:D CSDian MOOODY ??? NO COMMENT !! :D

لا لا لا ، دانا لازم أحكي اللي عمال بيحصل فينا ... يا عيني علينا ... رابعة كمبيوتر بتتبهدل يا رجالة والكل عمال بيتفرج ... أنا بتكلم على أنهو مودل فيهم ؟؟ أكيييد عن بتاع السوفتوير إنجنيرينج، هو في حاجة عمالة تستهبل غيره ؟؟؟ أنا عدة عليا مودلات كتير من بداية حياتي السي إس ديهية، بس عمري ما شفت حد زيه ... يا عيني عليه، غلبان أوييي، شكله مش بياكل كويس أو بياكل كتير أوي عشان كدة مش قادر يتحرك

قصة حبيبنا مودي تتحكي في روايات والله

أولا، المودل على طول واقععععع ، طب ليه بنستخده ؟؟؟ "عشان دي الطريقة الرسمية للتسليم" كما قال رئيس القسم حفظه الله لمندوبنا في اجتماع هام حول أحوال مودي العزيز

طيب، لنفترض إن حد فينا مامته كانت دعياله وحظه كان جميل فالمودل اشتغل معاه وسلم عليه (لازم كل ساعة تتدخل تتأكد إن مودي ما وقعش عشان تقدر تبعت، فاضيين إحنا) لازم بردو يرفع شغله على فور شيرد ويجيب نسخة مطبوعة من شغله

طب ليه نسخة مطبوعة لما احنا سلمنا خلاص على المودل ؟؟؟ "عشان المودل (اللي هو الطريقة الرسمية) غير معتمد عليه وممكن يفضل واقع وشغلكم يضيع" زي ما بردو رئيس القسم حفظه الله صرح في المقابلة الساخنة

طب ليه ما نسلمش النسخة المطبوعة وفكنا من مودي خالص ؟؟ "عشان ممكن نحتاج نعمل ستاتستكس على شغلكم ونعرف مين اللي سلم ومين ما سلمش" ء

مش عارفة هما كانوا حالفين لمامة مودي إنهم مش هيسيبوه ولا هينسوه أبدا ؟؟ خايفين على مشاعره ؟؟

مرة مودي كان شغال، جينا نرفع عليه، ما نفعش، سألناهم، قالوا إن ما فيهوش مساحة !!!!! بجد هههههههههه ! وقالوا نستنى لما مودي يفضي اللي في بطنه أو يزرعوله بطن زيادة

المهم بقة، قالولنا النهاردة في كويز على المودل الساعة 10 بالظبط طبعا الدفعة كلها عارفة إن المودل هيقع وفي ناس كتيرة كانت مراهنة على كدة وبالفعل المودل كان شغال لحد 10 بالظبط بس "لما لقى ناس كتير داخلة عليه في نفس الوقت، اتكسف وما قدرش يستحمل النظرات الفاتنة دي، راح واقع" كما صرح زميل

والكويز اتأجل عبل ما مودي ياخد علينا بقة ويبطل كسوف أو يرجع بالسلامة من الغيبوبة دي (وطبعا الجميع متأكد إن لا دة ولا دة هيحصل) ... دي الدفعة كلها بقيت بتطلع نكت عليه وعلى المادة والموضوع بقة مسلي أوي ... لو احنا قسم كوبيوتر وبيتعمل معانا كدة، بقية الناس تعمل إيه ؟؟؟ بجد عييييب أويييييي اللي بيحصل دة، الموضوع ممكن يتحل ببساطة بس أنا مش فاهمة ليه التعقيد دة ولا مين اللي مصمم يعقدنا .. دة الرسول صلى الله عليه وسلم حتى بيقول "يسروا ولا تعسروا، بشروا ولا تنفروا" ..... يا رب ما أستخدمش مودي دة تاني عشان أنا مش بحبه، هو وحش