فهم النفسيات

من كام شهر ، واحدة صاحبتي من سي إس دي 2009 طلبت مني أجيب لها كتب من برا مصر وأنا نسيت خااالص :))) ... المهم بقة ، حصل بيني وبينها كلام تاني من قريب وببص كدة في ال conversation history ، لاقيت طلباتها :))) ولاقيت إني أنا اللي محتاجاهم :))) .... المهم، بما إن الناس للأسف بعدت خالص عن القراءة وكتير صراحة بكون عاوزة الخلاصة بتاعت حاجة ، يعني تقول لي مثلا "طرق عملية للتخلص من التوتر" وتديني مُجلد ، أنا عمري ما هفتحه لو حتى فيَّ توتر الدنيا، لكن لو سمعتني محاضرة ولو حتى لمدة ساعة عن الموضوع دة ، أو ادتني نقط (واحد ، اتنين ، تلاتة) ، هتبسط أوي وهطبقهم ...

دورت على النت عن كاتب الحاجات اللي هي كانت طالباها ، للدكتور جاسم المطوع (كويتي) ولاقيت له محاضرات .... سمعت أول محاضرة حسيتها أهم حاجة عن "فهم النفسيات بين الزوجين" وكعادتي لما أقرأ أو اسمع أي حاجة ، كان عندي ورقة وقلم على جنب عشان أسجل الحاجات اللي عجبتني أو الحاجات المفيدة ....

المهم ، الحاجات دي نفسها مكررة في كل مكان تقريبا (الرجال من المريخ والنساء من الزهرة ، المرأة البحر والرجل المحيط (كتاب أكتر من 300 صفحة ومش راضي يخلص :)) ) ، أنا عارفة العبرة مش بالتخليص ، ولا بالقراءة ، ولا بالإستماع ، العبرة بالتطبيق ، بس الواحد عشان يطبق لازم يكون عنده علم وأنا شايفة لما الواحد يقرأ نفس الحاجة من كذا مصدر بطريقة مختلفة وتعمق شوية ، ونقط شوية ، إن شاء الله لما يحتاج الحاجات دي ، هيلاقي عقله لا إراديا بيطلع الحاجات اللي كان بيغذيه بيها ، بإذن الله يعني، المهم بقة ، الميزة إني حسيت محاضرة الدكتور to the point أوي ومش عمال يكرر على الفاضي عشان يبقى اسمها أدى مادة طويلة وخلاص ، زي كتير من المؤلفين للأسف ....

الناس الغريبة اللي بتقول إن المرأة مهانة في الإسلام (هيبقى لي حديث مطول إن شاء في المستقبل عن الخزعبلات دي) ، ومُستعبدة ومحسسين الواحد إن في الغرب بس أو في أي ديانة تانية غير الإسلام  المرأة مُكرّمة ودة العكس خاااالص ، اسمعوا الحديث دة : روى أبو هريرة رضي الله عنه في الحديث الصحيح أن الرسول صلى الله عليه وسلم قال : (( استوصوا بالنساء خيرا ؛ فإن المرأة خلقت من ضلع ، و إن أعوج شيء في الضلع أعلاه ؛ فإن ذهبت تقيمه كسرته ، و إن تركته لم يزل أعوج ؛ فاستوصوا بالنساء خيرا )) 

خلوا بالكم إن الرسول كرر وصيته مرتين في نفس الحديث لأهميتها :) ، فأي راجل مسلم بيعمل غير كدة بقى ، هو اللي لا يتبع الإسلام في النقطة دي ، والإسلام منه برئ  :)  ، ربنا يعافينا ويعافي بنات المسلمين ....

 

نقطة مهمة إن ربنا خلق آدم عليه السلام من تراب (حفنة من الأرض) لكن حواء خلقت من ضلع آدم (ومش من رجليه :)) ) ، فنحس فعلا من نفسية كل واحد وتصرفاته وتفكيره ، إنها ترجع لطريقة خلقه ...

صحيح أنا اختلفت مع الدكتور في حبة حاجات ، بس هكتب اللي قاله ، ممكن غيري يشوفه صح ... والدكتور أكد إن الموضوع دة بردو يختلف باختلاف نشأة الواحد ، يعني لو واحد نشأ في بيت لقى فيه أبوه بيعامل مامته بطريقة معينة ، هيكون عنده قابلية عالية لإنه يعامل مراته بالطريقة دي ، ويجب أن يصحح مفاهيمه إن كانت خاطئة وإذا كان يبحث عن السعادة بجد .....

- المرأة تثبت نفسها بالإعتماد على الرجل وتعبر عن نفسها بالكلام قبل الفعل ولكن الرجل يثبت نفسه بالإعتماد على نفسه عملياً عن طريق الإنتاج والأفعال ... يعني ممكن واحدة تقول "زوجي لم يقل لي أبدا أنه يحبني" وهو يصر أنه يحبها ب"ألم أحضر لك كذا وكذا ؟؟ ألم أفعل كذا؟؟ أليس هذا دليلاً كافياً؟" ، هو يعبر عن حبه بطريقة مختلفة عما تحتاجه المرأة .... هي تنتظر الكلمات وهو يثبته بالأفعال ... طبعا دة لا يمنع إنه يعمل ، ما يكونش بتاع كلام بس ، لكن ما تكونش حياته كلها أفعال ، يفتكر إن الكلام "عنها لها" بيكون مهم بالنسبة للمرأة ....

الرجل لما بيتكلم ، بيكون فكر خلاص قبل ما يطلع الكلام ، فكلامه بيكون حل أو قرار لكن المرأة لما تتكلم ، بتكون بتطلع اللي جواها (بتفكر بصوت عالي بمعنى أدق أو بتعبر عن مشاعر بتشاركه فيها) ، لكن الرجل بياخد كلامها على إنه اتخاذ قرار أو بحث عن حل للمشكلة ... أول مثال لو واحدة بتقول "إيه رأيك نسافر؟" ، "تحبي يكون فين؟" ، "نفسي في حتة فيها شلالات ومناظر طبيعية ، زي نياجرا مثلا" ودخلوا في موضوع تاني ، جت اليوم اللي بعده لاقيته جايب تذكرتين لكندا :)) هي هتتضايق أوي ، "احنا لسة ما اتفقناش على حاجة!" "بس انت اتكلمت عن نياجرا، فأنا قلت انت عاوزاها" !!!!   :))) 

المثال التاني : هي بتتكلم عن مشكلة "النهاردة فلانة كلمتني وحصل كذا كذا " وهي لسة بتتكلم هو يقاطعها "أنا شايف إن أمامك ثلاث حلول " ويبدأ يتكلم عن كل حل ، هي تتنرفز لإنه : أولاً ما خلهاش تتكلم للآخر ، وثانياً هي مجرد بتطلع اللي جواها ، مش عاوزة حل ، وهو مسكين شايف إنه ساعدها لإنه جاب لها الحل بسرعة قبل ما تخلص حتى :)))

هي تظن أن كلامه لها مجرد مناقشة وتفكير بصوت عالي وهو يظن أن كلامها قرارات نهائية  :))))

هو يخرج ما بداخله عن طريق التفكير الصامت وهي تخرج ما بداخلها عن طريق الكلام بصوت مسموع :)))

- المرأة تستخدم الجزء الأيمن من المخ : العاطفة ، الخيال ، الأبداع ، التناسق ، الذوق :)  ، الرجل يستخدم الجزء الأيسر : الأرقام ، التحليل ، الترتيب ، القرارات ، التخطيط ....

بس في صمام بين الجزئين ، والصمام دة أوسع عند المرأة ، لأنها أفضل مخطط ومدير للبيت وقراراته :) .... لكن الرجل لا يستطيع إدارة أعمال البيت أبداً ... في الشغل ممكن يكون أفضل مدير ، لكن مش في البيت ....

- المرأة تنظر في تفاصيل الموضوع ، لكن الرجل ينظر للموضوع نظرة عامة بشكل كامل ... يعني المرأة  تحب مدح تفاصيل الترتيب في الغرفة ، تفاصيل الأكل ... هو يقول لها "الأكل حلو" ، هي مستنياه يقول "الفراخ المرة دي أحلى من كل مرة ، عملتيها إزاي؟" ، عاوزاه ياخد باله من التفاصيل ، لإن ممكن أوي الأكل كله أخد منها ساعتين ، ساعة ونصف منهم كانت للفراخ بس !!! :)))  الراجل لا يهمه البيت اترتب إزاي ولا إيه اتغير مكانه طالما هو مرتب ، لكن المرأة تهتم بالطريقة التي وصل إليها والتغيرات التي حدثت لكي يصل إلى صورته النهائية ....

- الرجل يحتاج وقت وجهد أكتر من المرأة لإجماع عواطفه وإخراجها ولا يحب أن يشعر بالضعف ويظن أنه أصبح ضعيفاً إذا أخرجها (بيحب يبان صلب على طول) !!!... وينسحب بعد أن يظهرها ليستجمع قواه ثم يعود .... 

افتكرت مقولة لمحمود درويش "لن أسميك امرأة ، ولكن سأسميك كل شئ" :)

النقطة دي بقى مهمة أوي ي ي، لإن في قرارات كتيرة بتتاخد في الوقت دة وشرعاً القرارات دي غير واقعة، يعني سبحان الرحيم الذي رحم المرأة في أضعف فترة لها !! 

- المرأة تمر بتغيرات حادة جدا جدا جدا جدا (ومرة كمان : جدا :) )  في النفسية ، بسبب تغيرات الهرمونات أو بسبب الحمل والولادة ، ويجب على الزوج أن يرفق بها ويراعيها بالقول والتسامح والمساعدة المعنوية أثناء هذه التغيرات ويجب أن يقدر هذه الظروف والتقلبات النفسية ، التي ليست بيدها ... كالرسول محمد صلى الله عليه وسلم مع حبيبته عائشة رضي الله عنها حين تكون في تلك الظروف كان ينتظر حتى تشرب ليضع فاه الشريف مكان فاها ويشرب مكانها تدعيما نفسياً لها !!!! هو صلى الله عليه وسلم وراه مسؤولية الأمة كلها وحمل رسالة ثقيلة جدا لكن لم يمنعه ذلك أن يرفق بزوجته ويظهر ذلك لها !!!.... والرجالة دلوقت تكون يا دوب مسؤولة عن شغلها بس ويقول "مش فاضي" ، "مش واخد بالي" إلا من رحم ربي .... فداك نفسي وروحي ودمي يا حبيبي يا رسول الله :(( ...

وتقولوا الإسلام بيهين المرأة !!! شوفوا الديانات التانية بتعاملها إزاي أثناء الفترة دي والعبوا بعيـــــــــــــــــــد :) ...

الحمد لله على نعمة الإسلام :) ، عنده حل لكل مشكلة بس عشان احنا بعدنا عنه أوي أوي وبقى بس عبارة عن قول "لا إله إلا الله" وحاجة مكتوبة في شهادة الميلاد والسلام ، من غير أي عمل حتى للواجبااااات (لسة ما دخلناش في السنن)، بقى حالنا يبكي دم :(((  ....

مسلمة وأفتخر :)