الناس الي بتسلم على غير المحارم ... الناس اللي بتهزر مع غير المحارم .. الناس اللي بتمشي مع غير المحارم .... البنات اللي بتكشف نفسها على غير المحارم .... ولما تكلمهم يقولوا "دة زي أخويا " أو "دة قد بابا" أو "دة احنا متربين سوا" أو "دة بابا واثق فيه" !!! فين في القرآن ولا في السنة ولا في أي حتة على الكوكب موضوع "زي ...." دة ؟؟ ما فيش اتنين اختلفوا إن الكلام دة غلط ومالهوش أي ذرة من الصحة
عاوزين نعرف مين هما المحارم وإيه اللي لا يجوز على غير المحارم عشان في ناس كتيرة أوي متخيلة إن كل اللي في عيلتها محارم، وابن الجيران من المحارم وصاحب باباها وابن صاحب باباها
للنساء: محارمك هما أبوك، أخوك، جدك، زوجك (مش مش مش خطيبك، خلي باااالك، احذرييييي :) )، حماك (أبو جوزك)، ابنك، ابن أختك، ابن أخوك، عمك (مش مش مش ابن عمك)، خالك (مش مش مش ابن خالك)، زوج مامتك، ابن جوزك، جوز بنتك
للرجال: لو انت تعتبر أي حاجة من اللي فاتوا لواحدة، يبقى انت محرم ليها، يعني ممكن تشوفها من غير حجاب وتهزر معاها وتقعد معاها براحتك وتسافر معاها
للنساء، الغير محارم هما: أخو جوزك (احذريييييي بشدة)، جوز أختك، جوز عمتك، جوز خالتك، ابن خالتك، ابن عمتك، ابن خالك، ابن عمك
كل دول صحيح هما أقارب بس مش محارم (أجاااانب) يعني حرام يشوفوكي من غير حجاب، حرام يقعدوا معاك لوحدهم، حرام يهزروا معاك
وطبعا خطيبك وابن الجيران وزميلك !!!! ء
ء(((((( نقطة مهمة: ناس بتقول، طب ابن عمي مثلا من أقاربي، مش احنا مطالبين نسأل على أقاربنا ونصل رحمنا ؟؟؟ أيوة، انت لو سألتي على عمك ومراة عمك وبنات عمك (ومراة ابن عمك، لو متجوز) وسألتي عن أحواله عن طريقهم ("إزاي العيلة كلها؟؟ أخبار الجميع إيه" كدة يعني)، كدة انت سألتي عليه، فمش لازم يعني تكلميه ذات نفسه عشان يكون اسمك سألتي عليه :) )))) ء
نقطة أهمممم: في بنات بتقول "أنا مش بعمل حاجة من ورا أهلي، بابا عارف إني بكلمهم" ، أنا بقول لها "طب ما ممكن بردو بابا يكون عارف إنك مش بتصلي وإنك مش محجبة، هل دة معناه بقة إن ترك الصلاة وترك الحجاب حلال؟؟؟ بعدين انت بتاخدي منهجك من بابا ولا من ربنا ؟؟؟ "ء
وللرجال، انت مش محرم ل: مراة خالك، مراة عمك، بنات عمك وبنات عمتك، بنات خالك وبنات خالتك، مراة أخوك، أخت مراتك، خطيبتك، بنت الجيران، زميلتك
بالنسبة لأخو الزوج (وأقارب الزوج من الرجال عامة)، ليه بقة أنا قلت "احذرييييي بشدة" ؟؟؟؟ عن عقبة بن عامر أن رسول الله صلى الله عليه وسلم قال : " إياكم والدخول على النساء ، فقال رجل من الأنصار : يا رسول الله أفرأيت الحمو ؟ قال : الحمو الموت . رواه البخاري ( 4934 ) ومسلم ( 2172 ) .ء
والحمو : هو قريب الزوج .
وأما قوله صلى الله عليه وسلم " الحمو الموت " فمعناه : أن الخوف منه أكثر من غيره , والشر يتوقع منه , والفتنة أكثر لتمكنه من الوصول إلى المرأة والخلوة من غير أن ينكر عليه
والله تعالى أعلم، جعلنا الله ممن يستمعون القول فيتبعون أحسنه وجعلنا ممن نخشاه هو ولا نخشى الناس
3 comments:
فدوى حتى لو قريبي ده أصغر مني برضه حرام ؟؟
و بالنسبة للزمايل، حرام السلام حتى، او نسأل بعض في حاجة فالدراسة، او الهزار يكون فالدراسة والشغل (مش حاجات شخصية يعني) ؟؟
شيمو حبيبتي
بالنسبة للي أصغر منك، العبرة مش بالسن خاالص، العبرة بالولد دة مكلف (بالغ) ولا لسة طفل
لو لسة طفل، أكيد عاديي أوي
لكن لو مكلف حتى لو كان أصغر منك، يبقى حرام
بالنسبة للزمايل، السؤال في الشغل والدراسة مش حرام لو أمنت على نفسك وعليه الفتنة، يعني ما يكونش في هزار ولا كلام زيادة (النقطة دي مهمة أوي) ولا كدة يعني
فالهزار سواء في الدراسة والشغل أو في الحاجات الشخصية حرام
وكمان طبعا الحاجات الشخصية حرام
:)
جزانا وإياكم وبارك فينا وفيكم
Post a Comment
comments are always welcomed :)