النهاردة كان آخر يوم في الدورة التي امتدت شهرين .... أحلى شهرين عدوا علي السنة دي كانوا آخر شهرين لأسباب كتيرة أوي ، ودي أحدهم ....
بدأت أركز في ما ينفعني بجد ... صحيح كتير بقع ، لكن سبحان من بيقويني تاني ....
سبحان من وفقني لختمها .... سبحان من خلاني يوم الخميس اللي هو المفروض أجازة وراحة من كل الخلق أقوم من بعد الفجر عشان أروح وأرجع بعد الظهر ....
سبحان من جمعني بناس بترتاح بمجرد إنك تشوفهم ....
سبحان من وفقني لدروس العلم وحفظ ما يقرب من ال150 حديث من صحيح البخاري وقراءة وفهم ما يقرب من ال2200 حديث !!! :) أصدق الكتب بعد القرآن الكريم
كلام الحبيب محمد ابن عبد الله
اللهم صلي وسلم على نبينا محمد ....
اتعلمت حاجات كتيرة أوي
أوي
أوي
أولها: الصبر على طلب العلم ... كنت بحفظ الأحاديث في أوقات غريبة (في المواصلات، بين المحاضرات، قبل الفجر أتشجع أقوم، ......)
ثانيها: من سلك طريقاً يلتمس به علماً ، سهل الله له به طريقاً إلى الجنة :) .... يا رب أكون ممن صدقك .... يا رب ارزقني الجنة وأنت تعلم أني أحبك وأشتاق للقاءك :(
يا رب ارزقني الإخلاص :(
ثالثاً: الواحد حاسس بغربة شديدة في مقر عمله ، وربنا عوضه عن الغربة دي بمكان روحه التقت فيها مع من هم مثله .... أنا أنتمي لتلك الحلقات .... هناك الراحة .... كفاية تحفنا الملائكة ويقولوا "قوموا مغفوراً لكم" !!!
رابعاً: الصحبة الصالحة أقوى حاجة تثبت الإنسان بعد الله .... جنبهم الواحد بيحس إنه نملة ... وسبحان الله، أحياناً كتيرة مع غيرهم ، بيحس إني عالم من علماء الأمة !!! عشان لو الواحد قارن نفسه بالدنئ، هيحس إنه ما فيش زيه، لهلوب، ولو جه يقارن نفسه بالكبار، هيحس إنه دنئ ... دنئ ... دنئ ....
خامساً: لسة الدنيا بخير ... والخير في أمة محمد إلى قيام الساعة ....
سادساً: فطوبى للغرباء .... القابضون على الجمر .... يا الله !! حتى في بلاد التوحيد الغربة الدينية ؟؟؟ يا رب الثباااات حتى ألقاك ....
دي صورة من هدية جميلة ادوهالنا ، وتورتة عمالوهالنا :)))
كنت عاوزة أحط باقية الأكل ، بس حرام يعني ، أراعي نفسيات الناس والجوع وبتاع :)) ....
أول حاجة هطلبها لما أدخل الجنة إني أشوفهم (أو بإذن الله هشوفهم تحت عرش الرحمن لما ربنا بكرمه يظلنا لإننا أحببنا بعضنا البعض فيه) وأكل/أشرب من أنهار الشوكولاتة واكل ورق عنب شامي !
إدمااااان :)))
No comments:
Post a Comment
comments are always welcomed :)