Failing to plan, is planning to fail

الحمد لله وحسبي الله ونعم الوكيل، اللهم إني أشكو إليك

أحداث كتيرة قاعدة بتحصل وأنا عقلي مش مستحمل فعلا التصادمات النفسية دي كلها :(( .... من اسبوع تقريبا، اتقال علينا اننا أسوأ دفعة شهدها القسم ( يا ترى نفس الكلام دة اتقال لكل الدفعات ؟؟) وإن المعيدين كلهم بيكرهونا ومش طايقينا ومش عاوزين يدونا تاني أبدا وإن سمعتنا وحشة أوي وما حدش هيرضى يناسبنا (مع إن والله في بنات لسة بتتخطب من عندنا ما شاء الله :)) ) وإننا هيتعلم علينا ك"دفعة 2011 السيئة للغاية" وهنتعب أوي لما نطلع ونشتغل برة .. يا ترى الكلام دة مبالغة ولا بجد ؟؟ ويا ترى إيه اللي دفعهم إنهم يحسوا بكل الحاجات دي من ناحيتنا ؟؟ هل بسبب وجود شخص أو شخصين لم يحسنوا التصرف في موقف أو موقفين (مع إني بردو لسة ما أعرفش إيه اللي حصل) يخلي الدفعة كلها يتقال عليها كدة ؟؟ طبعا مش كل الناس كانت موجودة لما الكلام دة اتقالنا والحمد لله إن مش كل الناس كانت قاعدة وإلا فعلا كان هيكون في ناس اتكلمت أو على الأقل استفسرت عن السبب ... المهم، حتى لو الدفعة دي كانت أسوأ حاجة مرت على تاريخ البشرية والدكاترة والمعيدين كلهم فعلا بيشتكوا مننا ومش طايقيننا، الواحد عليه بنفسه، المهم هو يكون كويس مع اللي حواليه، على الأقل ممكن يتقال إن الدفعة كلها كانت سيئة إلا هو :) ...

للناس اللي مش من دفعتي، بقالنا تقريبا شهر بنعمل في لاب الكونترول بتاع الأسانسير، المفروض كنا أول اسبوع ندخل نجربه وتاني أسبوع نسلمه .. الباش مهندس بيقول من الطبيعي إنه ما يشتغلش صح .. المهم، جينا أول اسبوع بدأنا بالجروب بتاعي والمتكون من 3 بنات فقط، أول ما دخلنا ولسة بنشغل البرنامج، قام الأسانسير واقع .. جابوا اللاب تكنشين والمانيول وهلوما واحنا قاعدين مستنين .. بعد ساعة بالظبط من الانتظار في المعمل، أعلنوا إنه خلاص باظ وهيقولوا لنا لو في محاولة الاسبوع الجاي ولا لأ ... جه الأسبوع اللي بعديه وكان الأسانسير اتصلح الحمد لله والدفعة كلها جربت وسمعت إن جروبين بس اللي اشتغل معاهم (طبعا جروبنا الثلاثي مش منهم) ... الاسبوع اللي بعده كان التسليم نفسه والدرجات بقة والريبورت (مش بس تجربة) .. من بداية السنة والجروب بتاعي بيسلم الأسبوع التاني (غريبة ما حدش لاحظ، ولا حتى المندوب ذات نفسه) .. أول أسبوع بيكون جروب أ ونصف ب ، والاسبوع التاني ج ونصف ب التاني .. المهم، المرة دي باش مهندس من ج اعترض (لسة واخد باله) وقال احنا اللي عاوزين نسلم الاسبوع الأول، مش كل مرة تأخرونا .. المهم، الجدول اتظبط الحمد لله بحيث أنا (ولأول مرة ومن نفسي) أسلم الأسبوع الاول .. الغريب بقة والمستفززززززز في الموضوع إن بعد ما الجدول اتحط ورحنا الكلية، راح المندوب مغيره وخلى الناس اللي كانت هتسلم الأسوبع الجاي يسلموا قبلينا !! طبعا ما ينفعش أتكلم عشان هكون بكلم نفسي .. شاء الله إننا يوميها نخلص محاضرات الساعة 1 تقريبا وإننا نكون الجروب ال 15 (حسبي الله ونعم الوكيل) اللي يسلم، يعني نسلم على الساعة 5-6 ... أنا كنت بقالي يومين عيانة أوي ومش بروح الكلية وكنت لسة في فترة نقاهة بس ما ينفعش أروح عشان احنا أصلا 3 ولو أنا مشيت، بجد هتبقى مشكلة .. الجروبات كلها على الأقل 4-5 أفراد، احنا الوحيدين اللي 3 :( ... قلت معلش أصبر وقعدت أقرأ الكتاب اللي بدأته من اسبوعين تقريبا ولما عدت الساعة 5 ونص ولسة ما سلمناش وقاعدين على السلم عشان الفصل بقة بيقفل بدري (حسبي الله ونعم الوكيل) وانا بقول خلاص هانت، قالوا الأسانسير باظظظظظظ وهنسلم الأسبوع الجاي!!! طبعا البنات قعدت تصوت وفي بنات عيطت (عشان القهرة والاستفزاز والله)... المندوب يغير الجدول بتاعنا كذا مرة ليه ويحط الدفعة كلها في يوم واحد ليه ؟؟ ما أكيد هيبوظ (حسبي الله ونعم الوكيل) ... أنا طبعا كنت مش شايفة قدامي وحسيت إني بجد عييت تاني وبقت شرارات من الغضب قاعدة بتطلع من عيني وحاسة إني لو فضلت في الكلية ممكن حاجة تحصل فمشيت بسرعة واستغلت النرفزة في المشي السريع (أو الطيرااااان) إلى البحر وروحت بيتنا ..

امبارح كنا مع بعض في الكلية عشان مشروع التخرج اللي مش باين له أول ولا آخر واحنا من عادتنا بنقعد نشتغل (أو نحاول) من غير ما نفتح إيمايلاتنا ولا حاجة .. شاء الله إن واحدة مننا تفتح المايل وتصوت "إلحقوا، جدول امتحان السوفت وير نزل على المودل" .. طبعا روحنا نفتح المودل، واقعععععع، فطلبت من نهال تبعت الجدول على الجروب وطلع امتحاني بكرة (النهاردة يعني) الساعة 3 !!! بسرعة لمينا الحاجة وقمنا .. بغض النظر الامتحان عن إيه ولا سهل ولا تافه بس فكرة إن ممكن ناس ما عندهاش نت أو أصلا عيانة وقافلة الدنيا وفجأة يتقال إن الامتحان بكرة (حسبي الله ونعم الوكيل) !!؟؟؟ يعني الحمد لله بجد اننا عرفنا وربنا يرحم بقة اللي ما عرفش عشان ما عندهوش نت ولا أي حاجة (ما حدش يقول إن الناس هتقول له، ما حدش بيفتكر حد، حتى الصحاب) ... المهم، أنا نزلت بقة عشان الامتحان النهاردة وأنا في سيدي جابر أفاجأ بصاحبتي بتتصل بيا (أنا قلت بتستعجلني مثلا ولا حاجة) لاقيتها بتقول (الامتحان اتأجل، هيبقى بكرة الساعة 10)!!! يااااه ؟؟؟ (حسبي الله ونعم الوكيل) ... ما فيش نظام ولا خطة واضحة ولا جدول ولا أي حاجة ، بجد بهدلة وسايبيننا عيمين لا عارفين راسنا من رجلينا ... ممكن حد فيكم يقول الظروف، بس ما هو دة اللي مضيع العالم دلوقت، الحرامي بيقول أنا بسرق عشان الظروف، اللي بيقتل بيقتل عشان الظروف، كل الناس اللي ماشية غلط بترمي اللي بتعلمه على مسمى الظروف ... أنا طبعا كملت المشروع لحد آخره ورجعت معاه عشان لو نزلت في النص، هقعد ساعتين عبل ما ألاقي حاجة اركبها عشان دي كانت ساعة ذروة ..

المهم، أنا أصلا الحمد لله عندي دوار الحركة (90% من المرات اللي بركب فيها أي حاجة، بدوخ وبيجيلي غثيان شديد أوي :( الحمد لله :( ) ومرة حتى ركبت مع خالي عربيته وما أقدرش أقول غير إنه يوميها ودى عربيته للمغسلة وأنا قعدت أعتذر ألف مرة وهو حسبني عيانة بس دوار الحركة دة مش مرض .. للي فيكم عنده دوار الحركة، أنا بتبع الأسلوب دة عشان يخف، بقعد جنب شباك مفتوح او حتة متهوية كويس عشان الكتمة والهواء الواقف بتزودها، ببص برة على العربيات اللي بتتحرك، بمضغ مستيكة أو أمص بمبناية .. أصلا دوار الحركة بيجي من إن الأذن الوسطى بتحس بحركة بس العين مش بتكون شايفة الحركة دي (لو انت باصص جوا المشروع أو بتقرأ حاجة وأنا غالبا ما بكون بقرأ حاجة عشان ما بعرفش أقعد كدة ساعة بتفرج على اللي حواليا أو أسمح لأفكار غريبة تنهال على عقلي المسكين) فالمخ بيترجم التناقض بين احساس الأذن بالحركة وعدم رؤية العين للحركة على إنه سم في جسمك ولازم تتخلص منه عشان كدة شعور الغثيان :( .. أنا كنت بقرأ نفس الكتاب بتاع يوم الاسانسير المستفززززز والحمد لله خلصته النهاردة (أهي ميزة بردو للنزول اللي على الفاضي دة :) ) وكمان بدأت كتاب جديد بالانجليزي (إنسانة عجيبة، ماشية بكتابين ما شاء الله :) عشان لو واحد خلص، أبدأ في التاني :) ) ...

بس كفاية كدة، ولو انت كملت لهنا، أكيد بتقول إيه الكلام الكتير دة وأنا المفروض أستفاد إيه، مش انت قلتي لنا انك مش هتحكي حاجة إلا لو فيها فايدة .؟؟؟ انت ما أخدتش بالك، الفايدة إنك تحترم مواعيدك وتحط خطة لحياتك وما ترميش كل حاجة على الظروف .. الانسان الناجح هو اللي بيتحكم في ظروفه ... وكمان ديما حط خطط بديلة عشان لو خطة فشلت تتشغل بغيرها بدل ما تقعد تعيط (زي الكتابين اللي جبتهم معايا :) ) ... كمان أكيد دلوقت عرفت تتصرف إزاي لو جالك دوار الحركة (ربنا يشفيني ويشفي جميع الناس منه) ... كفاية كدة وحسبي الله ونعم الوكيل في كل الناس اللي في إيديها سلطة أو مكانة معينة وبتضيع الناس معاها حسبي الله ونعم الوكيل على حرق الدم المتكررة من مواقف ذكرتها واخرى لم أستطع ذكرها ....

Failing to plan, is planning to fail …