ال label هو gratitude عشان بحاول أبص على الجانب المشرق في كل ظلمة .... أكيد فيه ، مش عشان الجانب مديني ظهره يبقى هو مش موجود .....
مش بقول لك خليك زي فُلانة ولا علانة ، لإن المُقارنة بالغير تحطيم ، ما حدش عمره كان في مكانك ولا حد عمره هيقوم بدور "فدوى" إلا "فدوى" .... أنا بطلب منك تكوني فدوى التي يرضاها الله ورسوله .... شوفي ربنا أمر بإيه والرسول دعى لإيه ....
صعبة دي ؟؟؟ والله إنها لسهلة على من سهلها الله عليه .....
ووالله لو صدقت الله لصدقك ....
بشكرك يا رب على الدروس القاسية اللي باخدها اليومين دول .....
كذا درس ورا بعض ....
طع طع طع طع ......
طخ طخ طخ طخ ......
وكله بيصب في نفس المصب .... أكيد استخدمت مكانتي كأخت كبيرة أو كمعلمة لطالبات استخدام خاطئ ولو مرة .... لأ ، أكيد كذا مرة ... لإن ربنا بيستر وبيرحم في أول كذا مرة ... لكن لما العبد يتمادى ، بيوريه حقيقة نفسه ....
حتى لو أنا شايفة إن هم فيهم استهتار الدنيا ولا مبالاة الحياة وبيغيظوا أوي و و و و ......
هي دي مدرسة الحياة ...
هي دي الكلمة اللي اتقالت لي كتير أوي وكنت بقول " هي الناس اللي هقابلها في الشغل ولا في الحياة عامةً هتفرق عن الجامعة ولا العائلة إزاي ؟" .... أديني عرفت بتفرق إزاي .....
حتى لو حاجات في كيفية التعامل اتقالت لي في البيت ، مش هتركز في عقلي ولا هقتنع بيها إلا لما أتعك فعلاً .... أتعك بجد وأتوجع .... الألم بردو بيعلم ... بس نبص على الدروس كويس ... مش نقعد نضمد الجرح وننسى سبب الجرح ...... ممكن حتى لو سبناه ينزف نلاقيه طلع كل الخبث اللي موجود ..... شكراً يا الله :)
حتى لو حاجات في كيفية التعامل اتقالت لي في البيت ، مش هتركز في عقلي ولا هقتنع بيها إلا لما أتعك فعلاً .... أتعك بجد وأتوجع .... الألم بردو بيعلم ... بس نبص على الدروس كويس ... مش نقعد نضمد الجرح وننسى سبب الجرح ...... ممكن حتى لو سبناه ينزف نلاقيه طلع كل الخبث اللي موجود ..... شكراً يا الله :)
1) اللي بتعمله في الناس مصيره في يوم من الأيام يتعمل فيك .... حتى لو انت مش قاااااصد .... حتى لو انت شايف إن اللي بتعمله دة يستحقوه ... مش انت اللي هتحاسب الناس .... بالذات طريقة تعاملك مع الناس ... طريقة ردك على الناس ... ازدراء الناس .... الرد من تحت مناخيرك ....
انت اللي لم " تُخفض جناحك للمؤمنين " ....
2) حتى لما تكون في موقف قوة (من وجهة نظرك التعبانة) وتقول كلمة حلوة لحد بصوت عالي وأمام الكثيرين كإنه هو بس اللي كويس والباقيين زي قلتهم ، وتحسسه فعلاً إنه كدة ( ما هو من وجهة نظرك مجتهد و و و والباقيين كُسالى و و و )، هيجي يوم في موقف ضعف ليك وهيتقال لك نفس الحاجة على مسمع من ناس كتيرة .... بتوجع أوي .....
3) مش طول عمرك هتفضل أحسن واحد على اللي حواليك (من منظورك الضعيف ونظرة الناس الغير مُنصفة) .... هيجي يوم تكون فيه انت فعلاً أسوأ من حولك ومش عارف حتى تتقدم أي خطوة عن اللي حواليك وتحس بعجز رهيب .... اعتياد النجاح له نهاية .... الفشل كتير بيخلي الواحد يخفض راسه شوية اللي بقالها سنين مرفوعة ويا ريتها مرفوعة على حاجة تستحق .....
4) لما تقلل من قدرات الناس وتقول " إزاي يعني مش عارفين يعملوا كذا كذا ، دي هبلة أوي " ، هتتحط في موقف تلاقي كل اللي حواليك بيعملوا حاجة وشايفنها " سهلة أوي أوي " وانت الوحيـــــــــد اللي محتااااس وعامل زي الغرقان مش لاقي مخرج ....
5) لما حد يقول لك " حاولت ومش عارف " وانت بكل كبر تقول في نفسك " ياااه ، على دي مش عارف ؟؟؟" هتتحط في موقف تلاقيك فعلاً " مش عارف ولا قادر " واللي حواليك " قادرين وعارفين " ....
5) بدايتي كانت نطفة قذرة ونهايتي جيفة نتنة ... أفخم لبسي من دودة وأحلى أكلي من حشرة .... فعلام التعالي ؟؟؟
من تواضع لله رفعه .....
كنت بسمع زمان " كما تُدين تُدان " وكنت كتير برددها وبقولها لغيري بس كتير أوي كنت بنساها وأنا بعامل غيري .....
قفي مع نفسك ، لما ربنا يحطك في موضع سلطة ( رتبة أعلى من غيرك أو علم أكتر من غيرك ) تواضعي .... اللي مش عندك ممكن أوي يكون عند غيرك .... حطي نفسك مكان اللي قدامك ....
التواضع ، الابتسامة ، حسن الظن ، التماس الأعذار ، إلقاء السلام ، عدم احتقار أحد حتى لو كنت شايفاه يستحق الاحتقار (انت مين عشان تحكمي عليه ؟؟؟ لعل بينه وبين الله سريرة ترفعه فوق منزلتك الحقيرة أضعافاً مضاعفة) .....
يا رب أتعلم بجد ... مش أكون مجرد بكتب كلام وبس ....
يا رب ، انت عارف إن الموضوع دة صعب علي أوي أوي وانت عارف الأسباب وبقالي فترة كبيرة بدعي تحل لي المُعضلة دة ، حلها من عندك يا رب ، أنت الرحيم وأنت على كل شئ قدير ....
الأيام دُوَل .....
No comments:
Post a Comment
comments are always welcomed :)