سبحاااان الله !!! بجد أنا مذهولة
أنا بقالي فترة كدة بتابع الحاجات اللي ربنا أمرنا بيها ونهانا عنها وأمسك كل حاجة وأقول يا ترى إيه هو السبب (مش بقول مش هعملها إلا لما أعرف السبب الحمد لله ولا بقول إني مش مقتنعة، بس بحب أعرف أسباب طبية لعل وعسى الناس تنجذب) ؟؟ كتير أوي طبعا بلاقي نفسي بقول "من غير ما تعرفي السبب، دة أمر من ربنا ولازم الناس تعمل اللي ربنا بيقول عليه وخلاص" وكتير بدور فعلا وأقرأ وألاقي فوائد الحاجات اللي ربنا أمرنا بيها وأضرار الحاجات اللي نهانا عنها من الأطباء نفسهم وأحيانا كثيرة بيكونوا غير مسلمين
وأنا في ثانوي ولما كانت كل البنات اللي حواليا بتنمص حواجبها (تنتفها وترقيقها) مع إنها حرام أوي "لعن الله النامصة والمتنمصة" قعدت أفكر، طب أنا مش بنمص الحمد لله (ربنا يعافيني ويهدي الجميع) يا ترى هو النمص إيه أضراره؟؟؟ وقرأت مقالات طبية لدكاترة مش مسلمين (أو حد قال لي إنه قرأ، مش فاكرة صراحة) إن المنطقة دي بتكون رقيقة جدا وقريبة من المخ وكل شعرة أصلا جذرها متوصل بعرق وانت كدة بتقطمي العرق وبيأثر على المخ مع الوقت قعدت أقول سبحان الله، له حكمة وأصلا هما ما وصلوش للحاجة دي اللي بعد آلاف السنين وربنا قالها من زمان
بعدين من سنتين تقريبا بدأت بقة رحلت "طب هي ليه اللحية فرض وحلق اللحية حرام؟؟ هو ليه النقاب فرض وكشف الوجه حرام"؟؟ يعني إزاي حبة شعر في وجه الرجل يفيدوه وإشمعنا مش بيفيدوا المرأة ؟؟ وقررت بعدها بقة إني إن شاء الله هعمل بحث بالاستعانة بالدكاترة اللي في العائلة عشان أوصل لحل لعل الناس اللي لم تقتنع بأوامر الله :( (مع إن الدين مش بالاقتناع "وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم") إنها تقتنع بكلام الأطباء بس سبحان الله، لسة دلوقت كدة وبينما أنا بتصفح النت بدون هدف معين، لاقيت 2 فيديو على اليو تيوب بالصدفة، واحد عن أضرار النمص للبنات والتاني عن فوائد إعفاء اللحية للولاد ولاقيت مقالة عن فوائد النقاب للبنات ... بجد سبحاااان الله، كلام أطباء لسة مكتشفينه دلوقت
الفوائد الطبية للنقاب
الأضرار الطبية للنمص
يا ترى بقة إمتى هنسمع كلام ربنا في كل حاجة من غير خداع ولا كسل ولا تخاذل ونعمل الحاجة عشان ربنا بس وننسى الناس ممكن تقول إيه ولا تعلق على إيه ؟؟؟ الناس كلها بتتكلم وهيجي اليوم اللي الواحد هيموت فيه ومش هيقدر يتكلم، بس ساعتها هيقول إيه لربنا لما يسأله انت كنت عارف إن الحاجة دي فرض، ليه ما عملتهاش ولا كنت عارف إن الحاجة دي حرام، ليه عملتها ؟؟؟
اللهم ارزقنا حسن الختام
2 comments:
يااااه كل حاجة ربنا أمرنا بها بتبهر فى الآخر لما أعرف ان لها أسباب طبية! سبحان الله العليم .. والغريب أن دايما الغرب هم اللى يكتشفوها!
سبحان الله يعنى لو الناس طبقت شرع ربنا حتحمى نفسها من أمراض كتيرة اوى من غير ما تعرف ..
:* سوسو
فعلا سبحان الله
انت كدة شجعتيني إني أعمل البوست اللي فيه الحاجات اللي ربنا والرسول أمرونا بيها والعلماء والأطباء اكتشفوا بعد 1400 سنة فوائدها والحاجات اللي ربنا والرسول نهونا عنها والعلماء اكتشفوا أضرارها بعد 1400 سنة بردو
جاري البحث إن شاء الله :) ء
Post a Comment
comments are always welcomed :)