مجرد سلام !!؟؟

للأسف دلوقت بقيت كتير أوي من الذكور والإناث سواء شباب ولا كبار بيسلموا على بعض بالإيد وبيقولوا "عادي دة مجرد سلاااام" !!! الناس بقيت تقول إن دي من الذوقيات ونسيت إنها ليست من الإسلاميات !!! عاوزين نعرف هل هو فعلا مجرد سلام وإيه رأي الدين في كدة والرسول قال إيه عن الموضوع دة ؟؟... أصلنا بناخد شرعنا من القرآن والسنة (وما ءاتاكم الرسول فخذوه وما نهاكم عنه فانتهوا) ... والمفروض يعني الواحد ما يتكسفش إنه يقول كدة لما حد يمد إيده وما يقولش كدة هيتقال ما عنديش ذوق، انت بترضي ربنا ولا الناس ؟؟ بعدين قول لهم الحُكم وفهمهم تاخد أجر إن شاء الله :) ء

حكم المصافحة سواء بوجود حائل (جونتي) أو عدمه

والمخيط عبارة عن الإبرة ... ولا شك في أن المصافحة من المس

وعن عائشة رضي الله عنها قالت:" والله ما أخذ رسول الله النساء قط إلا بما أمره الله تعالى، وما مست كف رسول الله صلى الله عليه وسلم كف امرأة قط، وكان يقول لهن إذا أخذ عليهن البيعة: "قد بايعتكن كلاما"ء

قال النووي رحمه الله : وقد قال أصحابنا: كل من حرم النظر إليه حرم مسه، بل المس أشد، فإنه يحل النظر إلى الأجنبية إذا أراد أن يتزوجها، ولا يجوز مسها. انتهى

وكمان اتفقت المذاهب الأربعة على حرمة السلام، عشان ما حدش بس يقول مش عارفة مين أفتى إنه حلال

1- مذهب الحنفية :

قال ابن نجيم :

ولا يجوز له أن يمس وجهها ولا كفها وإن أمن الشهوة لوجود المحرّم ولانعدام الضرورة . " البحر الرائق " ( 8 / 219 ) .

2- مذهب المالكية :

قال محمد بن أحمد ( عليش ) :

ولا يجوز للأجنبي لمس وجه الأجنبية ولا كفيها ، فلا يجوز لهما وضع كفه على كفها، قالت عائشة رضي الله تعالى عنها " ما بايع النبي صلى الله عليه وسلم امرأة بصفحة اليد قط إنما كانت مبايعته صلى الله عليه وسلم النساء بالكلام " ، وفي رواية " ما مست يده يد امرأة وإنما كان يبايعهن بالكلام " . " منح الجليل شرح مختصر خليل " ( 1 / 223 ) .

3- مذهب الشافعية :

قال النووي :

ولا يجوز مسها في شيء من ذلك . " المجموع " ( 4 / 515 ) .

وقال ولي الدين العراقي :

وفيه : أنه عليه الصلاة والسلام لم تمس يده قط يد امرأة غير زوجاته وما ملكت يمينه ، لا في مبايعة ، ولا في غيرها ، وإذا لم يفعل هو ذلك مع عصمته وانتفاء الريبة في حقه : فغيره أولى بذلك ، والظاهر أنه كان يمتنع من ذلك لتحريمه عليه ؛ فإنه لم يُعدَّ جوازه من خصائصه ، وقد قال الفقهاء من أصحابنا وغيرهم : إنه يحرم مس الأجنبية ولو في غير عورتها كالوجه ، وإن اختلفوا في جواز النظر حيث لا شهوة ولا خوف فتنة، فتحريم المس آكد من تحريم النظر ، ومحل التحريم ما إذا لم تدع لذلك ضرورة فإن كان ضرورة كتطبيب وفصد وحجامة وقلع ضرس وكحل عين ونحوها مما لا يوجد امرأة تفعله جاز للرجل الأجنبي فعله للضرورة .

" طرح التثريب " ( 7 / 45 ، 46 ) .

4- مذهب الحنابلة :

وقال ابن مفلح :

وسئل أبو عبد الله – أي الإمام أحمد – عن الرجل يصافح المرأة قال : لا وشدد فيه جداً ، قلت : فيصافحها بثوبه؟

قال : لا ...

والتحريم اختيار الشيخ تقي الدين ، وعلل بأن الملامسة أبلغ من النظر

غقر الله لنا جميعا وجعلنا ممن يستمعون القول فيتبعون أحسنه

Happy and Proud

I just wanted to express how happy I am to be a member of this great batch CSD 2011 :) ما شاء الله .. It is a very nice feeling to wake up from your sleep and open your email to find a bunch of extremely brave people defending what is right :) ....

Thanks to Allah for making me a part of this batch, thanks to everyone who took a brave step (I mean by brave the ones who defended Islam, the ones who continued sending Islamic mails as if nothing happened :) , the ones who were at least angry from what happened, etc) , all those people shall be greatly rewarded by Allah :) إن شاء الله

ربنا يجزاكم خير، بجد أثلجتم صدري :) بعد أما كنت حاسة إن ما حدش هيتكلم واللي خلاني أتكلم أصلا مع إني بقالي سنتين سايبة الجروب وبعيدة عن الحاجات دي كلها وكنت واعدة نفسي إني ماليش دعوة بحاجة وكنت هكمل كدة لحد ما أتخرج على خير إن شاء الله ، بس لما ما لاقيتش أي رد بشكل ما، ولاقيت كلام مضحك قبل ما يكون مبكي، توكلت على الله وقلت الصح ... الظاهر إن الناس ما كانتش لسة لحقت تشوف (المهزلة) اللي "واحد فينا" بدأها أو شافت حبة ردوا، فقالت خلاص يعني، بس أكيد الدفعة دي فيها خير كبير أويييي والله وناس ربنا هينصرها بإذن الله زي ما نصرته أو عاوزة تنصره أو كانت هتنصره

قال تعالى "ولينصرن الله من ينصره" وقال أيضا "إن تنصروا الله ينصركم ويثبت أقدامكم"ء

ما شاء الله، عندنا رجااااالة (صفة الرجولة ممكن تكون موجودة في بنت عادي :) ودة اللي قرأته قبل كدة في كذا مكان، مش شرط راجل يبقى ولد، الولد يسمى ذكر وليس رجل وكمان الراجل يتقال عليه ذكر)ء

بجد الموضوع كبر أويييي وفعلا رد فعل غير متوقع خاااالص من واحد مسلم ؟؟؟!!!؟؟؟

ربنا يهدينا ويهديه وينور بصيرته قبل فوات الأوان

بردو مصمم على الليستة العجيبة اللي اسمي (أنا و10-11 بنت) مش موجود فيها ومش هيبقى فيها إن شاء الله زي ما اتفقنا مع بعض، وأسامي محطوطة صحابها ما حطوهاش وحاجة عجيبة

كل حاجة هترجع زي الأول بإذن الله

قال تعالى: "وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ"ء

كفاية بقة، اتعدى علينا قبل كدة وسكتنا، على المعيدين واندهشنا بس طنشنا عشان هما أحرار يردوا على التعدي دة براحتهم (أنا مش فاهمة صحابه فين من كل دة ؟؟ مش المفروض يوجهوه؟؟؟)، لكن تعدي على الدين والإصرار على الكلام اللي مالهوش أي معنى دة، كدة لازم بقة نتدخل

يا رب انصر من نصر الدين واخذل كل من خذل الدين

اللهم عليك بمن خذل الدين وحاربه

ولازم أفضل طول عمري فاكرة اللي حصل دة كدليل على عكس اللي كنت بحاول أثبته لنفسي من فترة بس فشلت

أختاااااااااه، احذريييييييييي

إلا واحدا !!!! ء

لو بتحبها... لو بتحبيه

تميم الريمي حفظه الله

سبحان من هداني لإني أسمعه وبالذات الآيات دول في وقت زي دة ومع اللي عمال بيحصل في الدفعة (من قبل المسلمين نفسهم !!!!؟؟؟؟؟ :((( وما حدش حتى بيغير بلسانه !؟ :( ) والإسلام عامة في العالم كله، الواحد فعلا حزين إن الوضع بقة عامل كدة

ما شاء الله، الله أكبر، أول مرة في حياتي أعرف عنه أو أسمعله حاجة ... بجد دخل قلبي زي ما صوت القارئ أحمد بن علي العجمي حفظه الله بيدخل قلبي

ربنا يحفظهم يا رب ويجزاهم خير ، ناس أحسنوا استخدام أصواتهم ونعمة الله عليهم بدل الرقص عليها

النهاية

قلمي ليلة امتحان ال"أي إس"

---------------

لم تفهم تصرفات صديقتها الغريبة مؤخرا ... فكلما تحدثت عنه ارتبكت وأسقطت كل شئ من يدها ... تجاهلت وساوسها وطمأنت نفسها أن ذلك لا يمكن أن يحدث أبدا حتى في الروايات فهذه صديقة عمرها وهو لن يجرؤ على جرحها ...

ذات يوم، بعد أن مضى على وفاة والدتها وسفر والدها اسبوعان، كانت قد اختنقت من حزنها فقررت أن تخرج مع صديقتها الصدوقة لتخرجها من حالتها تلك ولكنها أخبرتها أنها لا تستطيع لشدة انشغالها ... كانت هذه أول مرة ترفضها فيها خصوصا وأنها قد قررت أن يجلسا إلى "زاويتهما" التي اختاراها في الحديقة العامة منذ الطفولة ... "حسنا، سأطلب منه الذهاب معي إذن" ... وبعد حديث قصير للغاية عن أحوال كل منهم لاحظت أن نبراته كانت تبوح بالاستعجال ... لم تتردد في الطلب منه، ولكنه أيضا خيب رجاها وأخبرها أنه مشغول ... اشتد حزنها وأخذت تبكي وهو يسألها "هل من شئ آخر"؟ لم تدرِ ماذا تقول، فقد كانت هذه مرته الأولى لرفض القدوم معها لأي مكان ... ألم تكن الحديقة العامة مكانه المفضل الذي ينتظر بلهفة الذهاب معها إليه ؟؟ ألم تكن أزهار الياسمين والبنفسج المفضلة لديه ؟؟ ماذا حل به ؟؟ "لا بأس إذن، سأذهب بمفردي، لا بد من وجود عذر قوي منعهما من القدوم معي" ... قررت أن تعوّد نفسها ألا تنتظر من أحد أن يمسح عبراتها ويضمد جراحها وأيقنت أنها هي الوحيدة التي تستطيع بحق إسعاد نفسها ...

بعد التجول بين الزهور ونوافير المياه لبعض الوقت، وبعد بكائها على كل شئ: على أمها التي تركتها وحيدة في هذه الدنيا، وعلى أبوها الذي تزوج وسافر مع عروسه قبل انقضاء عدته، فتركها دون رعاية مع قليل من المال قائلا "سيصلك مثله كل شهر"، وعلى تغير صديقتها وتصرفاتها الغريبة مؤخرا، وعلى أشياء أخرى قد عاهدت نفسها أن تنساها ولكنها وجدت نفسها تبكي على كل شئ مرة واحدة، بعد كل هذه العبرات، تنهدت بعمق وأخذت تنظر حولها ... رأت أطفالا يركضون في كل مكان غير مبالين بأي شئ وتمنت لو أنها ظلت طفلة إلى الأبد، ثم رأت آخر شئ توقعت مشاهدته في حياتها وخصوصا في هذه الحديقة ... رأتها معه ... نعم، إنهم هم، فكيف لها أن تخطئ تقاطيع وجههما التي أمضت معها ما يقرب من العشر سنوات ؟؟؟ ها هي صديقة عمرها تمسك بذراعه ... رأوها وابتسما ابتسامة المعتذر المودّع ورحلا ويداها لا تفارق ذراعه ... اليوم فقط أيقنت أنها فقدت كل شئ ... اليوم أدركت أنها هي المذنبة، فهي التي كانت تحكي لكل منهم ببراءة شديدة عن الآخر ولم تكن تبالي بمصافحتهم كلما التقيا ... اليوم فقط أدركت أن هذه هي النهاية ...

:) خليك بطاطس :)

:) خليك بطاطس :)

عارفين ليه البطاطس المحمرة هية الاكلة الوحيدة اللي اجتمع الناس كلهم علي حبها ؟

ء1- البطاطس المحمرة لما بتتقلي في الزيت بتبقي عادة مقرمشة من برة و طرية من جوة

عشان كدة لما حد يعمل معاك موقف سخن أوي ما تعاملهوش وحش .. أيوة حاسسه إنك زعلان منه و خد موقف بس خلي قلبك أبيض وطري "طيب يعني" مش ناشف، وسامح عشان ربنا بيسامح

ء2- البطاطس المحمرة تلاقيها عند ماكدونالدز (فرينش فرايز) و برضه تلاقيها عند بتاع الفول والفلافل

يعني انت كمان خليك زي البطاطساية ما تتكبرش علي حد وصاحب كل الناس غني أو فقير

ء3- البطاطس المحمرة بتتقدم مع حاجات كتير: مايونيز, كاتشب, صالصات مختلفة و ساعات كمان طحينة بس بتفضل في الاخر اسمها بطااااطس

يعني مهما اتعرضت لثقافات و بيئات مختلفة احتفظ دايما بشخصيتك المستقلة و طريقة تربيتك و خلي الناس هية اللي تتأثر بيك

ء4- البطاطس بردو ممكن تبقي شيبسي و هي أول حاجة بنفكر فيها لما بنحس بالجوع و احنا برة البيت

ساعد الناس دايما و خليك أول واحد ييجي علي بالهم لما يقعوا في مشكلة، خليك جدع زي "الشيبسي"ء

أهم نقطة بقة

ء5- البطاطس المحمرة لو اتهرست بتبقي بردو طعمها حلو وممكن نسميها "بطاطس بيوريه"ء

مهما الدنيا تهرس و تبهدل فيك خليك شخص كويس و لذيذ و طلع للدنيا لسانك وقول "انا بطاطساية بيوريه"ء

عشان تبقي محبوب من كل الناس

:) خليك بطاطس :)

يا تاكسي حود

:) تمييييييييييم :)

العشق شغال في مصر برغم بلاويها ** يمكن ما فيش إلا هو في البلد شغال

4

مواقف هزتني

الضحكات هي فترات قصيرة لتجفيف الدموع

--------------------

في البداية نعلم أطفالنا كيف يتكلمون، بعد ذلك نحاول تعليمهم الصمت

-------------------

Old friends become old strangers

--------------------

الحمد لله، بعد أما قررت بصدق إني مش هكتب هنا يومياتي عشان أسباب كتيرة، يعني قلت هكتب الحاجات المفيدة بس، حاجات عجبتني وكدة بس مش هحكي الحاجات اللي بتحصل لي وبتعرض لها كل يوم زي ما كنت بكتب زمان والخواطر الغامضة عن الناس والمواقف الغامضة :) ، لاقيت كذا بنت بتقول لي إنها قررت إنها هتعمل مدونة :) عشان مدونتي عجبتها أوي وشجعتها، واللي بتقول إنها فكرة جميلة أوي إن الواحد يحكي اللي بيحصل له (بس بردو مش شرط كل حاجة الناس تقرأها عشان كدة بقيت أستعين بالكتابة في أماكن متأكدة إن ما حدش عمره هيشوفها، كدة الواحد يتكلم براحته هناك :) وكتير أوي بكتب بعدين أقطع الورقة وأرميها عشان أكون احتفظت بخواطري ومواقفي لنفسي أريح والله :) )، فمش عارفة يعني موقف مدونتي مني دلوقت هيبقى إيه ؟؟؟ هسيبها لظروفها

---------------

كتير أوي بكون ماشية في الشارع وألاقي أم ماسكة ابنها الصغير من إيده وبتجره وقاعدة بتضربه عشان يسكت .. أنا مش فاهمة يعني لما هي هتضربه هيسكت ؟؟؟ دة هيقعد يعيط أكتر وكدة ممكن يتأذى ... والله أنا بقول لها "حرام عليك" بس هي بتقعد تشتم فيه كإنه مش ابنها أصلا وتقول لي "أصله مش بيسمع الكلام" ؟؟؟ لا يا شيخة ؟؟ أصلك لما تهريه ضرب كدة، هيسمع الكلام !!!...ء

كمان الموقف دة اتكرر كتير أوي ... أم بتجر ابنها من إيد واحدة عشان يركب المشروع وبتضربه عشان مش عارف يطلع (السلم عالي عليه ورجليه صغنونة يا عيني :(( ) ... فين الرحمة ؟؟؟ دي حتى كل الناس اللي راكبة بتقول لها "إيه يا ست انت اليي بتعمليه دة؟" بس هي ولا بيهمها، المهم إن المخلوق اللي هي والداه دة يطلع المشروع بأي طريقة ممكنة، بالجر، بخلع ذراعه، بضربه، هي مالها ... أكيد ولد مش بيسمع الكلااام ؟؟؟!!!!ء

بجد حرام عليكم، مادام انتم مش قد الجواز والعيال، بتتجوزوا ليه ؟؟؟ هتقولوا دي سنة الحياة والكلام الفارغ دة، لا، مش سنة الحياة إننا نجيب عيال ونقعد نضرب فيهم ونعذبهم ونعقدهم .... يا ترى كام واحد فعلا قبل ما يتجوز قرأ ولو كتاب واحد عن المعاملة الصحيحة لمراته وعن التربية السليمة لعياله ؟؟؟ يا ترى كام واحدة قرأت إزاي ممكن تسعد زوجها وتخلي بيتها دة جنة وعيالها تطلعهم مش أي كلام ؟؟؟ كام واحد أو واحدة حتى سمع محاضرة واحدة ولا حضر ندوة عن الموضوع دة ولا اهتم بيه ؟؟؟ أتوقع ما حدش خالص مهتم، ما حدش حاسس فعلا إنه بيجيب إنسان للدنيا ولازم يكون عارف كويس جدا إزاي يكبره وعلى إيه يربيه ... المهم إنه يبقى اسمه متجوز وعنده عيال، مش شرط حالتهم عاملة إزاي ولا بيتعامل معاهم إزاي ... أنا مش بقول كدة وعاملة نفسي بقة فهيمة عصري في المواضيع دي وتربية الأطفال بالعكس خالص، أنا بشجع نفسي إني فعلا أبقى غير الناس وما أمشيش في الحاجة إلا لما أبقى قدها عشان ما أتعبش حد بسببي (أكيد هتقولي تربية أطفال إيه بس، مش وقت الكلام دة) أمال إمتى وقته ؟؟ لما تتجوزوا بقة وتلاقوا نفسكم ما عندكمش وقت لحاجة خالص وفجأة تلاقوا عيالكم جم وانت محتاسين مش عارفين تعملوا إيه غير الضرب والعقاب ؟؟؟ ماشي، اللي بيدرس، حجته معاه، بس الناس اللي اتخرجت وبتفكر تكون بيت أو كونت بيت فعلا، ناوية تعمل إيه ؟؟؟ مين هيطلع عن الروتين الممل بتاع الحاجات دي ويفكر يغير ويبدأ من نفسه وأسرته وعياله ؟؟؟ أصل أي حاجة بتزرعها في ابنك، بتأثر فيه بعد كدة ... ممكن ضربك يخليه يطلع ضعيف وجبان .. ممكن ضربك يخليه يدور على الحنان برة البيت ويتجر لرفقاء السوء ...ء

--------------------------

كتير أوي (أوي أوي ^ أوي أوي) بلاقي ولد صغير حالته وحشة وهدومه مقطعة ومش نظيفة أوي يجيلي ويعمل بإيده كإنه بياكل ويقول لي "يا طنط، الله يخليك أي حاجة أكلها" !!!! أنا والله بيكون نفسي أطبخله حاجة تشبعه أو أخذه معايا البيت أحميه وألبسه لبس كويس وأأكله (ما حدش يسأل وأوديه فين بعد كدة) ... هي الناس دي أهلها فيييييين ؟؟؟ يا ناس ياللي عمالة بتتجوز وبتجيب عيال، رميتوهم في الشارع ليه ؟؟؟ هتتسألوا عليهم والله أشد السؤال، ضيعتم الرعية، مش عارفة أدعي عليكم ولا أدعي لكم ... وموقف المجتمع من الأطفال الغلابة دول إيه ؟؟؟ أهو كل واحد بيطلع نص جنيه دة لو طلعه واللي يقول له "روح ربنا يسهل لك" واللي يبعد عنه ويهرب منه كإنه مجرم ... ربنا يتولاهم، بس نفسي فعلا أعمل حاجة عن الموضوع دة

--------------------------

تقريبا ما فيش مقلب زبالة ولا برميل زبالة (أكرمكم الله) عديت عليه فيك يا مصر وما لاقيتش واحد ولا اتنين بيدوروا فيه !!! مش فاهمة بيدوروا على إيه، بس والله قلبي بيتقطع ... وناس تيجي تقلب البرميل (أكرمكم الله) وتطلع كل اللي فيه وتقعد تقطع في الكيس وهي بتدور بردو !! والدنيا تتبهدل والشارع يتزروط أكتر بعد ما كان متزروط أصلا ... الناس دي إيه اللي وصلها لكدة ؟؟ ومتوقعة تلاقي إيه في الزبالة ؟؟ وفين الدولة من كل دة ؟؟؟ يا رب الوضع يتحسن ... بجد نفسي أعمل حاجة

الشتاء جه (أسخن من كل سنة بس بردو فرق عن الصيف أكيد) ورجعنا لمشهد الناس الي في عز البرد نايمة على الرصيف وبترتعش مش لاقية حاجة تتغطى بيها ... أحيانا طفل مرمي جنب الحيطة تحس إنه فعلا ميت وممكن يموت ويتحلل ولا حد يحس ... أحيانا ست ومعاها طفلين مش عارفة تحضن مين فيهم عشان يتدفى فحضناهم الاتنين والكل بيرتعش .. أحيانا راجل كبير في السن شكله بقاله أيام ما داقش طعم الأكل وما عندهوش حتى طاقة إنه يرتعش فجسمه ساكن خالص ... كل دول مين مسؤول عنهم وإيه اللي وداهم لكدة ؟؟؟

يا رب، انت أرحم بالناس دي كلها من غيرك، انت اللي خلقتهم، فارزقهم وارفع عنهم ... يا رب مين هيرحمهم غيرك ؟؟؟ يا رب هيطلبوا من مين ولا هيلجأوا لمين ؟؟؟ يا رب سايبهم لمين ؟؟؟ مين مسؤول عنهم ؟؟ مين هيساعدهم ؟؟؟ مين ؟؟؟ مين ؟؟؟ لهم الله، لهم الله :(( ء

العمر طويـــــــــــــــــــــل

قالوا لنا عن موعد ال

midterm exams

عشان كدة كلنا قدرنا نستعد ولو بجزء بسيط

بس للأسف ما حددوش موعد ال

end-of-life exams

عشان كدة ما حدش بيستعد ولا حد حتى فاكر إن اليوم دة هيجي وممكن يكون أقرب مما يتخيل

يا ترى هنعرف نجاوب على الملكين اللي أول ما هنتحط في القبر والناس تمشي هيجولنا ؟؟؟ ملكين قبيحين ضخمين سود هيجوا

الحديث هنا بالتفصيل

فقد روى الترمذي (1071) عَنْ أَبِي هُرَيْرَةَ رضي الله عنه قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( إِذَا قُبِرَ الْمَيِّتُ أَوْ قَالَ أَحَدُكُمْ أَتَاهُ مَلَكَانِ أَسْوَدَانِ أَزْرَقَانِ يُقَالُ لأَحَدِهِمَا الْمُنْكَرُ وَالآخَرُ النَّكِيرُ ، فَيَقُولَانِ : مَا كُنْتَ تَقُولُ فِي هَذَا الرَّجُلِ ؟ فَيَقُولُ مَا كَانَ يَقُولُ : هُوَ عَبْدُ اللَّهِ وَرَسُولُهُ ، أَشْهَدُ أَنْ لا إِلَهَ إِلا اللَّهُ ، وَأَنَّ مُحَمَّدًا عَبْدُهُ وَرَسُولُهُ . فَيَقُولانِ : قَدْ كُنَّا نَعْلَمُ أَنَّكَ تَقُولُ هَذَا ، ثُمَّ يُفْسَحُ لَهُ فِي قَبْرِهِ سَبْعُونَ ذِرَاعًا فِي سَبْعِينَ ، ثُمَّ يُنَوَّرُ لَهُ فِيهِ ، ثُمَّ يُقَالُ لَهُ : نَمْ ، فَيَقُولُ : أَرْجِعُ إِلَى أَهْلِي فَأُخْبِرُهُمْ ، فَيَقُولَانِ : نَمْ كَنَوْمَةِ الْعَرُوسِ الَّذِي لا يُوقِظُهُ إِلا أَحَبُّ أَهْلِهِ إِلَيْهِ حَتَّى يَبْعَثَهُ اللَّهُ مِنْ مَضْجَعِهِ ذَلِكَ .

وَإِنْ كَانَ مُنَافِقًا قَالَ : سَمِعْتُ النَّاسَ يَقُولُونَ فَقُلْتُ مِثْلَهُ لا أَدْرِي . فَيَقُولَانِ : قَدْ كُنَّا نَعْلَمُ أَنَّكَ تَقُولُ ذَلِكَ ، فَيُقَالُ لِلأَرْضِ : الْتَئِمِي عَلَيْهِ ، فَتَلْتَئِمُ عَلَيْهِ ، فَتَخْتَلِفُ فِيهَا أَضْلاعُهُ ، فَلا يَزَالُ فِيهَا مُعَذَّبًا حَتَّى يَبْعَثَهُ اللَّهُ مِنْ مَضْجَعِهِ ذَلِكَ ) والحديث حسنه الألباني في صحيح الترمذي .

---------------

قالوا لك بأن العمر طويــــــــــــــــــــــــــل

والله كــذبوك فان العمر قصير قصير
...
فالليل مهما طال فلا بد من طلوع الفجر

والعمر مهما طال فلا بد من دخول القبر

فما هى الا أنفاس قد يدخل النفس ولا يخرج ويقال فلان
{مٌاٌتَ}

وقد يخرج النفس ولا يدخل ويقال فلان

{مٌاٌتَ}

فالموت كأس وكل الناس شاربه ** ياليت علمى بعد { ُاًلَمِوٍتٌ} ما الدار

الدار دار نعيم ان عملت بما ** يرضى الاله وان خالفت فالنار

هما محلان ما للمرء غيرهما ** فانظر لنفسك أى الدار تختار

ما للعباد سوى الفردوس ان عملوا ** وان هفوا هفوة فالرب غفار

فالنزول من قطار العمر آًتُ ٌآٍتِ لا محالة ولا مراوغة فى ذلك

إن كنت تاركا {للصلاة} فارجع للصلاة

وإن كنت للذنوب فاعلا فاستغفر الإله

وقل{ ُيُاُ ًاَلِلٍهُ ٌيٌاُ ًاَلٍلٌهُ ًيَاِ ٍاًلَلُهٌ} أناجيك لتغفر الذنوب

وتستر العيوب وتهون على سكرات الموت

وتنجينى من ضمة {القبر} وتثبتنى عند سؤال الملكين


ونجنى عند تناول الكتب فاجعل كتابي يؤتني بيمني

فان تناولته بشمالى فقد ذهبت الى الجحيم وقلت لهم

{ خذوه فغلوه* ثم الجحيم صلوه * ثم فى سلسلة ذرعها سبعون ذراعا فاسلكوه }.

فإلى أين المهرب من هذا الموقف العظيم ؟؟؟

يا رب نجنى فوق الصراط فان هفوت هفوة سقطت فى سقر

{وماأدراك ما سقر * لا تبقى ولا تذر * لواحة للبشر * عليها تسعة عشر}

يا ربنا رحماك ياغفور ياودود

يا رب خلقتنا فعصيناك ورزقتنا فلم نحسن الشكر

خيرك يا ربنا للعباد نازل وشرهم إليك صاعد

فإن بعدوا عنك قربتهم إليك وأنت الغنى عنهم

وإن نسوك ابتليتهم بالمصائب

لتذكرهم بك ولتطهرهم من المعايب ومن { اُلًذَنِوٍبٌ ُ}ء

بك أستجير ومن يجير سواك ** فأجر ضعيفا يحتمى بحماك

يا رب قد أذنبت فاغفر ذلتى ** أنت المجيب لكل من نُاًدَاِك

السن القانوني

ولدتك أمك يا ابن آدم باكيا ** والناس حولك يضحكون سرورا

فاعمل ليوم أن تكون إذا بكوا ** في يوم موتك ضاحكا مسرورا

في ناس كدة تقول لك "أنا فاكر يوم ما انت اتولدت، كنت زي القمر" ... مش فاهمة يعني الواحد دلوقت بقة زي الإيه ؟؟ الشمس مثلا ؟؟؟ بعدين ما بحبش حد يقول "كنت" وهو وبيتكلم عن الجمال، مالها "مازلت" ؟؟ ماهيا من أخوات "كان" بردو !!! ء

:D

اليوم 21 وأنا تميت 21 :)) !!... يعني خلاص وصلت للسن القانوني وبقيت معترف بيا إن شاء الله :) (الواحد كان اسمه "قاصر" أو "ناقص الأهلية" والحمد لله بقة "كامل الأهلية" :) ) ... بيقولوا إن "سن الرشد" للبنت من 18 سنة وللولد من 21 فأنا الحمد لله كدة كدة وصلت لسن الرشد (رشيدة تتحدث إليكم الآن :)) ) ... طبعا في مميزات كتيرة أوي للواحد لما يوصل للسن القانوني زي ما أنا قعدت أستفسر من ناس كتيرة ... 1) تقدر تفتح حساب في البنك (طبعا الواحد فلوسه مش عارف يوديها فين ما شاء الله :))... 2) تقدر تشتري عقار باسمك (قطعة أرض أو عمارة مثلا (الواحد بردو يجيبله حتة أرض يبني عليها أي حاجة تنفعه في المستقبل) ... 3) يسافر بدون موافقة ولي الأمر (الواحد نفسه فعلا يسافر اليابان ويعيش فيها أو يسافر تركيا للسياحة أو هاواي للتصييف :)) ) ... 4) لو ليه ورث من أي حد، من حقه يأخذه ويتصرف فيه براحته ... 5) لو عمل جريمة (بعد الشر)، هو اللي يتعاقب عليها، مش باباه ... 6) بداية نمو ضرس العقل (طبعا ضرس العقل ما لهوش علاقة بالعقل، ممكن الواحد يكون مش عاقل وتصرفاته طفولية بس الضرس بردو يطلعله (دة عشان الناس اللي بتقعد تقلس وتقول "أخيرا هتعقل والضرس هيطلعلك) ... ء

أنا مش بحتفل بأيام الميلاد طبعا عشان حرام ومش فارق معايا (أما أنا عجيبة صحيح، مش فارق معايا بس بتكلم عنه) بس مجرد فكرة إن الواحد بقة أقرب لقبره بسنة كاملة تخلي الواحد يقف ويفكر هو عمل إيه في السنة دي وهل هو السنة دي أفضل من اللي فاتت ولا لأ

ماما وبابا مختلفين على يوم ميلادي، ماما بتقول أنا أدرى، أنا اللي ولدتك وكان يوم 21 وبابا بيقول شهادة الميلاد بتقول 26 ودة اللي المفروض بتقدميه لكل الناس ... أنا اتسجلت متأخر 5 أيام مش أكتر بس أنا بميل لإني أكون اتولدت يوم 26 مش عارفة ليه .. أنا أعتبر رابع أصغر بنت في الدفعة (في بنتين أصغر مني بشهر وواحدة أصغر ب 6 شهور) فأنا أعتبر صغيرة إلى حد ما عشان ما شاء الله البنات الباقيين أكترهم تمت ال22 !! وأعتبر في النصف تقريبا في الأسرة الكريمة ... ربنا يبارك في عمرنا يا رب ويجعله في طاعته دائما ويميتنا وهو راض عنا

طبعا الكلية من أول ما دخلتها وهي بتحتفل بيوم ميلادي بحيث إنها بتحط الميد ترم فيه، فالواحد لازم يبطل كلام دلوقت وينسى الاحتفالات ويفكر في الاحتفالات اللي مستنياه الأسبوع دة .... ربنا يسهلها علينا جميعا يا رب ويدينا أكتر مما نتمنى ونتوقع

طبعا ما حدش أخد باله، بس كان الأسبوع كله هيبقى امتحانات ما عدا النهاردة بس الدكتور حسين ربنا يكرمه ويرضى عليه غير الجدول اللي كانت الدفعة عاملاه وحط مادته النهاردة إحتفالا بيا :) ... ربنا يسهل بقة

إن شاء الله تكون دي صفحة جديدة مع الله، مع نفسي ومع كل الناس .. يا رب سامحني على كل اللي فات، يا رب امحيه خااالص وابعد عني المعاصي وأعني على طاعتك وعلى بر أهلي وحسن الخلق مع الناس .. يا رب ارزقني حب الناس واجعل أيامي الجيا لو اتكتبلي عمر تبقى أحسن من اللي فاتت .. يا رب ارضيني بقضائك ودبر لي أمري وعوضني أنا وأهلي وصحباتي بكل خير واشرح صدرنا واسعدنا واجمعنا جميعا عند حوض نبيك يا رب ... اللهم لا تحرمنا من دخول الجنة دون حساب ولا عقاب ... اللهم آآميييين

حاسب على كلامك

امبارح أول مرة أقرأ مقالة للأستاذ "أحمد فتح الباب" خريج الجامعة الأمريكية دفعة 2008، وصراحة لاقيت نفسي قاعدة بدور على كل مقالاته ومواضيعه وقرأت كتير منهم وبجد استمتعت بكل كلمة ... فعلا بيقول كل اللي عاوزة أقوله بس بطريقة أحسن ما شاء الله ... أسيبكم مع أول حاجة قرأتها ليه

------------------------------

"البس الشوز يا حماااادة"

" عايز واحد فيتوتشيني ألفريدو .. وزود عليه اكسترا تشيز .. و فرينش فرايز والدرينك يكونكولا .. بليز"

ء"أنا كان عندي مييتنج في الشغل وبعدين عملت برنت للسي في ورحت انترفيو.. والراجل اتكلم معايا في الكاريير بلان والباكيدج وبعدين قال لي هنرد عليك في إس ام إس أو مايل "ء

ء" أيوة يا مان .. وانت نازل هاتلي الجاكت وفي جيبه الموبايل وشنطة اللاب توب اللي فوقالفريزر اللي في الليفينج.. وأنا هعدي علي السوبر ماركت أجيب شامبو وكونديشينر..وأعدي علي الدراي كلين أجيب البلوفر وبقية اللبس... بيس؟؟"ء

صلوا عالنبي يا جدعان..ء

أنا في احدي مناقشاتي مع صديقي مصطفي سعيد (اللي يصدق عليا و عليه قول الفنان عمرو دياب: أحبك ..أكرهك) كنا بنتكلم عن موضوع الكتابة بما يسمي "الفرانكو آراب" .. وحصل جدال طويل.. وأنا كان رأيي في النهاية باختصار

ان أي واحد يغير لغته ويتكلم لغة ناس تانيين يبقي عيّل سيس و طفلة الحشرة..ء

ييجي واحد يقول لي يا واد يا فتح الباب (أو يا فتحي.. أو يا فاتح.. أو يا فتحتح.. أو يا فتّوح.. أو يا باب.. أو يا أُكرة.. أو يا أوبن زا دوور أو يا دوور أو يا اوبن) : طيب ما هو اللغة وسيلة للتفاهم.. وبما اني بكلم واحد تاني بألفاظ أو كتابة هو فاهمها .. يبقي بيس و نو بروبليم.. سواءا كانت الألفاظ أو الكتابة دي بالعربي أو بالإنجليزي أو بالهندي أو بلغة الواك واك..ء

وهو ده بيت القصيد..ء

يا جدعان كل الناس اللي بتفهم في العالم عارفه ان اللغة مش مجرد وسيلة لنقل الأفكار.. اللغة ليها جوانب كتير جدا أهم كتير من كونها أداة لنقل الأفكار.. اللغة وعاء لحفظ كل مكونات الإنسان الدينية و الإجتماعية و الأخلاقية و التاريخية.. والإنسان اللي بيفرّط في لغته بيخلع نفسه من حاجات كتير قوي أكبر من مجرد حروف و كلمات..ء

وأنا هتكلم في جانب واحد علي سبيل المثال.. علاقة اللغة بالأخلاق..ء

لا شك ان اللغة مرتبطة جدا بنفسية الإنسان و مشاعره.. و الكلمة الواحدة مش بيبقي ليها نفس المعني عند كل بني آدم.. لكن وقعها عليه بيكون مرتبط بنفسيته و تجاربه و خبراته..ء

يعني مثلا.. كلمة (أبو تريكة) لما يسمعها واحد أهلاوي بتبعث في نفسه شعور بالفخر و الإنتصار و الراس المرفوعة و فحت المنافسين.. ولما نفس الكلمة (أبو تريكة) بيسمعها واحد زملكاوي بتلاقي نفسيته علي طول بقت عامله زي نفسية هتلر بعد ما اتفحت في الحرب العالمية.. دي شيء لا ارادي بيحصل لأن الكلمة بترتبط بنفسية الإنسان..ء

واللغة بالطريقة دي مع الوقت بتأثر و بتتأثر بكل قيم المجتمع و أخلاقه.. وهضرب لحضرتكم كام مثل..ء

(1)

العرب عندهم أسماء مختلفة للعم و الخال ..ء

الإنجليز عندهم الإتنين بمعني واحد

Uncle

العرب عندهم أسماء لإبن العم و ابن الخال .. والإنجليز عندهم الإتنين اسمهم

Cousin

فالعرب بتهتم بالعائلة أو القرابة و بالتالي لغتها لازم تحمل المعاني دي

(2)

الإنجليز شعب مادي شوية.. فبتلاقي المادية دي بتظهر في لغتهم بشكل واضح جدا.. فعلي سبيل المثال

لما واحد انجليزي بيعوز يزور حد بيقول

Pay him a visit

يعني أدفعله زياره.. ولما بيحب يشكر حد بيقول

I owe you thanks

يعني عليا دين ليك.. لازم أشكرك.. لما بيحب يرد لحد جميل بيقول

How can I pay you back?

يعني ازاي أدفعلك اللي انت عملته .. ولما بيقضي وقت بيقول

Spent my time

يعني أنفقت وقتي

وهكذا.. فبتلاقي لغته بتحمل قيمه المادية .. و بعدين بتأثر فيها

(3)

العرب ناس عاطفيين و حبّيبة.. فبتلاقي عندهم أسامي كتير للحب.. منها

الحب.. العشق.. الهوي.. الغرام.. الهيام.. التتيّم.. الصبابة.. الجوي.. الكَلَف.. الصبوة.. الشغف.. الوجد.. السدم.. التباريح.. الخلابة.. الشجو..الوصب.. اللهف.. الود.. الوله.. الخلة.. ء

(وعشرات الأسماء الأخري (وعشرات بجد مش مبالغة

علي حين ان فيه لغات أخري اختزلت الحب بحيث ان كلمة "يمارس الحب" في اللغات دي بقت كلمة عيب..ء

(4)

...........................

(5)

اللغة بتتأثر و تؤثر في رقي الإنسان و رقة مشاعره.. زي ما بيحكوا ان شاعر اسمه (علي بن الجهم) راح يمدح الخليفة المتوكل.. وكان راجل بدوي جاي من الصحرا و نزل رشق علي قصر الخليفة.. فقام يمدحه فقال له

أنت كالكلب في وفائك للعهد

وكالتيس في اقتراع الخطوب

:D

فالناس قالت يا نهار أبيض.. ايه المدح اللي زي وشك ده.. امشي انجر من هنا.. فالخليفة قال لهم: بلاش تطردوه.. خلّوه يعيش في بغداد شهر ويرجع لي تاني (وطبعا بغداد وقتها كانت عاصمة الدنيا.. مليانه بالحدائق و المساجد و البحيرات و والأسواق.. كانت بغداد يعني العلم و الفن و الحضارة و الجمال).. فرجع بعد شهر بيقول قصيدة في منتهي الجمال

عيون المها بين الرصافة والجسرِ

جلبن الهوي من حيث أدري و لا أدري

خليليّ ما أحلي الهوي و أمره

وأعرفني بالحلو منه وبالمرّ

وبيقول فيها بيكلم حبيبته

صِليه لعل الوصل يحييه واعلمي

بأن أسير الحب في أعظم الأسرِ

شوفتوا الحلاوة و الجمال

كل دي أمثله وفيه غيرها أمثلة كتير جدا في فكرة ان اللغة بتتشكل مع أخلاق البشر.. وبعدين هي نفسها بتشكل أخلاقهم

وبعدين نقطة علي جنب.. هو ليه واحد يقول كلمة

meeting

مع انه ممكن يقول اجتماع

لأنه (في بعض الحالات طبعا مش في كل الحالات) بيكون حاسس بالنقص.. بيقول في قرارة نفسه: أنا ناقص و سيس عشان كده هتكلم بلغة ناس متقدمين عشان يحترموني

انتوا عارفين ان الصورة اتقلبت.. زمان في أيام المجد الحضاري بتاعنا كان الواد الأسباني أو الإنجليزي لما بيحب يبان ابن ناس و متعلم تعليم نضيف بيقول كلمات عربية في وسط كلاه

عشان كده هتلاقي آلاف الألفاظ الأسبانية أصلها عربي..

http://en.wikipedia.org/wiki/Arabic_influence_on_the_Spanish_language

وكتير من الألفاظ الإنجليزية أصلها عربي

http://en.wikipedia.org/wiki/List_of_Arabic_loanwords_in_English

إيييييييه.. دنيا ملهاش أمان !ء

وكل ده عن علاقة اللغة بالأخلاق.. والأهم من كده علاقتها بالدين و التاريخ و ىالتقاليد.. والكلام يطول في الموضوع ده

المهم ان كل الكلام الحلمنتيشي اللي أنا قلته ده عن ان اللغة بتأثر وبتتأثر بالأخلاق.. أجدادنا العظماء فهموه.. والإمام أبو منصور الثعالبي من أئمة اللغة (توفي 430 للهجرة.. من ألف سنة!!) وهو أحد أئمة اللغة.. يقول في مقدمة كتابه (فقه اللغة وسر العربية):ء

ء((والإقبال على تفهمها من الديانة، إذ هي أداة العلم ومفتاح التفقه في الدين، وسبب إصلاح المعايش والمعاد. ثم هي لإحراز الفضائل، والاحتواء على المروءة وسائر أنواع المناقب، كالينبوع للماء، والزند للنار )) ء

اللهم بلغت

اللهم فاشهد!ء

خواطر ما بعد العيد

العيد دة كان جميل الحمد لله بغض النظر عن افتقادي لأهم أعضاء أسرتي والحمد لله على كل حال :( ... طبعا كل ما أجتمع مع أهلي، يعلقوا إن أخويا مش بيسلم على الستات بإيده وإني مش بسلم على الرجالة بإيدي عشان طبعا حراااااام بدون أي خلاف، بس عادي يعني، الواحد أخد على التعليق من الناس على كل حاجة في حياته تقريبا بس دي فعلا بقيت سيرتهم اللي بيتسلوا بيها كل أما يشوفونا مش عارفة ليه :( ... بعدين كل مرة يشوفوني يقولوا "انت لسة لابسة النقاب ؟؟ اقلعيه بقة دة سنة" (مع إنه فرررض) ونقعد بقة في نقاش حاد عن الموضوع دة بس السنة دي كان الوضع متطور خااااااالص، ما شاء الله، بقوا يقولولي "انت لابساه ليه ؟؟ دة لا فرض ولا سنة " !!!!!!!! أنا روحت قايلة "ولا حتى حلال؟؟؟!!!!!" ... قعدوا يضحكوا مع إن دمي كنت متضايقة أوي وأنا بقولها (تحوييير وتألييييف وتزوييير وتخريييف في الدين، ربنا يهدينا ويهديهم ويهدي الجميع للحق) ... ولا حتى سنة ؟؟؟؟ يا سبحان الله !!! دة على كدة بقة المرة الجيا هيقولوا "ولا حتى حلال، دة بدعة ولازم تتوبي منها"!!! طبعا الواحد قعد يتكلم كالعادة، بس قالوا "شيخ الأزهر اللي قال كدة" !!!! ..... معلش بقة، أنا ملاحظة فعلا إن الأزهر بقاله فترة كدة بيألف في الدين وبيحارب حاجات في الدين وبيطلع فتاوي فقهية عجييييبة مع إنه زماااان كان رمز من رموز الدين الصحيح فعلا وللأسف تقريبا كل الناس اللي في مصر بتاخد فتاويها منه وحسبي الله ونعم الوكيل في المسؤول عن تدهور الأمة وبعدها عن ربنا

------------------------------

الحمد لله لسة في ناس تانية بقة بتوزني إني أقلع النقاب وبتقول بكل ثقة ( أنا جوزي شغال مع أعضاء هيئة التدريس وبيقول إنهم مطلعين قرار إنهم ما يدوش المنتقبات امتياز =)) ) !!!!.... بجد ههههههه ... يا ستي ما يهمنيش الامتياز ... وتقول (أصلك لما لبستي النقاب، إدوكي جيد جدا في ثالثة، طول عمرك بتجيبي امتياز من أول ما دخلتي الكلية) .. والله أنا اللي كنت مضيعة خالص السنة اللي فاتت وكنت مش مهتمية زي كل سنة وكنت بقول "زي ما تيجي تيجي" ..... أعوذ بالله من شياطين الإنس !!! .. أنا مش عاوزة الامتياز دي، ارتاحتوا ؟؟ بعدين لو ربنا كاتبهالي، هاخدها سواء بنقاب أو من غيره وغصبا عن كل اللي في الكلية والكون ... أصلا قوانين الله فوق قوانين الجميع (لا يُسأل عما يفعل وهم يُسألون) (إنما أمره إذا أراد شيئا أن يقول له كُن فيكون)، سبحانه :) ... بعدين الحمد لله أنا بقالي سنة و8 شهور ما شاء الله لابساه (ربنا يثبتني ويهديني)، يعني مش عارفة انت لسة بتحاولي في إيه ؟؟؟!!! وناس مصممة إني أقلعه وألبسه لما أتجوز =)) .. أنا مش فاهمة إيه الحكمة ومال الجواز بيه ؟؟ بيطلعوا حجج واهية وأسبب عبيطة أوي ... بجد حاجة تنرفز .... ربنا يهديهم ويهدينا

-------------------------------------

ء"حضرتك فاضي خمس دقائق" ؟؟؟ بصلي بكل ما يملك من استحقار كإني بشحت منه وقلع نظارته بتأهب كإنه هيتخانق معايا وشخط بكل ما يملك من قرف "عاوزة إيه " ؟؟؟ ربنا يسامحه ... بجد الدنيا وحشة أوي بيه

---------------------------------

الحمد لله ربنا بيسخر لي ناس لما بركب المشروع والناس تقعد تزق وتلزق فيا، مرة واحد ما أعرفهوش ولا عمري شفته راح قال للناس "استنوا في واحدة منتقبة ما تزقوش" :) ومنع أي حد يدخل لحد أما أنا أدخل وأقعد :) ... ومرة تانية واحد راح حاطط دراعه وسادد بيه المشروع وخلاني أنا بس أعدي وقال للناس استنوا عشان ما حدش يلزق فيا :) !!! وأنا لا أعرف دة ولا دة !!! سبحان الله :) ... بجد اللهم لك الحمد، بتسخرلي خلقك :) .. اللهم أدم علي نعمك واحفظها من الزوال واجزى كل الناس اللي بتقف جنبي خير الجزاء

-----------------------------------

الحمد لله ما فيش نصيب السنة دي :(( ... قدر الله وما شاء فعل :( كان نفسي أوي

-----------------------------------

When I needed you the most, I looked around, but you were no where in sight ... I shall not look for you again :( , go away and leave me alone !! Thank you ! ;(

------------------------------------

كفاية كدة عشان الناس المتابعة ووراهة مذاكرة ( قال يعني أنا ما وراييش مذاكرة) ء

ربنا يوفقنا جميعا يا رب سواء بنقاب أو من غيره

:D