النهاردة اقتنعت إن أغلب الحاجات اللي بتبهر ناس كتيرة ، ما بتستحقش الإنبهار .... وإن كل الأشخاص اللي الناس بتقعد مبهورة بيهم أوي وتتكلم عنهم كإنهم تماثيل ، لو قربت منهم تلاقيهم ولا حاجة .... زي تمثال مجوف مرشوش بذهب ، من بعيد بيلمع والناس كلها تحلم بيه ، ولو حد فعلاً وصل له ، يلاقيه فاضي من جوا أو ممكن أوي ماليان حاجات مقرفة ....
ليه لازم أواكب الناس في موضوع "واو" لما أشوف اللي بيبهرهم هم ولما أقابل التمثال بتاعهم ؟؟؟
أغلب الحاجات اللي الناس بتعمل عليها ضجة ، بتكون ولا حاجة ، والحاجات المستخبية بخجل هي اللي بتستحق المدح ....
أغلب الحاجات اللي الناس بتعمل عليها ضجة ، بتكون ولا حاجة ، والحاجات المستخبية بخجل هي اللي بتستحق المدح ....
زيي ، وزيهم ، وزي دول كمان ... أيوة ، احنا الثلاثة اجتمعت فينا نفس فكرة انبهار الناس واحنا في الآخر ولا حاجة .... هل عشان أنا "خواء" قابلت اللي "خواء" زيي ؟؟ طب أنا ذنبي إيه ؟؟؟ أنا جيت من خواء ونشأت في خواء ....
في ناس أعرفهم أوي تقريباً ما حدش عارفهم ولا كان اسمهم مشهور ، ولكنهم فعلاً يستحقوا المدح (وحشاني يا مي مي) .... وناس الكل عارف اسمهم وبيمدح فيهم ويتمناهم ومش شايف إن في زيهم (بكره المظاهر ، بكرهها !!! ) ، ولما أنا عرفتهم ، وكسرت الغلاف الذهبي الزائف ، وصلت للفراغ أو للخراب .... ناس كبيرة في الظاهر بس فاضية كدة زي زبد البحر .... رغوة رغوة رغوة ....
