مجاهيل

تعريف الدناءة: هي عندما تخبر أحدهم أنك لا تريد أن تتحدث إلى شخص ما لإنه يقوم بمضايقتك، فيقوم بوضعك معه في غرفة واحدة متعمدا ويغلق الباب بإحكام فلا مفر

-------------------

بعضا من القصاصات القادمة مستوحاة من دكتور أحمد خالد توفيق وفقه الله، فقد قرأت قصاصاته القابلة للحرق فوجدت نفسي مع قلمي أكتب هذا، فقد يكون هناك تشابه بين ما كتبت وبين كتاباته وهو أستاذي الذي أرجو أن أتعلم منه المزيد

---------------------------

اليوم أدرك أن وجودهم بيننا لا بد منه كوجود البصل في الطعام ... رائحته كريهة وطعمه مقيت ولكنك كثيرا ما تجد نفسك مجبورا على وضعه في طعامك !!! ء

---------------------

حقا، نحتاج إلى أنذال مثلهم في مجتمعنا كي نشعر بأننا شرفاء ...ء

--------------------

يقولون أنه أذكى رجل قابلوه، أظنهم لم يقابلوا أحدا غيره !!!ء

--------------------

كلما تذكرت الكثيرين ممن أظهروا كرههم الشديد ونقدهم لهذا الكاتب العبقري، شكرت كل من كره كتاباتي وسخر من كلماتي وعلمت مكانتي في المستقبل بإذن الله ....ء

-----------------------

لا يشعر المرء أنه شريف إلا إذا أحيط بمن هو أنذل منه .. حقا، فبدونهم لشعرت أنني أنذل من في الأرض !!ء

----------------------

عندما رأيت عدد المرات التي قام فيها الكاتب العبقري بنقد أناس دون ذكر أساميهم واستعان في سبه بالغموض، علمت أن كلماتي لم تخطئ مسيرها يوما كما أوحى لي الكثيرون.... لا بد للغموض في النقد وفي الإفصاح عن بغض شخص ما

----------------------

يقولون "أن ترمى من الخلف فهذا يعني أنك في المقدمة " لا أحد يريد أن يعترف أن هناك من يرمون من الخلف لأنهم يستحقون ذلك فعلا ولا يمتون إلى "المقدمة" بصلة ...ء

----------------------

حزنت كثيرا عندما لاحظت أنه في بداية كتاباته كان ينعت زوجته ب"حبيبتي" والآن يقول بكل إشمئزاز "أم العيال" !!ء

-------------------

عذرا، أنا لم أتغير إطلاقا، أنا فقط ظهرت على حقيقتي !! غالبا ما تكون الحقيقة مؤلمة، فعليكم بالقبول !!!ء

اهتم بالسبعة يوميا

سمعت حلقة للدكتور ابراهيم الفقي من كام يوم، طبعا الدكتور إبراهيم غني عن التعريف، هو رائد في التنمية البشرية وحاصل على حاجات كتيرة أوي ما شاء الله وفعلا كلامه مؤثر وبناء أوي ما شاء الله

المهم، في الحلقة دي كان بيتكلم على إزاي إن الواحد كل يوم لازم ياخد باله من 7 حاجات وأي إنسان ناجح في الدنيا عمره ما نسى واحدة منهم .. قعد يقول إنه عمل مقابلات مع ناس كتيرة أوي ناجحة وكلهم أجمعوا على الحاجات دي
دي 7 جوانب لازم الإنسان يديها من وقته كل يوم

أولا: الجانب الروحاني : ويتضمن قراءة قرآن، ذكر، تأمل في خلق الله .. لأسف الناس بتفتكر الحاجات دي بس لما تكون متضايقة أو وقعت في مشكلة لكن في وقت الرخاء، قلما بنفتكر ربنا
ثانيا: الجانب الصحي: ويتضمن مثلا مشي ربع ساعة يوميا عشان دي أسهل رياضة ومتاحة للجميع .. طبعا المشي مش إن الواحد يتمشى بقى على قشرة بيضة، المفروض مشيه يكون سريع (شبه هرولة) عشان يستفيد من مشيه والمفروض يتنفس بعمق طول ما هو ماشي وحبذا لو مشى في حتة فيها هواء زي مثلا على البحر أو الطريق من الكلية للبحر والعكس بالنسبة لنا
بالنسبة للأكل والشرب لازم الواحد يشرب 8 كبيات ماء في اليوم ويتنفس بعمق دائما عشان أهم حاجة للمخ الماء والأكسجين ... كمان لازم يهتم بأكله وياكل خضار وفاكهة على الأقل فاكهاية وطبق سلطة يوميا.... لازم يقلل من الدهون أوي أوي أوي عشان حتى لو مش بتبان على جسم الواحد من برة، فممكن تعمل انسداد في شريان القلب ربنا يعافينا ... كمان يقلل من السكريات عشان لو هو ما حرقش السكريات دي هتتحول لدهون ... طبعا احنا بنكون في الكلية أغلب اليوم فبنقضيها شيبسي وبسكوت وسموم مالهاش أي لازمة وربنا يعافينا من السرطانات اللي الحاجات دي بتجيبها، بنشبع جسمنا بحاجات بتضرنا
ثالثا: الجانب الشخصي: هنا الواحد بينمي من نفسه... لازم الواحد يقرأ على الأقل نصف ساعة يوميا والمفروض النص ساعة دي ما تكونش متعلقة بشغل الواحد أو بدراسته، يعني لازم يتوسع ويقرأ في كل حاجة تقريبا... طبعا احنا لا بنقرأ ولا حاجة، ممكن بس في الأجازات بس أنا عودت نفسي أفضل ماسكة كتاب معايا عشان منين ما أكون مستنية حد أو بين الفترات مثلا لو مش بعمل حاجة، أقعد أقرأ فيه أفيدلي من الكلام والله
رابعا: الجانب العائلي: يكلم حد من أقاربه ما كلمهوش من زمان، يقعد مع أسرته شوية ... احنا بنفتقد الحاجات دي كتير أوي لما بننزل بدري ونرجع متأخر وولا بنشوف حد ولا حد بيشوفنا في البيت ... أنا فاكرة إني كنت بقعد أكلم أهلي وأنا في الكلية السنة اللي فاتت عشان بكون عارفة إني مش هلحق أكلمهم اليوم دة لما أرجع فبعوضه مثلا بالكلام على الموبايل
خامسا: الجانب الاجتماعي: لازم يسأل الناس عن أحوالها ويكلم اللي حواليه ويطمئن عليهم ... يقعد يواسي حد زعلان ولا يساعد حد محتاج ... كمان يسأل عن صديق ما كلمهوش من زمان .. المشكلة إن الواحد كتير بيقول ليه أكلمه إذا كان هو مش بيسأل عليا بس ببساطة الواحد يحط نفسه مكان التاني، ياما انشغلنا عن الناس ... كمان الواحد ما يعرفش ظروف اللي حواليه فلازم يعذره وما يقعدش يلوم فيه إنه ما كانش بيكلمه
سادسا: الجانب المهني: الواحد يهتم بشغله ويشوف إزاي ممكن يحسنه ولازم يحب اللي بيعمله ... طبعا المرحلة دي بالنسبة لكثير مننا تعتبر المذاكرة والدراسة عامة
سابعا: الجانب المادي: الواحد يهتم بمصدر المال بالنسبة له وينميه .... لاحظ إنه حاطط الماديات في آخر حاجة بس للأسف هي بقيت أول حاجة مهمة لكل الناس وبينسوا على حسابها كل الحاجات اللي أهم منها .. طبعا أكترنا بيكون باباه هو المصدر المادي ليه، ربنا يخليه لنا ويقدرنا نبره يا رب
أنا قعدت أفكر ليه هو قال الفلوس آخر حاجة مع إنها فعلا مهمة أوي عشان الواحد يعرف يعيش ؟؟؟ لقيته بيرد في الحلقة "أصل بالعقل كدة، لو الواحد علاقته بربنا كويسة، مهتم بصحته، الناس بتحبه عشان تعاملاته معاهم كويسة، بيهتم بشغله، فرحان مع عائلته، أكيد هيبقة ناجح في شغله ففلوسه هتزيد أو على الأقل ربنا هيبارك له فيها" ...

الحلقة دي أفادتني فعلا فقلت أكتبها لعل حد يستفيد أو ممكن أرجع لها لو نسيت عنصر من السبعة في أي يوم ... يا ترى عملت السبعة النهاردة ؟؟؟

مدح ورد

دي قصيدة "للإمام أبي عمران موسى بن محمد بن عبد الله الأندلسي" المعروف ب"ابن بهيج" في مدح أم المؤمنين عائشة و الرد على مبغضيها
هي طويلة حبتين بس جميلة

مَا شَانُ أُمِّ المؤمنين وشَاني .. هُدي المُحِبُّ لها وضَلَّ الشَّاني
إنِّي أقول مُبَيِّناً عن فَضْلِها .. ومُتَرجماً عن قوْلها بلِسَاني
يا مُبْغضي لا تَأْت قَبْرَ محمَّدٍ .. فالبَيْتُ بيتي والمَكانُ مَكاني
إِنِّي خُصِصْتُ على نِساءِ مُحَمَّدٍ .. بِصِفاتِ بِرٍّ تَحْتَهُنَّ مَعاني
وَسَبَقْتُهُن إلى الفَضَائِل كُلَّها .. فالسَّبْقُ سَبقي والعِنَانُ عِنَاني
مَرِضَ النَّبِيُّ وَمَاتَ بين تَرَائِبِي .. فاليَوْمَ يَوْمي والزَّمانُ زَماني
زَوْجي رَسولُ الله لَمْ أرَ غَيْرَهُ .. اللــه زَوَّجَني بـه وحَبَاني
وأتاهُ جِبريلُ الأمينُ بِصُورتي .. فَأحَبَّني المُخْتَار حِينَ رَآني
أنا بِكْرُه العَذْراءُ عِنْدي سِرُّهُ .. وضَجيعُهُ في مَنْزِلي قَمَرانِ
وَتَكَلَّمَ اللهُ العظيمُ بِحُجَّتي .. وَبَرَاءَتِي في مُحْكَمِ القُرآنِ .
وَالله خَفَّرَني وَعَظَّمَ حُرْمَتِي .. وعلى لِسَانِ نَبِيِّهِ بَرَّانِي
والله في القُرآنِ قد لَعَنَ الذي .. بَعْدَ البَرَاءَةِ بالقَبيح رَماني
والله وَبَّخَ مَنْ أرَادَ تَنَقُّصي .. إفْكاً وسَبَّحَ نَفسَهُ في شاني
إنّي لمُحْصَنَةُ الإزارِ بَرِيئَةٌ .. ودليلُ حُسْنِ طَهَارتي إحْصاني
واللهُ أَحْصَنَنِي بخاتِمِ رُسْلِه .. وَأَذَلَّ أَهْلَ الإِفْكِ والبُهتانِ
وسَمِعْتُ وَحْيَ الله عِنْدَ مُحَمَّدٍ .. من جِبَرَئيلَ ونُورُه يَغْشاني
مَنْ ذَا يُفَاخِرُني وينْكِرُ صُحْبَتي .. ومُحَمَّدٌ في حِجْرِه رَبَّاني؟
وأَخَذتُ عن أَبَوَيَّ دينَ مُحَمَّدٍ .. وَهُمَا على الإِسْلامِ مُصْطَحِبَانِ
وأبي أَقامَ الدِّين بَعْدَ مُحَمَّدٍ .. فَالنَّصْلُ نصْلي والسِّنَان سِناني
والفَخْرُ فَخْرِي والخِلَافَةُ في أبي .. حَسْبِي بِهَذَا مَفْخَراً وَكَفاني
وأنا ابْنَةُ الصِّدِّيقِ صَاحِبِ أَحْمَدٍ .. وحَبِيبِهِ في السِّرِّ والإِعلانِ
نَصَر النبيَّ بمالِهِ وفِعالِه .. وخُرُوجِهِ مَعَهُ في الأوطانِ
ثَانيه في الغارِ الذي سَدَّ الكُوَى .. بِرِدَائِهِ أَكْرِم بِهِ مِنْ ثانِ
وَجَفَا الغِنى حَتَّى تَخَلَّل بالعَبَا .. زُهداً وأَذْعَنَ أَيَّما إِذْعَانِ
وتَخَلَّلَتْ مَعَهُ مَلائِكَةُ السَّما .. وأَتَتْهُ بُشرى اللهِ بالرِّضْوَانِ
وهو الذي لَمْ يَخْشَ لَوْمَة لائمٍ .. في قَتْلِ أهْلِ البَغْيِ والعُدوانِ
قَتَلَ الأُلى مَنَعوا الزَّكاة بكُفْرِهِمْ .. وأَذَل أَهْلَ الكُفر والطُّغيانِ
سَبَقَ الصَّحَابَةَ والقَرَابَةَ لِلهُدى .. هو شَيْخُهُمُ في الفضلِ والإِحْسَانِ
واللهِ ما اسْتَبَقُوا لِنَيْلِ فضيلةٍ .. مِثْلَ استباقِ الخيلِ يومَ رِهانِ
إلاَّ وطارَ أبي إلى عَلْيَائِها .. فمكانُه منها أَجَلُّ مكانِ
وَيْلٌ لِعَبْدٍ خانَ آلَ مُحَمَّدٍ .. بِعَدَاوةِ الأزواجِ والأخْتانِ
طُوبى لِمَنْ والى جماعةَ صَحْبِهِ .. ويكونُ مِن أحْبَابِهِ الحَسَنانِ
بينَ الصحابةِ والقرابةِ أُلْفَةٌ .. لا تستحيلُ بِنَزْغَةِ الشيطانِ
هُمْ كالأَصابِع في اليدينِ تواصُلاً .. هل يَسْتَوي كَفُّ بغير بَنَانِ
حَصِرَتْ صُدُورُ الكافرين بوالدي .. وقُلوبُهُمْ مُلِئَتْ من الأضغانِ
حُبُّ البَتولِ وَبَعْلِها لم يَخْتَلِفْ .. مِن مِلَّةِ الإِسلامِ فيه اثنانِ
أكرم بأربعةٍ أئمةِ شَرْعِنا .. فَهُمُ لِبيتِ الدينِ كالأَرْكَان
نُسِجَتْ مَوِدَّتُهم سَدًا في لُحْمَةٍ .. فَبِناؤها مِنْ أَثْبَتِ البُنيانِ
الله ألَّفَ بَيْنَ وُدِّ قُلُوبِهِمْ .. لِيَغِيظَ كُلَّ مُنَافِقٍ طعَّانِ
رُحَماءُ بَيْنَهُمُ صَفَتْ أَخْلاَقُهُمْ .. وخَلَتْ قُلُوبُهُمُ مِنَ الشَّنَآنِ
فَدُخُولُهُم بَيْنَ الأَحِبَّةِ كُلْفَةٌ .. وسِبَابُهُمْ سَبَبٌ إِلى الحِرْمَانِ
جَمَعَ الإِلهُ المسلمين على أبي .. واستُبدلوا مِنْ خوْفهم بأَمان
وإذا أرادَ اللهُ نُصْرَة عَبْدِهِ .. مَنْ ذا يُطيقُ لَهُ على خُذْلانِ
مَن حَبَّني فَلْيَجْتَنِبْ مَنْ سَبَّني .. إنْ كانَ صانَ مَحَبَّتي ورعاني
وإذا مُحِبِّي قَدْ أَلَظَّ بِمُبْغِضي .. فَكِلَاهُما في البُغضِ مُسْتِويانِ
إِني لَطَيِّبَةٌ خُلِقْتُ لطيِّبٍ .. ونِساءُ أَحْمَدَ أطيبُ النِّسْوانِ
إني لأَمُّ المؤمنينَ فَمَنْ أَبَى .. حُبِّي فَسَوْف يَبُوءُ بالخُسْرَانِ
اللهُ حَبَّبَني لِقَلْبِ نَبِيِّه .. وإلى الصراطِ المستقيمِ هداني
واللهُ يُكْرِمُ مَنْ أَرَادَ كَرامتي .. ويُهينُ رَبِّي من أرادَ هواني
واللهُ أَسْأَلُهُ زيادةَ فَضْلِهِ .. وحَمِدْتُهُ شكْراً لِما أوْلاني
يا من يَلُوذُ بِأَهْلِ بَيْتِ مُحَمَّدٍ .. يرجو بذلك رحمةَ الرحمانِ
صِلْ أُمَّهَاتِ المؤمنينَ ولا تَحُدْ .. عَنَّا فَتُسْلَبْ حُلَّةَ الإِيمانِ
إِني لصادِقَةُ المقالِ كريمةٌ .. إِيْ والَّذي ذَلَّتْ لَهُ الثَّقَلانِ
خُذْها إليكَ فإِنَّمَا هي رَوْضَةٌ .. محفوفَةٌ بالرَّوحِ والرَّيحانِ
صَلَّى الإلهُ على النبيِّ وآلِهِ .. فَبِهمْ تُشَمُّ أزاهِرُ البُستانِ

وا إسلامااااااه

على طول بسأل نفسي ليه دلوقت المسلمين أضعف ناس وليه الإسلام ظاهر للناس إنه أضعف ديانة ؟؟؟ إشمعنا بيهتفوا بحرية اعتناق الديانات ويجوا عند الإسلام يخطفوا اللي بيسلم ويعملوا حملات تنصيرية يغصبوا فيها الناس على إعتناق النصرانية ويغروهم بالمال ؟؟؟ مع إن الديانة الوحيدة اللي ما حدش أكره عشان يدخلها ودخلها بكامل رغبته هي الإسلام !!! ليه بيتكلموا عن حرية الملبس بس يجوا عند اللبس الشرعي اللي ربنا أمرنا بيه ويقلبوا الدنيا ويمنعونا من لبسه بالضغط علينا من خلال دراستنا وامتحاناتنا ؟؟؟ مع إن اللبس الشرعي والله هيقلل الفساد في البلد وهيساعد الشباب على غض البصر والرذيلة هتقل ... يعني والله حتى الواحد قبل ما يلتزم بالحجاب الشرعي (مع إن لبسه كان واسع وطويل) بس كان عدد التحرش أكثر بكتير من دلوقت، يعني ربنا أمرنا باللي بيحمينا، مش بيضيق علينا ... يا ترى ليه ديننا وإيماننا بالله لم يتعدى "لا إله إلا الله" والصلاة وخلاص على كدة ؟؟؟ يا ترى ليه مش بنهتم لما مصيبة تمس الإسلام بس دمنا بيتحرق أوي لو حاجة مستنا أو أهلنا ؟؟؟

يا ترى ليه ما حدش فينا صلح من نفسه بجد وبطل كلام ما لهوش لازمة ؟؟؟

لحد امتى هنحسب إن المظاهرات هتصلح الدنيا ؟؟ مش بقالنا قرووووون بنعمل مظاهرات وهتافات وبنحرق أعلام ؟؟ وصلنا لإيه ؟؟؟؟ ولا حاجة !!! دة حتى الوضع بقة أسوأ ... نصرخ عشان ننقذ الأقصى وأديه في إيد أعداءنا وبيتهدم ... رفعنا يفط عشان حاجات كتيرة أوي وولا حاجة حصلت ... أصلهم عارفين إننا مالناش إلا في الكلام يعني في نظرهم، سيبوهم يتكلموا، هيعملوا إيه في الأخر ؟؟؟ ... أصلا إزاي نقف ضدهم واحنا بنقلدهم ؟؟؟ وإزاي نعاديهم وكثير مننا بيحبهم ؟؟؟ يا ترى ليه الإسلام بقة ضعيف أوي ؟؟؟ إحنا اللي مسؤولين عن الصورة اللي هو فيها والله ولو ما لحقناش نفسنا، الصورة هتبقى أسوأ للأجيال الجيا ... يعني أنا متخيلة لو الوضع دة استمر، عيالي مش هيلاقوا مسجد يصلوا فيه

يا ترى موقفك كان إيه لما القران اتحرق واتقطع ؟؟؟ كلام ربنا !!! يا ترى موقفك كان إيه لما عائشة رضي الله عنها اتشتمت في عرضها (ولو حد من أهلك اتقال عنه كدة، بجد هتروح وتقتله) ؟؟؟؟ أم المؤمنين زوجة الرسول صلى الله عليه وسلم !!!! عملت إيه لما خطفوا كاميليا اللي دخلت الإسلام عن حب وبكامل رغبتها وقواها العقلية ؟؟؟؟ لو اختك هي اللي اتخطفت ولا مامتك، كنت هتعمل إيه ؟؟؟ يا ترى ويا ترى وما خفي أعظم

طب ليه بقة زمان الإسلام كان أقوى ديانة والدولة الإسلامية كانت أعظم حاجة والكل بيخاف منها ؟؟؟ فكر كدة، فرقنا إيه عن زمان ؟؟؟

ببساطة شديدة، زمان كانوا متمسكين بالدين أوي عشان كدة كانوا أقوياء وربنا ساعدهم بس دلوقت إحنا حيا الله بنقول الشهادة فإزاي ربنا هيساعدنا واحنا أصلا مش عارفين نساعد نفسنا ؟؟؟

يا رب نبطل نتكلم بقة ونعمل حاجة

على الأقل ابدأ بنفسك، لو انت اتصلحت، بإذن الله صحابك هيتصلحوا، وكمان أهلك، وبعدين الكلية كلها والحتة اللي ساكن فيها، بعدين مصر ، بعدين الوطن العربي والاسلامي بعدين الكون كله

ابدأ بنفسك

ابدأ بنفسك

هادم اللذات

يا فدوى، قبل ما تعصي ربنا افتكررررررررررررررررررييييييي

يا ترى ميييييييييييين مستعد ؟؟ الموت لا يفرق بين الكبير والصغير :(( ... ياما شباب ماتوا وياما أطفال ما لحقوش يكبروا

قال رسول الله صلى الله عليه وسلم :(( أكثروا من ذكر هادم اللذات)) وهادم اللذات هو الموت ... ودة مش للنكد ولا للغم، دة عشان نفتكر إن في يوم كلنا هنوصل له ومش هينفعنا فيه والله والله أي حاجة إلا العمل الصالح ... الناس قاعدة بتجمع في كل حاجة ممكن تتخيلها عشان الدنيا ونسيت تجميع الحسنات لليوم دة

اللهم ارزقنا حسن الختام يا رب يا رب

يا رب هون علينا سكرات الموت

اللهم اغفر لها وارحمها وعافها واعف عنها وأكرم نزلها ووسع مدخلها

واغسلها بالماء والثلج والبرد ونقها من الذنوب والخطايا كما ينقى الثوب الأبيض من الدنس

اللهم وجازها بالحسنات إحسانا وبالسيئات عفوا وغفرانا

يا رب ثبتها عند المسئلة

اللهم أنر قبرها وأجعله روضة من رياض الجنة

يا رب اجعلها من أصحاب اليمين

يا رب ادخلها الجنة بغير حساب ولا عقاب

يا رب لا تعذب لسانا قال "لا إله إلا الله"ء

يا رب ارزق أهلها الصبر والاحتساب والثبات

اللهم وارحمنا إذا صرنا إلى ما صارت إليه

يا رب يا رب اجمعنا بيها في جنتك يا أكرم الأكرمين

قدر الله وما شاء فعل

الشاعرة فدوى :) ء

أنا مش هقول زي بقية الناس إني حاسة إن السنة دي هتبقى كويسة، لا ، أنا واثقة بإذن واحد أحد إنها هتكون أسعد سنة في حياتي أو على الأقل من أسعد سنين حياتي .. إن شاء الله هستمتع بكل لحظة عشان خلاص أنا بودع الكلية اللي بجد هتوحشني أوي أوي أوي وأحلى سنين العمر هي سنين الكلية فعلا زي ما الكبار كلهم بنسمهعم بيقولوا :( ... المفروض الواحد ما يضيعهاش في الزعل والاكتئاب لإنه جرب يكتئب قبل كدة والأوضاع لم تتحسن، بل بقيت أسوأ !!!ء

شعاراتي السنة دي بإذن الله:ء

فليرضى عني الناس أو فليسخطوا ** أنا لم أعد أسعى لغير رضاك

اتق الله حيثما كنت، وأتبع السيئة الحسنة تمحها، وخالق الناس بخلق حسن

ادعوا الله وأنتم موقنون بالإجابة

رزقي لن لن لن يأخذه أحد غيري

الابتسامة والصبر والثقة والتوكل وحسن الظن والدعاء ومساعدة الأخرين وتقبل عيوب الغير وما أقعدش أكتر من نصف يوم متخانقة مع حد

من وجد الله فماذا فقد، ومن فقد الله فماذا وجد

"وعجلت إليك رب لترضى"

Everything I want is on its way to me .. If it never comes, than Allah knows it was not good for me :)

-----------------------------------------

من سنتين تقريبا وأنا داخلة مكتبة الاسكندرية، كنت بعمل تصريح للاب توب بتاعي فالراجل سألني "اسمك إيه ؟؟" "فدوى أحمد" راح قايل لي "ياااه، فدوى ؟؟" أنا طبعا قلت دة يا إما راجل بيستظرف أو عاوز يفتح مواضيع وبتاع وأنا مش بتاعت المواضيع دي خااالص .. بس قال لي "تعرفي إن في شاعرة فلستينية اسمها فدوى توكال " ؟؟ أنا معرفتش أقول له إيه، فقلت "طيب" ... المهم، طبعا أنا يوميها كان ورايا شغل كتير أوي فمكنتش فاضية لفدوى ولا غيرها .. بس سبحان الله، بعد فترة طويلة أوي (تقريبا سنة) ، كنت بقرأ على النت أشعار لاقيت نفسي بدور على "فدوى توكال" ... طبعا استعنت ب"جوجل صديقي" بس ما لاقيتش أي حاجة تدل على أي "توكالات" ... المهم، لاقيت "فدوى طوقان " ... لاحظ الفرق الشاسع بين الاسمين !! طبعا النطق المصري للحروف العربية له تأثير عظيييم، أنا طبعا قعدت أضحك، الراجل بوظ اسمها خاااالص !! آه، نسيت أقول إني كمان سألت شخص عن الشاعرة دي في يوميها "تعرف فدوى توكال" وهو طبعا قال "لأ" لإنها مش موجودة

المهم، طلعت في فعلا شاعرة فلسطينية "مش فلستينية" اسمها فدوى وأنا فرحت أوي أوي أوي، حسيت إنها بشرة خير

قرأتلها حبة قصائد، وفعلا كالعادة زعلت إني ما كنتش أعرفها من زمان بالذات إن اسمها زي اسمي .. إن شاء الله هنشر الأشعار اللي عجبتني بعدين

طبعا هي توفيت من 7 سنين ربنا يرحمها :((( ، بس لاقيت قصيدة بعنوان "أكاليل الوداع " إلى روح الشاعرة الفلسطينية فدوى طوقان

والكلام خلاني فعلا أعيط

أنا كتبت خاطرة صغيرة بعد أما قرأتها، قلت

" يا أبيات الشعر لا تحزني، فإن كانت ابنة طوقان قد فارقتك، فقد ولد التارخ ابنة أحمد "

طبعا ابنة أحمد دي تبقى أنا

:D

بس، أسيبكم مع "أكاليل الوداع" ... يا ترى حد ممكن يكتب فيَ قصيدة لما أموت ؟؟ يا ترى هتكون "الحمد لله إننا خلصنا منك " ولا "الدنيا كئيبة من غيرك " ؟؟؟ الله أعلم

أكاليلُ الوِداع

13-12-2003
إلى روح الشاعرة الفلسطينية فدوى طوقان

ودار الزمان
وانا أدور كما المكان
فالجُرحِ في قلبي مُقيمْ
إني أذوبُ تألُماً
والقلبُ يسكُنهُ الحميمْ
كي يذرُفَ الجُرحَ القديمْ
حتى إذا جاء الصباحْ
ليحملَ الخبرَ الصِراحْ
فدوى وقد حان الرواحْ
آهٍ على ذاكَ الصِراحْ
هو صعقة ٌ
هو صرخة ٌ
هو صدمة ٌ
... همٌ تُخضبهُ الجِراحْ
فيا شعراً وقد فارقت أماً
فلتعتكف ليلَ النِواح
هُناك في جرزيم قد لُبِسَ السوادْ
وهناك في نابُلسَ يغمُرنا الحِدادْ
وهُنا قصائدُ
مُزنةٍ غزيةٍ
باتت تُحَوّم في البلادْ
لتبكي في الذُرا شمس العباد
يا فدوةَ الطوقان واأسفي عليكِ
سأبعثُ كُلَ قصائدي يوماً إليكِ
تأتيكِ من مُنطارِنا
تُودع مقلتيكِ
تُودعهم
بوداع شاعركِ الصغيرْ
وتُودعهم
يا فدوةَ اللحنِ الأخيرْ
يا رحلة ً جبلية ً
ومشواراً عسيرْ
فأنا هُنا
في غزتي
غُصنٌ كسيرْ
طيرٌ أسيرْ
أقول الوداع
وداعاً وداعاً وداعاً وداع
وداعاً أيا فدوةَ العاشقين
وداعاً بقلبٍ ولحنٍ حزين

فداها أبي وأمي ونفسي ودمي رضي الله عنها وأرضاها

فداها أبي وأمي ونفسي ودمي رضي الله عنها وأرضاها

إزاي الواحد هيقدر يدافع عن حد اتشتم إلا إذا كان هو أصلا عارف حاجة عن الحد دة ؟؟؟ يا جماعة، احنا قصرنا في حق الصحابة أوي لما بطلنا نتكلم عنهم ونعرف سيرتهم ونقرأ عن فضلهم ... كلنا قصرنا وكلنا مسؤولين عن اللي عمله الرافضي الفاسق ...ء

طب هما ليه أصلا بدأوا يشتموا في الصحابة (أبو هريرة، عمر ابن الخطاب، خالد ابن الوليد، ...) وأمهات المؤمنين كعائشة رضي الله عنها ؟؟ أصل الواحد لما يطعن في أصحاب النبي صلى الله عليه وسلم، يبقى أكيد بيطعن في اللي كان بيعلمهم واللي رباهم اللي هو النبي نفسه، يبقى بيطعنوا في الدين اللي جه بيه النبي، بيطعنوا في شريعتنا اللي هي عبارة عن القرآن والسنة، طب لما الحجتين دول يتطعن فيهم والواحد يشك في صحتهم، الواحد هيجيب المنهج الديني بتاعه منين ؟؟؟ هما عاوزين يهدموا الكتاب والسنة (دة اللي ظهر على لسانهم وما تخفي صدورهم أعظم) لإنهم إذا طعنوا في الناقل، طعنوا في المنقول زي ما قال الزنديق شاكر لما راحوا يقتلوه عشان سب حد من الصحابة أو أمهات المؤمنين مش فاكرة والله .... بس أبشركم، إن اللي حصل دة خير لينا إن شاء الله عشان ربنا يبين لنا العدو الحقيقي اللي متخفي بيننا باسم الإسلام وكمان عشان ناس كتير أوي بدئت ترجع لربنا الحمد لله ..ء

عشان كتير أوي مننا مش بيقرأ للأسف (أمة اقرأ لا تقرأ) إلا في الحاجات اللي متعلقة بالدراسة والتكنولوجيا، أنا جيت ألخص حبة كلام عن فضل السيدة عائشة أم المؤمنين رضي الله عنها ووالله لو كتبنا مقالات عنها، ما وفيناها أي حاجة من فضلها بس الناس لازم تكون عارفة مين هي السيدة عائشة وأنا اتعمدت إني أحول الكلام للعامي عشان يكون أسهل على الناس إن شاء الله ودة من كذة محاضرة للشيخ محمد حسان، حازم شومان، أحمد هلال حفظهم الله جميعا ..ء

واللي عاوز يقرأ أكتر، ممكن من هنا

http://www.islamweb.net/ver2/archive/readArt.php?id=135313

من أصول السنة حب الصحابة والاقتداء بيهم، طب إزاي أصلا الواحد هيقتدي بيهم وهو ما يعرفش أي حاجة عنهم ؟؟ء

وهما ما قدروش يصرحوا بنقص رسول الله مباشرة فقالوا يطعنوا فيه من خلال الطعن في أصحابه رضي الله عنهم زي ما قال الإمام مالك ... طيب عاوزين دلوقت نعرف حاجات أكتر عن السيدة عائشة رضي الله عنها

هي أم المؤمنين، عائشة بنت أبي بكر، زوجة رسول الله صلى الله عليه وسلم...ء

هي أحب امرأة إلى قلب رسول الله وكان يظهر الحب دة قدام الناس، في غزوة ذات السلاسل زي ما أخرج البخاري، سأله عمرو بن العاص رضي الله عنه "من أحب الناس إليك" فقال "عائشة" قال "ثم من"، فقال "أبوها" ...ء

أول من اختار الله ورسوله لما خيرها الرسول بين الدنيا ومتاعها وبين الله ورسوله ...ء

تزوجها الرسول وهي صغيرة وكانت عاقلة وواعية وفطنة

ذكر الإمام الحاكم: حمل عن السيدة عائشة ربع الشريعة .. تخيل لما يطعن في حاملة ربع الشريعة ..ء

كانت وحيدة عصرها في الفقه والطب والشعر

ربنا ذكر4 تبرئات في القرآن، يوسف واللي برؤه واحد من أهل مراة العزيز "وشهد شاهد من أهلها .. "، مريم واللي برأها ابنها عيسى عليه السلام "قال إني عبد الله أتاني الكتاب وجعلني نبيا"، وموسى لما الناس قالوا عليه إن عنده مرض عشان كدة مش بيغتسل معاهم فالحجر اللي حط عليه هدومه برأه، وأخيرا والوحيدة اللي ربنا برأها بنفسه هي عائشة رضي الله عنها بعد حادثة الإفك ب 16 آية من القرآن .. الآية رقم 11 ( إِنَّ الَّذِينَ جَاؤُوا بِالإِفْكِ عُصْبَةٌ مِّنكُمْ لا تَحْسَبُوهُ شَرًّا لَّكُم بَلْ هُوَ خَيْرٌ لَّكُمْ لِكُلِّ امْرِئٍ مِّنْهُم مَّا اكْتَسَبَ مِنَ الإِثْمِ وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ) إلى آخر الأيات ...ء

آية ( الخبيثات للخبيثين والخبيثون للخبيثات والطيبات للطيبين والطيبون للطيبات أولئك مبرءون مما يقولون لهم مغفرة ورزق كريم) يقول ابن كثير في تفسيره، أنها نزلت تبرئة لعائشة .. فربنا وصفها أنها من الطيبات وأنها مبرأة وأن لها أجر عظيم ...ء

كان الناس بيختاروا اليوم اللي الرسول قاعد فيه عند عائشة عشان يدوه الهدايا فيه إرضاء له ...ء

ربنا هو اللي اختار عائشة زوجة للنبي زي ما الرسول قال لها إنه شافها مرتين في المنام قبل ما يتجوزها ..ء

الوحي ما كانش بينزل على الرسول وهو عند أي حد غيرها من زوجاته

قال الرسول صلى الله عليه وسلم (فضل عائشة على النساء، كفضل الثريد على سائر الطعام ) متفق عليه . والثريد دة كان أفضل أكل عند رسول الله

ربنا نزه نفسه في موضعين في القرآن، الأول "وقالوا اتخذ الله ولدا سبحانه"، والثاني الآية ال 16 من سورة النور (( وَلَوْلا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَذَا سُبْحَانَكَ هَذَا بُهْتَانٌ عَظِيمٌ)) نزه نفسه عشان زواج الرسول زي ما قلنا كان بوحي من ربنا ولا يرضى الله لنبيه أن يتزوج من خائنة كما يدعون لعنهم الله

كان الرسول كل يوم يقول "أين أنا غدا"، بيستعجل يوم عائشة عشان كان لكل زوجة يوم...ء

الرسول اختار أن يمرض في بيتها ويموت صلى الله عليه وسلم على صدرها (بين سحرها ونحرها) ويدفن في غرفتها، يعني قبر النبي هو بيت عائشة ...ء

اختارها الرسول زوجة له في الجنة زي ما البخاري روى ...ء

فداها أبي وأمي ونفسي ودمي رضي الله عنها وأرضاها

قررت أن أضحك

قررت أن أضحك !!!

(علمتني الأيام ألا أسخر من جراح أحد، لأنني ربما أصبحت صاحبة هذه الجراح في يوم ما)

من عدة أيام، قرأت كلاما جميلا لزميل لي بعنوان "قررت أن أبتسم".. أكثر ما شدني في الموضوع عنوانه لأنني هكذا كنت أخاطب نفسي دوما.. عندما تصارعني الأيام وتأخذني إلى قمة الألم، غالبا ما أحدث نفسي والدموع تغمر عيناي قائلة "لا عليك يا فدوى، فأنا قررت أن أبتسم" وسرعان ما أجد ابتسامة على شفتاي برغم كل شئ ... وفي كثير من الأوقات -ولله الحمد- أجد الشجاعة الكافية لرسم ابتسامة أكبر على شفاه غيري .. ولكنني اليوم، وبعد ما بلغت من الأوجاع ما بلغت، لن أبتسم، بل سأضحك !! نعم، فاليوم "قررت أن أضحك" !!

سمعت العام الماضي فكاهة لذيذة: (يقول الشاعر: وإذا الهموم على الأكتاف تشعبطت *** فاضحك وقل لها "ياختي انزلي") ... لاحظ أن القائل لم يكتفي بحثنا على الابتسامة ولكنه نصحنا بالضحك ومنذ ذلك الحين، وكلما رأيت رفيقة لي حزينة، أنصحها بالضحك وأن تقول لهمومها "ياختي انزلي"!!

قد تكون متعجبا -عزيزي القارئ- من كلامي بعض الشئ: من قال أن المشاكل تُحل بالضحك ؟؟ إذا أخبرني أنت، وهل تُحل بالحزن أو البكاء ؟؟؟ أعْلَمُ يقينا أنه في كثير من الأوقات البكاء يريح ولكنني أعلم أيضا أنه يضع غشاء على العقل والعين حيث لا تستطيع التفكير في حل أو رؤية فرص أخرى وهذا عن تجربتي الشخصية ..

سأشتاق إليهن ... لم علي إخفاء ذلك ؟؟ حاولت التظاهر بأن الأمر يبدو طبيعيا، ألم يتكرر مرارا من قبل ؟؟ ولكن، وبرغم تكرار هذا الفراق المؤلم وولادة الحنين والاشتياق من جديد، إلا أن الآلام لا زالت مثل ما سلف، ربما أشد .. سأشتاق إلى أكفهن الصغيرة التي كانت تتصارع لتمسك بكفاي أثناء سيرنا .. سأشتاق إلى ضحكاتهن البريئة عندما ألقي عليهن فكاهات طفولية .. لن أنسى ركضهن إلي حينما يروني وهتافاتهن كأنهن حصلن على جائزة ما "فدوىىى" والتسابق إلى حضني الذي كان يسعهن جميعا .. لن أنسى قبلاتهن الرقيقة والمتكررة والتنافس للجلوس بجانبي على مائدة الطعام .. لن أنسى قول أصغرهن حينما أرادت أن تعبر عما بداخلها فقالت: "فدوى، هوحشك أوييييي" بدلا من "هتوحشيني أويييي" !!! .. سأشتاق إلى سباقات الركض التي غالبا ما كنت أخسر فيها لكمية الشحم الذي يحمله جسدي مقارنة بأجسامهن الصغيرة .. لن أنسى عدم ذهابهن للنوم إلا إذا احتضنوني وتمنوا لي "أن أصبح على خير".. لن أنسى سؤالهن الدائم "إيه أكتر حاجة بتحبيها أو نفسك فيها" وظنهن أنها ربما تكون حلوة أو لعبة ما ثم تعبيرات وجوههن حينما أقص عليهن بعض ما أتمنى ثم قول إحداهن "أنا هدعيلك إن ربنا يديك كل الحاجات دي عشان أنا مش هفتكر ولا حاجة منهم" .. هذا ما علمتهن إياه، بالعمل، الثقة، حسن الظن والدعاء، يحصل الإنسان على كل ما يريد بفضل الله ..

عاما بعد عام يكبرن وملامحهن تتغير بعض الشئ ولكن حبي لهن يزيد فالفراق يقويه .. لا أظن أن علاقتنا كانت ستصبح بهذه القوة لولا الله ثم الفراق ..

أكثر ما يبكيني أنهن طوال فترة غيابي وكلما حصلن على حلوة جديدة النوع أو هدية قيمة، قمن بتخبأتها وذكرن بعضهن أنها ل"فدوى لما تيجي" .. أشياء لا تناسب سني ولكنها دائما ما تسعدني لأن مجرد تفكيرهن في وتذكرهن بي طوال فترة غيابي تعنيان لي الكثير..

هأنذا الآن أبكي ودموعي قامت بتبليل الورقة بالكامل ولكنني تذكرت ما بدأت كتابته، تذكرت عنوان كلامي وتذكرت أنني:

"قررت أن أضحك"

حفظكن الله لي يا أحب الناس إلى قلبي ،شرح الله صدوركن لكل خير وجمعنا على خير دائما ..

إلى "رورو ودودو ولولو"

You are always my children no matter how old you become …

خواطر حزينة أوي أوي

عودة إلى أرض الوطن وإلى مسقط رأسي الجميييييل، وأتاري مصر كلها منورة

:D

--------------------

مصر اتغيرت في 35 يوم ... الأغاني زادت والسجاير ملت الدنيا ولبس الناس بقة أضيق والمظاهر الغير إسلامية بقيت ملحوظة أوي أوي ... إلى الأمام يا أم الدنيا، عماااار يا مصر !!!!!!!!! هو دة التغيير اللي بندور عليه فعلا !!!!!!! ء

----------------------

اتفكت مردة الشياطين، واتفتحت أبواب جهنم والناس قللت من القرآن والصلاة ... وحشتني يا رمضااااان ... :(((((( ء

--------------------

كل سنة وانتم طيبين ويا رب أيامكم كلها تكون سعادة وأعياد ونجاح وتحققوا كل اللي نفسكم فيه، يا رب يا رب ... والله أنا دعيت للناس كلها كل يوم في رمضان وناس كتيرة أوي دعيتلها بأساميها مع إني مش هستفيد حاجة خاالص لو هي بقيت سعيدة ... بس بردو، نفسي الناس كلها تكون سعيدة .. ربنا يتقبل ويستجيب يا رب

------------------

أنا مش هقول إني مش فاهمة ليه كل دة قاعد بيحصل للإسلام مع دخول العيد علينا، طبعا أنا فاهمة وعارفة كويس أوي ودي بشرة خير لينا بس لازم نرجع لربنا

أيوة نرجع له بجد، عصينا كتير أوي وجربنا كل حاجة ممكن تتعمل بس ما لقيناش السعادة اللي طول عمرنا بندور عليها، بس لما رجعنا له بجد، لقينا أكتر من ما كنا بنتخيل

أنا فرحت أوي لما كاميليا مراة القس أسلمت وفعلا قعدت أعيط لما شوفت موقف المسلمين منها وإزاي رجعوها للكنيسة بدل ما يحتضنوها ... ربنا يثبتها يا رب ويحفظها ويرزقها حسن الختام

يعني فعلا الناس نسيت الآية ( {يَا أَيُّهَا الَّذِينَ آمَنُوا إِذَا جَاءكُمُ الْمُؤْمِنَاتُ مُهَاجِرَاتٍ فَامْتَحِنُوهُنَّ اللَّهُ أَعْلَمُ بِإِيمَانِهِنَّ فَإِنْ عَلِمْتُمُوهُنَّ مُؤْمِنَاتٍ فَلَا تَرْجِعُوهُنَّ إِلَى الْكُفَّارِ لَا هُنَّ حِلٌّ لَّهُمْ وَلَا هُمْ يَحِلُّونَ لَهُنَّ ) دة أمر صرييييح أوي من ربنا إننا ما نرجعهمش للكفاااار .. لا حول ولا قوة إلا بالله

بعدين واحد شيعي رافض حقير ربنا يلعنه يا رب اسمه خاسر الخبيث (ياسر الحبيب ربنا ما ييسر له أي حاجة في دنيته وما يخلي أي حد يحبه) يطعن في عرض أمي وأمك، أم المؤمنين جميعا عائشة رضي الله عنها زوجة الرسول صلى الله عليه وسلم ويقول عنها كلام والله ما حدش يسمح إنه يتقال عن حد ما أهله

بعدين الخنزير القذر فريد فيليبس يحرق المصحف وكذة نسخة من المصحف تتقطع ... دة والله لو حد عمل كدة في كتاب حد عزيز علينا كتبه، كان هتكون لينا ردة فعل، بس إحنا ---------- ؟؟؟؟!!!!!!!!!!!ء

أنا عمري ما قصدت بردة الفعل إننا مثلا نطلع في مظاهرة ما بتجيبش أي نتيجة ولا نقعد نشتم ونصوت فيهم وخلاص، لا لا لا، الحاجة العملية فعلا إننا نرجع لربنا وأنا بكلم نفسي قبل ما أكون بكلم باقي الناس

لازم نتمسك بسنة الرسول صلى الله عليه وسلم اللي مراته اتشتمت واتطعن في عرضها، لازم نتمسك بالحجاب الصح بتاع أمهات المؤمنين ومنهم عائشة رضي الله عنها ... لازم نحفظ القرآن بجد نحفظه مش نقرؤه وخلاص ... طبعا القراءة مهمة أوي بس بردو لازم نحفظه

أنا صعقت لما عرفت إن قبل يوم القيامة ربنا هيرفع الكلام من القرآن فهيكون المصحف فاضي ويعني اللي حفظ حفظ ، ربنا يستر علينا، لازم نلحق نحفظ قد ما نقدر في صدورنا قبل ما اليوم دة يجي

لازم نعمل حاجة عملية، ناس كتيرة أوي مش ملتزمة بس مسلمة ونفسها تنصر دينها وبدئت فعلا تحفظ القرآن وتقرأ في سيرة الرسول صلى الله عليه وسلم ودي الحاجة الوحيدة المفرحة في الموضوع، ربنا يثبتهم يا رب ويعين الجميع

يا رب سامح تقصيري وساعدني على اللي نفسي أعمله وهعمله بإذن الله طول ما انت راضي عني وبتساعدني

ويبقى الأمل