اهتم بالسبعة يوميا

سمعت حلقة للدكتور ابراهيم الفقي من كام يوم، طبعا الدكتور إبراهيم غني عن التعريف، هو رائد في التنمية البشرية وحاصل على حاجات كتيرة أوي ما شاء الله وفعلا كلامه مؤثر وبناء أوي ما شاء الله

المهم، في الحلقة دي كان بيتكلم على إزاي إن الواحد كل يوم لازم ياخد باله من 7 حاجات وأي إنسان ناجح في الدنيا عمره ما نسى واحدة منهم .. قعد يقول إنه عمل مقابلات مع ناس كتيرة أوي ناجحة وكلهم أجمعوا على الحاجات دي
دي 7 جوانب لازم الإنسان يديها من وقته كل يوم

أولا: الجانب الروحاني : ويتضمن قراءة قرآن، ذكر، تأمل في خلق الله .. لأسف الناس بتفتكر الحاجات دي بس لما تكون متضايقة أو وقعت في مشكلة لكن في وقت الرخاء، قلما بنفتكر ربنا
ثانيا: الجانب الصحي: ويتضمن مثلا مشي ربع ساعة يوميا عشان دي أسهل رياضة ومتاحة للجميع .. طبعا المشي مش إن الواحد يتمشى بقى على قشرة بيضة، المفروض مشيه يكون سريع (شبه هرولة) عشان يستفيد من مشيه والمفروض يتنفس بعمق طول ما هو ماشي وحبذا لو مشى في حتة فيها هواء زي مثلا على البحر أو الطريق من الكلية للبحر والعكس بالنسبة لنا
بالنسبة للأكل والشرب لازم الواحد يشرب 8 كبيات ماء في اليوم ويتنفس بعمق دائما عشان أهم حاجة للمخ الماء والأكسجين ... كمان لازم يهتم بأكله وياكل خضار وفاكهة على الأقل فاكهاية وطبق سلطة يوميا.... لازم يقلل من الدهون أوي أوي أوي عشان حتى لو مش بتبان على جسم الواحد من برة، فممكن تعمل انسداد في شريان القلب ربنا يعافينا ... كمان يقلل من السكريات عشان لو هو ما حرقش السكريات دي هتتحول لدهون ... طبعا احنا بنكون في الكلية أغلب اليوم فبنقضيها شيبسي وبسكوت وسموم مالهاش أي لازمة وربنا يعافينا من السرطانات اللي الحاجات دي بتجيبها، بنشبع جسمنا بحاجات بتضرنا
ثالثا: الجانب الشخصي: هنا الواحد بينمي من نفسه... لازم الواحد يقرأ على الأقل نصف ساعة يوميا والمفروض النص ساعة دي ما تكونش متعلقة بشغل الواحد أو بدراسته، يعني لازم يتوسع ويقرأ في كل حاجة تقريبا... طبعا احنا لا بنقرأ ولا حاجة، ممكن بس في الأجازات بس أنا عودت نفسي أفضل ماسكة كتاب معايا عشان منين ما أكون مستنية حد أو بين الفترات مثلا لو مش بعمل حاجة، أقعد أقرأ فيه أفيدلي من الكلام والله
رابعا: الجانب العائلي: يكلم حد من أقاربه ما كلمهوش من زمان، يقعد مع أسرته شوية ... احنا بنفتقد الحاجات دي كتير أوي لما بننزل بدري ونرجع متأخر وولا بنشوف حد ولا حد بيشوفنا في البيت ... أنا فاكرة إني كنت بقعد أكلم أهلي وأنا في الكلية السنة اللي فاتت عشان بكون عارفة إني مش هلحق أكلمهم اليوم دة لما أرجع فبعوضه مثلا بالكلام على الموبايل
خامسا: الجانب الاجتماعي: لازم يسأل الناس عن أحوالها ويكلم اللي حواليه ويطمئن عليهم ... يقعد يواسي حد زعلان ولا يساعد حد محتاج ... كمان يسأل عن صديق ما كلمهوش من زمان .. المشكلة إن الواحد كتير بيقول ليه أكلمه إذا كان هو مش بيسأل عليا بس ببساطة الواحد يحط نفسه مكان التاني، ياما انشغلنا عن الناس ... كمان الواحد ما يعرفش ظروف اللي حواليه فلازم يعذره وما يقعدش يلوم فيه إنه ما كانش بيكلمه
سادسا: الجانب المهني: الواحد يهتم بشغله ويشوف إزاي ممكن يحسنه ولازم يحب اللي بيعمله ... طبعا المرحلة دي بالنسبة لكثير مننا تعتبر المذاكرة والدراسة عامة
سابعا: الجانب المادي: الواحد يهتم بمصدر المال بالنسبة له وينميه .... لاحظ إنه حاطط الماديات في آخر حاجة بس للأسف هي بقيت أول حاجة مهمة لكل الناس وبينسوا على حسابها كل الحاجات اللي أهم منها .. طبعا أكترنا بيكون باباه هو المصدر المادي ليه، ربنا يخليه لنا ويقدرنا نبره يا رب
أنا قعدت أفكر ليه هو قال الفلوس آخر حاجة مع إنها فعلا مهمة أوي عشان الواحد يعرف يعيش ؟؟؟ لقيته بيرد في الحلقة "أصل بالعقل كدة، لو الواحد علاقته بربنا كويسة، مهتم بصحته، الناس بتحبه عشان تعاملاته معاهم كويسة، بيهتم بشغله، فرحان مع عائلته، أكيد هيبقة ناجح في شغله ففلوسه هتزيد أو على الأقل ربنا هيبارك له فيها" ...

الحلقة دي أفادتني فعلا فقلت أكتبها لعل حد يستفيد أو ممكن أرجع لها لو نسيت عنصر من السبعة في أي يوم ... يا ترى عملت السبعة النهاردة ؟؟؟