السن القانوني

ولدتك أمك يا ابن آدم باكيا ** والناس حولك يضحكون سرورا

فاعمل ليوم أن تكون إذا بكوا ** في يوم موتك ضاحكا مسرورا

في ناس كدة تقول لك "أنا فاكر يوم ما انت اتولدت، كنت زي القمر" ... مش فاهمة يعني الواحد دلوقت بقة زي الإيه ؟؟ الشمس مثلا ؟؟؟ بعدين ما بحبش حد يقول "كنت" وهو وبيتكلم عن الجمال، مالها "مازلت" ؟؟ ماهيا من أخوات "كان" بردو !!! ء

:D

اليوم 21 وأنا تميت 21 :)) !!... يعني خلاص وصلت للسن القانوني وبقيت معترف بيا إن شاء الله :) (الواحد كان اسمه "قاصر" أو "ناقص الأهلية" والحمد لله بقة "كامل الأهلية" :) ) ... بيقولوا إن "سن الرشد" للبنت من 18 سنة وللولد من 21 فأنا الحمد لله كدة كدة وصلت لسن الرشد (رشيدة تتحدث إليكم الآن :)) ) ... طبعا في مميزات كتيرة أوي للواحد لما يوصل للسن القانوني زي ما أنا قعدت أستفسر من ناس كتيرة ... 1) تقدر تفتح حساب في البنك (طبعا الواحد فلوسه مش عارف يوديها فين ما شاء الله :))... 2) تقدر تشتري عقار باسمك (قطعة أرض أو عمارة مثلا (الواحد بردو يجيبله حتة أرض يبني عليها أي حاجة تنفعه في المستقبل) ... 3) يسافر بدون موافقة ولي الأمر (الواحد نفسه فعلا يسافر اليابان ويعيش فيها أو يسافر تركيا للسياحة أو هاواي للتصييف :)) ) ... 4) لو ليه ورث من أي حد، من حقه يأخذه ويتصرف فيه براحته ... 5) لو عمل جريمة (بعد الشر)، هو اللي يتعاقب عليها، مش باباه ... 6) بداية نمو ضرس العقل (طبعا ضرس العقل ما لهوش علاقة بالعقل، ممكن الواحد يكون مش عاقل وتصرفاته طفولية بس الضرس بردو يطلعله (دة عشان الناس اللي بتقعد تقلس وتقول "أخيرا هتعقل والضرس هيطلعلك) ... ء

أنا مش بحتفل بأيام الميلاد طبعا عشان حرام ومش فارق معايا (أما أنا عجيبة صحيح، مش فارق معايا بس بتكلم عنه) بس مجرد فكرة إن الواحد بقة أقرب لقبره بسنة كاملة تخلي الواحد يقف ويفكر هو عمل إيه في السنة دي وهل هو السنة دي أفضل من اللي فاتت ولا لأ

ماما وبابا مختلفين على يوم ميلادي، ماما بتقول أنا أدرى، أنا اللي ولدتك وكان يوم 21 وبابا بيقول شهادة الميلاد بتقول 26 ودة اللي المفروض بتقدميه لكل الناس ... أنا اتسجلت متأخر 5 أيام مش أكتر بس أنا بميل لإني أكون اتولدت يوم 26 مش عارفة ليه .. أنا أعتبر رابع أصغر بنت في الدفعة (في بنتين أصغر مني بشهر وواحدة أصغر ب 6 شهور) فأنا أعتبر صغيرة إلى حد ما عشان ما شاء الله البنات الباقيين أكترهم تمت ال22 !! وأعتبر في النصف تقريبا في الأسرة الكريمة ... ربنا يبارك في عمرنا يا رب ويجعله في طاعته دائما ويميتنا وهو راض عنا

طبعا الكلية من أول ما دخلتها وهي بتحتفل بيوم ميلادي بحيث إنها بتحط الميد ترم فيه، فالواحد لازم يبطل كلام دلوقت وينسى الاحتفالات ويفكر في الاحتفالات اللي مستنياه الأسبوع دة .... ربنا يسهلها علينا جميعا يا رب ويدينا أكتر مما نتمنى ونتوقع

طبعا ما حدش أخد باله، بس كان الأسبوع كله هيبقى امتحانات ما عدا النهاردة بس الدكتور حسين ربنا يكرمه ويرضى عليه غير الجدول اللي كانت الدفعة عاملاه وحط مادته النهاردة إحتفالا بيا :) ... ربنا يسهل بقة

إن شاء الله تكون دي صفحة جديدة مع الله، مع نفسي ومع كل الناس .. يا رب سامحني على كل اللي فات، يا رب امحيه خااالص وابعد عني المعاصي وأعني على طاعتك وعلى بر أهلي وحسن الخلق مع الناس .. يا رب ارزقني حب الناس واجعل أيامي الجيا لو اتكتبلي عمر تبقى أحسن من اللي فاتت .. يا رب ارضيني بقضائك ودبر لي أمري وعوضني أنا وأهلي وصحباتي بكل خير واشرح صدرنا واسعدنا واجمعنا جميعا عند حوض نبيك يا رب ... اللهم لا تحرمنا من دخول الجنة دون حساب ولا عقاب ... اللهم آآميييين