الشيخ الدكتور حازم شومان، أنا بعشق محاضراته وكلامه وأسلوب إلقاؤه ما شاء الله عليه ... ما حدش في الدنيا بيؤثر فيا زيه :(( ... مرة كنت راكبة مشروع والسواق (لدهشتي) ما كانش مشغل حاجة تخرم لك ودانك وتكإبك أكتر ما انت أصلا مكتئب وكلام بايخ مالهوش لازمة ولا ليه أي معنى، (مع إنه ما كانش ملتحي مثلا ولا حاجة سبحان الله)، كان مشغل محاضرة للدكتور حازم (من 3 سنوات تقريبا) وكانت أول مرة في حياتي أسمعه .... صعب أوي أنسى اليوم دة ... كان بيتكلم عن الموت والكفن :( .... لاقيت نفسي بعيط في المشروع جامد أوي، نفسي أقوله ينزلني عشان أبطل عياط وما حدش يتفرج عليا ونفسي أفضل قاعدة أكمل كلامه للآخر ... الحمد لله كملت كلامه وكملت عياط ومن ساعتها وأنا بدور على كل محاضراته وبحاول أسمعها قد ما أقدر وحطيت له كذا فيديو صغير على المدونة قبل كدة تحت "وقفات" ....
يا رب اشفيه وعافيه وارفع عنه .. اللهم يا رب الناس ، يا مذهب البأس، يا شافي يا معافي، يا من لا شفاء إلا شفاؤك، اللهم اشفه شفاء لا يغادر سقما .... لا حول ولا قوة إلا بالله :( :( :(
ما أفتكرش إني عيطت على مرض حد كإنه حد من أهلي فعلا إلا هو :( ... بجد مش قادرة أمسك نفسي :( ... ربنا يكرمه ويسعده ويرفع عنه، كان ليه الفضل الكبير بعد الله في حاجات كتيرة في حياتي اتخلصت منها أو بحاول أتخلص منها وبفشل فبرجع أسمعله محاضرة تاني وأقوى من جديد ... أقوى محاضرات بتهزني وأكتر كلام يرجني ويفوقني هو كلامه ... حماس غير عادي ما شاء الله وطريقة رهيبة في الترهيب لا قوة إلا بالله
شكله وهو نايم على السرير كدة وجعلي قلبي :( :( :( ... يا رب ارفع عنه ورجعه أقوى مما كان
لا حول ولا قوة إلا بالله
2 comments:
شفاه الله وعافاه شفاء لا يغادر سقما
ربنا يشفيه ان شاء الله .. انا كنت سامع من زمان انه عيان ومريض .. ربنا ان شاء الله يشفيه عن قريب
Post a Comment
comments are always welcomed :)