هل انت فعلاً في ابتلاء ؟؟

يقول عمر ابن الخطاب رضي الله عنه: "إنني ما أُصبت بمصيبة إلا تذكرت ثلاثة أمور، أنه لم يبتليني بأشد منها ، وأنه لم يجعلها في ديني ، وأنه وعدني بالأجر إذا صبرت عليها ... فكلما تذكرت ذلك ، هانت على المصيبة " ....

اللهم هون علينا مصائب الدنيا وارزقنا الصبر والرضى إلى أن نلقاك ....

----------------------------

كان الامام الشافعي ماشياً فاذا برجل يسبقه يناجي ربه ويقول : يارب ارضى عني ...
فقال الشافعي : يا رجل وهل انت راض عن الله حتى يرضى عنك ؟
قال الرجل : كيف أرضى عن ربي وأنا أتمنى رضاه ؟
قال : إذا كان سرورك بالنقمة كسرورك بالنعمة فقد رضيت عن الله

------------------------------------

ماشي ... ممكن تكون فعلاً مبتلى وحاسس إنك حزين جداً ودائما في ألم وحياتك مالياااانة مصاعب من أول ما اتولدت ومن مطب لمطب أصعب بس استنى عندك ... !!!

تعرف في كام واحد غيرك في مصاعب زيك ؟؟؟ طب تعرف في كام واحد في مصاعب أكتر منك بكتيـــــــــــــر ويتمنى لو ربنا يخفف عنه الألم شوية ويبقى زيك ؟؟؟

آه والله انت في نعمة مهما وصل بيك البلاء

مش هتكلم على إن البلاء تمحيص للذنوب وإن ممكن يكون ربنا عاوزك توصل لمرتبة معينة في الجنة (الفردوس الأعلى مثلاً اللي سقفها عرش الرحمن) وعارف إنك بأعمالك الضئيلة دي مش هتوصل لأي درجة فبعت لك الابتلاءات دي كلها عشان تروح مراتب الجنة العليا ... آه والله

دة يوم القيامة كلنا هنحس إننا كنا قاعدين في الدنيا ساعة بس ... القبر هتقعد فيه سنيـــــــــن مستني يوم القيامة ، تحت الأرض مخنوق في عذاب أو مفتوح عليك باب من أبواب الجنة .... اللهم اجعلنا من أصحاب الجنة .... تخيل حياتك دي كلها بكل مطباتها ودموعها هتحس إنها ساعة من أهوال يوم القيامة ... داحنا هنقف تحت الشمس سنيـــــــن ، في بيقولوا 500 ألف سنة !!! وأرقام مهولة !!! طب إيه اللي هيونسنا كل الفترة دي ؟؟؟ طبعاً أعمالنا الصالحة بعد فضل الله ، أو طبعا لو أعمالك سيئة أو قليلة أوي يبقى الابتلاءات !!!!

والمشي (أو الزحف :( ) على الصراط .... هتعدي إزاي ؟؟؟ هتقعد تتكعبل عشان أعمالك الصالحة مش قادرة تدخلك ولا ؟؟؟

دة المفروض يكون اهتمامنا الأساس بس احنا للأسف مش حاطينه في بالنا أوي أو كل فين وفين أما بنفتكر ....

بص حواليك ، فلان جارك ممكن يكون في عذاب أشد منك بس انت مش حاسس ، عشان هو راضي وساكت .... ابن خالك ممكن تكون عنده مشاكل أكبر منك ومش لاقي منها مخرج بس بردو مش بيتكلم .... زميلك في الشغل ممكن يكون فيه بلاوي بس بردو مبتسم مع إنه بيموت من جوا .... ممكن الناس دي كلها لو قعدت وحكت لك اليل بيحصل لها في حياتها تتكسف إنك في يوم كنت متضايق من حاجة ربنا حطك فيها ....

مشكلتنا إننا شايفين إن كل اللي حوالينا (أو كتير من اللي حوالينا) مبسوطين آخر انبساط واحنا بس اللي بنتعذب ....

دة أنا كل ما أكون قرفانة وبقول "امتى يا رب الفرج ؟ تعبت أوي بجد"

ألاقي واحدة فاقدة البصر وعايشة كل حياتها كدة وشغالة تهزر مع الناس !!! يا ربي !!!

ألاقي واحدة برجل واحدة والرجل دي صغيرة جدا بتمشي بعكازين طول حياتها ومع كدة بتبتسم لكل اللي حواليها ومبسوطة أوي لدرجة انك تحس إنك عاوز تبقى برجل واحدة بس تكون زيها كدة !!! نسأل الله السلامة !!!

ألاقي واحدة عملت حادثة ووجهها اتشوه يا عيني وكل ما تبص لنفسها في المراية تلاقي التشوه دة بعد ما كانت جميلة أوي ، يا ترى دي نفسيتها عاملة إزاي بس بردو مع كدة تلاقيها مبتسمة وبتهزر مع الكل وانت تبصلها تكون عاوز تعيط جنبها على منظرها وهي ما شاء الله .. نسأل الله العافية !!!

ألاقي واحدة جوزها مات وسابها بخمس عيال مش عارفة تأكلهم منين ؟ بعد ما كانوا مبسوطين وبيروحوا مدارس نظيفة دلوقت مش لاقيين لقمة العيش ؟ يا رب عافينا ....

في ناس عاشت 17 سنة مش بتخلف ونفسها في ولو عيل واحد ، ربنا يعافينا ....

في ناس عايشة سنين في المستشفى ...

في ناس عندها سرطان وبتصوت من شدة الألم وشعرها كله وقع وشكلها بقة مرعب .... ربنا يشفيهم ويعافينا ...

في ناس مقضية حياتها على الرصيف ....

في ناس أبوها وأخوها بيتعاطوا مخدرات وخمرة ويرجعوا البيت ينزلوا فيها ضرب أو يؤذوها .....

في ناس بتشتغل في بيوت الناس ...

في ناس بتدور على الأكل في الزبالة ....

في ناس عايشة طول حياتها بهدمة واحدة عمرها ما غيرتها وجايلها أصلاً من الناس ...

في ناس اتربت في ملاجئ وبيعاملوها أسوأ معاملة ومش حاسة إن ليها أي حد في الدنيا ....

في وفي وفي .... بص حواليك وانت تعرف ... ارضى باللي اتكتب عليك مهما كان ، الدنيا مش مستاهل الواحد يزعل على حاجة فيها غير ساعة عدت من غير ما يذكر الله فيها .....

ربنا بيورينا الناس دي واحد ورا التاني عشان نفوق من الشكوى اللي احنا فيها والتمذر والزعل والحزن واليأس .....

كلها كام يوم ونروح الجنة إن شاء الله برحمة الله مش بعملنا ....

{وَاسْتَعِينُوا بِالصَّبْرِ وَالصَّلَاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ} البقرة 45.