My PainKiller

أنا استغربت من نفسي جدا، إزاي لون البلوج قبل ما أسوده كان بني مع إني مش بحب اللون البني خااالص ؟؟ أنا ألواني المفضلة الأسود والكحلي الغامق أوي بالذات في اللبس :) ... أديني بغير.....ء
---------------------أنا هنا :)

أنا بخير الحمد لله

كان يوم عجيب

سبحان مغير الأحوال

سبحان مقلب القلوب

سبحان من ينزل السكينة على من يشاء

أول مرة أحس إني مبسوطة إني قدرت أتخطى ألم بمساعدة ربنا بس

في كلام كتير عاوزة أقوله

أولا الحمد لله

ثانيا شكرا أوي
ثالثا ودة الأهم، "مع كل محنة منحة" صدق اللي قال كدة، كلامه دقيق أوي أوي ومش هتحس بيه إلا لما يحصل لك ... جايز المنحة لا تتم للآخر، بس أحيانا البدايات بتدي أمل ... زي الواحد كدة يكون دخل الكلية وحط رجليه على الطريق، هو لسة مش عارف هيعمل إيه ولا هيوصل لإيه وجايز ما فيش حاجة بيحبها تحصل، بس إحساس دخول الكلية جميل أوي .. أديني قربت أسيبها

..................

فاصل غير متوقع

يا رب اكتب الخير وارضينا بيه

أنا واثقة في اختيار الله

أنا ديما بدعيه
-------------

أكمل بقة اليوم كان عامل إزاي

صحيت من الصبح بدري أغير البلوج واخليه كئيب

ونزلت كمية صور كئيبة وحفظت أشعار مكتئبة لنزار قباني وفاروق جويدة (نصيحة، ابعدوا عنهم خاااالص، كلامهم يا إما غزل يا إما ألم ودموع، أنا طبعا كنت بدور على "مود" الألم :)) )ء

بعدين لاقيتني بقالي أكتر من يومين ما أكلتش حاجة تًذكر وماليش أي نفس أحط حاجة في بقي

وكنت قايلة إني مش هروح الكلية إلا لو في تسليم أو أيام الإمتحانات بس

بالذات كمان إني ما حضرتش الحفلة :((

So I will feel left out until all the decorations are removed

ربنا يسعدهم ويبسطهم، كان نفسي أكون معاهم الحمد لله

إن شاء الله في حفلة التخرج الكبيـــــــــــرة أو حد فيهم يتخطب ونهيص له

المهم، افتكرت إن كل أربعاء بعد المغرب الشيخ محمد الصاوي ربنا يعزه بيدي درس في مسجد عباد الرحمان في سبورتنج على البحر

أنا بروح أحيانا ، بس للأسف عشان الدراسة والتسليمات مش عارفة أظبط وقتي فبسمع الحاجات دي في البيت مع إن الحضور والجو بيبقى غير خاااالص في المسجد

المهم بقة، قررت إني أنزل الساعة 6 وأركب لحتة قريبة من المسجد بعدين أتمشى على البحر شوية بعدين أروح الدرس

حسيت حاجة بتقولي إنزلي إنزلي

وماله، ممكن أوي ربنا يبعتلي كلمة تغير كياني في الدرس دة
أنا كنت قاعدة بقول فقدت الأمل في الحياة والثقة في الناس بس ما فقدتش الأمل ولا الثقة في الله، ماليش غيره

ركبت وطلع بينا على البحر، لاقيت ناس مصيفة ومهيصة ونازلة الماية عادي جدا (نفسي أنزل الماية أوي، في الجنة إن شاء الله :) )ء

نزلت الإبراهيمية ورجعت مشي لسبورتنج الكبيرة بعدين رجعت تاني لسبورتنج الصغيرة

وصلت على المغرب

البحر كان عليه ناس بتتمشى وناس ربنا يهيدها، عايشة في كوكبها الخاص

بس الحمد لله كان في ناس ماشية زيي كدة مالهاش دعوة بحد
ولاقيت مكتوب على الصخور "ومن يتوكل على الله فهو حسبه" آه والله، ديما كنت بلاقي مكتوب تفاهات زي "يا توتو مش عارف بعمل إيه ويا ميدو جرالي إيه" وكلام مش موزون كدة، بس بجد المرة دي "أترضاه لأختك"؟؟ "ومن يتق الله يجعل له مخرجا"، "قل للمؤمنين يغضوا من أبصارهم"ء

كان لازم ألتقط صورة للغروب، اللي هرياه تصوير


سبحان المبدع، أنا عندي كمية صور أنا مصورها للطبيعة، سبحان الخلاق العليم، فعلا بديع السماوات والأرض، مش فاهمة الناس اللي مش مؤمنة بالله دي بتقول يعني مين اللي خلق الحاجات دي ؟؟ البقرة ؟؟ الصليب ؟؟ ولا الطبيعة خلقت نفسها ؟؟ تعالى الله عما يقولون علواً كبيراً ... كان إحساس جميل أوي كدة وانت بتاخد نفس عميق ونقي من البحر ... الحمد لله .. في حديث بيقول إن التأمل في البحر عبادة :) ء
وصلت المسجد، صلينا المغرب واستنينا الشيخ .. جو تاني خالص المسجد دة، مع إني ما أعرفش أي واحدة فيهم، بس حسيت إني بحبهم كلهم ونفسي أقوم أسلم عليهم واحدة واحدة .. بجد والله تحس إن دي الناس اللي نفسك تبقى زيهم، أيوة بتفشل كتير أوي بس هتوصل إن شاء الله ... الشيخ اتأخر، مش عوايده .. طلعت كتيب "الهوية الإسلامية" للشيخ محمد إسماعيل المقدم ربنا يكرمه، الكتاب دة لازم أعمل عنه بوست مخصوص، قرأته مرتين تلاتة وبقرأه تاني .. عاوزة أحفظه، جميــــــــــل وبيفوق الواحد كدة ، بجد بستمتع بيه أوي ... المهم، الناس اقترحوا على واحدة تروح تسأل الشيخ فين ، المهم رجعت تقول إنه مش جاي !!! لأأأأأأأ !!! قدر الله وما شاء فعل، كان نفسي في درس من بتوعه دول اللي بينسوني أنا فين وبيخلوني أقعد أعيط بقوة وأحس إني اتغسلت بعدها ... الحمد لله

طلعت من المسجد وقلت أروح بقة، لاقيت سوبر ماركت جنبه، ولاقيت عنده عصيري المفضل اللي مش بلاقيه خاااالص (سيزر بالتفاح) ولاقيت بتاعة كدة كنا بناكلها أيام المدرسة (من 6 سنين) بالتفاح بردو ... جيبتهم وجيت

إيه دة ؟؟ أمال اكتئابك راح فين وألمك راح فين ؟؟ ما أعرفش ، كله اختفى ، بمعنى الكلمة، تلاشى .. طول ما أنا مشاية على البحر كنت بفكر في حاجات كتيرة وأدعي ربنا بثقة إني أثبت وأصبر وأكمل
سبحانه، من غير ما أسمع درس ولا أعمل حاجة، كل حاجة فعلا اختفت وحسيت إن أصلا ما كانش في حاجة

وأنا في طريقي للمنزل، لمحت حاجة مكتوبة على مشورع خليتني أبتسم وأقول "يا ريت يا رب" وسبحان الله، ربنا ليه تدبيراته في أنسب أوقات هو شايفها .... قررت وأنا في السكة أجدد شكل البلوج وأرجع أحسن مما كنت وسبحان الله، رجعت ولاقيت ناس صاحباتي مكلمني على النت كذا مرة وزعلانين إني مش برد وقلقانين (أصلي قافلة موبايلي من الصبح) وكنت هقفله لأجل غير مسمى ... طمنتهم عليا الحمد لله وكنت بكتب هنا في نفس الوقت
-------------------
حاجة أخيرة، حسبي الله ونعم الوكيل في كل اللي بيكره الناس في الإلتزام، حسبي الله ونعم الوكيل في اللي شايف نفسه ربنا وبإيده ومن حقه يحاسب الناس، حسبي الله ونعم الوكيل في اللي بينشر الكلام ولو كان صحيح، حسبي الله ونعم الوكيل في اللي بيفتي من غير علم "فليتبوأ مقعده من النار"، حسبي الله ونعم الوكيل في اللي بيتتبع عوراتي ومستنيلي غلطة، حسبي الله ونعم الوكيل في اللي بيفرح في غلطي، حسبي الله ونعم الوكيل في أي حد ظلمني، حسبي الله ونعم الوكيل في أي حد قاصد يضايقني
وإلى لقاء قريب بإذن الله، لا تنسوني من الدعوات، أهم حاجة في حياتي :) ء