خواطر، مش يوميات (2)ء

ياااا رب :( ... أنت قلت وقولك الحق "أمن يجيب المضطر إذا دعاه ويكشف السوء" ... "ادعوني أستجب لكم" ... "وإذا سألك عبادي عني فإني قريب" ... "إن ربي قريب مجيب" ... "إن ربي رحيم ودود" ... "إن ربك فعال لما يريد" ... "ألم تعلم أن الله على كل شئ قديرّ" ... يا من أمره بين الكاف والنون ... يا من بقبضته ملك السماوات والأراضين وخزائنها .... يا أكرم الأكرمين، يا أرحم الراحمين، يا رزاق، يا حليم، يا معطي، يا منان، يا جواد، يا وهاب، يا رب، يا الله، يا رحيم، يا رحمن، يا قوي، يا قادر، يا جبار، يا من هو أقرب إلي من حبل الوريد، اللهم أنت المجيب وأنا المضطر، فاكشف ما بي من ضر ... اللهم إنك تعلم ما أريد قبل أن أطلبه منك، وتعلم مصائبي قبل أن تحل علي، وتعلم مصيري ومثواي، اللهم فألهمني رشدي وقني شر نفسي ... يا رب طلعني من الدنيا دي على خير

-------------------------------

الحمد لله، لسة الناس فيها خير ... قال صلى الله عليه وسلم "المؤمن كيّس فطن" وقال أيضا "اتقوا الشبهات" ببساطة، لو في احتمال ولو 1% إنك تتفهم غلط، ما تعملش الحاجة دي ... مش عيب إنك تغلط، العيب إنك ما تصلحش الخطأ أو "الشبهة" أول ما تقع

-----------------------------

الحمد لله على نعمة النوم، الواحد بيتعزل فيه عن الدنيا وعن الناس وحتى عن نفسه

-------------------------------

... :) لولا البلاءُ لكانَ يوسف مدلّلًا في حضنِ أبيه، ولكنّه أصبحَ معَ البلاء عزيز

-------------------------------

نفسي أعرف، هل سجاجيد الصلاة فعلا معمولة للصلاة ؟؟؟ أصل كمية الزخارف والزينة والألوان اللي عليها أكتر من السجاجيد العادية ... أنا فاكرة زمان وأنا طفلة في رمضان كنت لما بصلي التراويح بروح المسجد عشان أتتبع الخطوط والمتاهات اللي في السجادة واتخيل نفسي ماشية ما بينهم ومش عارفة فين آخر السجادة وإن في حد بيجري ورايا وأقعد أدور على أفضل مكان في الرسم اللي في السجادة ممكن أستخبى فيه عشان ما حدش يشوفني وأقعد أتخيل كل حاجة ممكنة مع الألوان والأشكال لحد ما الصلاة تخلص وأروح وأنا عملت مغامرة عظيمة مع السجادة المزخرفة وبفكر في مغامرة بكرة هتكون عاملة إزاي ... نفسي أشوف سجادة صلاة سادة

------------------------------

جايز فعلا يكون الواحد غلط وكل حاجة بيعملها غلط بس بردو دة لا يمنعه إنه يصحح حاجة غلط شافها .. أنا ضد موضوع "صلح نفسك الأول بعدين تعالى كلمنا" ... ماحدش أبدا كامل ولو كل واحد اتقاله كدة، ما حدش هيتوجه ولا حد هيعرف الغلط فين والناس كلها هتمشي على هواها أكتر مما هي أصلا "ألردي" ماشية على هواها

------------------------------

أكتر حاجة غايظاني في مصر كمية القهاوي الغير طبيعية والكافيتيريات المهولة ..... القهوة دي أي حد مش لاقي شغل "أو مكسل يدور على شغل" يجي رايح قاعد عليها ومادام راح يبقى أكيد هينسى مسؤوليات بيته وهيبدأ في شرب السجاير والشيشة وال"بحلقة البجحة" في اللي رايح واللي جاي ... والساعات تقعد تعدي كدة وهو ولا هو هنا ... أحيانا فعلا بحس إني نفسي أخد حبة وقت منهم لما بكون مزنوقة وورايا حاجات بالهبل .... اللي يضايق فعلا إنك بتلاقي شباب لسة المستقبل قدامهم قاعدين عليها ومش بيعملوا أي حاجة مفيدة في حياتهم ... ممكن حد يقول لي إنها للتسلية أو الرفاهية، بس أي نوع من التسلية لما تكون محاط بسحب من الدخان ؟؟ أنا لو مجرد شميت سجارة من على بعد مترين، بدوخ وبتخنق وممكن يغمى علي ... الناس بقة مستحملة تدخلها جواها إزاي ؟؟؟ نفسي فعلا أعمل حملة لغلق القهاوي وفتح مراكز للتعليم والتوظيف والرفاهية "العدلة"ء

-------------------------------

في ناس كتيرة أوي عندها مفهوم خاطئ إن الواحدة ممكن تتمشى مع خطيبها كدة عادي (أنا اكتشفت إن مصر كلها تقريبا فاهمة كدة) وهي لا تعلم إنه يعتبر أجنبي بالنسبة لها، يعني زيه زي أي واحد تاني .. الفرق الوحيد إنه يجوز ليه إنه يكلمها في حضور محرم (أخوها أو أبوها أو عمها) ، الأدلة واضحة وما فيش حد حتى اختلف في النقطة دي أبدا بس الناس بتقلد وتعاند وتكابر .. المسلسلات والأفلام متحكمة في الناس بطريقة محزنة

-------------------------------

الناس بقيت تضايق من أي حد يقول لها إن حاجة حرام .. بتدور على اللي يحلل لها كل حاجة، عاوزة تشكل الدين على هواها، مش عاوزة هي تتشكل على حسب الدين ... وفي ناس تقول "في مواضيع أهم من الحرام والحلال اللي بتتكلموا فيه دة" !!! بجد ؟؟

--------------------------------

أول مرة أخد بالي إن في خمور بتتباع في اسكندرية عادي زي العصير كدة وإن في مراقص أو ملاهي ليلية كدة في العلن ... قلبي انقبض ... هل مصر فعلا دولة إسلامية ؟؟؟؟؟

-------------------------------

فى حياة كل منا أشياء ثمينة جدًا لكنها تجعل الآخرين يتهموننا بالتفاهة أو الضحالة أو الجنون إذا عرفوا بها، ونتهمهم نحن بالغباء و تبلد المشاعر عندما يبدون سخريتهم ... د.أحمد خالد توفيق

-----------------------------------

يا أُمّةً ضحكت من جهلها الأُمم :((( ويا أُمّةً داست على أشلاءِ عزتها الأُمم :((( ماذا حل بك يا أمة محمد صلى الله عليه وسلم ؟؟؟ نفسي أشوفك زي زمان بس إزاي وأنا مش عارفة حتى أصلح من نفسي ؟؟ امتى بقة نقول "الله أكبر، فتحت الروم !!!" "الله أكبر، عادت الأندلس" ، ويااااااه لو قلنا "الله أكبر، نحن في الأقصى" !!!! حلمي والله أن تعودي عزيزة والله قادر ... يا رب ساعدني يكون ليا دور في كدة ولو بشئ قليل ... "ابدأ بنفسك"، لو قدرنا ننتصر على نفسنا، هنقدر ننتصر على أي حد والله، بس الدنيا كلها دلوقت بقيت شهوات * شهوات وبجد حاجة تقرف وبيدوروا على طرق لغواية الشباب والبنات بس وغزو فكرهم ودس السم في العسل وتدمير تفكيرهم ومبادئهم ومعتقداتهم وقطع الصلة بينهم وبين المسلمين العظماء بتوع زمان عشان يحسوا إن مالهمش أصل .... يا ترى حد حاسس فينا فعلا إنه من أحفاد "خالد ابن الوليد" و"عمر ابن الخطاب" ؟؟؟ طب لو حسينا وقلنا آه، ليه أعمالنا بتتنافى مع كلامنا ؟؟؟ ... الواحد محتاج ولو قشاية يتمسك بيها .. يا رب نجينا

---------------------------------

إذا وجدت شخصا يتصف بالمرح ويجيد الدعابة وإسعاد الناس، فأعلم أن قلبه ملئ بالهموم .... ء

----------------------------------

هل فعلا الواحد مش بيحس بقيمة الحاجة لما خلاص تجيله ؟؟؟ بيقعد ليالي سهران بيحلم بيها ونفسه فيها أوي وشايفها في تقريبا كل حاجة حواليه بس أول ما تقع في إيده بعيد عن أحلام اليقظة، بيستغرب ليه كان عاوزها قد كدة، طلعت ما تستاهلش كل دة ... ممكن هو الاحساس بالمتعة في الرغبة في حاجة والجري وراها ؟؟؟ ممكن الزهد في الحاجة عشان بقيت خلاص في إيدك؟؟ مش عارفة السبب الحقيقي بس أرجع أسأل نفسي "بس ليه في ناس بتتمسك بحاجة (منصب أو مال أو أي حاجة) أكتر لما تجيلها ؟؟ أكيد الكلام دة فيه خلل بس أنا فعلا مش فاهمة إمتى يطبق وإمتى ينفى ... مصيري أفهم

---------------------------------------

ياليل يا مستودع الأسرار ياموج الظنون *** كم مقلة خافت دياجير الظلام المستكين

حسبته أشباحاً وراحت ترتجي فيه المعين *** لم تدري أن الفجر يطرده أمام الناظرين

من نشيد "يا ليل" لحمود الخضر