Job Fair 2011

امبارح (من ساعة يعني تقريبا) كان يوم جميل ومتعب (عادي يعني، لازم الحاجات الحلوة يجي معاها تعب، دة الطبيعي :) )

كل سنة أروح أقدم للشركات ألاقي اتنين بس اللي بيقبلوا من سنة تانية وتالتة وأتاخد إنترفيو بس مش بكمل

السنة دي بقة مع إن الكل بياخد سنة رابعة الحمد لله بس حسيت إني مش عاوزة أقدم وإني لا أنتمي ليهم خالص

حسيت برهبة كدة واتمنيت إن يكون عندي جيش (أمنية لحظية بس، للهروب من لحظات الخوف من المجهول) ... خفت من شكل الناس اللي واقفين عند الشركات، كلهم ناس كبيرة

اطمنت لما لاقيت ناس من الدفعة اللي فاتت، حسيت إن في أمل، ناس عادية كنت بشوفها كل يوم تقريبا في السنوات اللي فاتت دلوقت بقة ليها مركزها في الشركة وبتتكلم عنها وكدة ما شاء الله

أخدنا قلم بينور من إي جادا P:

كانت iRange عاملة مسابقة ألعاب ذكاء وتركيب ومكعبات وبتاع

و vimov كانت عاملة أسئلة غريبة أوي وجايزة (iX (phone/pad

أخدنا ضربة شمس معتبرة زي كل سنة (مش عارفة إشمعنا اليوم دة بيكون مشمس أوي) ولفينا شوية

قلنا نشترك في المسابقات، مش هنخسر حاجة

مسابقة iRange كانت ثلاث مراحل كلهم timed

المرحلة الأول يدوك خشب مالهوش أي هيئة ولا منظر وتعمل بيه 5 أشكال مرسومة في ورق

أنا قدرت أعمل 3 والاتنين التانيين سيبته هو يعملهم D:

المرحلة التانية (لو قدرت تعمل على الأقل رسمتين في المرحلة الأولى)، عندك مكعبات صغنونة أوي مربوطة ببعض بخيط المفروض تكون منهم مكعب ضخم، ما عرفتش أعمل بيها حاجة

المرحلة التالتة، towers of Hanoi حبيبتنا اللي لما عملتلها implementation في سنة تانية (أو أولى مش فاكرة)، قلت للناس كلها إني عملت لعبة ... هههههههههه... المهم بقة، الحلقات بتاعت اللعبة رفنوعة أوي أوي وأنا الحمد لله ما كنتش عارفة أطلع ولا حلقة تقريبا من الأعمدة بسبب الجوانتي :((( ... قعدت أحاول والبتاع تطلع بعد طلوع الروح، بس سبحان الله، قدرت أعمل 6 حلقات صح من 8 وناس كتيرة أوي ما كانتش لابسة جونتي عملت أقل :) ... المهم، بعد شوية بقة جمعوا الدرجات وكدة وطلعت الثالثة :) ... الحمد لله، هما كانوا 3 مراكز بس، الأول الجائزة فلاشة kingston ستاشر جيجا ووسام بلاستك، التاني 8 جيجا ووسام بردو، أنا أخدت بقة 4 جيجا ووسام عسول أوي

الحمد لله، طبعا أنا كنت بلعب للتسلية وما كنتش أتوقع إني ممكن حتى أكسب ، الجونتي عمل شغل جامد معايا الحمد لله D:

دي الجائزة

سبحان الله، أنا لما اتقبلت في كمبيوتر (من 5 سنين، أيام الشباب)، فكرت جدياً أحول كهرباء وقعد التفكير دة ملازمني شهر كامل بالذات بعد ما الباش مهندس محمد سعد ربنا يمسيه بالخير دخل لنا وشرحلنا () Integer myInteger = new Integer و int myInt وأنا قعدت مش فاهمة يعني إيه myInteger ، كل همي والله كان ساعتها مين myInteger دة واشمعنا أنا بس اللي يكون ليا Integer ومش باقية الناس وقعدت شهور عبل ما اقتنعت ان أي حد ممكن يكون ليه hisInteger ... بعدين جينا عند

() public int foo ، ياااااااه، قعدت أضحك ضحك لما قال لنا foo دي وسألته إشمعنا foo وقال لي مش شرط ممكن يكون اسمها أي حاجة، Fadwa مثلا واستغربت أوي والassignment اللي بعد كدة سميت فيه function ب Fadwa واندهشت إنه اشتغل عادي جدا (آه والله :) ) ... كنت فعلا بعافر أول كام شهر أوي (وما زلت بعافر طبعا يعني) بس على الأقل الحمد لله عرفت إن ourInteger أفضل من myInteger :) ...

لا، ولما نتيجة سنة أولى طلعت (بعد سنة رهيبة من كل ناحية ومغامراااات وحاجات أول مرة أتعرض لها من ناس وعملية الزايدة اللي تقريبا فصلتني عن القسم فترة ومع إني سبحان الله جيبت إمتياز (ربنا لو قال لحاجة كن، ما حدش ممكن يمنع، سبحانه)، وقعدوا يقولوا سنة تانية صعبة أوي وكلام فارغ وقابلت الكونترول (لا وفقه الله أبدا)، كنت كل يوم بقول هحول كهرباء وفعلا سألت إزاي أحول عشان ما كنتش قادرة أكمل ... العبرة مش بدرجة أولى، العبرة إني كنت حاسة إني ما أنفعش أكتب برنامج خاالص (وموضوع ال foo دة كان لسة معلم معايا :) ههههههه )، وناس من العيلة ابنهم ما قدرش يدخل كمبيوتر طبعا شجعوا الفكرة دي وقالوا لي أدخل كهرباء زي ابنهم ومستقبلي هيكون هناك أفضل !!؟؟ ... أنا طبعا بعد ما قالوا كدة حسيت إن الكومبيوتر دة حاجة جميلة وما ينفعش أفرط فيه وقلت إن شاء الله هتحسن مع الوقت وهحبه... كمان كان في كمية ناس لا بأس بها من الدفعة واخدين كورسات C و ++C في الصيف اللي قبل أولى وكانوا بقة ما أقول لكمش على الذل اللي موريهملنا ... كان نفسي أقول لهم "خلاااااص، كفاية، عارفين إنكم فاهمين، سيبونا نفهم" ، آآه والله ، اصلهم كانوا متفاعلين مع الدكتور نهى عدلي في ال programming أوي وأنا كنت بيجيلي إحباط رهيب لما أحس إن في كمية ناس فاهمة وأنا قاعدة زي الكرسي اللي أنا قاعدة عليه ... واللي يغيظ إني كنت لما بسأل الدكتور سؤال، هما اللي يجاوبوا أو يتريقوا أو الدكتور تبصلي باستغراب إزاي أنا ما أعرفش حاجة زي دي وغيري عارفها ...

أنا قلت أكتب الكلام دة عبل ما برنامج ال Bayes classifier يشتغل، أصله بياخد وقت طويل أويييييييي وأنا أصلا لسة بكتب في كود ال testing بس عشان أتأكد إن سيادته شغال، لازم الأول أشغل ال training وهو اللي بياخد وقت التنين

يا مسهل

فرحت أوي لما لاقيت ناس من نفس الدفعة شغالين مع بعض في نفس الشركة، يعني مش شرط هنفصل عن الناس اللي بحبها خاالص، إن شاء الله نفضل في تواصل حتى لو ما اشتغلناش سوى، عمر ما الدراسة ولا الشغل هما اللي جمعوا الناس، بالعكس، من وجهة نظري هما اللي بيفرقوا الناس عشان المشاكل وكدة، بس بردو مش شرط لإن الأسر بيكون فيها مشاكل بس بفضل الله بتفضل مترابطة ... يا رب نفضل أنا وصحباتي على طول مترابطين

أشوف عمو Bayes وصل لإيه