حاجة عالسريع كدة بما إن الكل محتاس عشان بكرة أول يوم لامتحانات الميد ترم للترم التاني (قال يعني لو آخر يوم مش هنكون محتاسين، عااااااااا) ... آخر ميد ترمات (حلو جمع المؤنث السالم بتاع ترم دة :) ) ليا في حياتي بإذن الله، يللا مبروك مقدما يا باش مهندسة "فدوى أحمد" (تفاؤل بقة)
بما إن شعارات الوطنية زايدة أوي من أيام الثورة والكل شغال يكتب أشعار عن الوطن والوحدة الوطنية ويا حبيبتي يا مصر ومش عارف إيه (أنا بموووووووووت في مصر وصعب أوي أعيش براها مهما اتبهدلت فيها وارتحت براها)، لكن أنا لاحظت فعلا إن ما فيش حد عمل شعار ديني مثلا ... لما الواحد حس إن وطنه بيتنهب وبيتخان، قعد يألف في أشعار ويرسم في أعلام ويرفعها، طب ما الإسلام بقاله قرووووون بيتخان بردو، عملناله إيه ولا حتى حسينا بإيه ؟؟ الإسلام قاعد بينزف وما حدش عنده حتى شاش ليه :((
أكتر حاجة بتوجعني إن الناس بتحب وطنها أكتر من حبها لإسلامها ومستعدية تضحي وتموت عشان بلدها بس ناسية التضحية عشان دينها :(( شعارات وهتافات وأناشيد عشان الوطن وما فيش أي حاجة للدين ؟؟!! :(( ؟؟
يقولك "ارفع راسك، انت مصري" ويقول "أنا مصري وافتخر" ... ما حدش فكر يقول "ارفع راسك فووووووق، انت مسلم!" أو "أنا مسلم وافتخر"، "أنا حفيد أبو بكر وعمر وعثمان وعلي وخالد ابن الوليد وطلحة ابن عبيد الله" :((
ضاعت الهوية الإسلامية، اتمحت خااااالص
الناس عاوزة تحرر فلسطين عشان الوحدة العربية وقليلين أوي اللي فاكرين إنها لازم تتحرر عشان المسجد الأقصى !!
الأساس إني "مسلم" مش إني مصري .. أنا مسلمة مصرية :) الحمد لله على نعمة الإسلام .. اللي بيجمعنا دين واحد مش وطن واحد، الدين قبل الوطن .. لما نموت ونتحط في القبر مش هنتسأل "ما وطنك" لكن هنتسأل "ما دينك؟؟" .. خليك فاكر: "ما دينك" ؟؟
No comments:
Post a Comment
comments are always welcomed :)