يا رب سامحني
-------------------------------------
أنا فعلا كرهت البلوجر .... فجأة مسح كل التعليقات اللي كانوا صحباتي حطينهالي على البوستس اللي بكتبها !!!!!!!!!! نفسي أبعت شكوة لجوجل .... أنا فعلا متضايقة
-------------------------------------
أصعب 3 أيام عدوا عليا في حياتي بدون مبالغة خلصوا الحمد لله ..... مش شرط الواحد يقلب الصفحات القديمة عشان يعرف يبدأ واحدة جديدة، أحيانا لازم يقطع الصفحات القديمة ويحرقها وينثر رمادها في البحر
-------------------------------------
الحمد لله
--------------------------------------
أحيانا بيكون عدم وضع هدف أحسن من وضع هدف وعدم الوصول إليه وأحيانا عدم العمل أحسن من العمل وعدم تحقيق أي شئ
--------------------------------------
كل اللي بيحصل عادي جدا ومتوقع أوي ... مش شرط كل حاجة عاوزاها تحصل .... يا رب ما أكونش فشلت في الأربع امتحانات اللي اتحطيت فيهم ال3 أيام دول
-------------------------------------
أعمل إيه لما كل أما أمشي في الشارع أفتكر لما كنا بنمشي فيه سوى، كل أما أجيب حاجة ساقعة من السوبر ماركت وعيني تقع على شويبس بطعم اليوسفي أو ويندوز أو جوليو أو كورن فلايكس وألاقي دمعتي لا إراديا نزلت على خدي وألاقي نفسي بجيب الحاجات اللي كنت بتحبيها حتى لو مش هاكلها ؟؟؟؟ مين يسليني وأنا قاعدة في المشروع ؟؟؟ مين يتخانق معايا على أتفه الحاجات ؟؟؟ مين يصالحني على طول ؟؟؟؟ مين بستمتع بكل لحظة معاه غيرك ؟؟؟ مين ؟؟ مين ؟؟؟
-------------------------------------
وخير صديق في الحياة كتاب
--------------------------------------
كثير أوييييي بتكون الوحدة أحسن ألف مرة من الوجود بين الناس بس بردو أحيانا بحس إني عاوزة أقعد في مكان دوشة وزحمة حتى لو ما أعرفش فيه حد
-------------------------------------
أسوأ حاجة لما تكلم حاجة انت عارف إنها مش سامعاك والأسوأ من كدة لما تضايق إنها مش بترد عليك
------------------------------------
أحيانا بحس إني ما أنتميش للعالم دة ولا للناس دي خالص وبحس إني وحيدة أوي مع إن الناس كلها تقريبا بتحب تكلمني الحمد لله ... بردو كتير أوي ببتسم في وجه الناس وأقعد أفرحهم وأنا أصلا بكون أحزن واحدة فيهم ... بحس إني بمثل، بس ما يهمنيش طالما في ناس بتتأثر إيجابيا بالتمثيل دة الحمد لله .... على الأقل بحاول أخلي غيري يوصل للي أنا مش عارفة أوصل له
----------------------------------------
هو دة القدر ولازم أرضى بيه .... مش عارفة إيه اللي ممكن يحصل يوم السبت ، بس يا رب اليوم دة يعدي على خير ... مش خايفة بس قلقانة
5 comments:
فدوى :(
كلامك فظيع بجد
وجاي في وقت غريب اوي
ربنا يعينك
ادعيلي محتاجة دعوتك
:(:(:(:(
شيمو حبيبة قلبي
ربنا يسهل لك كل عسير
من عيوني يا حبيبتي
ربنا يقويك يا رب ويحقق لك كل اللي نفسك فيه
معلش، أيا كان السبب، الأيام كدة، يومين عليك (أحيانا بيكونوا 3-4 أيام ) ويوم ليك
ربنا يزود الأيام اللي لينا ويبارك فيها يا رب
معلش يا شيمو، الواحد لازم يكون أقوى من أي حاجة تحصل
what doesn't kill me makes me stronger
واللي بيتعرض لمشاكل وصعوبات وعقبات في حياته بيطلع أقوى بكتييييير وأنفع من غيره صدقيني
ودة عن تجربة
ربنا ما يحرمني من وجودك أبدا
:-******************
بيطلع أقوى بس لو قدر يستحمل اللي بيحصله
لو مقدرش بتكون ده هي نهايته
ليه لو الدنيا مش عايزانا، حرام نسيبها برضه ولازم نستحمل حتى لو مش قادرين نكمل ؟؟
فدفد روح قلبي
فدوى حبيبتي
كلما استعملنا كلمات زي الانهيار كل ما ضايقنا نفسنا
مش حابة أشوف الكلام ده ابدا
ربنا يجعله عامر عليكي يارب دايما و يوفقك ويعوضك كل خير
الوحدة بلاء والشيان بيبقى أقوى على الوحيد ويد الله مع الجماعة
كلها ابتلاءات و خسارات ورا بعض و قهر كبير
بس مش انتي اللي دايماً تقوليلي انا عندي يقين انه هيبقى بكرة أحلى و بتطمن أوي لما أسمع كدة
دا امتحان ورا امتحان ورا اختبار
وربنا عايزنا نرجع له ونلجأ له و نستغفره و نقول رضينا رضينا مهما كان الفقد والألم
الفقد طعمه مر أوي واللهي
بحبك أوي و وحشاني
:)
شيمو حبيبي
معلش اتأخرت في الرد، كنت مشغولة أوي
أصل الواح جه للدنيا دي بإرادة ربنا فبردو لازم يسيبها بإرادة ربنا
ما ينفعش الواحد يستسلم للألم والوجع مهما اشتد ولا يقول مش قادر أستحمل ... أكيد ربنا حاطط كل إنسان في أوضاع هو قادر يستحملها بس لو حاول بجدية
صدقيني والله والله، كل اللي بيتعرضوا لمصاعب وأزمات وفشل وألم في حياتهم وصبروا ورضوا بيها وسلموا أمرهم لله، ربنا بيعوضهم بحاجات جميلة جدا لا يمكن تتخيليها بس عشان كانوا واثقين إن ربنا هيخلي بكرة بتاعهم أحسن
ربنا بيقول " أنا عند ظن عبدي بي " ... والناس اللي بقول عليها دي في الواقع ، مش قصة خيالية ولا تأليف وأنا عارفاهم كويس أوي أوي
الواحد ما يعرفش فعلا الخير ليه فين
أقول لك حاجة
مثال بسيط أوي أوي
من 3-4 سنين تقريبا كان في واحد بيجيب كل سنة امتياز في الكلية، بس في سنة جاب جيد جدا وهو أصلا كان حلم حياته يجيب امتياز مع مرتبة الشرف ... هو طبعا قعد فترة زعلان وحاسس إنه خلاص ضاع (كل واحد وأهدافه بقة ) ... المهم لما اتخرج، كان هيموت ويشتغل في شركة كدة معروفة أوي إنها كويسة جدا، وواحد صاحبه قدم معاه وهو اتقبل وصاحبه لأ مع إن صاحبه كان جايب امتياز مع مرتبة الشرف
والأمثلة كتيرة ونتفرقة عن حاجات الواحد بيتألم وبيزعل لما بتحصل له بس بيكتشف بعدين إن اختيار ربنا ليه كان افضل ألف مرة من اختياره لنفسه
:)
ربنا يسعدك يا حبيبة قلبي ولا يخليك تتألمي أبدا أبدا أبدا ويجعل مستقبلك أحلى مما تتمني يا رب يا رب
لولي لولي
فعلا امتحانات ورا بعضها وأنا واثقة جدا بقة إن بكرة هيبقى أحسن بكتيييييييييييير إن شاء الله
والله يا علياء ربنا راحمني أوي
حتى وقت البلاء بيخفف ألمي وبيسمع دعائي
ربنا يعوض كل محروم ويعافي كل مبتلى
وما يحرمني منك أبدا أبدا ويجمع بيننا على خير
مش شرط تكوني معايا، المهم تكوني بخير
لك حبي من أعماق الفؤاد
Post a Comment
comments are always welcomed :)