شئ مقزز :(

أنا فعلا حاسة بقرف رهيب ... وبيزيد مع الوقت ... حزن عميق .... مش مصدقة المرحلة اللي وصلنا ليها .... قرف ، قرف ، قرف في كل مكان ... الواحد يكون نازل من البيت بنية الفسحة ، يرجع مغموم ومش مصدق اللي شافه ويتمنى إنه فضل في بيته ..... للدرجة دي ؟؟؟ وفي دولة التوحيد اللي المفروض تكون أكتر دولة متمسكة بالدين الصحيح ؟؟؟ بجد أنا مصدووومة ...

الواحد كان ماشي حاسس إنه الوحيد اللي لابس ... آه والله .... صدق الرسول صلى الله عليه وسلم "كاسيات عاريات" ، لابسة قالعة .... يعني ولا كإنها لابسة حاجة .... والولاد مش فاهمة دول ينتموا لفصيلة إيه ؟؟؟ بنطلون بامبي وشعر معدي الكتف ... وناس بتقول لي إنهم بقوا كمان يعملوا حواجبهم وينتفوا (مش يحلقوا) شعر وشهم !!!!! أنا بحاول قد ما أقدر ما أبصش على حاجة بس في حاجات بتكون ماشية بتصوت وتقول "بصوا علي ، بصوا علي" ..... والله شئ مؤلم ...

شفت أشكال غريبة بمعنى الكلمة وكان نفسي حد يصحيني ويقول "دة كان مجرد كابوس" بس للأسف ، الواقع بعينه .... راحت الهوية الإسلامية ، مافيش انتماء للدين ... مر علي شريط بعض الصحابة الشباب اللي لم يتعدوا ال 22 سنة وقادوا جيوش فتحوا بيها بلاد ، وشفت حالنا قلت "إخي" .... الواحد والله ما عارف إزاي هيربي عياله في بيئة كدة وهيحصل له إيه لو لقى ابنه في يوم لابس كدة ولا بنته بتتكلم كدة ..... 

طب انت شغالة تتكلمي ومش عاجبك حاجة ، عملتي إيه عشان تصلحي الوضع دة ؟؟؟ ولا حاجة ، شاغلاني المشكلة ومغمية عنيا عن الحل .... الشر بقى كتير أوي والواحد حاسس إنه خلاص صعب يتقدر عليه ... قاعد بيزيد وينتشر ويبقى أسوأ ....

عشان كدة الرسول قال : " عليكم بسُنَّتي وسنَّةَ الخلفاءِ الرَّاشدينَ المهديِّينَ من بَعدي ، تمسَّكوا بها وعضُّوا عليها بالنَّواجذِ " ... شايفين الحث ؟؟؟ عضوا عليها بأسنانكم ، لإن الوضع هيبقى صعب فعلاً وهتتفلت من الناس !!! 

وعشان كدة قال : "  سيأتي زمان على أمتي القابض فيه على دينه كالقابض على جمرة من النار " ... شايفين التشبيه ؟؟؟ جمرة من نار !! داحنا بنتلسع من الفرن ونقعد نصوت ونشيل إيدينا ، مين بقى هيقدر يمسك الجمرة بإيده ؟؟؟ ميــــــــن ؟؟؟ :((

وكمان قال : " طوبى للغرباء "، فقيل "من الغرباء يا رسول الله ؟" ، قال " أناس صالحون في أناس سوء كثير من يعصيهم أكثر ممن يطيعهم " ... يــــــــاه ، طوبى !!! قره العين او الفرحه او الجنه او شجره الطيب .... 

 وكمان قال :" ألا إن سلعة الله غالية، ألا إن سلعة الله الجنة " .... غالية أوي :(  ولازم نتعب لها ..... دة الواحد عشان يحصل على حاجة من أمور الدنيا ، بتطلع عينيه ، أمال الجنة ؟؟؟ يا رب أعنا :((

كل ما قرفي يزيد وأحس إن خلاص ما فيش أمل ، افتكر حديث الحبيب محمد صلى الله عليه وسلم عن الفرقة الناجية : ورد في الصحيحين عن معاذ بن جبل، عن النبي صلى الله عليه وسلم أنه قال: "لا تزال طائفة من أمتي ظاهرين على الحق لا يضرهم من خالفهم ولا من خذلهم حتى تقوم الساعة" ....

يا رب اجعلنا منهم 

يا رب اجعلنا منهم

يا رب اهدي شباب وفتيات المسلمين ... :(
خسارة يكونوا أحفاد عمر بن الخطاب وخالد بن الوليد وعائشة بنت أبي بكر رضي الله عنهم جميعاً .... خسارة ....

بعدين نقول "ليه دمنا رخيص وليه بنتدبح؟" .... شوفوا انتم عاملين إزاي ، ربنا ينصركم إزاي وانتم بتقلدوا أعدائكم ؟؟؟

شئ مقزز ....