سورة الطلاق

يا رب

يظن الناسُ بي خيراً وإني ** لشرُ الناسِ إن لم تعفو عني

----------------------------------------

في حاجات كتيرة أوي أوي أوي فيا محتاجة تتصلح ... تقريبا كل حاجة محتاجة تتصلح ... حاسة إني محتاجة أتكون من أول وجديد :( ... ناس كتيرة شايفة إني كويسة وأنا فعلا من أسوأ الناس على الأرض والله .... أصل الناس ما تعرفش حاجة، ربنا اللي بيستر عباده :( .... محتاجة شهر كدة مع ربنا ومع نفسي أرجع بعديه كيوم ولدتني أمي .... عاوزة أبعد عن كل حاجة لمدة شهر .... عاوزة أفضي عقلي وقلبي قبلها ... رمضان جاي، مش هضيعه إن شاء الله .... هدعي بكل حاجة عاوزاها، كل حاجة مش عاجباني أو مش نافعة معايا تتغير عشان تناسبني .... كل حاجة نفسي فيها وصعبة أو شبه مستحيلة، تتيسر لي ..... حاجات صبرت عليها وممكن ما تحصلش، هدعي تحصل ويكون لي الخير فيها :) طماعة بقة :) ..... أهم حاجة ما أنساش الدعاء بالثبات وحسن الختام ... يا رب اهديني :( .... قبل الفجر، عند الفطار، في كل سجدة، بين الأذان والإقامة، بعد الفرائض، يوم الجمعة .... أوقات كتيرة أوي مجابة فيها الدعوات، مش هسيب واحدة منهم إن شاء الله .... وهدعي لكل اللي بحبهم، واللي أحيانا بدعيلهم وبينسوني أدعي لنفسي :) .... يا رب ساعدني ... محتاجاك أوي أوي أوي .... ما لي سواك :( :( :(

----------------------------------------

سمعت قصص واقعية كتيرة أوي عن ثمرات التقوى وكنت دايما بغبطهم وبقول "ما شاء الله، يا ريتني أكون زيهم كدة" .. تقريبا القصص كلها شبه بعض، بتتكلم عن نفس الموضوع وبتصب في نفس الحاجة .... يمكن عشان أنا بقالي فترة كبيرة أوي أوي (سنيــــن) محطوطة في موقف زييهم افتكرتهم كلهم دلوقت ؟؟؟ يا ترى هتبقى لي نفس العاقبة ؟؟؟ أملي بالله كبيـــــــــــــــــــــر :) .... إن شاء الله عاقبتي هتكون أحسن .... آه والله، أنا واثقة في الله ..... بس أكيد هما اتعذبوا عبل ما صبروا وكدة .... الصبرُ مرٌ مذاقه لكن عواقبه أحلى من العسل :) .... زمان كانوا بيقولوا "الصبر مفتاح الفرج"، يا رب يكون الفرج ما غيرش الطبلة D:

السورة دي مع إن اسمها بيقبض القلب، بس سبحان الله، بحبها أوي أوي ... ربنا يعافينا ويعافي بنات المسلمين من الطلاق ويبعد عننا إبليس وسراياه ويجعل بيوتنا تتبنى على طاعته وتقواه ... آمين

أنا من كام شهر، كنت بتفرج على أحمد الشقيري أو طارق السويدان (مش فاكرة صراحة)، بس المهم بقة، كان بيتكلم عن حاجة أول مرة تلفت إنتباهي .... قعد يقول "ليه ربنا حاطط كل ءايات التقوى تقريبا في سورة الطلاق؟؟؟؟ عشان يفكر الناس إنهم حتى لو الموضوع دة حصل، إنهم يتقوا الله، الناس كلها ناسية موضوع التقوى دة عشان كدة العالم بيخبط في بعضه والأسر بتنهار

النهاردة كنت في الندوة بتاعت الشيخ حاتم فريد الواعر في كليتي الحبيبة، ويا سبحان الله، حسيت إنه بيكلمني، آه والله، كنت حاسة إنه شوية وهيقول "هه يا فدوى؟" ؟؟؟

سبحان الله، الشيخ فكرني بحديث الرسول صلى الله عليه وسلم لما قال "التقوى ها هنا" وشاور على قلبه وقالها ثلاث مرات

المهم، من وأنا في أولى إعدادي تقريبا وأنا الآيات الجاية دي بتستوقفني أوي، مع إني تقريبا ما كنتش حاساها زي دلوقت، بس ربنا كان عارف إني هحتاجها في يوم ما، عشان كدة رسخها في عقلي من ساعتها

أول آية آخرها بتقول " لا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا" ... سبحان الله، بقيت اليومين دول لما حد بيشتكيلي من حاجة أو بشتكي لحد من حاجة، بلاقي نفسي بتنهد وبقول "لا تدري لعل الله يُحدث بعد ذلك أمرا" .... صحيح، ما حدش عارف إيه اللي ممكن فجأة يحصل كدة، حاجة حلوة أوي ما كناش متوقعينها مثلا ... مش عارفة :)

آخر الآية التانية بتقول "وَمَن يَتَّقِ اللَّهَ يَجْعَل لَّهُ مَخْرَجًا" ... يااااه، المخرج بيطول أحيانا بسبب الذنوب أو امتحان من ربنا، بس والله بيجي المخرج لو اتقينا الله حق تقاته .... بيجي وهيجي بس نتقي ونصبر .... افتكرت سورة يوسف لما اخوان يوسف قالوا له " أَإِنَّكَ لَأَنتَ يُوسُفُ" وقال لهم "إِنَّهُ مَنَّ يَتَّقِ وَيَصْبِرْ فَإِنَّ اللَّهَ لاَ يُضِيعُ أَجْرَ الْمُحْسِنِينَ" ... فعلا والله، الصبر الصبر والتقوى والتقوى والصبر ... خليط كدة مع حسن الظن والدعاء والتفاؤل والأمل واليقين والثقة ومعلقة كل يوم على الريق وقبل النوم وكل ما تحس بيأس :) وادعيلي

الآية الثالثة بتقول " وَيَرْزُقْهُ مِنْ حَيْثُ لا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا " ..... قوية الآية دي أوي أوي .... ويرزقه من حيث لا يحتسب، حصلت معايا كتير أوي أوي، ومش شرط الرزق يكون فلوس بس .... ومن يتوكل على الله فهو حسبه .... قوية، سبحانه، الشيخ النهاردة لقيته بيقول الثلاث آيات دول وبيقول "فهو حسبه أي كافيه من كل ما أهمه وأحزنه وضايقه وتعسر عليه" .... يا رب .... ما لي سواك

الآية الرابعة بقة آخرها بيقول " وَمَن يَتَّقِ اللَّهَ يَجْعَل لَّهُ مِنْ أَمْرِهِ يُسْرًا " ... محتاجين التيسير أوي والله ... الشيخ بردو قال "هيلاقي تيسير في رزقه، في تعامله مع أهله، هيدخل بيته يلاقي كل حاجة سهلة، هيمشي برة، يلاقي الدنيا سهلة بما فيها من أكدار .... كلنا محتاجين التيسير ... يا مسهل يا رب

الآية الخامسة آخرها " وَمَن يَتَّقِ اللَّهَ يُكَفِّرْ عَنْهُ سَيِّئَاتِهِ وَيُعْظِمْ لَهُ أَجْرًا" .... اللي فات كله تقريبا كان عن حاجات في الدنيا، دي بقة الأجر الديني أو الأخروي ... يا رب كفر عنا سيئاتنا اللي مانعة عننا الرزق ومؤخرة إجابة الدعاء :(

الآية السابعة آخرها " سَيَجْعَلُ اللَّهُ بَعْدَ عُسْرٍ يُسْرًا " .... سبحانه، آية شديدة القوة، بجد جميلة، ومش هيحسها إلا اللي أمامه عقبة رهيبة مش عارف يتصرف فيها إزاي :( ....

آخر آية بقة، الآية ال12، آخرها بتقول " لِتَعْلَمُوا أَنَّ اللَّهَ عَلَى كُلِّ شَيْءٍ قَدِيرٌ وَأَنَّ اللَّهَ قَدْ أَحَاطَ بِكُلِّ شَيْءٍ عِلْمًا " ..... سبحانه، حد شاكك إن ربنا على كل شئ، كل شئ وإن بدى مستحيل ومن أصعب المستحيلات، حد شاكك إن ربنا عليه قدير ؟؟؟؟ حد شاكك إن ربنا أحاط بكل شئ علما ؟؟؟ عارف حال كل إنسان ... عارف تاريخك من قبل ما تتولد لحد ما تموت .... يااااه، أحيانا وأنا بدعي ربنا بحس إن ربنا متابعني وعارف كل حاجة فمش بقعد أحكيله من الأول إيه اللي حصل وكدة، سبحان الله يعني، لو عزت من حد يدعيلك بحاجة (اللهم اكفني بحلالك عن حرامك واغنني بفضلك عمن سواك)، هتضطر مثلا تحكيله الموضوع من الأول وكدة، لكن ربنا، بتقول الحاجة اللي عاوزها على طول ... أو بتدعي لحد بإسمه على طول، مش لازم تقول لربنا ليه انت بتدعيله بالذات ولا هو أصلا يبقى مين وعرفته إمتى، لإن ربنا يعلم خائنة الأعين وما تخفي الصدور

بجد آيات قوية، جرب تسمعها بصوت أكتر شيخ بتحبه أو تقرأها مع نفسك، حاجة جواك هتتحرك .... شعاع أمل هيظهر أو غيمة يأس ستنقشع :) واسأل واحد حصل معاه كدة وبيحصل معاه كدة على طول ..... وهذا من فضل ربي ليبلوني أأشكر أم أكفر :)

ومن يتوكل على الله فهو حسبه :)