"قُلْ أَغَيْرَ اللّهِ أَتَّخِذُ وَلِيًّا فَاطِرِ السَّمَاوَاتِ وَالأَرْضِ وَهُوَ يُطْعِمُ وَلاَ يُطْعَمُ "
-----------------------------
اللهم أمدني بقوة من عندك تغنيني بها عمن سواك ....
-----------------------------
سبحان الله، تركيبة الرجل غير تركيبة المرأة تماما تماما .... تقريبا ما فيش أي حاجة بتجمعهم .... ممكن تندهشوا بس في حاجات كتيرة أوي فيهم عاجباني جدا وبتعلمها عشان أطبقها ... حاجات عقلانية ومنطقية جدا ومش هتخليني أفقد أنوثتي بس لازم أتعلمها ... بس للأسف، لو طبقتها مع البنات، هتبقى وحشة أوي أوي، لإن تركيبتهم غير (ما انا بردو تركيبتي غير!!).... بس أنا مش عاجباني التركيبة دي خااااالص .... يا ريت العاطفة تبعد عن كل حاجة، عن الشغل، عن القرارات، عن كل حاجة مهمة ومصيرية .... واللـــه بقة لو الحساسيات الزايدة أوي اللي مالهاش لازمة دي تختفي من عندنا !!!... أصلها مش موجودة عندهم ..... ممكن أوي زي ما قلت قبل كدة تكون في أنثة راجل .... أسباب كتيرة أوي تخليني أتمنى صفاتهم وطريقة تعاملهم، مع إنها جافة أوي وقاسية جداً بس بتنفع في بعض الحالات ..... العاطفة بتكون لازم تهدى أو تتأجل فيها ...... ما حدش يتخض من كلامي ويهرب مني :) .... بس أنا بحس إن تعاملاتهم مع بعض أحلى ومحتاجة فن كدة ....
يللا، ربنا كان عارف إن أكيد في ناس هتتمنى إن خلقتها كانت مختلفة، عشان كدة قال في سورة النساء (سبحان الله، مافيش سورة الرجال مثلا :) ) "ولا تتمنوا ما فضل الله به بعضكم على بعض، للرجال نصيبٌ مما اكتسبوا وللنساء نصيب مما اكتسبن واسألوا الله من فضله" ..... ياااااااااه !!! اللهم إني أسألك من فضلك .... كمان أكثر أهل النار من النساء :(( بس السبب واضح، الرسول قال "يُكثرن اللعن ويَكفُرنَ العشير" ... يا رب لا تجعلني ممن يكثرن اللعن ويكفرن العشير :( .... اللهم اجعلنا من أصحاب الجنة سواء كنا ذكوراً أو إناثاً .... يا رب اجمعنا مع كل من نحب في الجنة، إن عز لقاؤنا في الدنيا وإن افترقنا في يوم ما ..... أنا عارفة مين أول ناس هطلب من ربنا أشوفهم في الجنة إن شاء الله بعد ما أشوف الرسول وجميع الرسل وأمهات المؤمنين والصحابة والصحابيات .... ربنا يجمعنا في الجنة :)
--------------------------------
يا رب اشفيني، بقالي أكتر من 4 أسابيع عندي برد عجيب أوي .... يروح ساعتين تلاتة، ويجي باقي اليوم بشدة رهيبة .... ما بحبش أروح دكاترة ولا أخد أدوية وما عنديش وقت أصلا للدكاترة ... اللهم اشفني وارفع عني من عندك .... أنت الطبيب الأعظم :) سبحانك
----------------------------
أنا بكره السجاير واللي بيشربها واللي بيبعها واللي بيتاجر فيها واللي بيشتريها وأي حد له علاقة بيها !!! أنا من غير أي حاجة بتعب منها أوي أوي .... بجد حرام تكون كمان السكة واقفة والدنيا رطوبة وتلاقي السواق واللي جنبيه بيشربوا سجاير رديئة النوع كمان !!! امبارح ما قدرتش أستحمل وأغمى علي بعد ما جالي غثيان ودوخة وخنقة بسببهم وأنا قاعدة ..... مش عارفة المرة الجاية هيحصل لي إيه !!! يا رب استر
No comments:
Post a Comment
comments are always welcomed :)