كان يا ما كان
كان في ألم مالوش عنوان
عمال يدور في كل مكان،
على حتة يحس فيها بأمان ...
جرب يعيش مع ناس كتير
مع الصغير ومع الكبير
بس لقاهم بييأسوا على طول،
عشان كدة كمل تدوير ...
فجأة جت له فكرة خطيرة
مش هيدور سنين كتيرة
لقى واحدة واستأمن نفسه عليها،
ودي كانت بداية الخطة الكبيرة ...
مسك فيها وقال مش هسيبك
وهتحاربي كتير، ما أنا عارفك !
وهتقولي أمل ويقين وحاجات،
بس في الآخر اليأس هيقتلك ...
بدئت تكبر وهو معاها
ديماً قاعد وماشي وياها
ومافيش فرحة معاها بتكمل،
والأحزان لبعيد واخداها ...
عاشت حياتها في حزن شديد
وكل مدى الألم يزيد
بس شافت نور من بعيد،
مرة تحسه خيال، ومرة تحسه أكيد ...
الدنيا ماشية وحياتها واقفة
مش عارفة تكون معارضة ولا موافقة
الناس حياتها بقى لها قيمة،
وهي حياتها فضلت تافهة ...
بعدين يأسِت زي ناس كتار
وقالت الحزن خلاص هينهار
بس لاقيته ماسك فيها،
مع الألم ليل ونهار ...
قالوا بردو اصمدي، قالت هجرب
بس لاقيت الخير منها بيهرب
وهي تايهة والأمل بيبعد،
ومنها النهاية قاعدة بتقرب ...
ومنها النهاية قاعدة بتقرب ...
No comments:
Post a Comment
comments are always welcomed :)