مصر التي في خاطري وفي دمي، أحبها من كل روحي ودمي

سلامي لمسقط رأسي، مصر الحبيبة

سلامي لشعب مصر العزيز

سلامي لمن لاقوا حتفهم في مظاهرة "سلمية، سلمية" ونالوا شرف الشهادة لقتلهم ظلماً

سلامي وتحياتي لشباب مصر الذي قام بتنظيم المرور وحماية دياره وعِرضه عندما فر الأمن، فبفضل الله ثم بوجودكم، استطاعت عيني أن تهنأ بساعات من النوم والراحة

سلامي للشباب الذي قضى الليل في البرد القارص ترصدا للبلطاجية والمجرمين الذين أُطلق سراحهم للقضاء على الشعب

تحياتي لكل من ساهم ولو بالشئ القليل لمساعدة الجرحى والمصابين

تحياتي لمن كان يأتي بالطعام والشراب والغطاء لمناضلو التحرير

تحياتي للمعتصمين بميدان التحرير

تحياتي لجرحى (1000) وشهداء (11) ميدان التحرير

تحياتي لمن رفع أكفه بالدعاء للمظلومين وبالدعاء على الظالمين المتمادين في طغيانهم حتى هذه اللحظة

إلى من طاوعتهم أنفسهم على قتل إخوانهم المصريين، بئس البشر أنتم

إلى من اشترى ضميره وذمته ربما بصحن من الكشري أو ببضع جنيهات وذهب لدهس أبناء وطنه بالإبل والخيول، بئس الرجل أنت

إلى من أطلق سراح المجرمين للعبث بأمن مصر وسلامة شعب مصر، سينتقم الله منك قريبا

إلى من قام بدهس عشرات المتظاهرين بسيارات مصفحة، حسبي الله ونعم الوكيل فيك وفي من أمرك بذلك وفي من سكت عن ذلك ولم يفعل شئ

أحداث كثيرة متواترة بدأت بوقفة سلمية يطالب فيها الشعب مطالبا مشروعة واستمرت حتى هذه الساعة بالعنف وسفك الدماء والتحول من الحفاظ على أمن الشعب، إلى السعي إلى إبادته لأنه طالب بحقوق ومطالب ترفعه من أسفل خط البشر وليس خط الفقر إلى خط العيش الذي تعيش عليه أغلب الشعوب

يعتصر قلبي ألما لم يشهد له مثيل ... استمرار للبكاء والدعاء لأكثر من أسبوع والدماء ما زالت تسيل ... لم تصدق الأعين أن الذي يشاهد على التلفاز هو يحدث على الأرض التي نعيش بها

---------------------

يا رب، امتى هنرجع نضحك تاني ونعيش حياة طبيعية ؟؟ سبحان الله، كنا بنشتكي من الروتين اليومي ومن النزول من الصبح لبليل، أدينا بقالنا فترة مش عارفين نتحرك ولا نعمل أي حاجة

أحداث كثيرة أوي بدأت تحصل في مصر ... اللي شجعهم الانتفاضة اللي حصلت في تونس وتغيير الحكومة .. بدأوا بمظاهرات سلمية يوم الشرطة، الثلاثاء الموافق ل 25 من يناير لعام 2011 واستمر لمدة 11 يوم ولحد دلوقت .. أما الجمعة الموافقة ل 28 يناير لعام 2011 فقد سميت "بجمعة الغضب" ... اتفق الجميع على الخروج لمظاهرات سلمية بعد صلاة الجمعة وفي جميع المحافظات ... بدأ اليوم بانقطاع لخدمات الانترنت ولمدة 6 أيام والهواتف النقالة ولمدة يومين عن جميع محافظات مصر ... ثم تساقطت الأمطار لفترة قصيرة جدا في الاسكندرية وأثناء إلقاء خطبة الجمعة.... طبعا أنا من أول ما الموضوع دة بدأ وأنا إيد على قلبي وإيد بتدعي وإيد بتمسح الدموع ... بجد أنا كنت خايفة حد يموت ودة اللي حصل فعلا .. أنا ما كنتش عارفة أعمل إيه، ففتحت قناة العربية وقعدت أتنقل بينها وبين قناة الجزيرة وقناة البي بي سي ... للأسف، ما جابوش أي صورة من اسكندرية، كل الصور كانت من السويس والقاهرة بس ... بس جت حبة أخبار صغيرة أوي من اسكندرية وكانت سيئة للغاية .. الاتصال كان مستحيل بسبب انقطاع الهواتف النقالة بس بردو الناس اجتمعت واحتجت وللأسف المظاهرات السلمية اتحوليت لمذبحة بعد ما الشرطة (الأمن الدولي) اتدخل بقنابل الغاز المسيلة للدموع وخراطيم المياه والرصاص المطاطي وكماااان الرصاص الحي ... بعدين كان فيه المظاهرة المليونية واللي كان فيها تقريبا مليون واحد في القاهرة ومليون في اسكندرية ... بعدين يوم الأربعاء الموافق 2 فبراير 2011 جت ناس راكبة خيول وجمال عشان تقتل المتظاهرين في التحرير وناس كتيرة أوي ماتت وآلاف اتجرحوا .... الناس اللي صامدة في التحرير دي ما شاء الله عندها عزيمة وإرادة من حديد ربنا يحفظهم ويحميهم .... النهاردة 4 فبراير 2011 كانت "جمعة الرحيل" عشان الرئيس يتنحى بس هو مش راضي يتنحى خااالص لأسباب لا يعلمها إلا الله ... بغض النظر الرئيس عمل ولا ما عملش إيه في 30 سنة، انتم إيش عرفكم اللي هيجي بعديه ممكن يعمل إيه ؟؟؟ مين قال إنه هيكون أفضل منه وهيبطل تعامل مع إسرائيل ؟؟ هو في حد يقدر بردو يزعل إسرائيل ؟؟ مين قال إنه هيأكلكم عيش ويشربكم ماء نظيف ويجيبلكم شغل وشقة تتجوزوا فيها ؟؟ ولا انتم أي حد مش عاجبكم هتعملوا معاه كدة وخلاص ؟؟؟ أنا لا ضد حد ولا مع حد ولا بأييد ولا بقف ضد حد، أنا بس ضد الظلم وضد التخريب

الناس بقة حبة منهم بيرموا اللي حصل على الإخوان المسلمين لإعتقادهم إنهم هما اللي بيمثلوا المسلمين وإن المسلمين لازم يكونوا ورا أي مصيبة، بس باين أويييي إن الشعب كله قام مش بس الإخوان (بس هما اتعودوا يرموا أي مصيبة على الإخوان) وكمان أصلا الإخوان مش بيمثلوا المسلمين فقهياً في حاجات كتيرة

طبعا الكل عارف إيه اللي حصل سواء كان في مصر أو برة بس أكيييد اللي قنوات الأخبار تناقلته ولا حاجة بالنسبة للواقع اللي كان بيحصل واللي أنا ما شوفتهوش، وعدد الشهداء والمصابين اللي قالوهم أقل بكتير من اللي فعلا حصل ... منه لله اللي حول مظاهرة إلى مجزرة .. منه لله إللي قضى على حياة شباب وهو أصلا لا يملكها ... يااااه، دة اللي بيقتل نفس واحدة متعمدا، فكأنما قتل الناس جميعا وجزاؤه جهنم خالدا فيها وغضب الله عليه ولعنه وأعد له عذابا عظيما، ما بالكم باللي قتل أكثر من نفس ؟؟؟

الواحد مستغرب ليه الناس اللي بتأييد الحكم الحالي طلعت وبدأت تتكلم (أو تبلطج وتقتل) متأخر أوي أوي، كانت فين أول كام يوم وإيه اللي خلاها تغير رأيها فجأة ؟؟؟ هل عشان زهقت من اللي بيحصل وعاوزة القمع القديم اللي كانت عايشة (أو بتموت) فيه ؟؟؟

------------------

زي ما عودت نفسي، لازم كل ما يحصل لي إبتلاء أو عقبة أقعد أفكر في الإيجابيات وإيه اللي استفدته عشان ما أنهرش من الإحباط والزعل

دة اللي قدرت أوصل له

اتعلمت إني أحمد ربنا على أي وضع أنا فيه وما أشتكيش مهما حصل عشان أكيد في أوضاع أسوأ منه ربنا حفظني منها وأديني بشوف

حسيت بنعمة الأمان اللي عايشة فيه بقالي سنين طالعة نازلة من البيت عشان أشتري أي حاجة أو أروح الكلية أو أجتمع مع صحباتي وبنام براحتي في أي وقت من غير قلق

عرفت الفرق بين الجيش والشرطة

عرفت أسماء أغلب الوزراء السابقين

شفت قد إيه الناس كانت خايفة على بعضها في التظاهر وإزاي بيساعدوا بعض وبيحموا ويأكلوا بعض ما شاء الله

الناس عرفت جيرانها والناس اللي ساكنة معاها في نفس المنطقة بسبب اللجان الشعبية، في الأول كان أغلب الناس قاعدة في حالها لا تعرف حد ولا حد يعرفها

الناس اللي دائما كانت بتتخانق وضد بعض، اتحدت وبقيت كلمتها واحدة

الشباب حسوا بالمسؤولية في غياب الحكومة والشرطة وحموا الأماكن وشالوا الزبالة ربنا يحفظهم ويحميهم ويكرمهم ويجعل لهم أحلى مستقبل ممكن يتخيلوه

الناس كلها اتصلت ببعض سواء صحاب ولا معارف عشان يطمنوا على بعض

وأكيد في إيجابيات كتيرة تانية أنا ما أخدتش بالي منها

بعد أما النت رجع، ناس كتيرة بقة رجعت تصحى وتنام عليه ويا ترى أكثر اللجان الشعبية كسلت عشان النت رجع ولقيت حاجة تعملها ولا عشان خلاص الأمن نزل الشارع ولا عشان قبضوا على الأكثر من 20 ألف سجين ؟!!!؟

ربنا يعدي اللي بيحصل دة على خير يا رب ونعرف النهاية إيه بس ... لا حول ولا قوة إلا بالله وحسبي الله ونعم الوكيل

أستودع الله مصر وشعب مصر