أنا وأنا

" If you are scared of something, face it and don't run away ".. Today was the first time I applied this and how relieved I am :) ! الحمد لله .... A "scary" but "funny" experience ... Still in shock !!

أنا 1 : أبعت ؟؟ ههههه ، مش عارفة ليه بضحك على نفسي كل ما يكون في فرصة بعت .... أجي إيه أنا قدامهم كلهم ؟؟

أنا 2 : وهتخسري إيه يعني ؟؟

أنا 1 : ما انا عارفة النتيجة ، كلهم زي بعض ، أتعب نفسي ليه بقة ؟ مش أختصر السكة وخلاص ؟؟

أنا 2 : مش هتخسري حاجة ، ممكن المرة دي يبقى غير ....

أنا 1 : غير ؟؟ أنا امتى كانت أي حاجة معايا غير ؟؟

أنا 2 : انت حرة ، أنا قلت اللي عندي .....

أنا 1 : طيب ، ما هي بايزة بايزة .... هبعت أهوه .....

وخلال الوقت .....

أنا 1 : هههههه، شفتي بقة إني أنا اللي صح ؟؟؟

أنا 2 : أنا نسيت أصلا الي بتتكلمي عليه ....

وبعد سبعة شهور .... والله سبعة !!!

أنا 1 : إيه دة ؟؟؟ وإيه اللي فكرهم بعد كل دة ؟؟؟ سبحان الله ! ما كنش طلعتلهم في الحلم مثلا ولا جالهم هاتف ؟؟

أنا 2 : مش قلت لك ؟ خسرتي حاجة ؟؟

أنا 1 : بس غريب انهم يتكلموا بعد كل المدة دي ، الموضوع دة فيه إنَّ وأنا هسحب نفسي من أوله ... أنا أصلاً ما كنتش عاوزة من الأول وانت اللي غصبتيني .....

أنا 2 : انت غريبة أوي ، ماشي يا ستي ، أديني بغصبك تكملي .... شوفي بس الموضوع إيه ...

أنا 1 : يا ستي أنا في غناء عن وجع الدماغ دة ، النهاية واحدة ومعروفة ....

أنا 2 : مش هرد عليك ، انت حرة ...

أنا 1 : طيب ، هجرب ، مش فارقة خااااالص ....

وبعد يوم ... يوم والله !!!

أنا 1 : إيه دة ؟؟؟ إيه اللي بيحصل ؟؟ أنا مش مصدقة !!

أنا 2 : مش قلت لك ؟؟

أنا 1 : عارفة يا ست الحكيمة بس غريبة أوي يعني ....

أنا 2 : غريبة غريبة ، هو في حاجة عمرها ما كانت غريبة معاك ؟؟

بعد يومين كلهم خوف وقلق ... مش زي أي يومين ....

أنا 1 : أنا خايفة أوي

أنا 2 : وهتفضلي خايفة كتير أوي لو ما أخدتيش الخطوة ... كفاية عليك أوي اليومين دول .... طالما كدة كدة هتتاخد ، خديها دلوقت وريحيني معاك ...

أنا 1 : بس أدي نفسي فرصة أستجمع قوايا فيها !!

أنا 2 : مش هتستجمعي غير الخوف ... اتوكلي على الله ... يللا، ربنا ثم أنا جنبك ....

بعد دقائق مخيفة ومضحكة .... فعلاً اجتمع الخوف مع الضحك مش عارفة إزاي ...

وصرااااااع بين أنا 1 وأنا 2 وطرف ثالث .....

سجود شكر ....

أنا 1 : انت معايا ؟؟؟ أنا 2 ؟؟؟ إيه اللي حصل دة ؟؟ في غلطة أكيد في الموضوع ....

أنا 2 : غلطة إيه بس ؟؟؟ دي الحاجة الوحيدة اللي صح ، كل اللي فات هو اللي كان غلط ....

أنا 1 : بس انت شايفة دة معناه إيه ؟؟؟ دة لسة اللي جاي أسوأ !!!

أنا 2 : ليه يعني ، مش حطيتي رجليك على أول الطريق وكنت مرعوبة من الخطوة دي ، أهي تمت الحمد لله ...

أنا 1 : ايوة بس بردو اللي جاي أصعب ... مين قال إن اللي بيحط رجليه على أول سلمة بيقدر يكمل ؟؟؟ أنا مشششش مصدقة .... أكيد في غلط ...
أنا 2 : معلش أنا عاذراك ، مانت اللي شفتيه يخليك تعملي أكتر من كدة ، بس اعتبريها هدية من ربنا ....

انا 1 : سبحان الله ، وأي هدية ....

لما الواحد يكون مش عارف يفرح ، يضحك ، يعيط من الفرحة ، ينط ولا يزقطط .... بس يفضل مبلم كدة وبيراجع الأحداث تاني لعل يكون في حاجة غلط ....

أنا 2 : أول مرة أشوف حد من شدة فرحته بلِم ... إن شاء الله الصدمة تروح بعد فترة وألاقيك فرحت ...

أنا 1 : فكرك هفرح ؟؟؟ حاسة إني شايلة هم سنيــــــــــــــــــــن ....

أنا 2 : استهدي بالله ، انت مالك بالسنين دي ؟؟ انت مسؤولة عن النهاردة بس ....

أنا 1 : الحمد لله ... الحمد لله .... الحمد لله .... في ناس بتستنى سنين ، في ناس بتستنى شهور في ناس مش بتستنى أصلا ... الحمد لله الذي جعلنا من أصحاب الشهور ، خير الأمور الوسط ...

أنا 2 : ولسة إن شاء الله ، ولسة ....