والله وعملتها !!! ء

Countdown: 33 .... :( :( :(

------------------------------

اللهم دبرلي أمري فإني لا أحسن التدبير

اللهم خير لي فاختار لي فإني لا أحسن الاختيار

اللهم اكفني بحلالك عن حرامك واغنني بفضلك عمن سواك

هو ما ينفعش حد يرتبلي حياتي كدة ويقول لي أعمل إيه ؟؟؟ مع إني طول عمري عارفة إن الواحد لما يتغصب على حاجة مش بيعملها حلو، مش زي لما تكون الحاجة بإرادة الواحد .... بس بردو، مالها أيام الكلية ؟؟ القرارات اللي الواحد كان بياخدها كانت محدودة جدا (أسلم late ولا ما أسلمش خالص ولا أسلم في الوقت ؟؟؟ أنام ولا أكمل ؟؟؟ حاجات بسيطة كدة) ... دلوقت الواحد عنده قرارات مصيرية، حياته كلها هتكون مبنية عليها :( ... حاسة إني مش عارفة أعمل حاجة ولا أختار إيه ... طول عمري نفسي أتخرج وأخلص كلية والنهاردة بس نفسي أرجع لها تاني أوي أوي ... إيه اللي خلاني أسيبها بس :( ؟؟؟ لا حول ولا قوة إلا بالله .... يا رب ساعدني، ماليش غيرك ولا حد هيساعدني ولا يقف جنبي غيرك والله :( :( :( .... لا إله إلا أنت سبحانك إني كنت من الظالمين ...

--------------------------------------

احتمال أوي تكون دي آخر يوميات ليا على البلوج لأسباب ما ... أنا ممكن أكتب خواطر، مواضيع مهمة، حاجات مفيدة بس خلاص، ما أتوقعش هحكي هنا حاجة تاني إن شاء الله

من كام ساعة، حققت أمنية من أمانية اللي كنت حطاها الترم التاني السنة دي ... الحمد لله، مش شرط أحلام الواحد كلها تكون ليها علاقة بالدراسة والشغل والارتباط ... فيه أحلام تانية بسيطة (تطبيقها ما كانش بسيط صراحة D:)، بس قصدي حاجات ممكن ما تاخدش أكتر من يوم ومن غير تعقيدات وناس يكون ليها دور في قرارك وناس شايفة إنها عارفة مصلحتك وتعمل الناصحة الأمينة وهي أصلا مش فاهمة أي حاجة عن العلاقات الإنسانية، بس أهو فرض سيطرة وحب تحكم وبس!!!!... ما علينا، مش دة موضوعي دلوقت :( ... المهم بقة، أنا أغلب أحلامي وأهدافي مالهاش علاقة لا بالعلم ولا بالشغل (ممكن عشان كدة مش نافعة في الاتنين ؟؟؟ ههههه) .... بس حاجات ممتعة، بتمتعني أنا شخصياً، ودي أهم حاجة في الحياة ... احنا ما اتخلقناش عشان نعمل اللي كل الناس بتعمله ونمشي ورا كلام الناس وورا الروتين الممل والناس عاوزاك تبقى إيه وبس ...

المهم بقة، يوم من الأيام (كان ليلة تسليم مشروع من المشاريع كالعادة، حيث ظهور الإبداعات عندي بيتم في هذه اللحظات الحرجة سواء كتابة قصص ولا أفكار)، فجأة لاقيتني بقول "إيه رأيك تروحي الكلية مشي من البيت؟؟؟ ههههه، آه والله، ولاقيتني رحبت بالفكرة أوي أوي وببص في الجدول أشوف إيه أنسب يوم .. لاقيت الأيام كلها يا إما بتبدأ 8 ونصف يا إما 10 إلا ربع وأكيد أصلا هوصل مهدودة وهلاقي نفسي رجعت تاني (أكيد مش مشي، غالبا على حمالة أو في عربية اسعاف D: ) ... زعلت كدة، بعدين قلت لا، مش شرط أيام الدراسة، ممكن في الصيف !! نعـــــــم ؟؟ لا ، الصيف هيبقى حر أوي أوي كمان أنا أصلا عارفة ظروفي هتبقى إيه بكرة :( عشان أأجله للصيف ؟؟ بعدين أنا عارفة نفسي، لما أسوف حاجة، غالبا مش بعملها خاااااالص وأنا خلاص الفكرة دخلت في دماغي فأكيد مش هقدر أطلعها ... لاقيت ضربات قلبي بتزيد ولاقيتني مبسوطة أوي كإن حد جابلي هدية (والله) وقررت إني إن شاء الله قبل ما أتخرج، هعمل الحركة دي ... كنت ناوية أعمل كدة الأسبوع اللي قبل الامتحانات بس خفت تحصل لي إصابات خطيرة (ههههه) ولا حاجة وبدل ما أروح اللجنة، أروح المستشفى، فقلت بلاش ... أنسب يوم بقة، كان النهاردة لإننا إن شاء الله نوينا (أهم حاجة النية) نبدأ شغل للمشروع من بكرة ونرتاح النهاردة (دانا ارتحت راحة!!! P:) ....

حاسين يعني إيه تاخد البحر كله مشي من اسكندر ابراهيم (ميامي) لحد الشاطبي ؟؟؟ دانا في الأيام العادية لو السكة فاضية والسواق مجنون وطاير على البحر، بناخدها في نصف ساعة تقريبا !!! وفي الأيام بتاعت (يا رب السكة تسلك :) )، كنت أحيانا بقعد فوق الساعة ونصف !! دي وهي عربية !! مش عارفة أنا حسيت إن الموضوع بسيط وقلت لنفسي بطلي تهويل الموضوع وكتبته عندي عشان اتعلمت إني أكتب أي حاجة عاوزة أحققها بفضل الله (دانا كاتبة حتة دين حاجات D:، يا رب كلها تتحقق) ....

المهم بقة، كان نفسي أبدأ من بعد العصر بحيث الشمس تكون راحت والجو يكون حلو بس خفت ما ألحقش والدنيا تظلم عليا وأنا بخاف من أشكال الناس اللي بتتمشى على البحر في الظلمة ومعاكسات وربنا يحمينا، البحر الصبح بيبقى فاضيييييي ... قلت أنسب حاجة بعد الشروق، كمان على الأقل المناظر العجيبة اللي بنشوفها بتكون نايمة الصبح ربنا يهديهم ويحمينا ... أنا السنة اللي فاتت أيام الميد ترم (ميد ترم ال algorithms بالتحديد)، السكة كانت واقفة خااااالص على البحر ولاقيت كل الطلبة نازلين من المشاريع قرروا يروحوا مشي !!! احنا كنا لسة في سيدي بشر وواحد معايا في المشروع سمعته اتصل بواحد صاحبه وقال له إن كمان أبو قير والترام وكل الطرق واقفة عشان الدنيا كانت مطرت جامد أوي ومش عارف إيه .. امم، يعني خطة أبو قير فشلت ... أنا كنت جايبة معايا اللاب توب (يا جمالي، يعني كل يوم ما كنتش بجيبه وآجي على اليوم دة وأقرر أجيبه؟؟؟!!!) ... المهم، عدد الناس اللي بتنزل من المشاريع وتمشي على البحر قاعد بيزيد وولاد بتجري ( :( ) ومش عارف إيه، أخدت القرار الجرئ قبل لوران بفترة ونزلت أمشي ... المهم بقة، قعدت أهرول عشان ما ينفعش أجري :( ، ووقت اللجنة عدى .. اتصلت بصحابي قالولي إن أصلا ما حدش من المعيدين جه ولا الناس جت، قالولي فيه اتنين تلاتة بس .. "بجد" ؟؟ "لا، مش اتنين تلاتة أوي، يعني 10 " (خليتهم يعدوا كام واحد موجود) ... كويس جدا .. كان ظهري خلاص بيودع عشان شايل 3 كيلو حديد ... ربنا يسامح اللاب توب واللي عمله فينا ال4 سنين دول :( ... قبل سيدي جابر بشوية السكة كانت سلكت فقررت أركب تاني .... وصلت الكلية زي القتيلة وعضلاتي كلها بترتعش ... طبعا دي لا تعتبر رياضة، أنا كدة بدمر العضلات، بس كان موعد اللجنة عدى والحاجة أم الاختراع (مش اختراع أوي يعني) ....

المهم بقة، أنا تهت وأنا أصلا المفروض كنت أتكلم عن اللي عملته النهاردة D: ، مش اللي حصل من سنة P: ... نظراً لإن بقالي كتير أوي مش بنام (أو حتى لو في فرصة أنام، بلاقي نفسي بقوم)، ونظرا لهدة امبارح، نمت تقريبا 10 ساعات (أول أول امبارح نمت 14 ساعة -كنت عيانة أوي وزعلانة وتعبانة ومتضايقة ومحبطة ومكتئبة (ما حدش عنده صفة كمان سيئة ؟؟ ههههه )- ) ، المهم، كان نفسي أنزل من البيت الساعة 6 الصبح بس أنا أصلا قمت 6 فعبل ما حطيت قرآن وأناشيد كتيرة أسمعهم في الرحلة (هههه) على الموبايل وعبل ما قرأت الإكتئاب اللي الناس كاتباه على الfacebook والوداع وكدة، نزلت 8 إلا ربع تقريبا .. بدأت رحلة الألف ميل (ولا أكتر؟؟؟) الساعة 8 بالظبط من عند نفق اسكندر ابراهيم (والله ما أعرف ليه بالذات اخترت دي نقطة انطلاقي، ما كنت ممكن أمشي من البيت ؟ بس قلت أركب لها بعدين أمشي منها) .... طبعا عشان الصيف بدأ والناس بتتفسح (آه والله بيتفسحوا ما شاء الله عادي يعني) لاقيت البحر فيه ناس بتعوم (أنا آخر مرة نزلت الماء كان من 3 سنين :( وما أتوقعش إني ممكن أنزل تاني ... ممكن في الجنة بقة إن شاء الله، أكيد بحر الجنة لا يقارن ببحور وشواطئ الدنيا مهما كانت) .. المهم، قعدت أتنفس هواء الحرية (بردو) وأفكر في كل حاجة ممكن واحد قرب يتخرج يفكر فيها وقعدت افضي عقلي من حاجات (أصلي سمعت في التنمية البشرية إنك كل ما تقاوم عقلك في التفكير في حاجة، الحاجة دي هتقعد ترجعلك، لكن لو خليته، هيفكر وخلاص، مش هيفكر فيها تاني إن شاء الله) ...

كان في ناس قليلة جدا بتتمشى بردو (أكيد ما كانتش حاطة الهدف المجنون بتاعي)، والشمس كانت ساطعة إلى حد ما بس الهواء كان جميل أوي ما شاء الله .. قرأت بردو إنك لما تكون غضبان، غير إنك تتوضى وتغير هيئتك (لو واقف، تقعد ولو قاعد تنام وكدة زي ما الحبيب أحمد بن عبدالله عليه أفضل الصلاة والسلام قال لنا)، ممكن أوي كمان تتمشى أو تجري وتطلع غضبك في الجري .. فأنا تخيلت نفسي بطلع كل غضبي المكبوت والحاجات اللي ما قدرتش أطلعها في المشي دة ولاقيتني برتاح ومستمتعة ... لما وصلت ستانلي، لاقيت نفسي تعبت فقلا أرتاح شوية .. اتفرجت على البحر الموج كان عالي جدا والبحر هايج أوي أوي (سبحان الله، النظر والتأمل في البحر عبادة زي ما أخبرنا الحبيب أحمد بن عبدالله عليه أفضل الصلاة وأتم التسليم) ....

كانت الساعة بقيت 9، ارتحت 10 دقايق تقريبا بعدين كملت .... لما وصلت سبورتنج، لاقيتني تعبت تاني، فارتحت شوية بردو وكملت .. المهم، أنا كل يوم بروح الكلية من كامب شيزار فلما وصلت كامب شيزار حسيت إني كدة عملت اللي كان نفسي أعمله، بس لا، في حاجة قالت لي أكمل لحد الشاطبي (كإن حدود مشوار الكلية من ميامي للشاطبي)، فقعدت أجر نفسي لحد الشاطبي ... الحمد لله وصلت في تمام الساعة العاشرة وثلث، يعني حلم اتحقق في ساعتين بالظبط ولله الحمد والمنة ... كان نفسي أول ما وصلت حد يشيلني كدة لحد البيت .... ههههههه، أعمل مغمى عليا عشان يجيبولي إسعاف ؟؟ المهم ركبت ورجعت البيت قلت أرتاح شوية قبل ما أنزل تاني عشان عندي مشوارين ضروريين قبل ما ندخل في جو المشروع والمعتقل بتاع ال 21 يوم الجايين دول ...

يا رب سهل لنا جميعاً المشروع والمناقشة والشغل والدراسات العليا والارتباط والأولاد والأحفاد (سرحت بعيد كدة ليه D: ؟؟؟) والحياة كلها بجميع جوانبها وأبعادها ونواحيها ... يا رب ادينا القوة إننا ناخد قرارات ونعرف نختار وسهل لنا الحياة ... أنا عارفة إن الحياة عمرها ما هتكون سهلة (أنا طول عمري بسمع في التنمية البشرية وكدة إن الحياة لازم تكون صعبة بس سبحان الله، من أسبوع تقريبا طلع واحد بتاع تنمية بشرية بردو اسمه فاروق (مش فاكرة اسم باباه صراحة) وقال إن دة غلط والحياة سهلة جدا لو أقنعنا نفسنا بكدة وعرفنا نتعامل معاها)، بس انت قادر يا رب تسهلها علينا وتدينا القوة :) ... اللهم أمدنا بقوة من عندك تغنينا بها عمن سواك ... آميـــــــن ....