حضرت محاضرة ، كان نفسي أخد المحاضِرة معاي البيت والله ، ما شاء الله تبارك الله عليها ..... واحدة فاهمة هي بتقول إيه مش حفظت لها كلمتين من أي حتة وبترددهم وخلاص .... ما شاء الله ....
كل ما بقرب من الناس دي بحس إني حشرة صغيرة ولا أعرف أي حاجة عن الإلتزام ولا الدين ، بجد بحس نفسي جااااهلة .... ربنا يرزقنا التفقه في الدين وحسن القول والعمل ..... اللهم علمنا ما ينفعنا وانفعنا بما علمتنا وزدنا علماً ....
اتكلِمِت في المحاضرة عن بعض مسائل ، بس للأسف ما نفعش أسجل وكنت بحاول أكتب على قد ما أقدر ، للأسف أنا في العربي بطيئة أوي أوي أوي :(( ، ربنا يسامحني ، دة عيب رهيب في ....
بمناسبة الكلام عن العربي ، درست إن العلوم العربية هي الآلة / الوسيلة لفهم العلوم الشرعية .... ولأن فهم القرآن واجب فالذي يوصلني إليه أيضا واجب ، إذن فهم العربية وااااجب :((( ..... شكلي هاخذ إجراء صارم بالنسبة للغة اللي بتكلم بيها في البيت من هنا لحد ما أموت إن شاء الله :)) ... كفاية إنجليزي وكفاية عامي مُحرف :((( .... كل مدى بنبعد عن فهم القرآن والعربي أكتر .... المفروض نقرأه ونفهمه من غير تفسير ، دة حتى بالتفسير (دة لو فتحنا كتاب التفسير) بنفهم بصعوبة .... :(
نرجع لكلامنا ....
اتقال لي ، "لو حسيت بثقل في فهم الشريعة ، دة ضعف إيمان " :(( .... ربنا يفتح علينا كلنا ونفهم المقصود ، طبعا اللي بيقرأ هنا مش زي اللي كان حاضر ، بس ما لا يدرك كله ، لا يترك كله ...
في نقطة مهمة أوي ، كل الأحكام الشرعية لها حكمة ولكن لا يجب أن أعرف أنا حكمتها ، يجب الإستسلام ..... ما وُجد في الكتاب والسنة نصاً لا يسعنا أن نخرج عنه أبداً ، لازم أعمل بيها ولا أقول "ممكن فيها معنى لا أفهمه وفيها تيسير ولا رخصة " وأقعد أنبش عليها لإن الأصل إنهم يتحدثوا مع جميع البشر .....
مشكلة ناس كتيرة أوي انهم بقوا يستهينوا بأوامر وشعائر الله تحت مسمى "التيسير" أو "الإختلاف" ، أهي شماعة وخلاص ....
أول حاجة اتكلمت عنها :
من هو المُفتي وما هي شروطه ؟؟؟؟
مش كل داعية أو مُربي ، يبقى مفتي ... آه الله يخليكم :(
لازم يكون باين عليه العدالة والعلم .... العدالة هي المظهر الإسلامي الإلتزامي الصحيح ، أيوة المظهر في الحالة دي مهم أوي ، مش معناه إني أطعن ولا أشتم في اللي مظهره مش ملتزم أوي ، ممكن يكون فعلا عند الله أفضل مني بس لازم أخد بالي أنا باخد فتواي من مين ، مش أي حد يرخصلي في الحرام (بدون دليل) أخد بكلامه وأنسى كلام التانييين الكتااااااار اللي قالوا (بدليل) إنه حرام ......
تاني حاجة :
هل الحق يتعدد ؟؟؟
طبعا لا ، الحق واحد بس عند الله ، ربنا بيقول في سورة الأنعام " وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُون " .....
ولما بيقولوا إن العالم اللي أخطأ اللي بناخد منه فتاوينا التعبانة ، ليه أجر الإجتهاد وتحري سبيل الله بس مش معناه عشان هو أخد أجر واحد ، نتبعه ، ما في غيره أخدوا أجرين ، أجر الإجتهاد وأجر الصواب ، مش دول أحق إنهم يُتبعوا ؟؟؟
ثالث حاجة ، قول الناس والشماعة اللي بيعلقوا عليها كل حاجة "اختلاف العلماء رحمة" :
نفسي أعرف أصلا مين اللي اخترع المقولة دي (دة حديث موضوع مكذوب عن الرسول صلى الله عليه وسلم) ؟؟؟ طبعا دي عبارة خاطئة لإنه معناها إن "اتفاق العلماء سخط" لإن الاتفاق عكس الإختلاف والسخط عكس الرحمة .....
قال ذلك ابن حزم في (الإحكام في أصول الأحكام): " وهذا من أفسد قول يكون، لأنه لو كان الاختلاف رحمة لكان الاتفاق سخطاً، وهذا مما لا يقوله مسلم، لأنه ليس إلا اتفاق أو اختلاف، وليس إلا رحمة أو سخط " ...
في ناس تقول العالم اتغير في فتواه ، يعني حاجة كان بيقول عليها حرام ، بقى يقول عليها حلال :
ممكن التغير يكون لمكان أو زمان مختلف ، لأنها أحكام مبنية على العرف والعادة ، لإن احتياجات الناس تتغير مع تغيير الأزمان ، بس عمره ما بيكون على نص صريح في الكتاب والسنة زي تحريم شرب الخمر مثلا ربنا يعافينا جميعاً ، عمره ما هيجي فيوم ويبقى حلال (إلا لو الفاحشة انتشرت أوي وساعتها عليه العوض ومنه العوض) ، ولكن التغيير بيكون في مسائل الإجتهاد زي مثلا زكاة الفطر ، الحديث : " فرض رسول الله صلى الله عليه وسلم زكاة الفطر صاعاً من تمر، أو صاعاً من شعير، على العبد والحر، والذكر والأنثى، والصغير والكبير من المسلمين، وأمر بها أن تؤدى قبل خروج الناس إلى الصلاة". متفق عليه ، بس لأن الشعير بقى أكل البهائم والتمر مش من الأساسيات ، والحاجات المتوفرة والأساسية في كل بلد بقيت الذرة والرز مثلا ، فالحكم لم يتغير (لسة الزكاة واجبة ، ومقدارها ثابت ) بس العلماء قاسوا عليها الرز والذرة ، مش غيروا حكمها ولا فتواها ....
بعدين ممكن أوي تتغير الفتوى في ظاهرها ، لو مآلاتها تغيرت ، زي مثلا زمان علماء السلف كانوا بيقولوا تعليم البنات حرام عشان خروج من البيت واختلاط ووقوع في مصايب أكبر من فوائد التعليم (ودة اللي احنا بنسمعه فعلا دلوقت ربنا يعافينا)، بس لما قالوا لهم هيكون في ظوابط وهيتعلموا لوحدهم بعيدا عن الولاد مثلاً أو هيلتزموا بحجابهم الشرعي ، ساعتها قالوا يبقى حلال طالما في ضوابط ومآلات مختلفة ....
وللحديث بقية بإذن الله .....
