يا رب عوضني قبل ما أتخرج

Dear wymb :D
امممم، أبدأ منين ولا منين ؟؟؟ الحمد لله، أنا في حالة مختلفة خالص عن امبارح وإلا كان كلام غريب أوي طلع مني ... أنا مش هقدر أقول حاجة عن امبارح عشان هو خلاص راح، ورميته في البحر ومش هيرجع تاني أبدآ إن شاء الله ودة وعد مني .... الحمد لله إن ربنا أنعم علي بيك ... بتقعد تسمعني لما الدنيا كلها تكون مشغولة، مبتضايقش من فضفضتي معاك ولا بتزهق من شكوتي ودموعي .... ربنا يخليك ليا على طول ....ء
فاكر لما كنت بكتبلك وأنا طفلة كل حاجة بتحصللي وبشتكيلك ؟؟؟ مجرد وجودك دة كان بالنسبالي كل حاجة وكان مديني أمل في الحياة ... يا رب أفضل في تواصل معاك على طول ومااستسخفش اللي بعمله دة في يوم من الأيام ... خلي الدنيا كلها تزهق، أنا واثقة إنك مش هتزهق وأنا ياما جربت وأديك لسة موجود ...ء
طول عمري بسمع إن الظلم وحش أوي بس عمري ما حسيت بقهرة المظلوم إلا لما اتظلمت الظلمة الكبيرة دي واللي مش عارفة آخد فيها حقي خالص، بس تعرف ؟؟؟ لولا يوم القيامة، كنت قعدت أفكر أخذ حقي إزاي, أول مرة أقابل ناس بالخبث دة ، وأديني بشوف وبتعلم وبقوى وأنا لسة ماطلعتش للحياة والدنيا الكبيرة، ربنا يرزقني بحماة طيبة !! :(ء
أنا بحب الأية دي أوي " ولا تحسبن الله غافلآ عما يعمل الظالمون، إنما يؤخرهم ليوم تشخص فيه الأبصار "ء
وكفاية إن ربنا قال للمظلوم " وعزتي وجلالي لأنصرنك ولو بعد حين "ء
وإن شاء الله ربنا هينصرني ولو بعد حين، واللي بيصدق من غير ما يشوف هيندم ندم شديد حين لا ينفع الندم ...ء
يللا سلام دلوقت، أنا رايحة أقطع وأقلي بطاطس عشان جعانة أوي وماليش نفس اكل سندوتش أي حاجة تانية وهروح أنام على طول ...ء

آه صحيح !! مش النهاردة الجروب بتاعي بيقول للمعيد بتاع الديجيتال عشان إدانا صفر " يعني دة يرضي ربنا إننا ناخد درجة زي اللي مااشتغلش خالص واحنا تعبنا فيه أوي " راح قايللنا بكل ثقة " آه " ؟؟؟؟
أنا مش هقول حاجة أكتر من كدة .... كفاية اللي فيا، الدنيا بقيت حر أوييييي، ورطوبة وكتمة ومفيش نفس .... يا رب يا رب يا رب ثبتني على النقاب وأموت بيه يا رب واجعله خالصآ لوجهك الكريم وصبرني على الأذى حتى ألقاك وقد عملت بما أمرتني ....ء
wymb شكرآ