واحدة صاحبتي قالت لي حاجة قبل كدة وكنت بحسبها بتبالغ بس طلع عندها حق أوي ، ربنا يهدي لها زوجها وعيالها ويجعلهم قرة عين لها ويجمعها بيهم وبي في الجنة ... آمين ...
قالت لي " لما تتخانقي مع حد من اخواتك إوعي في لحظة غضب تذكريه بسوء أمام أحد ، أو تحسسي حد إنك مش مهتمية بيه " ... فعلا ، الواحد لما يلاقيك مش محترم حد من أهلك أو صحابك ولو في ساعة غضب، بيحط لنفسه عذر إن هو يطعن فيه ، يبقى انت اللي خليت اللي بتحبه يبقى سيرةعلى أي لسان ...
لو حد شتم واحد صاحبك بتعمل إيه ؟؟؟
أكيد بتتضايق وبتحاول تدافع عنه وتبين كل الحاجات الحلوة اللي فيه ... ولو تطول كمان تعمل زي صاحبك في حاجات كتيرة عشان تقنع الناس وتبين لهم قد إيه صاحبك دة راجل كويس ....
طب لو حد عمل عن مامتك أو باباك فيلم إباحي ، هل هتسكت ؟؟ طب بلاش ماماتك وباباك عشان شايفاك بدأت تتنرفز ... خليه واحد صاحبك ، لو حد عمل عنه فيلم إباحي ، هتسكت ؟؟
طب لما ناس لا تنتمي للبني آدمية عملوا فيلم إباحي عن رسولك ، عملت إيه ؟؟
ولا حتى ناوي تعمل إيه ؟ ولا الموضوع مش فارق معاك ؟؟
متضايق ؟؟ مش انت السبب ؟؟ مش انت اللي كنت كل ما حد يكلمك عن حاجة يا إما تقول "فيها خلاف" أو "يا عم دي سنة" !!! ؟؟؟ مش انت اللي فرطت في السنة ؟؟ لم توقرها ولم تعطيها قدرها ولم تحترم أقوال ولا أفعال نبيك وانت بتدعي إنك بتحبه وبتحب ربنا (نسيت لما ربنا قال " قُلْ إِنْ كُنْتُمْ تُحِبُّونَ اللَّـهَ فَاتَّبِعُونِي يُحْبِبْكُمُ اللَّـهُ وَيَغْفِرْ لَكُمْ ذُنُوبَكُمْ والله غَفُورٌ رَحِيمٌ " ، متضايق ليه بقى لما واحد مش بيحبه يشتمه ؟؟
انت السبب ....
فداك أبي وأمي ونفسي ودمي وكل ما أملك أو سأملك يا حبيبي يا رسول الله ، صلى الله عليك وسلم ... :(
الدفاع عن اللي هيشفعلك يوم القيامة واللي وصل لك الدين الحق مش عن طريق حرق أعلام ولا قتل سفراء ولا حبة شعارات وتغير صور بروفايلات ، لا لا لا ، انت كدة بتلعب وكسلك وصل أبعد حدود ... الدفاع عنه وعن سنته يكون عن طريق معرفتها والتمسك بيها والدعوة إليها ...
الدفاع عن اللي هيشفعلك يوم القيامة واللي وصل لك الدين الحق مش عن طريق حرق أعلام ولا قتل سفراء ولا حبة شعارات وتغير صور بروفايلات ، لا لا لا ، انت كدة بتلعب وكسلك وصل أبعد حدود ... الدفاع عنه وعن سنته يكون عن طريق معرفتها والتمسك بيها والدعوة إليها ...
يا ترى انت قرأت قد إيه من سيرة الرسول ؟؟ غزواته ؟؟ أخلاقه ؟؟؟ رحمته ؟؟؟ حلمه ؟؟؟ تعاملاته مع غير المسلمين ؟؟؟ تعاملاته مع النساء والأطفال والشيوخ ؟؟؟
ما انت هتدافع عنه إزاي إذا ما كنتش تعرف أي حاجة عنه غير إنه رسولك ؟؟؟
حافظ عنه كام حديث ؟؟ عامل كام حاجة من سنته ؟؟ بتكسل أو بتتكسف تطبق سنته ؟؟؟
اسأل نفسك الأسئلة دي وهتعرف إن انت السبب في اللي حصل ، لو كان غالي عليك بجد ما كانش الوضع وصل لكدة ..
يا رب سامحني على تقصيري الشديد واجعلنا نفوق قبل فوات الأوان ... يا رب استعملنا ولا تستبدلنا وعرفنا حقيقة حقارة الدنيا وإنها كام يوم وهتنتهي ... يا رب يكون أسمى أمانينا الدفاع عن شريعتك .... أنت ورسولك في غنى عنا ، وكلام الأوغاد لن ينقص من ملكك ولا من مكانة حبيبك محمد صلى الله عليه وسلم شئ ، ودفاعنا لن يزيد من ملكك ولا من مكانة الحبيب أحمد شئ .... ربنا مش مستني نصرنا ليه ....
No comments:
Post a Comment
comments are always welcomed :)