الموضوع دة بقاله فترة كبيرة أوي (أكتر من سنتين) شاغل بالي ، وكل فترة يظهر لي في عقلي تاني :( :( :(
صعب الواحد يقعد ملتزم ويحاول يعمل اللي ربنا بيحبه ويبعد عن اللي بيغضبه (حُفت النار بالشهوات وحُفت الجنة بالمكاره) وفي لحظة يقول كلمة شرك تضيع كل دة وتوديه جهنم مخلد فيها ....
زي ما الرسول صلى الله عليه وسلم قال في حديث ابن مسعود (( إن الرجل ليعمل بعمل أهل الجنة حتى ما يكون بينه وبينها إلا ذراعاً فيسبق عليه الكتاب فيعمل بعمل أهل النار فيدخلها وإن الرجل ليعمل بعمل أهل النار حتى ما يكون بينه وبينها إلا ذراعاً فيسبق عليه الكتاب فيعمل بعمل أهل الجنة فيدخلها)) رواه مسلم :( ..... أنا عارفة إنه جاء في حق من لا يعمل إخلاصا وإيمانا بس بيعمل عشان الناس تقول عليه إنه عمل :( وإن اللي بيعمل بعمل أهل الجنة لله بس حقيقة وإخلاصا ، فالله الرحيم الرحمن الكريم أعدل وأكرم من أن يخذله في نهاية عمره ..... اللهم لا تخزنا يوم يبعثون :(((( .....
صعب الواحد يزرع شجرة وبتاخد وقت وصبر منه بس سهل أوي إن واحد في ثانية يجي ويقطع الشجرة دي ....
صعب الواحد يبني عمارة طوبة طوبة وخرساناية خرساناية بس ممكن بلدوزر في ثانية يجي يهدها ....
صعب الواحد يقعد يبني في علاقة مع مراته وبتاخد وقت طويل أوي عشان يقووا العلاقة دي بس ممكن في ثانية غضب "انت طالق" تدمر وتهد كل حاجة ....
صعب الواحد يقعد يربي في عياله ويكبرهم ويرعاهم ويحافظ عليهم وفي ثانية حد يجي يقتلهم أو حتى يلوث أفكارهم ويتقلبوا عكس ما اتربوا عليه :( ....
صعب الواحد يقعد محافظ على وزنه أو عامل ريجيم فترة طويلة أوي وفعلا يخس ويبقى جسمه حلو بعدين في لحظة ضعف ياكل تورتة شوكولاتة كاملة ويرجع كل حاجة خسها .....
صعب الواحد يقعد يعمل في مشروع أسابيع وأول ما يخلصه ، بضغطة delete بسيطة من غير قصد حتى ، كل حاجة تروح ....
صعب الواحد يقعد يعمل طبخة كبيرة وجميلة ولو حد جه علا النار عليها ، تتحرق في ثواني ....
صعب الواحد يقعد يفصل في فستان وحد في لحظة يجي يقطعه أو يكب عليه حاجة تدمره ....
سمعت المقولة دي من زمان
It takes years to build a strong relationship yet it takes a second to destroy it
حاجة مؤلمة أوي ، البناء دايما صعب والهدم ما فيش أسهل منه ....
الحاجة الحلوة بتاخد وقت طويل أوي عشان تتم والحاجة الوحشة ولا أسهل ، ما بتحتاجش ثواني :( ....
زمان كنت بتفرج على البتاعة دي في التلفزيون (سواءا كروت أو دومينو) وكتير أوي كنت بشوف واحد عاملها داير ما يدور البيت من جوا وعلى السلالم وقعد ساعااااات يوقف فيهم ، وفي ثانية ، واحد يجي يزقهم ويقعدوا يسقفوا !!! أنا كنت بسقف معاهم وكنت منبهرة أوي أوي بس دلوقت بتساءل ، هم كانوا بيسقفوا على إيه ؟؟؟؟ هو إيه اللي يبسط في لما تعب ساعات يروح في ثانية ؟؟؟؟
زي الراجل دة كدة ، ممكن تاخد منه أيام رفع الصخرة دي ، وأول ما يوصل للقمة ، إيده تعرق أوي وتتزحلق منه وتقع تاني للقاع :(
ربنا يبارك لنا في كل ما نبني أو نعزم على بنائه ويعافينا من الهدم :(( .... آمين ..... :(
No comments:
Post a Comment
comments are always welcomed :)