قصاصات توفيقية

كلما تذكرت كيف تركوني دون وداع، أتذكر دعاء أمي "ربنا يبعد عنك ولاد الحرام" ... الحمد لله ..... :) ء

-------------------------------------------------------------------

كل يوم بتأكد إن "وخير جليس في الحياة كتاب" .... أحلى حاجة في الدنيا الكتب :) ... نفسي تبقى الكتب رفيقتي إلى أن أموت ... يا رب أقرأ أكتر وأكتر وفي كل المجالات

أنا فعلا بقيت مدمنة كتابات الدكتور أحمد خالد توفيق

نزلت واشتريت كل مؤلفاته بتاعت دار ليلى وقرأت "حظك اليوم" و "زغازيغ" و"قوس قزح" و "عقل بلا جسد" و "قصة تكملها أنت" في أقل من 4 أيام وفعلا الراجل دة عبقري أوي أوي أوي ما شاء الله

كتاباته قمة في الجمال ... كالعادة طبعا لما بعرف حد، بتحسر أوي على كل الأيام اللي ما كنتش بعرفه فيها أو ماكنتش بقرأ له فيها .... ء

أما عن "حظك اليوم" فهو كان قمة في الجمال ما شاء الله ... هي عبارة عن رواية بتتكلم عن الأبراج (طبعا نحن لا نؤمن بالأبراج) وإزاي إن 12 صحفي كل واحد مولود في برج مختلف مرة فضحوا واحد اسمه عدنان كان بيؤمن بالأبراج وبيعمل سحر وكدة بعدين راح هو انتحر لما اتسجن عشان طلع نصاب وبعت لكل واحد فيهم ورقة مكتوب فيها "برجك هينتقم منك" وبالفعل مثلا واحدة من برج الدلو تموت غرقا في سفينة مكتوب عليه الدلو، واحد من برج الحمل يموت بشكة بروش على شكل الحمل ويسمم دمه .... وهكذا بس الأحداث شيقة أوي وغير متوقعة ... يعني مثلا الواحد متخيل إن اللي من برج الأسد مثلا أسد هياكلها بس تطلع الطريقة اللي تموت بيها تقرب لكلمة الأسد بس من بعيد أوي ... المهم الساحر كان مستعين بواحد من ال12 إنه يجيب له حاجة من أثر الباقيين (شعراية مثلا) والواحد دة كان من برجي، برج العقرب ... هي هي هي ... أصلا النصاب بردو كان من برج العقرب وكان بيمارس السحر الأسود ... ربنا يحفظنا ... بس فعلا الأحداث شيقة أوي أوي أوي

أما عن "زغازيغ" فأنا لم أتوقف عن الضحك بالمرة طول ما أنا كنت بقرأ .... أسلوبه قمة في السخرية ... ما شاء الله .. هي عبارة عن مقالات متفرقة بس بجد جميلة أوي

أما عن "عقل بلا جسد" فهي أكتر واحدة عجبتني فيهم .. رواية بتتكلم عن واحد عبقري أوي بس مشلول وعنده واحد صاحبه (الراوي) بوليس ... المهم البوليس كل شوية يستعين بصديق عمره العبقري المشلول (عصام) عشان يحل له لغز أو يفك شفرة .... أنا انبهرت أوي بيه ما شاء الله .... كل حاجة كانت متعلقة بالأرقام وحاجات رياضية عبقرية أوي أوي ... مثلا بيقول إن عدد الخطوات اللي الانسان بيمشيها في 3 ثواني = عدد الكيلو مترات اللي بيمشيها في الساعة وحاجات تانية كدة قعدت أحفظها وحسيت فعلا إن ثقافتي زادت بعد قراءته

أما عن "قوس قزح" فهو كتبه مع واحد اسمه الدكتور "تامر" مش فاكرة تامر إيه ... وهما عبارة عن 7 قصص، قصة لكل لون بس في 3 قصص ما عجبونيش

كل أما أعرف كاتب، أروح أجيب كتبه وما ألحقش أقرأهم كلهم عشان بسمع غيره وبروح أجيب كتبه ... مثلا نفسي أوي أكمل كتب (أحلام مستغانمي) بس الدكتور (أحمد خالد توفيق) مش مديني الفرصة خاااااااااالص

إن شاء الله هخلص كتبه قريب وأكمل أحلام، بس طبعا لو رمضان جه، هسيبهم كلهم إن شاء الله وأرجع لهم تاني بعد العيد إن شاء الله