وقفات مع اختلاف العلماء (2)ء

عدنا لنكمل الحديث بحول الله ومنته :) ....

الخلاف المقبول يجب أن يكون مُعتبر :

يعني إيه معتبر ؟؟؟ يعني يحوم حول دليل من الكتاب والسنة ، مش يكون كلام من رأيهم ... تشريعنا ودستورنا هو الكتاب والسنة ولما بعدنا عنهم ، ضعفنا أوي وحالتنا بقيت تبكي والله ..... 

طب لو الخلاف معتبر ، هل يسوغ لنا الاختيار من أقوال العلماء ؟؟

ليس لنا أن نتخير ، ما ينفعش ندور على الفتوى اللي توافق هوانا وأغراضنا وشهواتنا .....

يقول الشاطبي رحمه الله "متى خيرنا المقلدين في مذاهب الأئمة لينتقوا منها أطيبها عندهم لم يبق لهم مرجع إلا اتباع الشهوات في الاختيار، وهذا مناقض لمقصد وضع الشريعة فلا يصحّ القول بالتخيير على حال " .... 

قال سليمان التيمي : لو أخذتَ برُخصَةِ كلّ عالم اجتَمعَ فِيكَ الشرّ كُلّه

ما ينفعش أقعد أدور على الرخص بتاعت كل عالم وأخد بيها ، زي واحدة بتاخد فتاويها من شيخ معين ، وفجأة لاقيته بيقول عن حاجة حرام بس لقيت غيره بيقول على نفس الحاجة دي حلال والحاجات التانية اللي هي بتعملها حرام ، تيجي مرقعة دينها بقى وواخدة من دة ومن دة على حسب اللي يناسب هواها !!!! 

اشمعنا بقى في الاستشارات الطبية والدراسية كنا بنتأكد من مصدرنا ونسأل "أكبر واحد فيهم" وندوخ بس في الدين بنستسهل ونعمل أي حاجة ونقول "ربنا غفور رحيم" ؟؟؟؟؟؟؟؟؟؟

متى يكون التيسير مقبولاً في الشريعة ؟

* لازم الفتوى تكون مضبوطة بدليل ، مش من راسك زي اللي بيطلعوا على قنوات دريم ولما حد يقول "هات الدليل" يقول له "ما فيش دليل " !!!!!

* ما ينفعش الواحد يقعد يتتبع الرخص ، يقعد ينبش عن مين حلل حاجة أغلبنا عارف إنها حرام ويمسك في كلام الشخص دة وينسى الملايين اللي "فاهمين" اللي قالوا إنه حرام .... دة بيؤدي إلى الزندقة والعياذ بالله ....

* ما ينفعش نتتبع وقائع خاصة من حالات معينة أو استثناءات من الاصل ونجعلها هي الأصل ، يعني مثلا حاجة حلال في حالة معينة بس ، نخليها حلال على طول ، زي مثلا ربنا قال في السفر نقصر ونجمع الصلاة ، مرة نلاقي نفسنا مكسلين (وعلامة من علامات النفاق ربنا بيقول عنهم في القرآن "إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ وَإِذَا قَامُوا إِلَى الصَّلاةِ قَامُوا كُسَالَى" ) ، نقول "ما ربنا ادانا رخصة في السفر ، ممكن كمان دلوقت ، أحسن مما ما أصليش خالص" ..... طبعا احنا بنطبق الحاجة دي على حاجات كتيرة أوي .... نقول "أناشيد بموسيقى أحسن من أغاني" !!!!!! "أحط مكياج مع الحجاب أحسن من إني أقلع الحجاب خالص"  !!!!!..... مع إن يعني أنا شايفة تقلعيه أحسن لإنك بتشوهي شكل المحجبات .... ما علينا ....

* لازم يكون في هناك ثمة ما يدعو إلى التيسير ، مش كل حاجة نقول "الدين يسر" ، فعلا أنا لاحظت كل اللي في مصر بيقولوها زي البنبناية، لغاية ما بقينا حتى في الثوابت بندور على تياسير فيها !!!!!!!! الصحابة والتابعين (اللي حبوا ربنا بجد) كانوا بيدوروا إزاي يحسنوا أعمالهم ويزودوا حسناتهم حتى بعد ما عملوا السنن واحنا بنحاول نوقع الفرائض !!!!!!! مثال بقى على ما يدعو للتيسير: زي مثلا في أحكام العمرة والحج للستات ، أحيانا بتضطر ترجع بلدها وتيجي تكمل حجها (بالطواف في البيت) بعد فترة ، لو الست دي في بلد بعيدة أوي (ماليزيا مثلا) العلماء بيسمحوا لها تكمل عادي ، لكن اللي ساكنين في دول قريبة (أو في السعودية نفسها) ، ما ينفعش ، لازم يروحوا بلدهم ويرجعوا تاني يكملوا ..... 

لازم الواحد يبدأ بعد كتاب الله وسنة رسوله بأقوال الصحابة والتابعين وأتباع التابعين مش يجري على اللي بيألفوا دلوقت ، لم تضع الأمة إلا بضياع علم القرون الثلاثة المفضلة .....

بعدين ، يعني أنا مستغربة ، لما نلاقي أغلبية العلماء الربانيين (الموثوق في كلامهم ، اللي اجتمعت على صدق كلامهم الأمة مش اللي اختارهم منصب، من اللي بيتبعوا منهج السلف الصالح) ، بيقولوا على حاجة لا ، وواحد ولا اتنين بيقولوا آه ،  ليه مش بناخد باجتهاد الأغلبية زي الانتخابات ؟؟؟؟ ليه بنلزق في الواحد ولا الاتنين اللي شذوا ونقول "فلان قال آه" ؟؟؟؟؟؟؟؟؟؟

بعدين بقى أهم نقطة يعني ، الناس اللي بتقول "يابني كل اللي حواليك بيعمل كدة ، يعني كل الناس دي غلط وانت بس اللي صح؟" ، الحاجة لما تكون قليلة دليل على صوابها ، الحق لا يُعرف بكثرته ، مش ربنا بيقول عن نوح في سورة هود "  وَمَا آمَنَ مَعَهُ إِلَّا قَلِيلٌ " ، هل معناها إنه هو واللي آمنوا معاه كانوا غلط ؟؟؟؟

نقطة بقى مهمة عن موصوع أيام الميلاد ، ويوم الحب ويوم الام ويوم الماء والشجرة واللخبطة دي ، اللي بيقولوا "احنا مش نيتنا نتشبه بالكفار ، العبرة بالنية " ، معلش يعني ، " لا يلزم في التشبه النية ، لكن لو نويت ، تبقى المصيبة أكبر " ...... "كُل ما اختُص به الكفار حرااااااام ، عادة كان أو عبادة ، لأن مقصود الإسلام التميييييييز  (يا مسلموووون ، ربنا شرفكم ، بتنزلوا من نفسكم ليــــــــه ؟؟؟ الدين كامل ومش محتاج أي حاجة جديدة تدخل عليه !! ) ، مش كان الرسول قال لنا عن صوم عاشوراء "صوموه لوحده ، بس نيتكم تبقى غير اليهود " ؟؟؟؟؟ ليه أصر إننا نصوم يوم قبله ولا بعده عشان نخالفهم ، ليه بقى ما قالش "نيتنا سليمة ، بنحب موسى أكتر مما هم بيحبوه" وخلاص ؟؟؟؟؟


بس كدة :) ،  ربنا يهدينا للصواب اللي اتباعه بقى صعب أوي .... يا رب اقبضنا إليك غير مفتونين ....