كان يا ما كان
كان في مجموعة ناس صوتهم حلو أوي
بس واحدة منهم ، صوتها كان أجمل منهم كلهم .....
سمعوا إن في مسابقة إنشاد وكلهم راحوا عشان يقدموا .....
الناس كلها كان شكلها جميل فلجنة التحكيم ادتهم فرصة ينشدوا ويوروهم موهبتهم
لكن الواحدة دي كانت مش حلوة أوي فكل ما تروح حتة ، من غير ما حتى يسمعوا صوتها يقولوا "آسفين ، العدد اكتمل" .... طب ازاي العدد اكتمل وهم لسة قاعدين بياخدوا ناس بعدي ؟؟؟
افتكرت قبل كدة إن في حد قالها إن الناس دايما بتحكم على الناس بمظهرها ... فحمدت ربنا إنها مش حلوة وقعدت في بيتها خايفة تقابل الناس ....
مرة سمعت عن مسابقة إنشاد بس على الراديو ، يسمعوك من غير ما يشوفوك ... كانت خايفة ومترددة أوي أوي .... أصلها تعبت من إنها تترفض كل شوية .... فعلاً تعبت مع إنها كانت أكتر واحدة موهوبة .... قالت "هجرب، أكيد مش هتجرح أكتر من الأول" ....
اتصلت بيهم وقدمت نفسها وبدئت تنشد وهما مبهورين من أول سطر قالته .... سمعوها لحد الآخر بعدين قالوا لها "حرام عليك !!! فينك من زمان ؟؟ إزاي ما قدمتيش لمسابقات قبل كدة؟" .... سكتت ... بعدين قالت "ظروف" ...
قالوا لها إنها أفضل صوت هما سمعوه ويحبوا إنهم يقابلوها .... قالت لهم "بلاش تقابلوني الله يخليكم لحسن تغيروا رأيكم" !!! قالوا لها "إزاي يعني ؟؟؟ هو صوتك هيتغير لما نقابلك مثلا ؟؟؟ " ... قالت لهم "أصل شكلي ...... " .... "يا سلام ؟؟؟ واحنا مالنا بشاكلك ؟؟؟ اللي يهمنا صوتك .... دي مش مسابقة ملكات جمال" !!!!.....
راحت لهم وشافوها بس أول ما شافوها افتكروا صوتها فنسوا شكلها خالص وقالوا لها "مبرووووك ، طلعتي الأولى ، انت أجمل صوت سمعناه ... امتى هنبدأ تسجيل ؟ ممكن من دلوقت ؟؟؟" .... ابتسمت بعد ما قربت تنسى شكل الابتسامة وبدئت تنشد لهم أول نشيد وكان من تأليفها وعنوانه "عندي حلم ومش هسيبه" .....
No comments:
Post a Comment
comments are always welcomed :)