قرب الفراق

لا تسخر من جرح أحدهم، فقد تكون صاحب هذا الجرح في يوم ما

-------------------

قرب يجي اليوم اللي هنندم فيه إننا كنا بنطنش بعض ونعمل مش فارق معانا ومش هاممنا وكنا بنستخبى وراء الصمت الرهيب واحنا بنموووووت وبنتقطع من جوا

-------------------

يا ترى الخيط هيتقطع ولا حد فينا هيزهق ويسيب طرفه ولا هيقوى ويبقى زي الحبل ؟؟؟

أحيانا بتمنى أبقى ولد D: بس عشان هما مش بيعيطوا زينا (إن ما كانش بيعيطوا خالص أصلا) ولا فارق معاهم موضوع الفراق دة

أنا مش بقلل من قدرهم طبعا بس أنا شايفة إنها حاجة كويسة وتدل على القوة ما شاء الله

على الاقل بيقدروا يصمدوا وببساطة يصاحبوا ويفارقوا ويصاحبوا ويتعرفوا وينسوا ويسيبوا ويكملوا عادي جدا جدا

حتى بنشوف مثلا لما واحد وواحدة ينفصلوا (ربنا يعافي جميع المسلمين)، الواحد بيتجوز تاني على طول وولا كإن حاجة حصلت (حتى لو هو الغلطان) وياعيني الست تقعد مندهشة ومتألمة وتاكل في نفسها وترفض الإرتباط لمدة معينة تكون نفسيتها اتكونت فيها تاني وغالبا الفترة دي بتطول أوي أوي ... :(( هذا لا يعني بقة إنهم يستغلوا النقطة دي عشان صدقوني بردو في ستات قوية أوي ولو وقعوا في إيديهم يا ويل ويلهم P: غالبا ساعتها هما اللي هيعيطوا P:

أنا الحمد لله بدأت بقة مرحلة البكاء قبل الرحيل من الكلية

وجيبت كمية مناديل محترمة عشان كل يوم لما أروح أفتكر اليوم اللي هنسيب فيه بعض وأقعد أعيط شوية عشان لو حوشت العياط دة لآخر يوم (اللي هيكون آخر محاضرة pattern ولا هيكون يوم مناقشة المشروع، مش عارفة)، ممكن يحصل لي حاجة فعلا

وأقول هي دي سنة الحياة

وخلاص، هما 3 شهور ونسيب بعض وننسى بعض والناس اللي كنت بشوفها 5 مرات في الأسبوع وبسمع صوتها على طول إحتمال كبير ما أعرفش حاجة عنها :(

وبدأت أتأسف لكل البنات وأتأكد إن كلهم مش زعلانين مني وأحاول أعدي على بنات تانية وثالثة كل يوم عشان أطمن عليهم .. بيقولوا مش عارفين هيعملوا إيه لما أمشي :(( والله أنا كمان مش عارفة ... ممكن تعملوا مع اللي أصغر منكم اللي كنت بعمله معاكم :(( وتحيوا ذكرى فدوى

وأقعد أتمنى لو إني أقعد في الكلية زيادة حتى لو كانت محاضرة كونترول (بما إنها كانت أسوأ محاضرات تاريخي الجامعي وكنت أثناؤها بالذات بقعد أقول إمتى هتخرج) ... أديكي هتتخرجي يا ستي، فرحانة ؟؟

يللا، الحمد لله، الناس تقعد تقول لك مش دي النهاية وأكيد يا إما هنشتغل سوى (أستنى أنا بقة أعرف هما هيشتغلوا فين عشان أقدم في نفس الشركة) أو على الأقل هنكلم بعض كل فترة (وغالبا كل فترة دي بتكون في الأعياد)

ما دة الكلام اللي قلناه لصحابنا في ثانوي ومجرد ما دخلنا الكلية، ما حدش يعرف مين حصل له إيه ولا مين راح فين

نفس الحاجة

الناس بقة هتتخرج واللي هتسافر واللي هتتجوز أو تخلف بقة وصداقة إيه ووجع دماغ إيه، في حاجات أهم :((

أنا بقة بعمل حركة غبية وهبلة أوي (فعلا حركة هبلة والله)، بعمل عكس الناس، الناس كلها لما تحس إنها قربت تسيب بعض أو هتبعد عن بعض، تلاقيها بتقعد مع بعض أكتر عشان "تشبع من بعض" (على أساس إنها ساندويتشات مثلا)، لكن أنا بقة، قبلها تقريبا بقطع علاقتي بالناس اللي هسيبهم وبقلل كلامي معاهم خااالص عشان ما أتعبش لما أسيبهم .. يعني ببدأ أنسحب تدريجيا كدة ... زي أختي مثلا مرة كنا هنقعد فترة ما نشوفش بعض روحت خاصمتها وهي يا عيني قعدت مستغربة وتعيط مش فاهمة عملتلي إيه ولما قلتلها السبب قالت إني هبلة .. بس أنا شايفة كدة أحسن والله ...

آآه ياني

كفاية كدة عشان أكمل عياط

"واستعينوا بالصبر والصلاة"

محتاجين نحس بالحاجات دي فعلا

مش الناس اللي هتدي ولا الناس اللي هتمنع

ولا الناس اللي هتضر ولا الناس اللي هتنفع

ولا الناس اللي هتنزل البلاء ولا الناس اللي هترفع

غيرة الناس مش هتقتل

ربنا اللي بيحفظ من حسد الناس وحقدهم

ما حدش قال عشان اتضريت بحاجة قبل كدة أو غيرك اتبهدل منها، يبقى انت كمان هتضر تاني وابدأ بقة ودع السعادة من حياتك وشيل هم إيه اللي ممكن يحصل بكرة

اللي ربنا رايده هو اللي هيكون وما حدش فعلا بإيده أي حاجة

"أنت تريد وأنا أريد والله يفعل ما يريد"

( علمت أن رزقي لن يأخذه غيري فإطمأن قلبي )

لو حاجة ربنا كاتبهالك، ما فيش قوة في الدنيا ممكن تصدها عنك

لو حسيت إن حد كان السبب في حرمانك من حاجة أو هو أخدها بدالك، فاعرف وثق وتأكد إن دة الخير وإن هو مالهوش أي علاقة، ربنا أراد كدة فلازم كان يحصل كدة وأكيــــــــــد ربنا عاين لك حاجة أحسن بس في الوقت المناسب

زي التفاحة كدة، ما ينفعش تتقطف وتتاكل قبل موعدها (مع إني والله مش بحب التفاح بس أنا بذكره عشان أختي بتحبه :) )

http://hopefulhopes.blogspot.com/2008/12/blog-post_24.html

http://www.manhag.net/droos/details.php?file=585

يا ترى إمتى التفاحة هتكون قابلة للأكل ؟؟؟

إنا لله وإنا إليه راجعون

:(((

يقول تعالى في سورة آل عمران: "كُلُّ نَفْسٍ ذَائِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ فَمَن زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ وَمَا الْحَيَاةُ الدُّنْيَا إِلاَّ مَتَاعُ الْغُرُورِ"

لله ما أخذ ولله ما أعطى وكل شئ عنده بقدر

توفى إلى رحمة الله تعالى والد صديقتنا مي حسن في الدفعة يوم الخميس :((

ربنا يغفر له ويرحمه ويثبته عند السؤال

ربنا يجعل قبره روضة من رياض الجنة

اللهم اغسله بالماء والثلج والبرد ... اللهم نقه من الذنوب والخطايا كما ينقى الثوب الأبيض من الدنس

اللهم وجازه بالحسنات إحسانا وبالسيئات عفوا وغفرانا

اللهـــــــــــــــم وارحما إذا صرنا إلى ما صار إليه :(((

ربنا يصبر مي وأهلها يا رب ويرزقهم السلوان والثبات

ربنا يجمعنا بيه في الجنة يا رب على سرر متقابلين

نسألكم الدعاء :(

يا رب استر .. ابتلاءات

في صحيح الحاكم من حديث أنس عن النبي - صلى الله عليه وسلم:

"لا تعجزوا في الدعاء فإنه لا يهلك مع الدعاء أحد"

وقال الإمام الشافعي رحمه الله:

أَتَهْزَأُ بِالدُّعَاءِ وَتَزْدَرِيهِ *** وَمَا تَدْرِي بِما صَنَعَ الدُّعَاءُ

سِهَامُ اللَّيلِ لا تُخْطِي وَلَكِنْ *** لها أمدٌ وللأمدِ انقضاءُ

النهاردة كان في زلزال على العصر كدة، هزة بسيطة بس أنا حسيت بيها أوي

كنت قاعدة على الأرض لقيتني بتحرك، قلت ممكن دي دوخة، لاقيت القزاز بيتحرك، قلت أكيـــــــد القزاز مش دايخ :( !!! طلع فعلا زلزال 5.9 بمقياس ريختر

فجأة افتكرت اليابان واللي حصل فيها... :( وافتكرت الناس اللي بتقول الطبيعة خلقت نفسها ... ازاي حاجة زي دي تكون صنع إنسان أو من نفسها ؟؟؟ ألطف بينا يــــــــا رب

أول مرة أشوف ناس تفرح بالزلزال، الناس شغالة تطلع في نكت ومبسوطة كإن دي حاجة لذيذة

افتكرت سورة الزلزلة، يوم القيامة لما هيحصل زلزال عظيم أوي والأرض تطلع كل اللي جواها، ألطف بينا يا رب :((

-----------------------------------

في واحدة زميلتنا في ميكانيكا (دفعتي) وصاحبة صحابي بس أنا ما أعرفهاش، كان بيجيلها صداع كتير أوي بس كانت بتطنشه وفجأة عينيها ورمت من أكتر من شهر ... طلع عندها ورم خبيث على الجيوب الأنفية ومتشعب لأسفل المخ :(( .... حالتها بتسوء يوم بعد يوم وفي دكاترة ما عندهمش ضمير جربوا فيها 3 عمليات منهم لله ... المفروض ليها عمليات في الوجه وفي قاع العين غير الدواء الكيميائي والعلاج بالكهرباء :(((( يا جماعة، هي محتاجة فلوس أوي أوي، وبجد ربنا يلطف بينا كلنا ويا رب ما نكون في مكانها أبدا ويشفيها يا رب ويرجعها بالسلامة

يــــــــاااا لطيـــــــف يـــــــا رب

اللهم رب الناس، مذهب الباس، اشفها وأنت الشافي، لا شفاء إلا شفاؤك، شفاء لا يغادر سقما

اللهم انك تحيي العظام وهي رميم، فاحي ما افترسه المرض من جسدها

اللهم أنت الطبيب الأعظم فاشفها

ما تبخلوش عليها بالدعاء، أنا والله سمعت كذة قصة لناس كان عندها سرطان الأطباء عجزت تعالجه بس صاحب المرض كان بيقيم الليل ويدعي ربنا لحد ما ربنا شفاه والدكاترة استغربوا أوي ...

اللي حابب يدعم الموضوع ولو بجنيه (ما تستقلهوش، لو انت استقليت الجنيه، غيرك ممكن كمان يستاقله وجنيه على جنيه يعملوا 100) واللي بتدفعه دة بيزيد على فلوسك مش بيقل عشان انت في تجارة مع الله ... قال صلى الله عليه وسلم "ما نقص مالٌ من صدقة"... وقال أيضا "داووا مرضاكم بالصدقات" ... دفعتنا إن شاء الله ناوية تلم فلوس للحالة ودة رقم مندوب ميكانيكا سنة رابعة اللي حابب يعمل حاجة "الباش مهندس أحمد شحاتة رقمه 0162718483 "

قال تعالى: وَمَا تَفْعَلُواْ مِنْ خَيْرٍ فَإِنَّ اللّهَ بِهِ عَلِيمٌ {البقرة:215}

وقال صلى الله عليه وسلم "والله في عون العبد ما كان العبد في عون أخيه" رواه مسلم