وجدتُها

مش عارفة ليه أنا بكتب الكلام دة، هكتبه وخلاص

أحياناً الواحد يعيش ست سبع سنين مع ناس ويعاشرهم، وبردو ما يرتاحلهمش مع إنهم كويسين أوي، آه مبسوط إنه معاهم بس بيفكر ألف مرة قبل ما يقول كلمة قدامهم ... عادي يعني

وأحياناَ يقعد فترة عارف حد من بعيد كدة وفجأة يلاقي نفسه بعد فترة قصيرة بيكب كل اللي جواه قدامه، كإنه حنفية واتفتحت .... كإنك ندمان إنك ما عرفتهوش قبل كدة ... عاوز تقول له كل حاجة مرت عليك في حياتك في أقصر وقت ممكن .... عاوز تشاركه كل ألم عدا عليك مع إن الألام دي راحت من زمان بس لأ، بتعيد اسطوانة حياتك قدامه عشان تقول له"كنت فين؟" .... وتلاقيك بردو بتعيد الأفراح اللي حصلت فيها، كإنك بتتمنى إنه كان معاك في الأفراح دي وتحس إن أفراحك اللي فاتت كلها كانت ولا حاجة عشان هو ما كانش فيها

أول مرة أحس إن مش شرط الواحد يعاشر حد بقة ويقعد معاه ست سبع سنين (زي ما الناس عمالة تقول) عشان يرتاح له ويثق فيه ... سبحان الله، الكلام دة الرسول صلى الله عليه وسلم قاله في الحديث

روى الإمام البخاري رحمه الله في صحيحه معلقا مجزوما به عَنْ عَائِشَةَ رَضِيَ اللَّهُ عَنْهَا قَالَتْ سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ : " الأَرْوَاحُ جُنُودٌ مُجَنَّدَةٌ فَمَا تَعَارَفَ مِنْهَا ائْتَلَفَ وَمَا تَنَاكَرَ مِنْهَا اخْتَلَفَ ." صحيح البخاري

وهما اتنين تلاتة بالكتيــــــــر أوي اللي الواحد هيقابلهم في حياته ويلاقي نفسه بتتكلم معاهم كدة تلقائي وعادي جدا ومن غير ما تحاول تخبي ولا تخاف وكل ما تمنع نفسها وتقول "هسكت بعد الكلمة دي" تلاقي نفسها بتقول كلام أكتر، وتقول "خلاص خلاص، بس الكلمة دي" بس الكلام مش بيخلص إلا لو هما قالوا خلاص

تحس بمعنى Maybe Allah wants us to meet a few wrong people so that when we meet the right one, we feel how merciful he is and find our selves grateful ... أصلك لوعلى طول قابلت الناس دي قبل ما تتعرض لمطبات البشر، مش هتحس بنعمتهم أوي، لكن لما تشوف وتلاقي أشكال وأنواع وكل مرة تقول "هما دول" بس تكتشف "لا هما دول ولا حاجة" وتحس إنك طول السكة بجد مستنيهم، مش عارف هما مين ولا هيجوا إمتى، ولما يجوا فجأة تلاقي نفسك بتقول "ياااااه!! عشان كدة حصل كذا كذا" وتفهم ترتيب الله وأسباب كتيرة كانت غايبة عنك وكنت حاسس في ساعتها إنها إبتلاء أو شر بس دلوقت توقن إنها كانت أحلى منحة ممكن تحصل لك .... حسبت إنك لما سيبت غيرهم أو غيرهم هما اللي سابوك (مش فارقة والله، المهم سيبتوا بعض وخلاص) كان لسبب عابر زي باقية الأسباب، ما كنتش حاطط في بالك (أو كنت حاطط بس قعدت تطرد الفكرة دي) إن ربنا عاوزلك حاجة أحسن، بس كان بيوريك الناس عاملة إزاي وممكن كنت تقابل إيه .... وفجأة يجوا، ويتوقف الزمان عندهم، وتبص لورا وتقول "ما ممكن يكونوا زي اللي فاتوا" بس صوت قوي أوي جواك يقول "لا، صدقني دول غير، أنا حاسس إني طول عمري مستنيهم هما، يا رب هما؟؟!!" ....

بالأمس أدركت فقط أنني "وجدتها" وربما "وجدتهم" ولكن من يدري ماذا يخبئ لنا الغد ؟؟ لعله خير .... الحمد لله :)

أرجو ألا يتركوا يدي أبداً

والله وعملتها !!! ء

Countdown: 33 .... :( :( :(

------------------------------

اللهم دبرلي أمري فإني لا أحسن التدبير

اللهم خير لي فاختار لي فإني لا أحسن الاختيار

اللهم اكفني بحلالك عن حرامك واغنني بفضلك عمن سواك

هو ما ينفعش حد يرتبلي حياتي كدة ويقول لي أعمل إيه ؟؟؟ مع إني طول عمري عارفة إن الواحد لما يتغصب على حاجة مش بيعملها حلو، مش زي لما تكون الحاجة بإرادة الواحد .... بس بردو، مالها أيام الكلية ؟؟ القرارات اللي الواحد كان بياخدها كانت محدودة جدا (أسلم late ولا ما أسلمش خالص ولا أسلم في الوقت ؟؟؟ أنام ولا أكمل ؟؟؟ حاجات بسيطة كدة) ... دلوقت الواحد عنده قرارات مصيرية، حياته كلها هتكون مبنية عليها :( ... حاسة إني مش عارفة أعمل حاجة ولا أختار إيه ... طول عمري نفسي أتخرج وأخلص كلية والنهاردة بس نفسي أرجع لها تاني أوي أوي ... إيه اللي خلاني أسيبها بس :( ؟؟؟ لا حول ولا قوة إلا بالله .... يا رب ساعدني، ماليش غيرك ولا حد هيساعدني ولا يقف جنبي غيرك والله :( :( :( .... لا إله إلا أنت سبحانك إني كنت من الظالمين ...

--------------------------------------

احتمال أوي تكون دي آخر يوميات ليا على البلوج لأسباب ما ... أنا ممكن أكتب خواطر، مواضيع مهمة، حاجات مفيدة بس خلاص، ما أتوقعش هحكي هنا حاجة تاني إن شاء الله

من كام ساعة، حققت أمنية من أمانية اللي كنت حطاها الترم التاني السنة دي ... الحمد لله، مش شرط أحلام الواحد كلها تكون ليها علاقة بالدراسة والشغل والارتباط ... فيه أحلام تانية بسيطة (تطبيقها ما كانش بسيط صراحة D:)، بس قصدي حاجات ممكن ما تاخدش أكتر من يوم ومن غير تعقيدات وناس يكون ليها دور في قرارك وناس شايفة إنها عارفة مصلحتك وتعمل الناصحة الأمينة وهي أصلا مش فاهمة أي حاجة عن العلاقات الإنسانية، بس أهو فرض سيطرة وحب تحكم وبس!!!!... ما علينا، مش دة موضوعي دلوقت :( ... المهم بقة، أنا أغلب أحلامي وأهدافي مالهاش علاقة لا بالعلم ولا بالشغل (ممكن عشان كدة مش نافعة في الاتنين ؟؟؟ ههههه) .... بس حاجات ممتعة، بتمتعني أنا شخصياً، ودي أهم حاجة في الحياة ... احنا ما اتخلقناش عشان نعمل اللي كل الناس بتعمله ونمشي ورا كلام الناس وورا الروتين الممل والناس عاوزاك تبقى إيه وبس ...

المهم بقة، يوم من الأيام (كان ليلة تسليم مشروع من المشاريع كالعادة، حيث ظهور الإبداعات عندي بيتم في هذه اللحظات الحرجة سواء كتابة قصص ولا أفكار)، فجأة لاقيتني بقول "إيه رأيك تروحي الكلية مشي من البيت؟؟؟ ههههه، آه والله، ولاقيتني رحبت بالفكرة أوي أوي وببص في الجدول أشوف إيه أنسب يوم .. لاقيت الأيام كلها يا إما بتبدأ 8 ونصف يا إما 10 إلا ربع وأكيد أصلا هوصل مهدودة وهلاقي نفسي رجعت تاني (أكيد مش مشي، غالبا على حمالة أو في عربية اسعاف D: ) ... زعلت كدة، بعدين قلت لا، مش شرط أيام الدراسة، ممكن في الصيف !! نعـــــــم ؟؟ لا ، الصيف هيبقى حر أوي أوي كمان أنا أصلا عارفة ظروفي هتبقى إيه بكرة :( عشان أأجله للصيف ؟؟ بعدين أنا عارفة نفسي، لما أسوف حاجة، غالبا مش بعملها خاااااالص وأنا خلاص الفكرة دخلت في دماغي فأكيد مش هقدر أطلعها ... لاقيت ضربات قلبي بتزيد ولاقيتني مبسوطة أوي كإن حد جابلي هدية (والله) وقررت إني إن شاء الله قبل ما أتخرج، هعمل الحركة دي ... كنت ناوية أعمل كدة الأسبوع اللي قبل الامتحانات بس خفت تحصل لي إصابات خطيرة (ههههه) ولا حاجة وبدل ما أروح اللجنة، أروح المستشفى، فقلت بلاش ... أنسب يوم بقة، كان النهاردة لإننا إن شاء الله نوينا (أهم حاجة النية) نبدأ شغل للمشروع من بكرة ونرتاح النهاردة (دانا ارتحت راحة!!! P:) ....

حاسين يعني إيه تاخد البحر كله مشي من اسكندر ابراهيم (ميامي) لحد الشاطبي ؟؟؟ دانا في الأيام العادية لو السكة فاضية والسواق مجنون وطاير على البحر، بناخدها في نصف ساعة تقريبا !!! وفي الأيام بتاعت (يا رب السكة تسلك :) )، كنت أحيانا بقعد فوق الساعة ونصف !! دي وهي عربية !! مش عارفة أنا حسيت إن الموضوع بسيط وقلت لنفسي بطلي تهويل الموضوع وكتبته عندي عشان اتعلمت إني أكتب أي حاجة عاوزة أحققها بفضل الله (دانا كاتبة حتة دين حاجات D:، يا رب كلها تتحقق) ....

المهم بقة، كان نفسي أبدأ من بعد العصر بحيث الشمس تكون راحت والجو يكون حلو بس خفت ما ألحقش والدنيا تظلم عليا وأنا بخاف من أشكال الناس اللي بتتمشى على البحر في الظلمة ومعاكسات وربنا يحمينا، البحر الصبح بيبقى فاضيييييي ... قلت أنسب حاجة بعد الشروق، كمان على الأقل المناظر العجيبة اللي بنشوفها بتكون نايمة الصبح ربنا يهديهم ويحمينا ... أنا السنة اللي فاتت أيام الميد ترم (ميد ترم ال algorithms بالتحديد)، السكة كانت واقفة خااااالص على البحر ولاقيت كل الطلبة نازلين من المشاريع قرروا يروحوا مشي !!! احنا كنا لسة في سيدي بشر وواحد معايا في المشروع سمعته اتصل بواحد صاحبه وقال له إن كمان أبو قير والترام وكل الطرق واقفة عشان الدنيا كانت مطرت جامد أوي ومش عارف إيه .. امم، يعني خطة أبو قير فشلت ... أنا كنت جايبة معايا اللاب توب (يا جمالي، يعني كل يوم ما كنتش بجيبه وآجي على اليوم دة وأقرر أجيبه؟؟؟!!!) ... المهم، عدد الناس اللي بتنزل من المشاريع وتمشي على البحر قاعد بيزيد وولاد بتجري ( :( ) ومش عارف إيه، أخدت القرار الجرئ قبل لوران بفترة ونزلت أمشي ... المهم بقة، قعدت أهرول عشان ما ينفعش أجري :( ، ووقت اللجنة عدى .. اتصلت بصحابي قالولي إن أصلا ما حدش من المعيدين جه ولا الناس جت، قالولي فيه اتنين تلاتة بس .. "بجد" ؟؟ "لا، مش اتنين تلاتة أوي، يعني 10 " (خليتهم يعدوا كام واحد موجود) ... كويس جدا .. كان ظهري خلاص بيودع عشان شايل 3 كيلو حديد ... ربنا يسامح اللاب توب واللي عمله فينا ال4 سنين دول :( ... قبل سيدي جابر بشوية السكة كانت سلكت فقررت أركب تاني .... وصلت الكلية زي القتيلة وعضلاتي كلها بترتعش ... طبعا دي لا تعتبر رياضة، أنا كدة بدمر العضلات، بس كان موعد اللجنة عدى والحاجة أم الاختراع (مش اختراع أوي يعني) ....

المهم بقة، أنا تهت وأنا أصلا المفروض كنت أتكلم عن اللي عملته النهاردة D: ، مش اللي حصل من سنة P: ... نظراً لإن بقالي كتير أوي مش بنام (أو حتى لو في فرصة أنام، بلاقي نفسي بقوم)، ونظرا لهدة امبارح، نمت تقريبا 10 ساعات (أول أول امبارح نمت 14 ساعة -كنت عيانة أوي وزعلانة وتعبانة ومتضايقة ومحبطة ومكتئبة (ما حدش عنده صفة كمان سيئة ؟؟ ههههه )- ) ، المهم، كان نفسي أنزل من البيت الساعة 6 الصبح بس أنا أصلا قمت 6 فعبل ما حطيت قرآن وأناشيد كتيرة أسمعهم في الرحلة (هههه) على الموبايل وعبل ما قرأت الإكتئاب اللي الناس كاتباه على الfacebook والوداع وكدة، نزلت 8 إلا ربع تقريبا .. بدأت رحلة الألف ميل (ولا أكتر؟؟؟) الساعة 8 بالظبط من عند نفق اسكندر ابراهيم (والله ما أعرف ليه بالذات اخترت دي نقطة انطلاقي، ما كنت ممكن أمشي من البيت ؟ بس قلت أركب لها بعدين أمشي منها) .... طبعا عشان الصيف بدأ والناس بتتفسح (آه والله بيتفسحوا ما شاء الله عادي يعني) لاقيت البحر فيه ناس بتعوم (أنا آخر مرة نزلت الماء كان من 3 سنين :( وما أتوقعش إني ممكن أنزل تاني ... ممكن في الجنة بقة إن شاء الله، أكيد بحر الجنة لا يقارن ببحور وشواطئ الدنيا مهما كانت) .. المهم، قعدت أتنفس هواء الحرية (بردو) وأفكر في كل حاجة ممكن واحد قرب يتخرج يفكر فيها وقعدت افضي عقلي من حاجات (أصلي سمعت في التنمية البشرية إنك كل ما تقاوم عقلك في التفكير في حاجة، الحاجة دي هتقعد ترجعلك، لكن لو خليته، هيفكر وخلاص، مش هيفكر فيها تاني إن شاء الله) ...

كان في ناس قليلة جدا بتتمشى بردو (أكيد ما كانتش حاطة الهدف المجنون بتاعي)، والشمس كانت ساطعة إلى حد ما بس الهواء كان جميل أوي ما شاء الله .. قرأت بردو إنك لما تكون غضبان، غير إنك تتوضى وتغير هيئتك (لو واقف، تقعد ولو قاعد تنام وكدة زي ما الحبيب أحمد بن عبدالله عليه أفضل الصلاة والسلام قال لنا)، ممكن أوي كمان تتمشى أو تجري وتطلع غضبك في الجري .. فأنا تخيلت نفسي بطلع كل غضبي المكبوت والحاجات اللي ما قدرتش أطلعها في المشي دة ولاقيتني برتاح ومستمتعة ... لما وصلت ستانلي، لاقيت نفسي تعبت فقلا أرتاح شوية .. اتفرجت على البحر الموج كان عالي جدا والبحر هايج أوي أوي (سبحان الله، النظر والتأمل في البحر عبادة زي ما أخبرنا الحبيب أحمد بن عبدالله عليه أفضل الصلاة وأتم التسليم) ....

كانت الساعة بقيت 9، ارتحت 10 دقايق تقريبا بعدين كملت .... لما وصلت سبورتنج، لاقيتني تعبت تاني، فارتحت شوية بردو وكملت .. المهم، أنا كل يوم بروح الكلية من كامب شيزار فلما وصلت كامب شيزار حسيت إني كدة عملت اللي كان نفسي أعمله، بس لا، في حاجة قالت لي أكمل لحد الشاطبي (كإن حدود مشوار الكلية من ميامي للشاطبي)، فقعدت أجر نفسي لحد الشاطبي ... الحمد لله وصلت في تمام الساعة العاشرة وثلث، يعني حلم اتحقق في ساعتين بالظبط ولله الحمد والمنة ... كان نفسي أول ما وصلت حد يشيلني كدة لحد البيت .... ههههههه، أعمل مغمى عليا عشان يجيبولي إسعاف ؟؟ المهم ركبت ورجعت البيت قلت أرتاح شوية قبل ما أنزل تاني عشان عندي مشوارين ضروريين قبل ما ندخل في جو المشروع والمعتقل بتاع ال 21 يوم الجايين دول ...

يا رب سهل لنا جميعاً المشروع والمناقشة والشغل والدراسات العليا والارتباط والأولاد والأحفاد (سرحت بعيد كدة ليه D: ؟؟؟) والحياة كلها بجميع جوانبها وأبعادها ونواحيها ... يا رب ادينا القوة إننا ناخد قرارات ونعرف نختار وسهل لنا الحياة ... أنا عارفة إن الحياة عمرها ما هتكون سهلة (أنا طول عمري بسمع في التنمية البشرية وكدة إن الحياة لازم تكون صعبة بس سبحان الله، من أسبوع تقريبا طلع واحد بتاع تنمية بشرية بردو اسمه فاروق (مش فاكرة اسم باباه صراحة) وقال إن دة غلط والحياة سهلة جدا لو أقنعنا نفسنا بكدة وعرفنا نتعامل معاها)، بس انت قادر يا رب تسهلها علينا وتدينا القوة :) ... اللهم أمدنا بقوة من عندك تغنينا بها عمن سواك ... آميـــــــن ....

كــــــــــــــــلام

Countdown: 33 .... :( :( :(

------------------------------

"There is no such thing as a weird human being. It's just that some people require more understanding than others." --- Tom Robbins

-------------------------------------------

Sometimes you do things which you don't want to do but you have to do them ... You find yourself in great pain and crying strongly while doing them (pathetic??) and asking for someone (unseen)'s forgiveness ... I am so sorry, it was one of them, I had no other choice; it's just for the mere good of everyone ... It was so PAINFUL but who said that all decisions are fun to take ?? :( It was not a life long decision, so if there's another way around to what I did, we certainly will find it and Allah will lead us to it no matter how many months/years from now it might be ...

------------------------------------------

"Takotsubo Cardiomyopathy" :( :( :( Wow!! It turned out to be real after all !!!

-----------------------------------

إيه المناهج الجبارة دي ؟؟ حسن ونعيمة، وAlice and Bob ؟؟ ربنا يسامحكم، بوظتوا لنا عقلنا !!! أنا مش فاهمة ليه يعني ما ينفعش حسن يكلم Bob ونعيمة تكلم Alice ؟؟؟ ولا هو زرع السم في العسل وبس ؟؟؟ واحنا مالنا أصلا إذا كانوا عاوزين يكلموا بعض ب confidentiality ولا integrity ؟؟؟ ههههه، واحدة من تعليقات البنات كانت "ما يخرجوا ولا يتنيلوا، هما ليه قارفيننا بالchat بتاعهم"؟؟؟ D: .... بعدين يوقفلك اللجنة كلها عشان يقول لك "خلي بالك، دة حسن اللي بيبعت لنعيمة، مش Alice and Bob زي ما انتم متعودين، عشان ما حدش يتلخبط" !!!! يا سلام ؟؟ زي ما احنا متعودين ؟؟؟ في ناس دمها شربات بس محتاج يتحط عليه كيلو سكر :)) ... ما علينا ...

----------------------------------------

مش عارفة ليه بحب أوي أدخل اللجنة متأخر على الأقل 5 دقائق ؟؟!! حاجة في دمي من إعدادي هندسة، حتى لو كنت في الكلية قبل ما اللجنة تبدأ، أقعد برة أتمشى شوية لحد ما وقت اللجنة يعدي بعدين أدخل :) (يا برودي) ... مع إن مواعيدي الحمد لله دائما مظبوطة لما أتواعد مع حد ولا آجي لمحاضرة أو سيكشن، بس مش عارفة اشمعنا الامتحانات بعمل معاها كدة ؟؟؟

Generally, I believe that "arriving an hour early is better than arriving a minute late"

كمان مش بحب أبداً أكلم حد قبل اللجنة ولا بعدها، ما حبش حد يشوفني قبلها ويقعد يكلمني ولا يمسكني بعدها، فبطيـــــر أول ما أخلص، لكن اضطريت أقعد آخر يوم ... مش اضطريت يعني، دة كان اختياري، آخر يوم لينا في الكلية مع بعض .. ما فيش أي حاجة هتجمعنا كلنا تاني خلاص أبداً

--------------------------------------

واحدة صاحبتي يوم مناقشة مشروع التخرج بتاعها هو يوم فرحها !!!!!!! مش عارفة ما شاء الله هتعمل إيه ؟؟؟ ربنا يسعدها يا رب وعقبال كل اللي عاوزين (جواز مش مناقشة، ههههههه)

---------------------------------------

الحمد لله الذي هدانا لهذا وما كنا لنهتدي لولا أن هدانا الله

--------------------------------------

فعلا ربنا أحن وأرحم من الأب والأم ... الحمد لله :)

---------------------------------------

ارحموني بقة، مش كل شوية واحد يبعت مايل على الجروب فيه وداع وكلام يبكي ... كفاية، مش عاوزة أعيط :( .... أول مرة أحس إني فعلا مسامحة كل الناس اللي أذيتني ... يللا، الفراق بيعلمنا التسامح بردو :) كل حاجة بفائدة

--------------------------------------

سبحان الله، حدث واحد في السنة ممكن يخلي الواحد يقول إنها كانت سنة جميلة أو يقول إنها كانت سنة وحشة ... السنة دي كانت ممتعة إلى حد كبيــــر الحمد لله، حصل فيها كذا حدث جميل، ربنا يسعد الجميع يا رب ومن فرحة لفرحة أكبر

--------------------------------------

ربنا يسامحكم، لبستوني تي شيرت تخرج أبيض :( !!! ماله الأسود وعليه لوجو كحلي ؟؟؟ هههههه :) ، ما حدش يسألني طب إزاي أصلا اللوجو هيبان عليه !! ما أعرفش، بس صدقوني الأسود في اللبس قمة في الجمال !! بعشقه !! آدي التي شيرت وعليه كل الكلام اللي يسد النفس :)) بس CSD '11 منورة في النصف والله :)

فرقت إيه امبارح عن النهاردة ؟؟ يعني ممكن في يوم وليلة الواحد يبقى حاجة تانية ؟؟؟ سبحان الله، امبارح الواحد كان طالب مثلا والنهاردة بقة مهندس ؟؟ مش حاسة بفرق |: ... ممكن لما السنة الجديدة تبدأ وألاقي نفسي مش بروح الكلية كل يوم ساعتها هحس ؟؟ وهل دة يعني إني كبرت فعلا ولا دي مجرد مسميات ؟؟ حاسة إني لسة فدوى الطالبة الجامعية .... (شاعرة حاسوبية على رأي بابا :) ، أنا موافقة على أول صفة لكن التاني دة أشك فيه :) ) ....

----------------------------------------

امبارح كان يوم جميل الحمد لله ... الامتحان قعدت أكتب فيه كل الساعتين بدون توقف (ما فرصة بقة الورق قدامك، اكتب براحتك، مش زي المواد اللي فاتت الواحد ما كانش عارف يكتب إيه :) )... وواحد طالع من اللجنة يقول "دة أسوأ امتحان أحل فيه" !! ما شاء الله عليك، ما هما العباقرة كدة، الحاجات الخفيفة بيحلوا فيها وحش والجامد تلاقيهم طالعين مبسوطين منه ... يا رب يزيدهم من نعيمه ... أنا اللي على قدي ...

كان في اقتراح عجيب إن الدفعة كلها تخرج مع بعض !! هههههه، تحفة والله كدة 47 ولد و33 بنت يخرجوا سوا !! منظر إسلامي بحت بس الحمد لله في باش مهندس قال اللي كان نفسنا نقوله والإقتراح العجيب باظ :) .... بعدين لما طلعنا من اللجنة، وقفنا تقريبا ساعة حداد (آه والله، حداااااد)، ما بنعملش حاجة تقريبا غير زهقانين وبنتكلم ... أكيد الدح مأثر علينا ومش مخلينا حتى عارفين نتبسط آخر يوم .... هههههههه ... بعدين بحرية ومدني بقة بدأوا فعاليات التخرج (صواريخ وبمب وحاجات بتطلع قلوب ملونة :) وبتلمع في الجو) وكلنا روحنا نتفرج وللحظة، اتمنينا إننا كنا مدني (هههه) بس بعدين لاقينا مناظر ربنا يعافينا، بنات بتجري ورا ولاد (آه والله) وبيرشوا على بعض snow spray وبيضربوا بعض !!!!!! فحسيت إني في المجمع النظري ونفدنا بجلدنا وحمدنا ربنا على قسمنا المحترم الجميل :) ...

كلنا كنا تعبانين جدا عشان مش نايمين (كالعادة يعني) والشمس جميلة بالذات مع اللون الأسود (بردو بحبه :) ) ... بعد شوية بقة لقينا بقية بنات الدفعة بيتصوروا في ظهر مبنى الإدارة .. أنا ما اتصورتش معاهم ولا صورة صراحة .. أولا مش بحب الصور، ثانيا يا إما يكون في ولاد في الصورة يا إما معيد (اتصوروا مع م-عمرو مجدي وم-أحمد عصام)، وما ينفعش أطلع في صورة معاهم ....

صراحة كان في صورة واحدة بس بنات بس لكن اللي بيصورها كان ولد طبعاً فتخيلت نفسي ببصله وببتسم له فجسمي قشعر ورفضنا نتصور ... بعد شوية، حبة مننا اتلموا على بعض (الباقي فضل المرواح والنوم)، أنا كنت عاوزة أروح بس قعدنا كلنا نتحايل على بعض ونشجع بعض، لحد ما الحمد لله خرجنا- كنا تسعة....

روحنا اتغدينا في مطعم واتصورنا (أعمل إيه بس ؟؟ :) ) بعدين اتمشينا على البحر واستنشقنا "نسيم الحرية" وأكلنا أيس كريم الحرية ... هههههه، دة مش محل، بس هما بيقولوا طعمه غير لو كانوا أكلوه قبلها بيوم، ههههه ... بعدين انهارت جميع قوانا فقررنا نروح إلى حيث المنزل ...

دي حبة إبداعات ...

دة من تصميمي ... طول عمري كان دة توقيعي بما إن بابا واخواتي وأخويا بحرف ال A (وماديلياتي بردو A)... وكمان ميمي بحرف ال A فزاد تعلقي بالحرف دة :) .... ولما لقيته ممكن يلزق في ال F من غير ما شكلهم يبوظ، حبيته أكتر ....

دة من تصميم ميمي

كنت عاوزة أكمل إسمي، بس واحدة اتنرفزت (هههههه) وشوهتلي الطبق، بس تصدقوا شكله حلو ؟؟؟ فدوى محاطة بعوائق -كالعادة- والأمل مستنيها برة (شكله هيستنى كتيــــر :)) ... بس الراجل جاب الأكل فمالحقتيش أكمل HopefulHopes وظل Hope كما هو، وفي الآخر ال Hope اتاكل زي ما كل حاجة حلوة في الدنيا بتختفي وتروح (إيه التفاؤل اللي أنا فيه دة ؟؟؟) ، الحمد لله

مش عارفة أقول إيه تاني ... شكرا هندسة، خليتيني أعرف ناس عملوا فرق كبير في حياتي، عمري ما كنت أتخيل إن الدنيا فيها ناس جميلة كدة ما شاء الله ... حتى الناس اللي زعلوني اتعلمت منهم حاجات ياما ....

الحمــــــــــــــد للــــــــــه

يا رب اشفيه :((((

الشيخ الدكتور حازم شومان، أنا بعشق محاضراته وكلامه وأسلوب إلقاؤه ما شاء الله عليه ... ما حدش في الدنيا بيؤثر فيا زيه :(( ... مرة كنت راكبة مشروع والسواق (لدهشتي) ما كانش مشغل حاجة تخرم لك ودانك وتكإبك أكتر ما انت أصلا مكتئب وكلام بايخ مالهوش لازمة ولا ليه أي معنى، (مع إنه ما كانش ملتحي مثلا ولا حاجة سبحان الله)، كان مشغل محاضرة للدكتور حازم (من 3 سنوات تقريبا) وكانت أول مرة في حياتي أسمعه .... صعب أوي أنسى اليوم دة ... كان بيتكلم عن الموت والكفن :( .... لاقيت نفسي بعيط في المشروع جامد أوي، نفسي أقوله ينزلني عشان أبطل عياط وما حدش يتفرج عليا ونفسي أفضل قاعدة أكمل كلامه للآخر ... الحمد لله كملت كلامه وكملت عياط ومن ساعتها وأنا بدور على كل محاضراته وبحاول أسمعها قد ما أقدر وحطيت له كذا فيديو صغير على المدونة قبل كدة تحت "وقفات" ....

يا رب اشفيه وعافيه وارفع عنه .. اللهم يا رب الناس ، يا مذهب البأس، يا شافي يا معافي، يا من لا شفاء إلا شفاؤك، اللهم اشفه شفاء لا يغادر سقما .... لا حول ولا قوة إلا بالله :( :( :(

ما أفتكرش إني عيطت على مرض حد كإنه حد من أهلي فعلا إلا هو :( ... بجد مش قادرة أمسك نفسي :( ... ربنا يكرمه ويسعده ويرفع عنه، كان ليه الفضل الكبير بعد الله في حاجات كتيرة في حياتي اتخلصت منها أو بحاول أتخلص منها وبفشل فبرجع أسمعله محاضرة تاني وأقوى من جديد ... أقوى محاضرات بتهزني وأكتر كلام يرجني ويفوقني هو كلامه ... حماس غير عادي ما شاء الله وطريقة رهيبة في الترهيب لا قوة إلا بالله

شكله وهو نايم على السرير كدة وجعلي قلبي :( :( :( ... يا رب ارفع عنه ورجعه أقوى مما كان

لا حول ولا قوة إلا بالله

وعسى الله لا يفرقنا

Countdown: 36 .... :( :( :(

يا رب هونها علي، ما لي سواك

--------------------------------------

:قال تعالى في سورة الزخرف

"الأَخِلاَّءُ يَوْمَئِذٍ بَعْضُهُمْ لِبَعْضٍ عَدُوٌّ إِلاَّ الْمُتَّقِينَ

يَا عِبَادِ لا خَوْفٌ عَلَيْكُمُ الْيَوْمَ وَلا أَنتُمْ تَحْزَنُونَ

الَّذِينَ آمَنُوا بِآيَاتِنَا وَكَانُوا مُسْلِمِينَ

ادْخُلُوا الْجَنَّةَ أَنتُمْ وَأَزْوَاجُكُمْ تُحْبَرُونَ"

تفسير ابن كثيـــر/

قوله تعالى: ( الأخِلاءُ يَوْمَئِذٍ بَعْضُهُمْ لِبَعْضٍ عَدُوٌّ إِلا الْمُتَّقِينَ ) أي: كل صداقة وصحابة لغير الله فإنها تنقلب يوم القيامة عداوة إلا ما كان لله، عز وجل :) ، فإنه دائم بدوامه

----------------------------------------

To My Gurlieees :D

تالله أحبكن في الله ولله وبالله

أحبابُنا ما أجمل الدنيا بكُم ** لا تقبحُ الدنيا وفيها أنتُمُ

بما إن السنة العظيمة أوشكت على الانتهاء، دة إهداء خاص جدا إلى أصدقاء

"هادووووب دووووب" ( أنا دوبت خلاص P: )

بسومة، ميمي، رودي، زوزو، دودو وأكيــــــد أكيـــــــــــد يعني فيدو D:

أحبكن جميعاً حبيباتي :* :* :*

"instead of Buffers :D"

اختلفنا واتفقنا كتيـــــــــــــر ( مش كتير أوي يعني P: )....

وياما الهم وحدنا (ياااااااماااااااا :( )، وياما الفرحة عمتنا

بغض النظر عن اللهجة الخليجية (لو حد عاوز ترجمة، أنا في الخدمة :) )، الكلمات جميــــلة والنشيــــد دة ليه ذكريات حلوة معانا

يللا يا بنتيت، اعملوا like بقة D:

I love his reply :)

Countdown: 38 .... :( :( :(

-----------------------------

روى البخاري عن ابن عباس أن رسول الله صلى الله عليه وسلم قال: "اتَّقِ دَعْوَةَ الْمَظْلُومِ ، فَإِنَّهَا لَيْسَ بَيْنَهَا وَبَيْنَ اللَّهِ حِجَابٌ" .... حسبي الله ونعم الوكيــــــــل ... اللهم أرني فيها ثأري

----------------------------------------

الم ﴿١﴾ أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ ﴿٢﴾ وَلَقَدْ فَتَنَّا الَّذِينَ مِن قَبْلِهِمْ ۖ فَلَيَعْلَمَنَّ اللَّـهُ الَّذِينَ صَدَقُوا وَلَيَعْلَمَنَّ الْكَاذِبِينَ ﴿٣﴾ أَمْ حَسِبَ الَّذِينَ يَعْمَلُونَ السَّيِّئَاتِ أَن يَسْبِقُونَا ۚ سَاءَ مَا يَحْكُمُونَ ﴿٤﴾ مَن كَانَ يَرْجُو لِقَاءَ اللَّـهِ فَإِنَّ أَجَلَ اللَّـهِ لَآتٍ ۚ وَهُوَ السَّمِيعُ الْعَلِيمُ ﴿٥﴾ وَمَن جَاهَدَ فَإِنَّمَا يُجَاهِدُ لِنَفْسِهِ ۚ إِنَّ اللَّـهَ لَغَنِيٌّ عَنِ الْعَالَمِينَ ﴿٦﴾ء

"فاصبر إن وعد الله حق ولا يستخفنك الذين لا يوقنون" سورة الروم

أكيد الشيخ يوسف إستس وهو وهي وكلهم اتعرضوا لحاجات أشد ... يا رب ثبتني، يا رب الجنة يا رب ...

أنا ما باقيتش عاوزة أي حاجة من الدنيا .... الدنيا ملعونة وملعون ما فيها إلا ذكر الله وما والاه أو عالماً أو متعلماً كما أخبرنا الحبيب المصطفى في سنن الترمذي

---------------------------------------

------------------------------------------------------------

Sheikh Yusuf Estes, a previous Christian preacher, a current Islamic preacher :)

سبحان الله العظيم، تحس صورته في الشمال كدة مش مريحة وفي اليمين وجهه بيشع نور ما شاء الله :)

ربنا يثبته يا رب :)

سبحان الله، حاجة بجد مخلياني مستغربة ومندهشة ومش لاقية لها تفسير منطقي (يا ريت اللي عنده تفسير منطقي يقوله) !!! كل اللي كانوا غير مسلمين زمان سواء أجانب ولا عرب ودخلوا في الإسلام، الرجالة بتلتحي أول ما تسلم والستات بتلبس النقاب !!! اشمعنا يعني ؟؟ هل عشان هما عارفين إن دة فرض والمفروض يعملوه فبيعملوه (واللي مولودين مسلمين مش قادرين مثلاً أو مكسلين ؟؟) ولا هما حبوا الإسلام أوي ودخل قلبهم لدرجة إنهم قرروا يطبقوه بحذافيره (يعني اللي مولودين مسلمين لسة الإسلام ما دخلش قلبهم أوي ؟؟!! ) ؟؟ مش عارفة فعلاً بس دي حاجة شدت انتباهي أوي أوي أوي ونفسي ألاقي لها تفسير .. ممكن لو سألت حد فيهم أعرف السبب ...

سبحان الله، {إِنَّكَ لَا تَهْدِي مَنْ أَحْبَبْتَ وَلَكِنَّ اللَّهَ يَهْدِي مَن يَشَاء }[56 القصص]

I loOove his reply :) مقنع جداً

1:25 minutes only ... Amazing :) ما شاء الله

To Women As Far As I'm Concerned

I have a strong feeling that I am always being rejected because of it

حسبي الله ونعم الوكيل .... "فاصبر إن وعد الله حقٌ ولا يستخفنك الذين لا يوقنون"

الحمد لله، ممكن أوي ربنا منع عني مصيبة كانت هتحصل لي عندهم

:) القابضون على الجمر :) ...

"وفي السماء رزقكم وما توعدون ... فورب السماء والأرض إنهُ لحقٌ مثلَ ما أنكم تنطقون"

اللهم اكفني بحلالك عن حرامك واغنني بفضلك عمن سواك ....

أما نشوف آخرتها معاكم ....

---------------------------------

أجزاء كتيرة هنا اتكتبت في أوقات ومواقف مختلفة، لحسن حد يقول علي مجنونة، ثانية مبسوطة وثانية متنرفزة

الحمد لله على نعمة العقل

D:

----------------------------------

هو الواحد لما نفسه تهفه على حاجة في نصف الليل ومش لاقيها في البيت، يعمل إيه ؟؟ هيحصل إيه لو نزلت أجيبها ؟؟ :(

----------------------------------

Dr.Soumaya El-Sayed, walahi I love you soOoOo much !! Thank you for being who you are and for giving me hope in my dream again... I was losing it :( ...

ربنا ينفعك وينفع بيك وأبقى زيك كدة يا رب من غير عوائق واللي بدئت من سنتين ونصف تقريباُ (الحمد لله :) ) ... أحبك في الله والله

-----------------------------------

A secondary emotion that typically refers to the negative thoughts and feelings of insecurity, fear, and anxiety over an anticipated loss of something that the person values, particularly in reference to a human connection. It often consists of a combination of presenting emotions such as anger, sadness, and disgust. It is a familiar experience in human relationships !!! From Wikipedia

يا رب استر

هو ليه الواحد لما بيكون خايف أوي يعمل حاجة تزعل حد معين، يلاقي الحد دة عمل الحاجة دي ؟؟ مش واخد باله ؟؟ مش بإيده ؟؟ أنانية ؟؟ حب تملك ؟؟ غيرة ؟؟ أعوذ بالله من الشيطان الرجيم !!! لا تغضب، لا تغضب، لا تغضب !!! أستغفر الله العظيم يا رب ... اهدي ي ي، ما فيش أي حاجة تستاهل !!! أكيد انت مكبرة الموضوع أو فاهمة غلط أو النرفزة والغيرة عامياك ... :( :(

--------------------------------------------

ورقة النتيجة بتاعت بكرة بتقول "الصابرون لهم الجنة" !!! يا رب صبرني ودخلني الجنة :(

---------------------------------------------

بس أنا سألت واحدة بثق فيها أوي لو الموضوع دة ممكن يضايقهم وقالت لأ !! هل الموضوع نسبي ولا عشان هي مش في مكانهم فمش عارفة ؟؟ لا أدري :( لو سألتهم هم، هيقولوا عليَّ هبلة :(

---------------------------------------------

أحيانا ينتاب الشخص نوبة غباء يندم عليها كثيراً فيما بعد :( ... وكانت هذه إحدى نوبات غبائي

--------------------------------------------

بخاف أوي لما بفرح أوي، بحس إن في حاجة غلط أو في مصيبة هتحصل بعدها :( ... يا رب استر، أصلي كنت طايرة من الفرحة ساعتها :) وكل ما أفتكر، الاقي نفسيتي اتقلبت 180 درجة وألاقي نفسي ببتســـــــــم وبسوطة أوي ي ي !!! يا رب استر !!!

--------------------------------------------

Count down ... 45 ... :( :( :(

--------------------------------------------

لما تلاقي نفسك بتقرأ نفس الحاجة اللي حد كتبها كل يوم كإنها جرعة الدواء اللي هيخليك تكمل يومك، اعرف وثق إنك مريض بالحاجة دي فعلاً ... يا رب اشفيني :( ...

---------------------------------------------

Being loved by someone gives you strength, while loving someone gives you courage

يا ترى مين عنده both strength and courage ؟؟؟

----------------------------------------------

الفرق بين الناجح والفاشل مش الذكاء ولا البيئة اللي نشأ فيها ولا الظروف اللي اتحط فيها (مع إن غالبا اللي بيتحطوا في ظروف صعبة، هما اللي بيبقوا أقوى وأنجح والأمثلة كتيــــــــــــرة أوي)، الفرق كمية المحاولات وإمتى الواحد فيهم بيقول "كفاية" ... ناس كتيـــــرة أوي أعرفها طول السنة مش بتفتح كتاب وتيجي اليومين دول ما شاء الله تشد حيلها أوي أوي وتعوض جااامد اللي فاتها وتطلع كمان من الأوائل ما شاء الله الله أكبر!! آه والله، بالذات قسمنا دة اللي الواحد ماعندهوش وقت ينام طول السنة عشان حتى يذاكر (أنا باخد وقت مستقطع من نومي صراحة عشان أكتب هنا وأقرأ الحاجات اللي بحبها اللي مالهاش علاقة بالدراسة، لا تحسبوني بضيع وقت، ههههه، أنا بقلل نومي عشان أقدر أعمل الحاجات اللي بحبها :) ) ....

Albert Einstein said "It's not that I'm smart, it's just that I stay with problems longer"

---------------------------------------------------------------------------------

ما أحلى القراءة المتنوعة ليالي الإمتحانات !! أنا شايفة أعمل حاجة هتفدني باقية حياتي (لو/إن ربنا كتبلي يعني) أفيد :) ...

يقول "جون جراي" في كتاب "الرجال من المريخ النساء من الزهرة" : الرجال نادراً ما يقولون "أنا أسف" لأنها على سطح المريخ تعني بأنك قد ارتكبت خطأ ما وأنك تعتذر !!! (يااااه!!!) ولكن النساء يقلن "أنا أسفة" كطريقة أخرى لقول: "أنا أهتم بما تشعر به" وهذا لا يعني أنهن يعتذرن لارتكاب خطأ ما (اممممم)، والرجال الذين يدركون هذا والذين نادراً ما يقولون "أنا أسف" يمكن أن يصنعوا معجزات إذا تعلموا استعمال هذا الوجه من لغة أهل الزهرة :) . إن أسهل طريق للخروج من مجادلة هو أن تقول "أنا آسف".... كلام مثير حقاً ...

كنت بحسب إن فيا مشكلة عشان بتأسف من كل حاجة حتى لو مش غلطانة وناس كانت تقول لي انت بتتأسفي، يبقى انت غلطانة، وفهمت أخيراً إن دة طبع أنثوي :) ، مع إن في إناث كتيــــرة أعرفها مبتتأسفش إلا بطلوع الروح ! بتحس إنها هتدوس على كرامة نفسها حتى لو كانت غلطانة ؟؟؟

وصلت إلى صفحة 280 من 412 صفحة ... وتستمر القراءة :)

------------------------------------------------------------------------------------------------

To Women As Far As I'm Concerned.. By: David Herbert Lawrence

The feelings I don't have I don't have.

The feeling I don't have, I won't say I have.
The feelings you say you have, you don't have.
The feelings you would like us both to have, we neither of us have.
The feelings people ought to have, they never have.
If people say they've got feelings, you may be pretty sure they haven't got them.
So if you want either of us to feel anything at all
You'd better abandon all ideas of feelings altogether.

Total Lunar Eclipse

مش عارفة ليه أحيانا بكتب العنوان بلغة والموضوع نفسه بلغة تانية، ما علينا

--------------------

ياااااه !!!! حسيت بضآلتي جداً :( ، مش عارفة ليه بخاف أزعل ناس مش قريبة مني أوي على حساب ناس بعزها جدا جدا جدا ؟؟ !! بس أنا أصلا مش متأكدة إذا كانوا بيتضايقوا ولا لأ ... :( :( :( .... ممكن متضايقين بس شايفين إن مالهمش حق يقولوا لي ؟؟ :( :( :( أمسحهم كلهم ؟؟؟ هياخدوا وقت طويــــــل أوي .... يللا، اللي يعز حد ممكن يعمل أي حاجة عشانه :) ..... بس حسيت من اللي غيري عمله فعلا إزاي واحد ممكن يضحي بأي حاجة عشان حد عزيز عليه ويخاف على مشاعره مهما كان موقف الناس التانية ... يا رب اجعل لي في ما أحب نصيب :( :( :(

---------------------

النهاردة الموافق 13 من شهر رجب لعام 1432 هجري (ليلة 14 حيث قمر 14، المفروض بدر منور) حصل خسوف كلي للقمر .. الناس عمالة تقول دي ظاهرة طبيعية !!! طب ماشي، مين أصلا اللي خلق الطبيعة، مش ربنا ، ولا هي خلقت نفسها ؟؟؟ خلاص، يبقى ربنا اللي عمل الخسوف دة لإن مافيش حاجة في الكون بتتم إلا بأمر الله (سامعاني يا فدوى؟؟) وأكيد ما فيش حاجة ربنا بيعملها إلا إذا كان لها سبب (مقتنعة يا فدوى؟؟)، عرفه من عرفه وجهله من جهله .. ومن أسباب الخسوف تخويف العباد بسبب معاصيهم الكتيرة (وأنا لي دور كبيـــــر أوي في الخسوف دة والله، ربنا يسامحني ويعفو عني :( ) ....

المهم، أحب أذكر ما قاله الرسول الحبيب أحمد بن عبدالله صلى الله عليه وسلم عن الخسوف

روى البخاري (1059) ومسلم (912) عَنْ أَبِي مُوسَى رضي الله عنه قَالَ : خَسَفَتْ الشَّمْسُ فَقَامَ النَّبِيُّ صَلَّى اللَّهُ عَلَيْهِ وَسَلَّمَ فَزِعًا يَخْشَى أَنْ تَكُونَ السَّاعَةُ ، فَأَتَى الْمَسْجِدَ فَصَلَّى بِأَطْوَلِ قِيَامٍ وَرُكُوعٍ وَسُجُودٍ رَأَيْتُهُ قَطُّ يَفْعَلُهُ ، وَقَالَ : ( هَذِهِ الْآيَاتُ الَّتِي يُرْسِلُ اللَّهُ لَا تَكُونُ لِمَوْتِ أَحَدٍ وَلَا لِحَيَاتِهِ وَلَكِنْ يُخَوِّفُ اللَّهُ بِهِ عِبَادَهُ ؛ فَإِذَا رَأَيْتُمْ شَيْئًا مِنْ ذَلِكَ فَافْزَعُوا إِلَى ذِكْرِهِ وَدُعَائِهِ وَاسْتِغْفَارِهِ ).

يعني لازم الذكر، والدعاء والاستغفااااار

أنا كنت بحسب إن لازم لو الواحد عاوز يصلي، يصلي في المسجد أو في جماعة، بس طلع إن ممكن أصلي في بيتي لوحدي (كأنثى يعني) ... بس، فالحمد لله النهاردة صليت أول صلاة خسوف لي في حياتي مع نفسي في البيت (ويا رب تكون آخر صلاة خسوف، يا رب ارحمنا برحمتك :( :( :( ) ....

صفة الصلاة بسيطة أوي، عبارة عن ركعتين، كل ركعة فيها ركوعين وقراءتين وسجدتين .... أنا لما قرأت وأنا بدور على صفتها، حسيت إني مش فاهمة حاجة، ركوعين وقراءتين في كل ركعة ؟؟؟ أقول لكم هي إزاي ....

تكبر وتقرأ الفاتحة وسورة طويلة (الرسول كان بيقرأ البقرة !!!!!!)، بعدين تركع وتطول في الركوع وتسبح فيه كتيـــــــــــر أوي ي ي ، بعدين ترفع من الركوع وتقرأ الفاتحة تاني وسورة طويلة (الرسول كان بيقرأ آل عمران!!!!)، بعدين تركع تاني وتطول بردو في الركوع بس أقصر من الركوع الاولاني، وترفع وتسجد سجدتين طواااااااال تدعي فيهم برحمة ربنا والمغفرة، بعدين تكرر دة في الركعة التانية بس تقصر من الصور شوية (الرسول قرأ النساء في أول قراءة، والمائدة في ثاني قراءة !!!!) وتقصر بردو شوية من مدة الركوعين والسجدتين ... بس كدة

ربنا يتقبل مننا يا رب ويرفع مقته وغضبه عننا :( ... اللهم ردنا إليك رداً جميلاً :( .... اللهم إنك عفو كريم تحب العفو فاعف عنا :( .... يا رب سامحني، أنا مقصرة في كل حاجة :( :( :( ... يا رب، يظن الناسُ بي خيراً وإني ** لشرُ الناس إن لم تعفو عني :( :( :(

يا رب انصر الإسلام وأعز المسلمين واحقن دماءهم :( :( :( ودمر بشار المستأسد الحقير وحسن نصر الشيطان الخبيث بتاع حزب إبليس ..... يا رب انتقم من الروافض وكل أعداء الدين ... آميــــــــــــــــــــــــــــــــــــــن

ليه ؟؟

Being older than me does NOT give you the right to disrespect me and being younger than you does NOT force me to excuse your dirty actions and tongue

--------------------------

وَقُل لِّعِبَادِي يَقُولُواْ الَّتِي هِيَ أَحْسَنُ إِنَّ الشَّيْطَانَ يَنزَغُ بَيْنَهُمْ إِنَّ الشَّيْطَانَ كَانَ لِلإِنْسَانِ عَدُوّاً مُّبِيناً [الإسراء : 53]

--------------------------

Why do I have to learn everything the hard way ?? why ?? :(

هي ليه الناس كلها الثمن اللي بتدفعه لأخطاؤها وإن كانت عظيمة بيكون بسيط جدا وأنا أخطائي وإن كانت صغيرة بدفع لها ثمن غالي أوي أوي ؟؟

هي ليه الناس بتنسى أخطاؤها وبتكمل حياتها عادي وأنا أخطائي بتفضل أدام عينيا طول الوقت ومش مخلياني أعرف أكمل ؟؟

هي ليه الناس لما بتديها مجال للكلام بتتعدى خطوطها مع إن الناس كلها بتكون عارفة المفروض تتكلم معاك إزاي بس بردو في ناس بتتعدى الخطوط الحمراء ؟؟

هو لو حد أذاك بالكلام فهل دة معناه إنك تستحق الكلام دة فعلا وهو شايف كدة أكتر منك وإنك مش محترم ولا عشان هو انسان مش كويس فبيغلط فيك ؟؟ هل تستحق غلطه ولا هو أخلاقه سيئة وانت كويس ؟؟ ولا ممكن الاتنين، انت سئ فربنا بعت لك واحد سئ يقول لك كدة ويجرحك ؟

ياااااه، ليه الواحد بيحتاج 5 سنين عشان يكتشف معدن الناس وأنا معدني بيبان من أول اسبوع تعامل ؟؟ آه والله، كل الناس اللي أعرفها بدون مبالغة بتقول لي إني لم أغير تعاملي ولا كنت قناع لما عرفوني، زي ما أنا، ممكن أول مقابلة بكون مختلفة (عشان ما اتحطوش معايا في مواقف لسة) بس بعد كدة، ببقى زي ما أنا، ما حدش بيحتاج عشرمائة سنة عشان يعرفني ولا يكتشفني

ليه اللي في قلبي على لساني واللي في عقلي بيبان في تصرفاتي من أول كام يوم تعامل والناس كلها ما بتظهرش إلا بعد سنين ؟؟ واللي بتظهر عليه بيكون غير خااالص اللي قعدت سنين مورياه ... يعني الواحد لازم يقعد 5-6 سنين قبل ما يقرر إنه خلاص هيصاحب حد ولا هيعيش معاه ؟؟

هل صح إني ما أحكمش على حد من تصرف واحد حتى لو التصرف الواحد دة كان قاتل ومدمر ؟؟ أجيب عذر منين ؟؟

هل الناس هي اللي غريبة ولا أنا اللي شايفاها غريبة ؟؟

خلاص، أنا مش عاوزة أعرف حد جديد، كفاية عليا اللي بعرفهم واللي لسة بكتشف فيهم حاجات

يا ريت يخرجوا من حياتي للأبد وأنسى كل كلام أتقال في أي وقت يا ريت يتمسحوا من ذاكرتي خااالص، يا رب الحتة اللي في ذاكرتي اللي تعنيهم تتمسح خالص ... بجد أنا مصدومة

حسبي الله ونعم الوكيل، الواحد مش ناقص وجع ولخبطة، يا ريت الناس تعيش معايا في سلام أو تسيبني في حالي أعيش لوحدي ... يا رب

ربنا أرحم مما نتخيل

معلش، أنا مش هقدر أستنى لحد 11 أو 12 بالليل D:، لسة جايلي خبر جميــــل أوي ما شاء الله

سبحان الله، حاجة كنت شايلة هم إنها احتمال كبير أوي تحصل بعد 3 أسابيع تقريبا وخايفة منها بس الحمد لله خوفي ما وقفنيش، كملت عادي وقعدت أدعي ربنا جامد أوي أوي في كل وقت وحين مع إن أصلا كان تقريبا ما فيش منها مفر

بس سبحان الرحيم الرحمن اللي عمره ما تخلى عني ولا سابني، لسة دلوقت حالا عارفة إن خوفي دة ما كانش ليه أي داعي (أو ممكن كان ليه داعي عشان هو اللي دفعني أدعي ربنا لحد ما الغمة انكشفت وأتذلل إليه :) ) وعرفت إن إن شاء الله ما فيش حاجة هتحصل واللي كان نفسي يحصل، هيحصل بالظبط

يا رب أدم عليا نعمتك والحاجة دي ما تحصلش أبدا (ومش بس مش بعد 3 أسابيع)

طب انتم مالكم بالكلام دة ؟؟ هو لازم كل ما تحصل لي حاجة سيئة أو حلوة تعرفوا ؟؟

أقول لكم، أولا this is my personal online diary فطالما انتم بتقرأوا، فانتم متقبلين إني أكتب أي حاجة وحابين تعرفوا إيه اللي بيحصل لي أو بتحاولوا تفكوا شفراتي ;)

ثانيا ودة الأهم بقة، إن إوعى إوعى إوعى تفقد الأمل ولا تقول خلاص، حتى لو مثلا كان في حد جاي يقتلك والسكينة على رقبتك، يعني بينها وبين رقبتك سانتي واحد، بردو خليك مطمئن وواثق في الله ولا تكف عن الدعاء والأمل ... والله بيكون امتحان من ربنا عشان يشوفك هتتصرف إزاي وحاول قد ما تقدر تتصرف صح عشان ربنا يعوضك بحاجة أحلى مما كنت تتمنى :)

الموقف دة فكرني بقصة جميلة أوي أثرت فيا قرأتها من فترة

كان في واحدة عصبية جدا :) اتجوزها واحد هادي جدا جدا

المهم، كل ما يحصل لهم موقف صعب، تلاقيها قاعدة بتزعق أو تعيط أو خايفة وهو قاعد مبتسم ولا في باله

مرة من المرات كانوا في سفينة والامواج بدءت تمطوحها يمين وشمال ورعد وبرق وماء بدأ يدخل السفينة وهي طبعا كعادتها شايلة الهم ومرعوبة وقاعدة بتزعق ومش عارف إيه وهو قاعد مبتسم (منظر مستفز صراحة :)) ) .... المهم، راحت له بقة وقالت "انت إيه ؟؟ كل مرة يحصل حاجة تفضل كدة قاعد وما تعملش حاجة وأن اللي أشيل الهم لوحدي"؟؟ راح بهدوء شديد جاب سكينة وحطها على رقبتها وسألها "مش بتزعقي ليه ؟؟ مش خايفة مني؟" .... قالت له"طبعا لأ" ... سألها "اشمعنا" ؟؟؟ ردت "عشان أنا متأكدة إنك بتحبني وعمرك ما هتؤذيني" .... قال لها، "أنا كمان متأكد إن ربنا بيحبنا وبيحب لنا الخير ومش هيضيعنا أبدا عشان كدة بكون هادي ومطمئن وشيل الهم مش بيجيب نتيجة" ...

ما أعرفش بقة إذا كانت هي اقتنعت وبطلت تشيل الدنيا على راسها ( :) ) بس أنا صراحة اتأثرت بالقصة أوي لما قرأتها وكل ما يحصل لي موقف، أفتكرها وأحاول أهدى وأبتسم كدة وأثق في اختيار الله ليا

اللهم خير لي فاختار لي فإني لا أحسن الاختيار

اللهم دبرلي أمري فإني لا أحسن التدبير

الفراق الجميل

النهاردة كان آخر يوم لينا في فصل 203 :( بعد 3 سنين من الفرح والحزن والزهق والفرفشة والخناقات والإتفاقات ... خلاص، مش هنجتمع في أي حتة تاني أبدا :( كل حاجة هتوحشني، كل التفاصيل الدقيقة .. هيوحشني إحساس الزهق وأنا قاعدة مش فاهمة حاجة بتتقال والناس بتتفاعل مع الدكتور أو المعيد، هتوحشني أسئلة الناس ومداخلتها العبقرية ما شاء الله وإحساسي بالبلاهة وإني لا أنتمي للقسم دة، هتوحشني السبورة والطباشير والمساحة ... هتوحشني طرابيزتي اللي مليانة smilies و fido وخواطر ورموز غامضة (نسيت أنظفها :) )، هتوحشني المروحة اللي بتطلع صوت، هتوحشني الكراسي اللي بتقطع الهدوم، ومادام الجماد هيوحشني، أكيد كمان الناس هتوحشني ... وداعاً دفعة 2011، وداعاً

-----------------

سبحان الله، كل ما حد يفتح لنا موضوع الشغل والماجستير والحياة المجهولة اللي مستنيانة، أقعد أفكر وأحس إني مش عارفة هيحصل لي إيه ولا الحياة هتاخدني لفين، وكالعادة الحمد لله، ربنا بعت لي رسالة أول ما فتحت الإمايل

"Accept responsibility for your life. Know that it is you who will get you where you want to go, no one else." AMAAAAZING :) :) :)

-----------------

------------------

عندك حق يا ميمي، لو تراب الأرض قال "لأ" وربنا قال "آه"، أكيد هيبقى "آه" .... يا رب :)

----------------

رُبَّمَا تَجْمَعُنَا أَقْدَارُنَا *** ذَاتَ يَوْمٍ بَعْدَمَا عَزَّ الِّلقَاءْ
فَإِذا أَنْكَرَ خِلٌّ خِلَّهُ *** وَتَلاَقَيْنَا لِقَاءَ الغُرَبَاءْ
وَمَضَى كُلٌّ إِلَى غَايَتِهِ *** لاَ تَقُلْ شِئْنَا! فَإِنَّ الله شَاء

----------------

ممكن يكون فراق مؤقت وهناك موعد للقاء ....

إهداء، إلى من شغلن في قلبي مكاناً، وملأن أيامي أنغاماً وألحاناً ...

"للشاعر الإماراتي: كريم معتوق"

لا أحملُ العُقَد القديمةَ

فالسلامُ على ضياعكِ من دمي

سكتَ الكلامْ

فلتأذني لي مرةً أخرى لأعُلنَ سرَّ غربتنا

وسرَّ حكايةٍ عبرتْ موشحةً بأغطيةِ الظلامْ

قالوا حرامْ ..

فقلتُ إنْ نبقى حرامْ

حزنٌ يجرُ الحزنَ

يأسٌ دائمٌ خوفٌ

عذابٌ مُنتقى ، زيفٌ

وألوانُ الكآبةِ بانسجامْ

لا تنتهي قصصُ الهوى دوماً

بوردٍ أحمرٍ أو أبيضٍ

أو غصنِ زيتونٍ وأسرابِ الحمامْ

نحن ارتضينا قصةً أُخرى

فراقٌ رائعٌ

لا ينحني للشوقِ والذكرى ، ويقبلُ بالملامْ

نحن ابتدعنا غربةً كُبرى

وصلينا صلاةَ الهجرِ

كانتْ حفلةً كُبرى وكنتُ بها الإمامْ

واتفقنا ..

قبلَ هذا اليومِ لا أذكرُ أنْ نحن اتفقنا

غيرَ أن نُمعن في قتلِ هوانا المستهامْ

وتراضينا على النسيانِ

أنجبنا حنيناً ميتاً

قومي ..

ركامُ اليوم يستدعيكِ أن تأتين تابوتاً

ركاماً أو حطامْ

لا صدرَ بعد اليومِ يحضننا

ولا كفٌ إذا ما لامَسَتْ كفاً

تنامي دفءُ ملحمةٍ وأسرارٍ

يُهدهدها الوئامْ

قومي ..

تبلدتْ المشاعرُ والكلامُ له فطامْ

نحن اصطفينا عنفَ خيبتنا

وجارينا البرودةَ في مشاعرنا

وأبرمنا عقودَ الهجرِ حتى تنتهي الدنيا

ويلفظنا الأنامْ

واشتبكنا ..

لا نرى فَجر خلاصٍ

فهوينا للأعالي

كقتيلينِ على الأفق ننامْ