ء :) الحمد لله :) ء

Dear blogger,

How are u ?? I am gr8 al7amdu li Allah : )

النهاردة كان زي بداية أي يوم، نزلت بدري بنية حضور محاضرة الدكتورة ليلى بس الظاهر إن النية ما كانتش سليمة : ) ... ركبت المشروع وقعدت أقرأ في مصحفي الصغير ( على فكرة، لو كل يوم بتقرأ في القرآن في سكة الذهاب إلى الكلية، هتختم القرآن مرة في الشهر : ) ) وفجأة واحنا في كليوباترا، وإذا بنافورة "ترجيع" دافئ ( أكرمك الله ) تتدفق علي من راسي وإلى قدمي من الست اللي ورايا !!! أعتذر عزيزي القارئ إن كنت قد اشمئززت، ولكن يمكنك تخيل مدى اشمئزازي أنا !!!! فجأة لاقيت نفسي من الخضة قعدت على حجر البنت اللي جنبي ... والست بردو كملت ترجيع عليا !!! وأول ما خلصت كل حاجة ومسحت بقها ( كنت بفكر أخليها تكمل وتمسح بقها بما تبقى من هدومي )، راحت الناس مطلعة لها كيسة !!! المهم، أنا بقة قعدت أحمد ربنا !!! آه والله، صراحة في حاجتين لفتوا نظري أويييييي ... أولا، اللي جنبي نصرانية وكل جسمها مكشوف، فحمدت ربنا على نعمة الإسلام وإني متغطية عشان كدة الترجيع ما جاش على شعري ولا دراعي ( سبحان الله !! لو كانت قعدت مكاني كان زمانها ....... ) ... أتوقع إنها إن شاء الله ممكن تسلم وتتنقب بسبب الواقعة دي ...

ثانيا حمدت ربنا إن واحدة زيي وبذنوبي ربنا ما خلاش مية نار ولا بنزين مثلا يتكب عليها .. أنا أستاهل حاجة أسوأ من الترجيع ( أكرمك الله ) ، بس ربنا رحيييييم أوييييييي

نزلت عند نفق كمب شيزار وهاتك يا مسح، خلصت باكيت المناديل اللي معايا بس ولا هما هنا، الطرحة والنقاب والعباية متغرقين وريحتهم وحشة !!! والله كنت هرجع البيت وأغير بس لاقيت الوقت مش هيكفي أحضر دكتور مصطفى أمين وأنا صراحة ما أقدرش أفوت له محاضرة !!!

روحت الكلية وغسلت العباية والحاجة وهيا عليا بالمية والصابون والمناديل المعطرة وقعدت أنشف بمناديل ... لاقيت الساعة بقيت 9 ونص طبعا خفت أدخل عشان الدكتور يا إما هتهزقني يا إما هتمنعني من الدخول والواحد مش ناقص حرقة دم ....

أنا أسفة لو الموضوع مقرف أو مالهوش لازمة بس أنا لازم أحكي للمدونة كل حاجة بتحصل لي بالذات لو أول مرة تحصل أو لو كانت واقعة لا تنسى وأنا ما اتوقعش هنسى " أول مرة حد يرجع عليا في حياتي كلها " ...

الحمد لله على نعمه، مسلمة، محجبة، مش أنا اللي رجعت، مجرد ترجيع اللي جه عليا ( أكرمك الله )، ..... بجد أنا في نعم، اللهم لك الحمد

ألقاك قريبا بإذن الله

: ) ويبقى الأمل : )