أغمى عليه ؟؟ ما فيش نبض ؟؟

البوست دة مهم أوي

لو حد أغمى عليه وانت موجود أو عديت لاقيت ناس متجمعة على حد مغمى عليه، تعمل إيه ؟؟

من المرات القليلة اللي قابلت فيها ناس أغمى عليها أمامي، الناس كلها اتصرفت غلط خاااالص، لازم ننشر التوعية ... أنا أخدت كورس في الإسعافات الأولية بعد إعدادي هندسة وروحت مستشفيات وشفت حاجات مريبة وسمعت صريخ من الأوض وتعبت نفسيا وكان هيغمى عليا مرة من اللي سمعته وشفته بس استفدت أوي الحمد لله :) :)

المهم، هما كانوا منبهين عن لو حد أغمى عليه وعن لو حد قلبه وقف ونبضه وقف وتنفسه وقف (مش شرط يكون مات على فكرة)

من سنتين ثلاثة، واحدة زميلتنا في الدفعة أغمى عليها وعلى كمية الأخطاء اللي اتعملت فيها !!!.. أنا بقيت قاعدة بزعق "اسمعوا الكلام، اعملوا كذا"، وكله متنح وواقف مش عارف يعمل إيه ... البنت كان حجمها صغنون كدة فأنا قدرت أشيلها لواحدي عشان قال إيه كانوا خايفين يحطوها على الارض لاهدومها تتوسخ !!؟؟ وقاعدين بيقوموها بالعافية ويوقفوها على رجليها وشغالين تلطيش فيها !!!.. لاقيت نفسي بزعق جامد واللي رايح واللي جاي يقول مالها دي ؟؟ كنا قدام الفصل، حسيت البُنَيَّة هتروح مننا ...

المهم، شيلتها بإيدي الاتنين ونيمتها على دراعاتي (على ظهرها، زي النونو :)) ) (سبحان من إداني القوة إني أعمل كدة)، ورفعت إيدي اللي شايلة رجليها عن مستوى إيدي اللي شايلة راسها وظهرها ... بعد شوية حسيت إني هنهار وهي بدءت تفوق رحت مطنشاهم وحطيتها على الأرض وكملت رفع رجليها عن مستوى جسمها ....

دي كانت تجربة رهيبة بالنسبة لي وكنت قاعدة برتعش وبقول كل الأدعية اللي أعرفها والأذكار بصوت عالي، كنت خايفة حاجة تحصل لها ويقولوا أنا السبب....

الناس بقة تقعد تقولك لو أغمى عليك إنك مش بتاكل كويس وأصلا أغلب أسبابه مالهاش علاقة بالأكل ... ممكن يكون زعل (حصلت معايا مرتين)، توتُر، خوف، وقوف وقت طويل في طابور، تقوم بسرعة من على الأرض، قلة سوائل في جسمك، عدم التهوية الجيدة، حر شديد ....

أولا، هتكلم عن لو حد أغمى عليه، هتكلم عن الأخطاء بعدين التصحيح

الأخطاء، تقعد تقومه وتوقفه على رجليه بالغصب

تقعد تلطشه عشان يفوق

تشممه بارفان

تشربه أو تأكله حاجة بالذات الحاجة الحلوة

التصحيح، المفروض 1) تنومه على الارض وترفع رجليه عن مستوى جسمه عشان الدم يجري لراسه، يعني حضرتك لما بتوقفه بالغصب بتمنع وصول الدم لراسه أكتر !!!.....

2) افتح أول كام زرار للقميص، هوي الطرحة، فك الكرافاتة، فك حزام البنطلون، هويها عليه يعني ...

3) المفروض تحط راسه على الجنب مش ترجعها لورا عشان ما يبلعش لسانه، وابقى ألطشه براحتك لما يفوق D: التلطيش مش بيعمل حاجة

البارفان مالهوش أي لازمة، 4) المفروض تبعدوا عنه شوية عشان يتهوى وياخد نفس، مش تنقضوا عليه وتخنقوه

الأكل والشرب بعد ما يفوق ويقوم تماما عشان ما فيش حاجة تخش في رئته ويتخنق ويموت، كمان أصلا السكريات بتنزل ضغط الدم فكدة هيدوخ أكتر، فاصبر عليه شوية

5) غطيه بحاجة خفيفة

6) جيب مناديل مبلولة بالماء امسحله بيها وجهه

7) لو الموضوع ما ظبطش معاك خلال 1-2 دقايق، اطلب الإسعاف فوراً

-------------------------------

بالنسبة للو حد قلبه وقف، أنا ما عديتش عليا الحالة دي ويا رب ما تعدي على حد أبدا، أنا ممكن لو حصل كدة، أنا اللي قلبي يقف وأقع جنبه ....

المهم، قالوا، أهم حاجة وأول خطوة، 1) تطلب الإسعاف ....

2) تستنى 5-10 ثواني تتأكد إن في نبض أصلا (من عند الرقبة في الجنب) ...

3) ترجع راسه لوراء عشان الهواء يقدر يدخل الرئة ...

4) تحط إيدك اليمين على الشمال من فوق وتدوس على نصف صدره جامد أوي وبسرعة حوالي 100 مرة في الدقيقة وبعمق 5 سنتي لجوا .. ممكن تكتفي ب 30 مرة ...

5) بعدين تقفل مناخيره وتتنفس في فمه بالراحة وتشوف صدره وهو بيرتفع وتدي فرصة لصدره إنه ينزل قبل ما تتنفس تاني في فمه .... تتنفس تلات مرات وترجع تضغط بإيديك على صدره تاني وهكذا ... تكرر الموضوع دة لحد ما يقوم أو الإسعاف يجي ...

ربنا يحفظنا والمسلمين جميعا من إننا نكون المغمى عليهم أو اللي يقابلوا المغمى عليهم