miss all the fun, games and plays…

Although we were always, with projects overloaded,

I now believe that I am, with knowledge flooded…

To my surprise, I understood many things,

U brought into me hope, which others couldn’t bring…

You answered all my questions, and listened to my point of view,

You took care of all details, which other doctors threw…

I can’t remember a lecture, in which I didn’t laugh,

After knowing you my life, was split into half…

A part dedicated to Embedded, and projects only,

The other part without embedded is lonely!!

The first part is tiring, but made my mind bright,

It keeps on expanding, with the second part it’ll fight!!

Every lecture you surprise us, with a massive TO DO,

I always try to solve it, but have got no clue….

You told us it’s not bad, to make a mistake,

It’s just bad to have a “good” risk, and not take…

You made us hungry, with PASTA and CAKES,

I now love food, and enjoy what my mom bakes !!

You’re our source of inspiration, with you our life is great,

Three lectures a week are NOT enough, we really needed eight !!

Your advice help me in life, everything seems so fine,

I now enjoy living, happiness became mine !!

Allah knows I’m honest in every word I said,

You are my role model, your ethics I shall spread !!

Thanks for everything, you have done for us,

I hope after this poem, I’ll get a bonus !!

الكلام دة مش مجاملة ولا رشوة عشان أصلا الدكتور عمره ما هيدخل هنا ولا هيشوف الكلام دة، بس بجد الكلام دة صادق أوي وهو فعلا من الشخصيات النادرة اللي صعب أوي الواحد ينساها ... بشكره بشدة على أسلوب شرحه، شخصيته، تعامله، حماسه، فعلا خلى المحاضرات ممتعة أوي ودي حاجة إحنا كنا مفتقدينها أوي أوي ... فيه 4 أسابيع الترم دة أنا ما كانش ليا نفس خالص أروح الكلية لأسباب وظروف كتيرة بس كنت باروح يوم الحد والخميس بس عشان أحضر محاضراته وما كنتش بحضر أي حاجة تانية : ) ...

ربنا يجزاه خير الجزاء ويرفعه ويرفع بيه وينفعه وينفع بيه ويجمعنا بيه في الجنة يا رب

أكثر كلمة أثرت فيا وبدأت فعلا أطبقها في حياتي العملية والاجتماعية، " مش عيب إنك تغلط، بس العيب إنك ما تحاولش أو ما تتعلمش من غلطتك " ... أنا إحتجت الكلمة دي اليومين دول والحمد لله طلعتني من حالة فظيعة كانت أصابتني (ومن أعمالكم سلط عليكم :(( ) ..... أنا فعلا غلطت كتييير أوي في حياتي بالذات الحياة الجامعية بس مين فينا ما بيغلطش ؟؟ وأنا الحمد لله إتعلمت منه إني ما أزعلش إني غلطت، بالعكس أفرح إني حسيت بغلطتي وراجعت نفسي ....

مع أطيب التمنيات بمستقبل باهر وأن يحقق الله لكم كل ما تريدون ويسعدكم أنتم والأسرة الكريمة

: ) HopefulHopes : )