نسيــــــــت أقول أهم حاجة

كويس إني نسيت عشان تبقى في تدوينة لوحدها عشان تحسوا بأهميتها :)

الدعاء ، الاستغفار، الصلاة، القرآن

مش بقول لك هتسيب كل حاجة وتقعد على السجادة طول اليوم ، ربنا ما أمرناش بكدة طبعاً

* بس تربص لأوقات إجابة الدعاء : ركعتين في جوف الليل (الثلث الأخير دة عجااااايب لوحده سبحان الله، يااااما سرطانات اتشفت ، ياما عقم اتشفى ، ياما جوازات تمت ، ياما فقر زاااال .... ربنا الكريم الغني بينزل إلى السماء الدنيا تنزلاً يليق بجلاله ويقول "هل من سائل فأعطيه" !!!! واحنا نايميــــــــــــــن ؟؟؟ دة والله لو واحد مهم من البشر عرفت إنه بيعدي على البيوت بالليل ويدي للناس اللي هي عاوزاه هتفضل صاحي ومستنيه ، طب ملك الملوك بيقول لك "عاوز إيه؟" ) ، بين الأذان والإقامة، في السجود بتاع الفرائض والنوافل، يوم الجمعة ....

* لما تكون قاعد سرحان ولا مستني حاجة (مواصلات، ماء يغلي، بتلبس، نازل على السلم ، أي وقت) ، اقعد استغفر الله ، بدل ما تقعد فاضي كدة ، خليك تاخد حسنات ، وتكفر سيئات وتجيب الدعوات ... ربنا قال في سورة نوح : " فقلت استغفروا ربكم إنه كان غفاراً ، يرسل السماء عليكم مدراراً ، ويمددكم بأموال وبنين ويجعل لكم جنات ويجعل لكم أنهاراً" .... دة اللي نوح عليه السلام قاله لقومه ... وفي قصص واقعية عن ثمرات الاستغفار دور على الyoutube وقعد عيط :(( .... والرسول صلى الله عليه وسلم قال في سنن الترمذي "من لزم الاستغفار جعل الله له من كل هم فرجاً ومن كل ضيق مخرجاً ورزقه من حيث لا يحتسب" .... استغفر الله وأتوب إليه .....

* كل ما تلاقي نفسك متضايق من حاجة أو شايل هم حاجة أو خايف من حاجة ، صلي ركعتين لله وقول له كل اللي جواك (صلاة الحاجة) ، هتلاقي سحرررررر .... الرسول صلى الله عليه وسلم لما كان بيهمه أمر من الدنيا ، كان بيهرع إلى الصلاة .... "واستعينوا بالصبر والصلاة" .....

* ويا سلام لو كل يوم يكون ليك ورد حفظ/مراجعة أو حتى قراءة من كتاب الله ... كلام ربنا لينا !!! رسائل وإرشاد وسكينة ... "وننزل من القرآن ما هو شفاء ورحمة للمؤمنين" .... لازم يكون ليك معاه وقفة يومياً ولو ربع ساعة ، ما تبقاش بخيل ، انت الكسبان ....

وإوعى تنسى قول الله تعالى "فاذكروني أذكركم" .... تخيل لو ربنا ذكرك حياتك ممكن تبقى عاملة إزاي ؟؟؟

اللهم أعنا على ذكرك وشكرك وحسن عبادتك ....

اللهم استعملنا ولا تستبدلنا .....